Ami xellmoddech ravtole?

Ami xellmoddech ravtole?

- Jose Salvador Fernandes


Ami xellmodde zaleat!
'Ami' mhollear konn? Bharotache nagrik! Dhanvtem udok khoim sodanch nitoll-nivoll asta; kiteak tem vhanvun veta. Jem eka konddant santton urta, tem udok vhanvon vochpa khatir fuddem-i vochona ani fattim-i sorona. Ekech svater tharun urta. Oxem ekech svater santton urlolea udkak kaim disamni xello manddta .... vas marta. Zoso kall sorta, toso tea udkak ghann-guttann marta. Punn tea ghann-ollxigvannea udkant jiyetolea jivak te ghannichem mat vegllem oxem kainch disona ... bhogona. Kiteak? Taka te ghann-gutt'tannichi sonvoim zal'li asta.

Pon'nas vorsam adim, porkeamni Bharotachem kondd kel'lem. Hea konddant tannim aple sot'techem udok haddun ghatlolem. Porki sot'techem udok vhanvon vochpa khatir fuddem vochona hem tor zalench. Fattim-i sorona. Bharot des porkeanchea gulam'ponnachem kondd zalem. Tednam thavn Bharotacho dor ek nagrik porkeanche sot'techea xelleak ghuspon urlo. Dis-kall sorta toso tannem porkeanchea teach-teach nem'-kaideanche ghannn-guttannint lollchem poddtalem. Monak favo te upai oxea vellar suchonk nasle dekun kaim kall tantunt to loll'la-i. Punn fuddem tea porkeanchea xeka-tollache ghannint odik jiyeunk zaina zalem, tednam taka ek upai suchlo. Oxea vellar tannem tea porkeanchea konddak khoim tori tea upayacho ghai ghalun, porki sot'techem ani xeka tollachem ghanniarem udok vhanvun vochunk soddlem. Ani tem toxem gelem-i bi. Titlean Bharot nitoll-nivoll zalo. Mekllo zalo. Svotontr zaIo .

... Bharotan svotontrai zoddli!

Tednam Bharotan svotontrai zoddloli zait, punn ti aiz khoreponnant togloli disona. Aiz Bharotant, niz svotontrayecho zago sanddla. Torui, konnak-ui Bharotache svotontraye vixim aiz kitem-i mhonnpachem asa zalear, ti fokot nanva purtich asa mhonnpak zai. Aiz Bharotant protek mollacher zo vevhar chol'la, to svotontr desa vangdda desachea svotontr nagrikak-ui sobpa sarko nhoi. Desant jem vevharachea nanvan chol'lam tem monache kosvotter ghanslear, Bharot des svotontr zal'lo des mhonn mandun gheunk augodd lagta.

Bharot des bhroxttacharache bhokik poddla. Nhoi! Tea bodlek, taka bhroxttacharache bhokik ghala mhonnop hem mudier thik koxem bostolem. Bharotant, vochot tea konnxeak ani zageancher sabar rupacho bhroxttachar riglolo, matlolo ani ramplolo dista. Bharotant aiz, hem-tem kam’ follak yeunche khatir poile-voile suvater bhroxttacharachem hains dakoilea xivai kainch ghoddona. Khorea kaideache poilitayen zaka jeo gozali favo zaunk zai asleo, taka teo mellonant. Khorea orthan mellonant oxem mhonnpak iena. Kiteak, zaich zalear te adim bhroxttacharachea hainsachem tondd dakounchem asta nhoi?
Fattlim kitlimxinch vorsam thavn, Bharot des barik-motteanchea hatantlean bhroxttacharachea chopkeak sampoddlolo asa. Ho bhroxttacharacho chopko kall sorta toso Bharotak kednam, khoim koso piddit hem sangunk zaina. Oxea velar ticho ugddas ieta. Konnacho?
Tika kazar zaun tin mhoine legit sorunk nasle.
"Bori xikloli" mhonntoch, ti aplea mona sarki nokri korunk sodi. Ani ek dis tika zai toslech nokrechi jairat khobram-potracher uzvadda aili. Tinnem ti vachli. Ani fuddem tichea monache nodre mukhar ‘to’ ubo ravta. ‘To’ mhollear konn?
Gõycho amdar!
Aiz Bharotachea khoinchea-I rayant , poile-voile suvater amdar-montreanche paim dhorlea xivai tujem kam' sompeponnan zatelench mhonnonk iena. Te nigtech kazar zalole ostorecher-ui tich palli aiIi. Apleak tem kam' mellchem mhunn tinnem 'tea' amdarache paim dhorle. Zalear tannem tika kitem sangchem?
"Kam' melloun ditam, punn ek rat mhojea vangdda hotelant sarchi poddteli."
Mud'dom' ghoddoiloli kanni disona hi? Kanni nhoi ti! Gõychea Gõyantuch te ostorechea jivitant ghoddloli ghoddnni hi!

