TEM MON…

SON’VARACHIM SUNGTTAM:

TEM MON…

-Jose Salvador Fernandes

 

Kal porian ghunvonaslolem mon

Az okosmat koddvollunk laglam…

Kuddant svotache vichar sodtanam

Aplea apunnuch gollunk laglam

 

Ghunvunk takot sodpi monantlean

Atam kopxe poddunk lagleat

Buniyad naslolea vicharanche…

Kosbel’lie nirddukayeche…

Polkea vhoddponnache…

Khottea chintnanche…

Khobor naslolea nennarponnache…

Benul’lichea sobhavache…

Osurokxit dubavache…

Rongoylolea rupnneache…

Ghoddoylolea aropanche….

 

Tem mon atam vingllem zalam

Khoinchem-i kam’ korunk pangllem tharlam.

 

 

 

Sonvar, Febrer 1, 2014

www.goa-world.com

http://goablog100.blogspot.com

Link:

http://goankrazy.blogspot.com/2012_10_01_archive.html

Bori Kovita Bhavnen Rongta ani Bud’din Rosrosta

SON’VARACHIM SUNGTTAM:

Bori Kovita Bhavnen Rongta ani Bud’din Rosrosta

-Jose Salvador Fernandes

1987 vorsa, Gõycho Rajbhas Kaido Devnagorintlean pas kortoch, “atam Romi Konknniche dis bhorle, Romi Konknni atam aste-aste morun vetoli” oso zaitea zonnancho odmas aslo. Punn az, Rajbhas Kaideak 26 vorsam purnn zalim, torui Romi Konknni jiti-jivi asa. Gõychea Rajbhas Kaidean Romi Konknnichio don pillgio sompoylio hem zorui khorem aslem, torui tache kodde Romi Konknni sompounk zaunk nam hem-ui titlench khorem. Hatachea bottancher mezunk mellpi fattlea kaim vorsamni, aichi pillgi Romi Konknni ap-aple porim udorgotik pavounk ani samballunk pott’tiddken vavurtanam dista, ani hem chitr polleun hie pillgechi apurbay dista. Hech pillgientlo eklo protinidhi mhollear ‘Utt Gõykara’ kovitam jheleacho kovi Anselmo Subash Fernandes.

    Dalgado Konknni Akademi (DKA) Romi Konknnichea mollar bhas fulovpacho ani samballpacho sabar torenim vavr kortanam, novea-novea borovpiank zagovpacho ani uttovpacho aple porim vavr korta. Hea vavracho foll mhonn Anselmo Subash-bab-ui zagovla ani uttla, ani ‘Utt Gõykara’ udexim to atam gõykarank uttounk lagla. Mullant gõykar ho susegad oxem mhonnlolem ami aikot aileanv. Choddxe pavtti, dusrean uttoylea bogor to aple apunn zaun uttonam. Taka sabar bhasamni zagouncho ani uttouncho poddta. Anselmo Subash-baban hea gõykarank kovitam udexim zagounk ani uttounk pavl ubarlam. Aplea kovitam madeomantlean gõykarank uttounk Anselmo Subash-baban sabar vixoyancher kovita kelloylolio hea kovitanchea jheleant vachunk melltat. ‘Gõy’, ‘Gõychi Mati’, ‘Gõychem Xetkamot’, ‘Mhojem Gõy’, ‘Gõychim Follam’ oxea nanvachio kovita Anselmo Subash-babachea hea kovita-jheleant vachtanam, kovik Gõycho kitlo mog, apurbay, apulki ani obhiman asa to disun yeta.

Jitlo kovik Gõycho mog titloch taka aplea ganvcho-i upatt mog hem tachea ‘Kudd’ttore Mhozo Ganv’ ani ‘Ganvchem Fest’ hea kovitamni spoxtt ritin disun yeta. Kovi aplea Kudd’ttore ganvchi tust gaytanam, ‘Ganvchem Fest’ kovitent to Dezembrachie 18 tarkecho ul’lekh korta. Dor vorsa Dezembrachie 18 tarker Kudd’ttore ganvant ‘Kelleanchem Fest’ zata. Ani teach festa disa Anselmo Subash-babacho ‘Utt Gõykara” kovitam-jhelo uzvaddak aila! Zanchem kalliz-nadd aplie ganvchie matiye kodde zull’loli asta tanche khatir oslio gozali apo-ap ghoddon yetat oxem mhonnchem poddta.

