‘Brother’ Devchar Kaddta!!! - I (Poilo Avisvor - Part 1)

SON’VARACHIM SUNGTTAM:

 

‘Brother’ Devchar Kaddta!!! - I

 

- Jose Salvador Fernandes

“Bhair sor devchara… bhair sor….” Oxim utram ghora vochpachie vatter astanam mhojea kanar sodoulim. Hanvem gaddi thamboyli. Polle zalear, tie sanjer, te-ui firgojent retir aslo. Tie firgojechea ugtea mollar cholpi tea retirak, azu-bazuchea-i ganvantlo lok ailolo mhonn, moneamni ubio aslolio bosi sangtalio. Tie uxir sanjer, retir sompunk oxem-toxem ek hor astanam, angar ‘kallo-so lob’ aslolo retir divpi, aplea talleak tras zaum porian, tie machier thaun, tallo soranttun mhonntalo - “Bhair sor devchara… bhair sor….  Hanv tuka hukum’ ghaltam, tum tachevelo bhair sor….. Jezuchea nanvan tachevelo bhair sor….. hangasor dusrie vollint ek ostori asa, tika atam pekovnni mellpacho vell aila… tichevelo devchar atam foddfoddunk lagla… tichie kuddintlo devchar atam tichi kudd apnnem soddun vecho vell lagim pavla mhonn voir-sokol zaunk lagla…. Soitana, hanv tuka sangtam, tichievelo bhair sor…” Tea retirant bhag ghevpi lok, konn ostorievelo devchar bhair sorta to polleunk utsuktayen aplio toklio hevtten-tevtten ghunvddaytalo. Retir divpiache sangati, astole sumar 7 te 8 tornnate, soglle ekech torechem ‘dress’ nheslole, oxe-toxe bhonvun retirak ailoleancher nodor bhonvddaytale. Tantuntlea dog zonnamni okosmat eke ostoriek dhorli, ani tika oddit-oddit retir divpi aslolie machiexim vheli. Tika atam to retir divpi kitem kortolo tem polleunk lok aplea pãyanchea bottancher ap-aplie porim lamb zatalo…. Hanv soglleam poros fattim aslom mhonntoch, tika thoim tannem kitem kelem tem mhaka mat disunk nam…

 

“Retir dita to padri konn?” Mhojie vorich gaddier bosun retir pollevpi, mhojea uzveak aslolie ostoriek hanvem vicharlem.

 

“Khobor nam…” Tinnem aplem nennarponn ugtaylem.

 

Retir divpiachi arodd choltanam, thoimsor mhojem-i mon vhoddlean yevzunk laglem… ‘Ho konn padri kay? Devchar kaddpachi haka koxi podvi favlia kay? Hachi ‘credibility’ kitem?’ Zalear dusriech goddiek, monan mhakach mhonnlem – ‘Kitem monis tum? Padrinchi-i ‘credibility’ sodunk laglo atam?....’      

 

“Fattlean konn eklo asa, to hea retirak atanch pavun sorla, ani tacher devchar boslolo asa…. Taka tea devcharachea chopkeantlean suttka divpachi atam goddi ailia… ” Burbur korun tache te ekech torechem ‘dress’ nheslole sangati fattlean yeun ube zale. Tanchio nodro “fattlean konn eklo asa, to hea retirak atanch pavun sorla, ani tacher devchar boslolo asa” mhonn sanglolem taka sodtalio. Mhaka ek goddibhor dislem – ho mhaka mhonnta kay? Hanv ‘self-conscious’ zalom.

 

“Vhoy, fattlean aslolea tea mon’xak atam, itlea kallan kherit suttka melltoli…. Itlo kall to devcharachea gulamponnant aslo…” Ekech torechem ‘dress’ nheslole tantuntle dog zonn mhojexim aile. Hevtten-tevtten nodor martanam, te mhaka-i polleunk lagle. Eklo tor mhojieveli nodoruch kaddunk toyar naslo….

 

“Atam ti goddi pavli…. Devchar boslolo to monis atam amche mukhar hanga ubo zatolo…. To devcharachea tabeantlo suttunk sodta, punn devchar taka addayta… taka tras korta…” Retir divpi soranttun sangtalo titlo tacho ek sangati porot-porot mhaka polletalo.

 

‘Mhojer devchar bosla kay? Ho mhaka-so polleta?’ Hanvem mhakach mhonnlem.