Bharotant sorvoi mollancher torekvar rupamni bhroxttachar cholta. Ami jiyetolea Bharotachem khoinchem moll bhroxttachara viret asa tem sodun kaddche khatir chudd lavun sodunk gelear amkam tem sodun-ui mellchem na. Bharotachea nagrikank hachi bes-bori zannvai asa. Ani hem zanna ason-ui, Bharotacho 'manadik' nagrik, kainch vankddem ghoddonk naslolea porim huskea viret jiyeta. Bharotacho dusro 'manadik' nagrik chear-chougam modem, desant vostolea bhroxttacharacher 'zannvayechim' chear utram uloita ani to vixoi titlea purtoch sompoita! Ani moujechi gozal mhollear, xiklole je asat, tea nagrikank desantlea bhroxttacharachi matui ghann-gutt'ttann ani vitt iena.
Vaitt boreachi zannvai aslolo ho xiklolo nagrik, aplea desant vostolo bhroxttachar koso sonsta kai? Desant vochot te suvater bhroxttacharacho xello matla hem sot taka kiteak huskaina kai? Bhroxttachara add taka kiteak utton-zhuzon disona kai?
Aiz Bharot desachim sutram nalaik mon'xanchea hatant poddlolim asat. Desacho mog naslole pranni desachim sutram hatalltat. Tanche poros bore ani odik tanki-kopxeche hea Bharotant konnuch na kai?
Na kiteak? Asat. Nitoll-nivoll xilache monis asat.
Sodeak des choloitat tanche poros-ui fixalkayen voir urtole pranni hea desant asat. Punn tankam, aplea desa khatir apnnem kitem-i tori korchem oxem kiteak disona, hench ek kuvaddem poddta.
Bharotantle zannar kivam nennar nagrikank - soglleankuch desantlea bhroxttacharachi zann asa.
Apunn hea bhroxttachari desant jiyeun-ui apnnak ani desak kosloch som’bond na oxe vrut'ten to jiyeta. Desachea boreponnache nodrentlean tannem dhogmoddayechem dhoronn apnnailam. To xellmoddo zala.
Dis-kall sorta titlo des bhroxttacharache ghann-ollxigent purot asa. Desache nagrik hea natean ami kitlo kall hem sonstole? Vo amche kodde bhroxttachara add zhuzunk tank na? Vo kopxi ason-ui ami xellmodde ravleat? Oxem asot tor fuddem ek sobhavik proxn uprasta to oso: Ami kitlo kall porian xellmodde ravtole?
Xellmodde ravche asat? Ravat. Punn ek - faleam ho 'bhroxttachar' Ghottnneche vollerint ghalun kaideaxir (legalised) kelo zalear, tednam mat...

4/04/2009

AMCHEA SONVSARI MONACHO ARSO ?

AMCHEA SONVSARI MONACHO ARSO ?

-Jose Salvador Fernandes


Moddganvam ‘Tato’ Hotelant bosun aslom. Limbu sodachea glasak thambun-thambun ghontt martolom. Khorem mhonnlear, teach hotelant mellpachem tharailolem. Konn eklean ani hanvem. Taka mhoje kodde gorjechem kam’ aslem khuim. To apoilolea vellar pavonk na. Dekun, ek limbu soda ‘order’ korun tachi vatt pollet ani tachi vat polletam-polletam glasak ek-ek ghontt martalom. Kuxichea mezachea kodelincher don ostoreo bosun asleo. Ekleche khankent eka vorsacho baba aslo. Don-ui ostoreo bhaji-puri khait uloitalim.
“Babachea 1st birthday-ak itlo lok zatolo mhunn hanvem chintunk nam.”
Bhurgeache avoin purecho kuddko khait sanglem.
“Bhurgeanchea birthday-ank lok ieta go. Amchea Jerrychea birthday-ak polleunk na tuvem?” Tichi sangati ostori uloili.
“Punn kitem-i zaum babak ‘gift’ mat khub aile. Dudduch mhunn sixteen thousand odik ‘gift’ aile. Tea bhair her gift.” Avoi dhadosbhorit mukhamollan uloit asli.
“Terezinhak hanvem special bibik korun haddunk lailolem. Tachim bibikam borim zatat. Ani tannem babddean, don kil odik bibik korun haddlem. Bibik-ui borem zal’lem. Ani nonddek hanvem ‘baby cycle’
haddunk lailoli. Tinnem haddli. Bori dista.” Ti avoi motteponnan uloit plettintli bhaji sompoupachich asli. Tem polleun veittor tanchexim ubo zalo. Tanche kodde fuddli ‘order’ vicharli. Tannim faloda order keli.
Veittor tanche sorxilo koddsortoch, porot-ui tancho gozali suru zaleo.
Babachea ‘birthday’-acheoch. Tancheo fuddle gozali mhaka uprant aikunk mellunk nant. Tednam mhonnosor, hanv zachi vatt polletalom, to pavun sorlolo.

Ratcho jevun hat dhutalom tednam, tea ostoreanche ‘birthday’-ache gozalicho mhaka ugddas ailo. Monant mhonnlem - kitem nhoi lok?
Bhurgeacho zolm’ dis somarombhunk fuddem sortat, ani lokak ho ani to ‘gift’ haddunk boll kortat. Punn oslea somarombhak bhett vo ‘gift’
khuxen haddpache astat nhoi? Zalear, tankam hi vo ti bhett-vostu hadd mhonn amchean koxem sangum ieta? Ghoddie, sangum iena mhonn khuinch boroilolem na dekunch sangtat zait!