Anselmo Subash-babachio ‘Utt Gõykara’ kovitanchea jheleant anik-ui sabar vixoyancher – Pavsacher, Suknneacher, Desacher, adi. – kovita boroylolio sabar vicharanchio kovita vachunk melltat.

Choddxea borovpianchi borovpachi survat kovitentlean zata oxem mhonntat. Aplea monantle vichar boroun te ugtaunk monis proyotn korta, tednam taka te vichar survatek kovitentlean ugtavop sompem dista. Mhonnun to kovitentlean aplea borovpak survat korta. Anselmo Subash-bab-ui hie gozalik opvad nam.

Kovita ho sahityacho prokar khubxe zonn kelloytat. Punn soglleankuch to zomta oxem nam. Ho prokar kellounk jitlo sompo dista, titlo to sompo nam. Kovitek mhonn tichem khas xastr asta hem khub zonn visortat. Kovitentlo vichar jitlo bhavnen rosroslolo asta, nazuk, movall, rosall ani sobitayen nheslolo asta, titlo to vachpiachea vo aikotoleachea monak khuxalkay dita ani vangddach vicharachi kholay ugddapi korta. Kallzak pill ghalun lokachea monant kherit vicharancho surya uzvaddaun haddop hem kovitechem agllem-vegllem khaxeleponn asta. Dusrea utramni, kovi bhavnam porgott korta. Lokachea ontoskornnant tio bhavnam zagoyta, ani uprant  kovik aila toch onnbhov lokak-ui zannunk lagta. Dusrea utramni sangchem zalear, bhavnechea rongan rongloli ani rosrosloli bud’di mhollearuch kovita!

Anselmo Subash-bab Fernandesachea rupan Romi Konknnichea mollar anik ek borovpi zolmak haddunk apnnak yes mell’lem mhonn, DKA-k bhovuch khuxalkay bhogta. 

Sorjonxil sahitya rochpi choltam-bhonvtam aplie sorbhonvtim kitem ghoddta tache poltoddi  polleta. Tacher vichar korta. Aplea monant borem xizoyta ani tea uprantuch tem borovpachea rupan kagdar vaddta. Anselmo Subash-baban-ui oslich kosrot korpachi goroz asa. Kovita borovpianchi veg-veglli xoili asta. Anselmo Subash-baban oxe torechio kovita zata titlio vach’chio, tanchi ghoddon koxi-kat zalea tacher vichar korcho. Fuddarak kovita rochtanam taka tem khub faideak ani upyogak poddtolem hantum dubav nam.

 DKA-chie ‘Kombri Yevzonne’ khal ‘Utt Gõykara’ kovitam jhelo uzvadda haddlolea Anselmo Subash-bab Fernandesak porbim ditam, ani Romi Konknnichea mollar fuddarak borem yes anvddetam.

Pustokachem nanv: UTT GÕYKARA

Kovi: Anselmo Subhash Fernandes

Uzvaddavpi: Fernandes Prokaxon, Kudd’ttore

Panam: 101

Mol: 130/- Rupya

Sonvar, 25/01/2014

www.goa-world.com

http://goablog100.blogspot.com

Apleach Fonddar Apnnench Mati Oddop…

SON’VARACHIM SUNGTTAM:

             Apleach Fonddar Apnnench Mati Oddop…

 

         -   Jose Salvador Fernandes
 

 Sod’deak desbhor Lok Sobhechie vinchnnukechem varem suttlam. Desachea panvddear zavpi hie vinchnnukek  desantle lhan-motte, veg-veglle pokx, ap-aplie porim toyar korunk lagleat. Gõyant-ui ti toyari chol’lea. Hie toyariecho bhag mhonn Gõyant don mukhel raxttrik pokxamni - Bharoti Janata Pokxan (BJP) ani Kongres Pokxan – aplo toyariecho kon’ddo halounk survat kelia. Hea pokxanchie toyariechea vavracho niyall kelear, Kongres Pokx fattlie Gõy Vidhan Sobhechie vinchnnukentlean kainch xikunk nam mhonnpachio khunnam disun yetat.