 

“Vhoy, tea devcharacho atam bhosm’ zavpacho vell pavla… ami ravonanv tie goddiek atam devcharan zopt keloli kudd hanga ubi zatoli… Devcharachea tabeant asloli ti kudd fattlean ubi asa…” ‘Konn kay’ oxie nodren retirak hajir aslolo lok fattlean polleunk laglo…

 

“Vhoy…. To thoddeanchie nodrek disla…. Ani tachevelo devchar atam chodduch khubdovla… Ani…”

 

Tednam sogllo lok mhakach polleta-so mhaka bhas zalo… Hanvem ani vell ibaddunk nam… gaddi suru korun ghora xevttolom.

 

‘Disbhor chintun ani kam’ korun tum thoklai, atam yo, ratbhor mhojer nhid ani visov ghe’ oxem mhonnpi xendriecher udaro poddun astanam, to retir divpi padri, chintnantlean porot mhoje mukhar ubo ravlo - kitle podven ho devchar kaddta! Koso kay? Romant vochun ‘Exorcism’ vixoya vixim xikun aila astolo. Punn tachi vollokh zannun gheunkuch zay mhonn monant gantt marli. Konnak vicharpachem tem tharaytoch, nhiden mhaka aplea gopant ghetlo.

 

(Cholta)

 

Son’var, 28.03.2015

http://www.goa-world.com/

TUJIE AVOY BHITOR...

SON’VARACHIM  SUNGTTAM:

 

TUJIE AVOY BHITOR...

• Jose Salvador Fernandes
   
  Tujie avoy bhitor 
  Mhojie avoyk sodtam
  Itli sodunui mellonam zatoch
  Orde vatter hanv mhakach sanddlam dista
   
  Tujie avoy bhitor
  Mhojie avoychea mogak khottpott’tam
  To-ui mhaka mellonam zatoch
  Vhanvtea dukhamni mãycho mog piyetam
   
  Tujie avoy bhitor
  Mhojie avoychem avoyponn sodtam
  Sodun-ui tem mellonam zatoch
  Suklolea tolleachem niraxiponn bhogtam
   
  Tujie avoy bhitor
  Mhoji avoy disonam zatoch
  Hanv mhakach vichartam
  Soglleanchio avoyo eksarkio kiteak asonant?
   
   
  Son’var, 7-Mars-2015
  http://www.goa-world.com/

CRYwalk 2015 – Record participation

 

February the 6^th – a brilliant morning and an equally brilliant record. In its 4^th annual occurrence, there was a record number – a total of 96 children, who participated in the CRYwalk 2015.  Organized by FOCC (Friends of CRY Club, Kuwait), the first CRYwalk was held in 2012 when a mere 3 participants showed up. By 2014, the participation had already grown to 59 children in Mahboula area. This year’s Part-1 episode at Salmiya attracted 96 children, up from 43 last year. Children from nearby Salwa made it – which was not so surprising. What surprised was the presence of children residing in Shuhada and far-off Abbasiya area. After the huge showing at Mahboula, FOCC volunteers were hoping for an even greater surprise, and we were not at all disappointed. Great show, dear "Star Walkers". Among the children who participated, there were many who were under 6 years of age, but interestingly 4 children under 3 years walked as well. The most thrilling entries although, were two small girls at 20 and 18 months of age, walking by themselves, with their mothers tailing behind – beautiful sight. The total collective distance walked by all was 403 km, at an average of 4.2 km per child. We thank them all from the bottom of our hearts and hope that CRYwalk will keep growing in the year to come. FOCC organizes 3 annual events for children – CRYcket for children under 14 years, CRYchess and CRYwalk for children of upto high-school age. Our next event, the CRYcket is scheduled on Fri, Apr the 10^th. We will be releasing our annual Souvenir as well. Sponsors may take this opportunity to advertise their products as well as support a noble cause simultaneously. Our website www.focckwt.org .

 

• FOCC (Gaspar Ameida)

 

Orth

SON’VARACHIM SUNGTTAM:

 

Orth

                                                                                                           *Jose Salvador Fernandes 

• Dhormachie tolvarin kelolo ghavo
  Sosunk zainam
  Monis-dhorm’ ho ekuch dhorm’
  Konnak sangunk mellonam
  Sangloleak tem somzonam
  Somzotoleachem tondd ugddonam
  Tondd ugoddtoleachem konn aikonam
  Aikololem konn konnak sangonam
  Sanglolem konnak avddonam
  Avoddta taka somaz mandun ghenam
  Dhormacho orth konnak kollonam!  
   