Aiz mon’xachem mon sonvsari vostumni itlem gul’l zalam, ki to aplea bhurgeank lhanachim vhodd kortana sonvsari mona pormannench voir kaddunk vavurta. Bhurgeancho fuddar ani jivit sonvsari vostuncheruch adarun aslolea porim. Aiz ami sabar zann amchea lhan bhurgeancho zolm’-dis somorombhtat, ani dobajeak yeupi soiream-daiream, ixttam kodden, amchea bhurgeam khatir ‘gift’ mhunn khub kitem anvddetanv ani magtanv. Sonvsarantleo veg-veglleo vostu. Lhan bhurgeanchea nanvan ami amkam khuxi tem magtanv. Ani amchem sangnnem aikopi amcho mogacho-i amkam na mhonnina.

Bhurgeak ami lhanacho vhodd korpachi zababdari amchea buzancher asta tednam tanchea zolm’-disachea somarombhak ‘gift’ mhunn ami kednam konna kodde Povitr Pustok kiteak magonant? Bhurgeanchea zolm’-disak ailolea her bhett vostunk jem mhotv-mol asta tem Povitr Pustok-ak na mhonn kai? Bhurgeanchea zolm’-disache parttiek ailoleo bhett-vostu ibadd zaina zaunk, bhurgo vhodd zait porian ami teo tachea ugddasak show kesint samballun dovortanv. Punn, bhurgo lhanacho vhodd zatana tachem jivit atmik nodren vaddot-fulot vechem, vaddchem mhunn zacho show kesint dovrinastana sodamkal vapor korum ieta, tea Povitr Pustok-achi ‘gift’ mhonn amkam vhoddilank kiteak otrek nant?
Mhojea monant oxe he vixim proxn upzot asat toxe, vachpea tujea-i monant veg-veglle proxn uprasun tum-ui vichar korunk lagla zait.
Korcho, jerul vichar korcho. Vichar korpa sarkich gozal hi…!

28/03/2009

“Tum kovita kiteak boroina?”

“Tum kovita kiteak boroina?”

- Jose Salvador Fernandes


Fattlim, pustok ugtavnnechea dobajeak gel’lom. Eka nanvostea kovichea kovitechea pustokachi ugtavnni ti. Pustok ugtavnnecho dobazo somptoch, ek Konknni vachpi mhojea boroupantlean to mhaka vollkhotalo? Mhojexim yeun mhaka sangunk laglolo boroupam xivai kovita kiteak boroina?”
Hanv haslom ani ogich ravlam.
Te sanjer ghorche vatter astana, hanvem tea vachpeachea sangnnean mhakach vicharlem, “tum kovita kiteak boroina?”
Kovita boroupacheo nastat khoim. Kovita borounche khatir teo poileo monant zauncheo tednachea tednanch kagdar ghalpacheo astat oxem sangtat. Punn mhojea monant aiz meren ekdaim kovita zaunk na. Ek pavtt, kovitechea spordhea khatir chintun-chintun ek kovita boroiloli, punn ti spordhent vachtoch, te karyavollichea hajir aslolea spordhechea porikxokank nhoi mhunn hajir aslolea lokak-ui somzunk na. Anik ek pavtt hanvem kovitechea rupan volli boroiloleo teo oxeo,
Marfinchea Devak masam khavoilim,
Ani masachea mon’xak haddam khavoilim.
Punn hea vollimni kitli kovita, vo koviteche gunn asle te mhaka khobor na. Aiz, Konknni sahiteachea mollar, Konknniche her prokar kelloupeam poros, kovita boroupi (vo zaupi?) chodd asat. Khorench chodd asat! Tantuntlea tantum Konknniche Romi Lipintlean, tor atam konn-ui kovita borounk lagla. Punn tanchea teo ‘Kovita’ vachtoch tantum koviteche gunn mat khuinch disonant. Kovita mhonnlear khoreponnim kitem tem aiz meren tankam sarki somzonk na. Poetry is a spontaneous overflow of feelings oxem inglezintlo famad kovi William Wordsworth mhonnta. Punn amche kovita boroupi spontaneous overflow of feelings nastanaim kovita boroitat mhunn tancheo kovita vachtoch kollun ieta. Romi lipintlean kovita boroitole, kovita boroup mhonnlear fokot jonok zullovop (rhyming) oxem somzotat ani mandtat ani tech toren kovita boroitat. Dekhik,
Pollelem tuka hanvem festak
Tum gelem mhaka gostak
Dis-rat tujem chintun laglom roddpak
Dolle laun mhojea mollbak.
Oxe torechea vollimni jonok zull’lolem asa tem dista, punn tantum kovita, git ani ‘universality’ disona, kovitechea nanvar aslole gunn disonant. Dekunuch, oxe torecheo kovita boroupi kovi mhunnon chodd kall sahiteachea mollar tigun fattlean sanddtat.
Konknnichea, ani kherit toren Romi lipintlean kovita boroitoleank kovitachea xibiranchi borich goroz asa.
Hea xibiramni bhag gheun kovita prokarachi sar-puri vollokh gheupachi goroz asa. Khori ani bori kovita koxi-kat toyar zata tem onnbhovi kovim koddlean zannam ani xikun gheupachi goroz asa. Kovite vixim sahitea vachpachi, dusrea bhasantleo-i kovita vachun somzun gheupachi goroz asa. Ekech pavttin sangtolo zalear, bori kovita korunk khuincheo-khuincheo gozali monant gheuncheo poddtat tem zanna zaupachi goroz asa.
Hem sogllem hanvem thoddim vorsam korun pollelem, punn aiz meren mhoje thaim kovita borounk zaina. Magir, zaina te gozalincher vell kiteak ibaddum?

21/03/2009

Soglleam poros ghott konn?