 

Gõyant don zageam khatir Lok Sobhechi vinchnnuk loddounk Kongresichea Gõy fanttean kendrak so nanvam dhaddleant mhonn aikunk yeta. Ut’tor Gõyam khatir Jitendra Deshprabhu, Ramakant Khalap ani Girish Chodankar. Zalear, Dokxinn Gõyam khatir Kongresicho visvaxi chakor ani kendrant pallam-mullam ghott aslolo Luizinho Faleiro, tacho kumpar Churchill Alemao ani sod’deacho Lok Sobhecho khasdar Francisco Sardinha. Don zageam khatir so zonnanchim nanvam dhaddleant thoincheanuch khorem mhollear ‘politics’ suru zata oxem mhonnchem poddta.

 

Gõy Vidhan Sobhechie fattlie vinchnnukent, teach-teach ani adlea amdarank ani umedvarank vinchnnuk loddounk Kongresin fuddem kaddlolea khatir, tea pokxak tie vinchnnukent mati khaunchi poddloli hem to pokx khub vegim visorla-so dista. Toxem polleunk gelear, Gõyantlea Kongres Pokxan fattlie Vidhan Sobhechie vinchnnukentlean vhoddli-xi xikovnn ghetloli disonam. Oxem mhonnpa fattlean khubxim karonnam disun yetat.

 

Poilem karonn, Vidhan Sobhechie fattlie vinchnnukent har khalea uprant, Gõyantlea Kongres Pokxan apli har gombhirponnan gheunk nam. Kongresintle je konn tie Vidhan Sobhent harle, tankam Kongres Pokx nhoi, svota apunnuch jivitant harlo oxem dislem, ani tannim tea uprant anguch soddun dilem.

 

Dusrem karonn – Kongresiche je konn jikhle ani harle, tankam to pokx aplo pokx mhonn kednanch disunk nam. Har zali ti Pokxachi, luksonn zalem tem pokxachem. Te khatir Pokxachem vo aplem khoim chuklem, khoim kitem unnem poddlem, tem koxem nittayer ghalop ani fuddarak koslem dhoronn apnnaun pokxan ani apnnem fuddem vochop hacher tankam kednanch vichar korcho disunk nam ani tannim to az meren gombhirponnan korunk nam.

 

Tisrem, Pokxachie nodrentlean tannim Gõy Rajyachea boreponnacho kednanch vichar ani husko korunk nam. Tech khatir fuddarachi nodor naslole he monis atam kosloch khottpott korinastanam moneponn pangrun boslole distat. Vidhan Sobhechi fuddli vinchnnuk yeunchi nam te meren apunn zage zaunche nant oxem kitem hantuntlean ugtem zata. Rajki mollar aplo svarth gheun denvtoch oxem ghoddta tachi hi dek asa. Mhonnche, pokxachea nanvan monis aplo svarth mukhar ghalta tednam monis sanddta tachem hem chitr asa.

 

Fattlim sabar vorsam, Gõyant Kongres Pokx pixeponnam korit fuddem vetanam dista. Ani tanchim him pixeponnam ani tancho porinnam’ Gõy Vidan Sobhechea vinchnnukam vellar odik spoxttponnim disun yeta. Gõyantuch nhoi, tori desantlea choddant chodd zageancher apli adli mhoima ani nanv urunk nam vo tem denvot veta hem Kongres Pokxan poile ani voile suvater mandun ghevpachi goroz asa. Kall bodol’la ani tea kalla vangdda desantlea nagrikanchi monanchi poristhiti-i bodol’lia dekun kalla pormannem mathear kurponnem gheun fuddem vochpachi nibel goroz asa mhonn Kongres Pokxan monant dovrunk zay.

Rajki mollar, khoinchea-i pokxak tem zaum, az khubxim avhan asat. To-to pokx hea avhanachea kallar tigun urtolo zalear, tea pokxan tea-tea avhanak tondd diunuch fuddem vechem poddtolem, ani tantuntlean apli takot dakounchi poddtoli. Hio gozali fattlie Gõy Vidhan Sobhent Kongres Pokx visrunk nam. Punn rajki ani motdaranchi monanchi poristhiti zannam astanam-i tea pokxan mud’dom zaun lokak vitt ailolea umedvarank vinchnnuk loddounk fuddem kaddle, ani aplea virodhokank zoit odik sompem kelem.