Soglleam poros ghott konn?

-Jose Salvador Fernandes


‘Soglleam poros ghott konn?’ hea proxnachi zap sodunk hanv khub mhoine niyall kelo. Ani xevttim ek zap mell’lli, punn ti zap kitli sarki vo nixchit asa mhaka khobor na. Torui mhonnlem, vollkhichea thoddeank tori vicharun polleum-ia… vicharunk mhunn poixe kaim poddonant!
“Soglleam poros ghott tem lokhondd.” Eklean sanglem.
“Punn lokhondd legit ‘molt’ korunk zata mure, zalear tem ghott koxem asum ieta?” Hanvem taka oxench mhonnlem. Punn mhojea sangnneak tache thaim zap nasli.
“Bildingam soglleam poros ghott,” anik eklean sanglem.
“Oxem? Zalear Amerikentlim ‘twin towers’ koxim goddie bhitor moddlim? Somzum-ia tim ‘twin towers’ kainch ghalinastana fokot lokhonddachim bandlolim zalear tim moddun vochpachim? Na mum?” Hanvem taka matso ghuspaupacho proyotn kelo.
“Mhonnche, soglleam poros ghott tem lokhondd oxem tum mhonnonk sodta?” Taka vicharlolea proxnacho to mhojea tonddantlean zabab aikopacho khell khellunk laglo.
“Hanvem lokhonddachi dekh dili mhunn lokhondduch ghott oxem hanv mhonnonk sodtam oso tacho orth koso zaum ieta? Are, faleam hanvem tor tuka Ladru poros Pedru huxar asa oxem mhunn sanglem zalear, tacho orth sonvsarant Pedruch soglleam von huxar oso zaina nhoi? Pedru poros-ui anik konn tori huxar asum ieta, oi kai nhoi?” Hanvem taka chintpant anik-ui boroch mukhar vhorun soddlo ani to mhojea tonddak pollet thoinch soddlo.
“Zo rajki monis, ani tantuntlea tantum to soglleam pros unchlea zagear aslear to sodanch ghott,” anik eklean uloita-uloitanch sanglem.
“Mhonnche to sodanch ghott nhoi tor?” Hanvem vicharlem.
“Kiteak mhonnta tum?” Hanv kiteak mhonnta tem somzupacho tannem proyotn korche bodlek mhojech koddlean ‘readymade’ zap gheum-ia mhunn ho proxn korun to mekllo zalo.
“Are baba, ho rajki monis je meren rajki podver asta te meren to tujea mona pormannem ghott, ani to sot’ter na tednam to mozbut oso tacho orth zata.” Hanvem taka zai asloli ‘readymade’ zap dili ani fuddem tachem tondduch bond zalem.
Thoddeach disamni anik ekleak toch proxn vicharlo – “soglleam poros ghott konn?” Zalear tannem sanglem, zo chintpant ghott asa to!
“Mhonnche?” Hache koddlean spoxtt zabab gheum-ia mhonnlem hanvem.
“Zo ‘argument’ korun dusreank sanddunk xokta to heram poros ghott, uprant to dadlo vo bail zaum.” Tannem apleak dista toxem sanglem.
“Zo duddvamni tann asta to sodanch ghott. Taka haloitolo konn asa?” anik eklean sanglem.
“Mhonnche faleam soglleam kodde duddu zale zalear magir sogllech ghott mure?” Hanv.
“Oi! Tednam tum zo proxn vicharta to proxn vicharpachi goroz legit upraschi na!” Apnnem kitem tori ‘sense’ uloilem oxem chintun to aplech bhitor dhadoskayen hanslo.
Ek dis eka padrichi-mhoji bhett zali tednam taka-I vicharlem, “Fadar, soglleam poros ghott konn?” Tednam fadar matso atmik (spiritual) zalo ani uloilo – “zo konn Devache khuxe pormannem hea sonvsarant jiyeun Devachem Raj porgott’ta to hea sonvsarantlo okhondd ani mozbut monis. Kitlem-i varem, modd ani pavs ailo mhunn to halcho-dholcho na.”
Padri ho kherit bhaxen dhormik monis mhonntoch tachea tonddantlean oslim atmik utram utram aikonk ievop hem sobhavik aslem.
“Are atam soglleam poros ghott mhonnlolem kainch uronk na….. pollena tum, pul, sorkar, ‘sensex’ ani her dhonde disandis nhoi zalear thoddea mhoineamni legit koxe konsllot vetat te?” Anik eklean sanglem. Hanvem taka porot kainch vicharunk.
“Dadleak sor zaupa itlo hea sonvsarant anik konn asa?” Konn eklean mhaka proxnachea rupan zap dili.
Hanvem mhonnlem, “oi!”
Mhoji hi zap aikun aplea mukhamollavelean tannem ojap ugtailem, ani matxea vellan hansot vicharlem, “konn?”
“Ostori!” Hanvem ‘casually’ sanglem.
“Ostori?” Oxem mhonnon tannem dolle motte kele ani mhaka lojek ghalolea porim apunn hans, hans khub hanslo. Ani magir mhonnonk laglo, “are, ostori mhunn sonvsarant soglleam poros ghott asum ieta re?”
“Oi!”
“Tor koxi?” Apunn dadlo, ani apnna sarkea dadlea xivai ostori ghott asunk zaich naslolea vori tannem vicharlem.
“Tum kednam Gõychea bosimni bhonvla?” Hanv.
“Oi?”
“Ek chikar bhorlole bosint jednam dadle-ostoreo ubeo astat, tednam ti bos ‘turn’-acher pavtoch bosintleo apunn aplea fuddlean vo fattlean aslolea dadleacher apunn poddchi nhoi mhunn apnnak khub samballun gheta. Punn tum mozbut somzotolo dadlo, chodd-ui chikar naslole bosint ani bos ‘turn’-acher add zainastana porian aple bazuk boslole, vo fuddlean-fattlean ube aslole ostorecher aplea angantli sokotuch jirun gelolea vori poddta… Mhonnche, bosint ostoreo apunn dusrea dadleacher poddcheo nhoi mhunn apnnak samballun ghetat toxe dadle apnnak samballun gheunk unne poddtat. Mhonnche ghott konn zalo? Ostorich mum?”
Hi mhoji zap aikun taka-i apunn ostorich zaloli zalear borem zatolem aslem oxem dislem zalear mhaka khobor na, punn hanvem toxem sangtoch to ostoream porinch lozlo ani aplea apnnakuch hansunk laglo.