 

Anik bhov thoddea mhoineamni, Lok Sobhechio vinchnnuko zaunchio asat. Tea vinchnnukank tondd diunk Kongresin porot-ui aplim adlinch pixeponnam kelim zalear, to pokx Gõyant apnnech fonddlolea fonddacher apunnuch mati oddtolo ani Gõyant kalla bhailo zatolo hem anik vegllem sangpachi goroz nam.

Sonvar, 18 Janier 2014

www.goa-world.com

Akhil Bharot Konknni Lekhok Songhotton Zolmak Yetanam...

SON’VARACHIM SUNGTTAM:

 

Akhil Bharot Konknni Lekhok Songhotton

Zolmak Yetanam…

 

         -   Jose Salvador Fernandes

Konknni bhaxechea chear lipincher – Romi, Kon’nodd, Molialom’ ani Perso-Arabik -    zalolie onitichim pallam-mullam Konknnichech Devnagori lipient asat hem sot Devnagorivaleamni legit nhoikarunk zainam. ‘Veglleponnant Ekvott’ mandunk toyar naslolea Devnagorivaleank poilinch thaun apli lipi ‘DEV’-achi lipi dista. Mhonnun, Konknnichea her lipintlea mon’xamni apli dudachi boli ani lipi soddun ‘DEV’-achi boli ani lipi apnnayloli Devnagorivaleank zay aslem. Punn sogllech khoim Devak mandtat nhoi? Magir Devak mandinam to aplia sobhavachi boli ani lipi soddun Devachi nagri lipi ani boli kiteak apnnaytolo? Toxem kelem zalear, Konknnikullachem kitlem ani kedem luksonn zaum yeta tem her chear lipintlea ani sabar bolinchea Konknneank khobor asa dekun te chotur zale. Ani tannim tharaylem – Konknni mollar vivdayent ekvott samballun fuddem vochop hi kallachi goroz. Hie kallachie gorjek zap mhonn atam teach totvantlean Akhil Bharot Konknni Lekhok Songhotton zolmak yeta!

 

Mon’xacho zolm’ khoim khuinchea disa ani kednam zatolo to mon’xak sangun yenam. Punn Akhil Bharot Konknni Lekhokanchie Songhottoniecho zolm’ mat Janeracher 19ver, 2014 Konknni sonvsarant sonvskrutayechea mollar unchlea panvddear urtolea Mongllurchea Kalaanganant zauncho asa. Hi Songhotton khal dilolio sonkolponam gheun zolmak yeunk umbrear ubi ravlia: 

 

1. Akhil Bharoti panvddear Konknni borovpianchem ani tanchea prosnanchem ani oddchonninchem protinidhitv korop.

 

2. Konknni sahityak tachie sogllie suropayen ani sabar lipimni ani bolimni girest korop ani samballop. 

 

3. Fuddlie pillgie khatir Konknni sahitya posravop.

 

4. Vattarachea, dhormachea, zatichea, bhavartachea ani poromporechea dor eka prokarak man divop.  

 

5. Konknnichea veg-vegllea lipinchem ani bolinchem lipieontor ani rupantor korunk ut’tejon  divop.

 

6. Her bhasantlem borem tem sahitya Konknnint bhaxantor korop ani Konknnintlem borem tem sahitya her bhasamni onnkarunk hatbhar lavop.

 

7. Konknni bhaxechie ani sahityachie udorgoti khatir vavurtolea Konknni sonvsthanchea sangatan vavr korop.

 

8. Puray Bharotant Konknni pustokanchie vikriek hatbhar launk Konknni klasi, kam’sallo, kem’pam, kurs, prodorxonam, spordha, porixodo ghoddoun haddop, puroskar ani maneotay divop ani oxe torechea her vavrantlean Konknni bhaxentlim pustokam chhap’pacho, Konknni posravpacho ani ti lokachie avddichi korpacho vavr hatant ghevop.