13/03/2009

Proxn… Zap Naslole?

Proxn… Zap Naslole?

-Jose Salvador Fernandes


Mhoji avoi asli tednam ti amger antrea-poirean ietali. Ami tichim konn tori khas lagtolea vori ti amkam apleponn dakoitali. Ami-i tika amchich koxi mandtalim. Ti amchi soiri nhoi mhunn xezarn-ui nasli, torui avoichi ani tichi khuim ani koxi vollokh zali ti mhaka khobor na. Punn avoi mhoji ho sonvsar soddun vochot porian ti amger yeupachi matxi patoll zalea hem mat hanv zannam. Tachem fattlem khas oxem karonn mhaka khobor na.
Poir ti khub mhoineamni mhonntat te bhaxen amger pavun sorli. Ticher nodor poddona fuddem, tichea mukhamollanuch mhaka tiche vixim kitem tori zala mhunn sanglem. Punn hanvem mud’dom zaun tiche thaim toxem kainch vicharunk na. Tea bodlek hanvem hansot mhonnlem, “mauxe, itlea tempan aiz amche khobrek ievop muge? Maim astana bori rokddea-rokddi ietali muge!? Atam amcho ugddas iena dista tuka? Maim geli mhunn tuvem-i amkam sanddun vochop muge?”
“Baba, maim asli tednam mhoji bholaiki-i bori asli. Atam bori pasar zaina.” Ti zodd kallzan uloili.
“Oxem kitem zalam mauxe tuka?” Hanvem vell ibaddinastana vicharlem.
“Jem zalam tem novem duens nhoi re baba mhaka. Hache poilim sat pavtti toslench mhaka duens zalolem. Atam tem attve pavtti zalam. Ubgonn ailea jivachi.” Ti bhorvanso soddun uloili.
“Mauxe, itlo bhorvanso soddun ulounk tuka zalam tori kitem?” Hanvem matxe chodduch ‘interest’ ghevpak survat keli.
“Mhojea ghovak mhoje vixim jitlo ‘interest’ na to tuka re so baba?” Ien’na mhonnosor tichea dolleant il’lim-il’lim dukham pazrunk laglim.
“Kitem? Tujea ghovak tuzo ‘interest’ na? Oxem kitem tor?” Hanvem tichea ghovak polleunk na khoro, torui mhaka ticho rag ailole vori dislem.
“Interest na mhonnche, mhoje bholaikecho re!” Tinnem khub vellan ghovak koslo ‘interest’ na to matso spoxtt kelo.
“Punn mauxe, tuje bholaikecho proxn koslo?” Hanvem huskean vicharlem.
“Baba, mutant vhoddlo fator zala...” Ti ogi ravli.
Fator zala zalear kaddum-ia ani tachem boremxem durig bandum-ia oxem mhonnit fokanddam korun dislolim, pun monant mhonnlem ‘situation’ matxe ‘serious’ asa.
“Fator zala zalear bhivpachem na mauxe, to sompeponnim kaddum ieta.” Hanvem tika matxe dhir diupacho proyotn kelo.
“Khobor asa re baba, punn tea kamant ghovacho mhaka tenko na.” Ti anik-ui zodd kallzan uloili.
“Tenko na mhonnche?” Hanvem kruzdadin vicharlem.
“ Ti anik sangpachi khobor nhoi baba! Atam khub mhoine zale tea fatrak lagun mhojea pottant itlem zollta, kednam-kednam sonsunk zaina tednam hanv ghorant meza ponda vochun zomnir lollar loll martam.” Tichi hi khobor aikun mhaka kitemxench dislem.
“Punn mauxe, ghovak hi khobor asa nhoi?” Hanv.
“Khobor asun faido kitem?” Ti anik-ui bhorvanso soddun uloili.
“Mhonnche to tuje bholaikechi kallji ghena oso tacho orth?” Hanvem mhoje porim tichea sangnneacho orth kaddpacho proyotn kelo.
“Fattlim sat pavtti oxech fator zalole, tednam apnnak khub despez zalo, atam aplea thaim ghoddona, tujem tum polle oxem sangta.” Itlo vell damun dovorlolem tichem roddnnem sobhavik ritin futtlem.
Mhaka tichea ghovacho atam odikuch rag ailo. “Ab’ba! Oslo koslo tor tuzo ghov to? Rogtacho vo xellea udkacho?” Tichea ghovachea ragachim lharam monant golloit hanvem tika vichar kelo.
“Baba, ghovan toxem mhonnlem ani pavsant bhizlem zalear konnak sangum ieta?” Tinnem xanneponnan ghova add kainch vankddem uloina zaupacho nitxoi kelo.
“Mauxe, tum tor te fator voizaxim vochun kaddunk sodta zalear, hanv tuka mhoji ful nhoi zalear fulachi paklli tori ditolom.” Hanv mhozo monisponnacho kaido monant gheun uloilom.
Te ratik hanv khattir nhidon aslom tednam te ostorechem chitr tiche te poristhiti sangata ghunvot ravlem. Hanga lok aplea konnak-ui tor ‘cancer’ zala ani to te piddeche ‘last stage’-ir asa mhunn koll’llem zalear-ui duddvancher duddu moddun upai gheta. Ani ho re ticho ghov hatant upai ason-ui ghena? Kiteak kai? Konn-ui ghov aple potiniche bholaike kodde itlo mhunn ‘insensitive’ zaum ieta? Borem, duddvanchi poristhiti bori na zalear, konna-i kodden adar magum ieta nhoi? Zalear, aple potini khatir aplea borem dekteam kodde to adar-ui magunk kiteak fuddem sorona tor?
Te ratik nhidum meren sod, pun aiz meren hea proxnancho mhaka zabab mellunk na. Punn sonvsarant soglleach proxnank zabab khuim astat? Oi! Oxench mhonnon ogi ravpachem.