 

9. Konknnint eksarki vollok aschi mhonn vividtayent ekvott ghoddounk vavrop.

 

Akhil Bharot Konknni Lekhokanchi Songhotton ghoddoun haddtat hi Konknni bhaxentlea - uprant to tie bhaxentlie khuinche-i lipintlo borovpi zaum – dor eka borovpia khatir khoxiechi khobor asa. Hie Songhottone udexim atam Konknni borovpiank ani tanchea vangdda Konknni bhaxek bharoti panvddear anik-ui zago melltolo. Konknni bhas dolleam mukhar dovrun sogllea borovpiamni hie Songhottone som’bondan aplem karya somzun ani mandun ghetlem zalear, hi Songhotton Konknni borovpiam vorvim Konknni mollar fultoli ani chonvortoli hantum il’lo-i dubav nam. Oxie fattbhuimier, choddan chodd Konknni borovpiamni, fuddlea Aitaradis zolmak yeunchie aslolie Akhil Bharot Konknni Lekhokanchie Songhottonechie Poilie Sorv Borovpianchie zomatik hajir zalear, Songhottonechea zolmak Konknni borovpianchea ekvottachem rup favo zatolem. Hi Songhotton survatekuch thaun Konknnichea veg-vegllea lipinchea, vicharanchea, vattaranchea ani poramporanchea borovpianchea ekvottachea hajirponnantlean zolmak aili zalear, itihasant to dis ani goddi mhotvachi thartoli.

 

Lipivadachea bhonvreak sampoddlolea Konknni sahityak eksarkeponnacho panvddo favo zatolo zalear,  tem sahitya lagim haddta-haddta ekttavpachi nibel goroz asa. Konknnichie Devnagori lipin her lipinchea borovpiancher keloli itlea kallachi onit sompounk, eka novea porvak ani kallak survat Akhil Bharot Lekhokanchie Songhottonechea zolmantlean atam survat zatoli. Dekun, vividtayent ekvott mandtolea ani palltolea zata titlea Konknni borovpiamni Akhil Bharot Konknni Lekhokanchie Songhottonechie Poilie Sobhek hajir zaunchi ani tie Songhottonecho vangddi zavop gorjechem asa.

 

Sompoytanam, Akhil Bharot Konknni Lekhokanchie Songhottonek sorvanchea, ani kherit bhaxen Konknni borovpianchea nanvan urbebhorit yeukar ditam, ani tichea puray Konknni somazantlea borovpiancho ani tantuntlean Konknnicho mozbut ekvott ghoddon yeuncho mhonn opekxitam!

 

 

 http://sonvarchimsungttam.blogspot.com/2014/01/akhil-bharot-konknni-lekhok-songhotton.html

Sonvar, Janer 11,2014

www.goa-world.com

Khavop Romi Konknnichem…Ani Tich Barik Zalea Mhonn Bottam Dakovp?

SON’VARACHIM SUNGTTAM: 

Khavop Romi Konknnichem…

Ani Tich Barik Zalea Mhonn Bottam Dakovp?

                                          -   Jose Salvador Fernandes

 

‘GULAB’ masikacho Janer 2014 ank. Pan 7. ‘Aplech Bhaxecho Fondd Khonnttat!’ oxea mathallea khal Dilip Borkaran borovp kelam, ani lipivadacho fondd porot ugto kela!

 

“Bhaxecher Bhor Divop, Lipicher Nhoi” ho Borkarachea tea borovpantlo poilo up-mathallo. Ho up-mathallo sompoytanam to mhonnta – “…. Mhunnttoch ek bhas mukhar vhortolo zalear soglleant adim bhaxecher kherit bhor divpachi goroz asa, lipicher nhoi. Punn amchem chol’lam tem rajkaronn bhaxechea nanvan ani lipichea nanvan. Haka lagun ami amchi Konknni bhas marun uddoitole ani amche modem Gõykar mhunn zo ekchar aslo taka ver vochun dhormik futt poddpachi bhirant upraslia.”

 

Dilip Borkar oxem boroun pixeank pimpoll dakounk sodta ani aple apnnakuch fottoyta mhonn thavem zata. Bhaxechea ani lipichea nanvan Konknnichem jem rajkaronn cholta, tachim pallam-mullam dhorma poros chodd zati-kastamni khol riglolim asat mhonn Borkarak khobor asun-ui to nennarponnachim dhongam korta.  Devnagrich tambddi, ani Romi Konknni khotti mhonnpi Borkara sarke je Devnagorivadi Devnagrichoch hott’ dhorun asat, tankanch lagun fattlim 27 vorsam hem Konknni bhaxechem ani lipinchem rajkaronn chalu urlam hantum il’lo-i dubav nam. Je meren Devnagorivadi aplea monant ubi keloli Romi Konknnichea dvesachi khomptti moddche nant, te meren hem rajkaronn chaluch urtolem ani bhaxechem luksonn-ui zait ravtolem. Borkaran Devnagri ani Romi Konknnichem kitlem-i ramayonn boroylem mhonn tem bond poddchem nam. Romi Konknnik Rajbhas Kaideant NIT mell’llearuch tem bond zatolem. Ani ti NIT melltoli zalear, Rajbhas Kaideant ek tor ‘Romi’-cho ul’lekh yeunk zay, nam tor ‘Devnagri’ hem utor kaddun uddounk zay.        

 

“Romi Konknni Rajbhas Zal’li Zai?” ho Borkarachea borovpacho tisro up-mathallo. Tea up-mathallea khal to oxem-i boroyta – “Atam prosn asa Romivaleancho. Tankam khoreaninch Romi Konknni rajbhas zal’li zai? Gõyant Romi Konknni mhunn kherit bhas asa? Mhaka disonam. Gõyant asa ti ekuch bhas ani ti mhollear Konknni… Lipi veglli asli mhunn bhas veglli zainam, hem sot soglleank khobor asa…”

 

Romi Konknnichea sonvsarant xemborantlea ekleak legit khobor aslear devak argam mhonnpachem, oxea ‘BIMB’ nanvachea Devnagri Konknni masikacho Dilip Borkar som’padok asa. Devnagri Konknni masikacho som’padok hea natean Borkarak Romi ani Devnagri Konknni modlo forok kitem to atam meren zannam zaunk zay aslo. Gõy Rajbhas Kaido pas zaunche poilim Hindu lokak Konknni mhollear Romi Konknni asli hem Borkar itle vegim koso visorlo? Ucharache, vyakoronnache ani her nodramni Romi Konknni hi Devnagri Konknni poros kitli veglli asa to ek khorem mhollear obheasacho vixoy asa. Dilip Borkara sarkea Konknni masikachea som’padokan ani borovpian hea vixoyacher voilea voir borounche poilim, tea vixoyacher obheas korchem ani to obheas uzvadda haddchem avhan mandun ghetlear Konknni somazak-ui faido zatolo aslo.       

 

Dilip Borkar ‘Romichea Naddear Zoitam’ hea chovtea up-mathallea khal fuddem mhonnta – “….. Romichea nanvan arodd marpi sogle aplea bhurgeank Inglez xikoitat, tanche lagim inglez katortat ani aplea ghorant sokall fuddem Inglez disallim haddttat. Vachunk konnak yeta ho prosn mhotvacho nhoi….. Amchea Agxi ganvant AMCHO AVAZ dor Son’varak yeta. Teach potrachea dhoniacho Inglez oHERALDO hem potr yeta. Son’varak khoinchem potr chodd lokanchea hatant asta tem pollelear Romi Konknnik kitlo tenko asa ani tichi lokak kitli goroz asa tem gomun yeta.”

 

Dilip Borkar ganvan Agxiecho. Agxi ganvant Romi Konknnichea AMCHO AVAZ satollea poros HERALD Inglez potrachio protio vo kopi chodd khoptat oxem tachem mhonn’nnem hem spoxtt somzum yeta. Punn heach Agxi ganvak dhorun Pilar meren Devnagri Konknnintlea SUNAPORANT disalleachio kitlio protio khoptat tem Borkar sangonam! Karonn samkem sompem. Agxi tem Pilar porian khobram-potranchea khuincheach manddacher ‘SUNAPORANT’ disallem vikrekuch haddinant! Mhonntoch, ekuch ek Devnagori Konknnintlea disalleachi poristhiti aplea ganvant kitem asa ti lipoun dovrun Borkar Romi Konknni satolleachi poristhiti challunk bhonvta tacho bhitorlo hetu hanga sangonastanam-i ugto zata!        