6/03/2009

Amchim Boroupam! Amchim Kortubam!

Amchim Boroupam! Amchim Kortubam!

-Jose Salvador Fernandes

Fattim eke ostore borvpechem pustok vachtalom. Konknniche Romi lipintlean boroilolem tichem tem pustok. Boroupant kitleo chuki mhunn sangum? Ikra utranche eke vollint att tori chuki. Punn Konknnintlea boroupant ticheo chuki astat mhunn kitem zalem? Tosleo chuki mat tichea inglez pustokant asonant. Tichea inglez pustokant asonant mhonnche? Mhonnche, ti inglezintlean-ui boroup korta…. Ekach vixoyacher veg-veglle nodrentlean boroilolim tichim tin pustokam asat.
Soglim vachleant hanvem. Punn tichea inglezintlea boroupamni osleo chuki nant. Vixoyachi kholai jitli bori asa, titlich tichi inglez-ui bori asa…… inglezintlea veakoronnachea (grammar) nem’-kaideank dhorun….. utramni boroupachi matui chuk na….. Na-na mhonnlear tichea tea ek inglez pustokanchem ‘editing’ tin pavtti tori zalam zaunk zai…… punn tichem tem Konknni pustok vachtoch, tea pustokachem ek-ui ‘editing’ zaunk na mhunn khatren sangum ieta.
Konknni, ani bhou korun Romi lipintlean uzvadda yeupi pustokam vixim mhaka vichitruch dista. Ami lekh, kotha, kovita, nibon’d, adi. borounk bostanv…. Boroitanv…. Boroilam tem pustok rupan uzvaddaunk sodtanv zalear, ami tem asa toxem chhapunk dhaddtanv. Tantum asloleo chuki ami nivllainanv. Borem, teo niullaupak amkam somzona, punn somzota tachexim tori vochunk ami toyar asonanv. Konknnichea mollar oxem kiteak? Taka karonnam asat.
Poilem, ami amkam svota khub zannar somzotanv. Ami jem kitem Konknnintlean boroitanv tem sarkench asta oso amcho (vankddo) somoz asta. Ami Konknni ulounk ani vachunk zannonv, hacho orth ami Konknnitlean vevosthit ritin borounk-ui zannonv oxem ami chintanv.
Punn khoreponnant oxem asona. Zo uloita ani vachta tache kodde borounk-ui zata oxem na, oso mhozo onnbhov mhaka sangta. Tednam hanv choute klasint xiktalom. Venya nanvachem ek cheddum teach vorgant xiktalem. Venya, khub gorem aslem. Polleunk unchle kullientlem distalem. Klasint tem sangati xikpeam kodde ji inglez uloitalem, ti inglez tache te gore katik sobtali. Tem je toren lett-fett korit inglez uloitalem, te toren tem her xikpeam poros xikpant kitlemxench huxar ani zannar koxem distalem, vo hanv toso te pirayer somzotalom.
Tea kallar amkam ‘Unit Test’ mhunn porikxa astali. Dor eka vixoyak 20 gunn (marks) astale. Tantum amkam inglez vixoyant ‘Dictation Test’
astalem. 20 markanchem. Hea ‘dictation test’-acho ‘result’ zatalo tednam, mhojea sangata xikpi Venyak 20 gunnantle 2 na zalear 3 gunn poddop! Mhaka ti sarki tondd ‘am’ korun ievjit bospachi gozal koxi asli! Ab’ba! Venya itli bori inglez uloita ani kitem kai mhonnlear ‘dictation test’-ak fail zata? Uprant mhaka fuddem vochun koll’lem…..
boro uloupi ho boro boroupi astach oxem na!
Ami Gõykar, ani kherit bhaxen Konknni boroupi toxe toklen borech huxar. Konknnintlean ami kitem boroitanv ani uzvaddaitanv, tednam amkam tea boroupant xud’dhlekhonache nodrentlean kitelo chuki asat tacher ami mon ghalinanv, tacho ami gombhirtayen vichar korinanv. Tim boroupam chuki viret korpacho thokos gheupachem amkam mon asona.
Amchea Konknni boroupamni chuki urleo mhunn amkam tem vhoddlemxem disona. Chukinche ghontter aslolim Konknni boroupam uzvaddaunk amkam koslich addkholl disona. Toxim tim chukimni uzvadda ailim zalear-ui amkam tachem kainch vegllem, lojek poddpa sarkem disona. Ami jem Konknnintlean boroitanv tem sarkench asa mhunn dhorun choltanv. Punn tem kiteacher adarun sarkem asa mhunn somzotanv ti khobor na.