 

Teach up-mathalleant Borkar fuddem boroyta – “…. Gõychea ani Gõyam bhailea zaitea Konknni lokanchi hi Romi lipi vachpachi goroz bhagoita. Devnagri vachpi legit Nagri Konknnintleam kainch vachunk mellonam zalear tokalos gheun Romi potr vo masik vachun apli Konknnichi bhuk nhivoita. Tich got Romi zanna zal’leachi. Jie suvater taka Nagrintlem potr vo masik hatak lagta tie suvater to Romivalo tem Nagri potr vachta. Taka sonvoy nasot zalear letram zoddun zoddun to vachta ani aplie Konknnicho asvad gheta. Tea vellar to ti khoinchi lipi mhunn pollenam. Tache pasot ti asta tachi mogall Konknni.”

 

Vevharik nodrentlean Romi Konknni hi Devnagri Konknni poros kitli unch urta ti Dilip Borkarak bori khobor asa. Dekunuch to Romi Konknnichea nanvar Devnagricho-i konddo halounk sodta. Bes-bori Devnagori lipi vachunk zannam aslolo khuinchoch Romi vachpi apnnak Romi Konknnichem potr vo masik vachunk mellonam zalear, to kednanch ti apli bhuk Devnagri Konknni disalleantlean vo masikantlean bagouncho nam, nhoi man tie lipientlean Konknnicho asvad-ui gheuncho nam. Kiteak Devnagri Konknni taka apli oxi kednanch disunk nam. MA panvddear porian Konknni xikun pas zaloleank ti aplie bhaxechi lipi mhonn mandun gheunk kitlem kustar zata tantuntlean disun yeta. Devnagri Konknnintlean BA, MA xikpi legit ‘BIMB’ sodduch, sodancho SUNAPORANT vachinant ti Borkarak khobor asun-ui to ti paylie pondak kiteak dhampun dovrunk sodta kai?          

 

Fuddem, teach bhagant to boroyta - “Tori legit Romi lipintlean zannim Konknni tigoun dovorli tea lokancho ankddo khub vhoddlo asa. Tancheach naddear ami Konknnichim khub xim zoitam hatall’lim. Punn tancho tenko Konknni bhaxek aslo. Nagri vo Romi lipik naslo. Tech pasot Gõyche ani Gõyam bhaile Hindu, Kristanv ani Muslim lok fokot Konknni bhaxe pasot ektthaim ravle. Konknni monis mhunn hatant hat ghalun vavurle. Lipi pasot zor ektthaim ailole zalear Konknnik ken’nanch tichi hokkachi suvat mellchi nasli ani Gõykaram modem ekcharui urcho naslo….”

 

Dilip Borkarak bhorpur khobor asa. Kosli? Rajbhas andolona vellar zo lok zomatimni bhag gheunk urponjimni yetalo to Romi Konknnich Rajbhas Kaideant vetoli mhonn somzun ani mandun yetalo hi. Zorui ho lok bhaxe khatir ekttaim zatalo, torui tankam Konknni mhollear Romi Konknni hi sonkolpona asli.  Punn xevttim Dilip Borkar ani komponin aplich tambddi mhonnpi ani mandpi Devnagri Konknni Rajbhas Kaideant ghali. Romi Konknnik Rajbhas Kaideant kainch nam! Sogllio sovloti Devnagri Konknnikuch…. Romi Konknnik kainch nam….! Tichea vantteak yetalem tem-ui apnnench khalem…. Apunn motte ani ghottmutt zale…. Ani atam, “Romi Konknni, tum itli barik ani oskot koxi zali?” oxem mhonnot Romi Konknnikuch guneanvanchim bottam dakoytat!

 

Hem kitlem sarkem asa?        

 

 

 

Janer 4, 2014

               _____________________________________________________
 

      
Valmiki Naik, Remo Fernandes, Rajendra Kakodkar & Dr Oscar Rebello at AAP press meet

(Photo courtesy: http://www.goanews.com/news_disp.php?newsid=4741&catid=235  / Saturday 04 January 2014 (today)

_____________________________________________________________________________