Punn inglezintlean ami kitem-i boroitanv, vo boroun uzvadda haddunk sodtanv tednam mat amkam amchea tea boroupacho khub husko asta. Ami boroilam tem sarkem asa zalear-ui tem sarkem asa kai na hacho amkam zaunk naka aslo tache poros-ui kitlexech pavttin husko zata. Dekun, ami amchim tim inglez boroupam amche amich khub pavtti, chotrayen, vellant vell kaddun, dhean-mon ghalun, gombhirtayen topastanv, ani hea sogllea khatir khub thokos ghetanv. Ami topasun zalem mhonntoch, ami tim boroupam uprant anik dog-tegam kodde diun tanche kodde sarkim korun ghetanv…… xud’dhlekhonache ani her bhaxik nodrentlean. Kiteak, inglezintlean chuki aslolim boroupam ami uzvaddailim zalear, vachpi lok amkam hanstolo, lojek ghaltolo, gozali kortolo, adi. oslea gozalinchi amkam bhirant dista. Oslem kitench amchea vantteak ailolem naka dekun ami amchim inglezintlim boroupam zata titlim sudraun ani nivllaun tim uzvadda haddtanv.
Zalear, Konknnintleach boroupanchi ami besarmai kiteak kortanv? Ami amchech bhaxechi oxe ritin besarmai kortanv, tednam amkam amche bhaxechem mol kitlem asa, amche bhaxechem amkam vhoddponn ani obhiman kitlo asa to tantuntlean ugto zata.
Konknni mon’xachi, ani tantuntlea tantum boreach zann boroupeanchi anik ek vrut’ti (attitude) asa. Tanche bhitor khalteponnachea gunnachi ddigri khub unni asa. Dekunuch to dusrea mukhar chodd-so khalto zaunk sodina. Toso khalto zalear taka ti unneponnachi bhavna koxi dista.
Mhunnon to aplo boroilolo vavr dusreak, somzotoleak dakoina. Apnnem kelam tench sarkem mhonnot, apnnem boroilolem chukichem chhapun ani uzvaddaun to mekllo zata. Punn hich gozal to, aplem inglezintlean uzvadda yeupachem aslolea pustoka vixim korina. Tea inglez pustokant ek-ui chuk urchi nhoi mhunn tem pustok chhapnnek vochum porian to artun-portun polleta! Tachi itli zotnai gheta, xevttim kitle-i duddu legit farik korun tachem vevosthit ritin ‘editing’ korun gheta.
Duddu diun ‘editing’ korun gheta mhonnlear anik eke gozalich favo tea vellaruch ugddas zalo. Fattlea vorsantlea Mayache 8ver, ratchim 9.00 vazun vetoch mhaka ek fon ailo. “Sir, hanv XXX uloitam. Mhojem ek kovitanchem pustok asa. Devonagorintlean ‘already’ uzvadda ailam. Atam tem hanv Romi lipintlean uzvadda haddunk sodtam. XXX-a kodde diun hanvem teo Devonagorint asloleo kovita Romintlean korun ghetleat.
Punn mhaka tantum chuki asat koxeo distat.”
“Mhonnche to sarko lipeontor korunk nokllo tor?” Hanvem modinch tondd ghalem.
“To zanna mhunnonuch hanvem tache kodde dilolem nhoi? Tem korpak taka hanvem duddu legit farik keleat.” Tannem mhaka anik-ui khobor ugti keli.
“Kitle farik kele?” Hanv.
“Devonagorintli ek kovita Romintlean borounk taka hanvem 15 rupia farik keleat,” tannem aplea duddvanchem mol sanglem.
“Eke kovitek 15 rupia farik keleat zalear, tannem teo sarkeoch lipeontor keleat astoleo.” Hanv.
“Na sir, tantum chuki asatxeo distat. Dekun, ‘editing’ korunk hanv teo tuje kodde diunk sodtam.” Xevttim tannem mhaka fon korpa fattlo aplo hetu sanglo.
“Editing korpak hanv ‘charges’ ghetam.” Editing korunk vell lagta, tokli lagta, kompiutoracher kortolo zalear bizli lagta hem sogllem taka kollche khatir hanvem taka tem soroll sanglem. Zalear, tannem mhaka kitem sangchem?
“Sir, tantum vhoddleoxeo chuki ascheonant.” Mhojea ‘charges’-anchi khobor aikun tannem aplea itlea vellachea sangpant bodol kelo.
“Punn thoddo vell fattim tum mhaka tantum chuki asat mhunn sangtalo nhoi?” Hanvem taka tacheach sangnneacher proxn kelo.
“Oi, punn toxeo tantum chuki ascheonant.” To porot-ui (chukichem?) uloilo.
“Chuki nant mure? Zalear, mhoje kodde anik kiteak dita? Tantum tor chuki nant zalear tum mhozo ani tuzo vell toxech duddu kiteak ibaddta?”
“Punn sir, ‘editing’-a khatir tujeo ‘charges kitleo?” Tannem utsuktayen vicharlem.
“Eka panak panch rupia,” Hanv.
“”Asum-di, hanv teo kovita mhaka boroun dileat toxeoch uzvaddaitam.”
Oxem uloun tannem okosmat fon dovorlo, ani hanvuim, jem kitem somzonk zai aslem tem somzolom.

28/02/2009

Devak lagon Aksident zalo?

Devak lagon Aksident zalo?

-Jose Salvador Fernandes

Don disam fattli gozal. Ghora koddchean motor-saikolin bazrant vochunk ghorachea durga bhair pavlolom mat……. gurgur korun motor-saikolicher ailolo to tednach mhojea mukhar yeun thamblo. Oi! To. Mhoje vollkhicho. Mhaka zapailo, ani bhair sorpache toyarent asa to polleun rokddoch uloilo –
"Kam' aslem tujexim!" Marunk vhortelea gorvam sarki avtikai apnnaun tannem mhaka sanglem.
"Kitem zalem? Konnak kainch zaunk ba na mure? Ghora sogllim asa mum borim?" Hanvem huskean, sottasott vicharlem.
"Asa borim." Hanvem apleponn dakoilolea khatir to khoxal zalo
"Sang, kitem kam' aslem?" Hanvem uloup chalu dovorlem.
"Anik don mhoineamni mhojea bhavak ek voros bhorta……To jea voltar marekar obsoeg zaun melo, thoimsor ami ghorchim ek khuris bandunk sodtanv. Tea khursacher Konknni bhaxen boroup ghalunk yeujilam…… ani tem sarke ritin borounk mhaka tuzo adar zai." Utranchea rupan to aplem kam' sangun mekllo zalo.
"Tumi thoim-so khuris bandunk tharailam?" Tachea tonddantlean mhaka tachea ghorcheanchem mon aikunk zai aslem. Kiteak, mogachea mon'xachea ugddasak khuris bandop hi gozal choddxe pavtti ghorcheanchea uloupant ekmot aslea viret tharona.
"Tachea ugddasak bandtanv!" To aplea somplolea bhavachea mogachea kollvollean uloilo.
"Punn tea voltar khuris bandlear, fuddem vochun thoinchean yeupi-vochpi motor-gaddiank tras zaunche nant?" Taka matui zanniv korinastana hanvem tachea monacher matso uzvadd ghalpacho proyotn kelo.
"Rosteache 'side'-ik vo voltar ubo kelolea devache kednach konnak tras mhunn zatat?" Tannem mhaka aplea unneponnachea chintpacho puravo diunk suru kelem. Tache kodde fuddem uloun kosloch faido zaupacho na, tea poros mhojea vellachem luksonn mat zatolem oxem chintun hanv ogich ravlom.
Aiz Gõyant amkam rostea-voltancher khubxe khuris ube kelole melltat. Konnem bandle te? Te khuris ube keleat tancho konn tori ghorcho tea zagear obsoeg zaun melolo asta. Tanchea ugddasak tannim te khuris bandlole astat. Punn koxe? Tea rosteavelean yeupi-vochpi lokak tras zatat te porim…. Osle tras zatat tea khursak legit borem dische nant. Punn hem amkam gineanachea mon'xank khuim somzota? Dusreak tras zatat tea zagear osleo dhormik bandavolleo ubeo korun ami devacho upott mog kortanv oxem somzotanv. Mhonnche deva-dhormachi amchi zannvai kitli porian khori asa tem hachevelean thavem zata. Dev-dhormanchea bandavollink lagun ami dusreank pangllim korunk ani marun uddounk legit raji astanv oso tacho 'indirect' orth zata.
Aiz Gõyant rosteanche kuxik, rostean yeupi-vochpi lokak vo yeradarik tras kortat teo dhormik bandavolleo moddun uddoupachi goroz asa. Rosteamveleo dhormik bandavolleo jeo lokak tras kortat, addkholl kortat, zaka lagun dusreacho jiv luksonn zaupacho asta teo thoimsorleo kaddun uddoitat tem xanneponnachem thartolem. Te-te gozalik, to-to vell, to-to zago asta. Khuinchi-i gozal, koslea-i nimitan khuimsor-ui vhorun ubi keli mhunn tem sobona. Amcho ghorcho vo mogacho jea zagear obsoeg zaun morta, tea zagear amkam bhorpur khorch korun khuris ube korun distat. Ami kortanv legit toxem. Oxem tor, amcho mogacho mela tea zagearuch taka ami kiteak matiek lainanv? Taka vo tika matiek launk kherit zago asa nhoi? Zalear, hea dhormik bandavollink-ui tacho zago asa mhunn amkam kiteak somzona?
Khorem mhonnlear Gõyche dor eka panchayatin, ap-aplea ganvant hea dhormik bandavollim vixim kaide korpachi goroz asa. Khuinchea-i dhormancheo bandavolleo teo zaum, bhouxik vo publik zageancher, zoim lokak tras zata thoim teo ubeo korunk diunkuch zaina. Ani aiz toxeo asat teo legit, tea-tea dhormak favo to man diun moddunk tannim fattim sorunk zaina.

20/02/2009