   

Son'var, 28 Febrer 2015

www.goa-world.com

Romi Konknni…. ‘Vollvolltta’ vo Vollvollayli?

SON’VARACHIM SUNGTTAM:

Romi Konknni….

‘Vollvolltta’ vo Vollvollayli?

 

-Jose Salvador Fernandes

 

 

Tin dis adim, Febrerachie 4ter, 2015 hanvem ‘AMCHO AVAZ’-achea 

som’padokak ‘Lokmot’ vibhagant vo her vibhagamni uzvaddaunk mhojem mot ‘lokmot@herald-goa.com’ hea pot’tear dhaddlem. Vangddach hanvem tem mot ‘sompadpi@herald-goa.com’

ani ‘amchoavaz@herald-goa.com’ he-ui e-pot’teancher dhaddlem. Tem mot dhaddtanam hanvem sompadpiak kelolem ‘covering letter’ toxea toxem khala ditam:  

 

 

Som’padok

‘Amcho Avaz’

Campal Trade Centre,

Campal, Ponnji, Gõy

 

Manest Som’padok,

 

Nomoskar!

 

‘Amcho Avaz’ satolleachea ‘Lokmot’ vibhagant vo her vibhagamni uzvaddaunk hanvem mhojem borovp hie chitti vangdda zoddlam.

 

Pavlam mhonn kollit korchem.  

 

Dev borem korum.

 

Borem magun,

 

Jose Salvador Fernandes

76, Igramoll, Deao,

Kepem, Gõy

Fon 9881810832 

 

 

Voilie ‘covering’ chittik zoddun ‘AMCHO AVAZ’ satolleachea som’padokak dhaddlolem mhojem motui, kosloch bodol korinastanam khala dilam:

 

 

 

Manest Som’padok,

Nomoskar!

24 Janer, 2015 tarkechea ‘Amcho Avaz’ satolleacher Agnelo-bab Piresan “Romi lipiyentli Konknni kiteak dara bhair vollvolltta?” oxea mathalleachem boroylolem borovp vachlem. Tem borovp vachun, Agnelo-bab apnnakuch fottoyta, vo vachpiancheam dolleank panam bandunk sodta kay, oso prosn monant ubo zalo.

Agnel-baban tea borovpant Tomazinho-bab Cardozok ul’lekhun eke kodden oxem boroylolem vachunk mellta – “Romi Konknni khatir tannem (mhonnje Tomazinho-baban) dilolea yogdanank xim-mer nam mhunnlear chuk zanvchinam. Punn Konknnintle Romi lipiyek nit mellovn

divpachem ani Raj bhas kaideant tika manan bhitor kaddpachem tachem sopon azun orde vatter asa.”

Aplem tem borovp sompoytanam Agnel-bab mhonnta – “Konknnintli Romi lipi jivi uronk, fulonk ani follevonk aiz jitli dorjedar borovpeanchi goroz asa titlich Romi lipiyentli Konknni mogan vachpeanchi goroz asa. Nam tor dara bhair vollvollttole Romi Konknnicher nodor marpi bab Tomazinho-chem sopon orde vatteruch urtolem.”

Agnelo-babachem tem borovp vachun, Romi Konknni fokot Tomazinho-bab Cardozakuch

Rajbhas Kaideant geloli zay asli, ani her Romi Konknniancho taka virodh aslo, oso-i monant

dubav upraslo.

Agnelo-bab zor “Konknnintle Romi lipiyek nit mellovn divpachem ani Raj bhas kaideant tika manan bhitor kaddpachem tachem (mhonnje Tomazinho-babachem) sopon azun orde vatter asa” oxem mhonnta zalear, tem sopon puray korpache bhangarache khub upay ani soeg hache poilim Tomazinho-babachea hatant asle.

Gõyant Rajbhaxechi chollvoll Konknni Porjecho Avaz (KPA) bavttea khal choltali. Tomazinho-babui tednam KPA-acho vangddi aslo.1987 vorsa Gõycho Rajbhas Kaido pas kelo. To Kaido pas korche poilinch, Konknnichi lipi Devnagori lipi astoli mhonn ‘HERALD’ disalleachea Julay 09, 1986 tarker chhapun haddlolea xevottachea Bilachea mosud’deant dilolem.

“Konkani language means the language in Devnagiri Script” oxem tantum spoxtt boroylolem aslem. Zalear, Tomazinho-bab KPA-ant ravun Rajbhas Kaideant Konknnichi lipi fokot Devnagori

aschi mhonn vavurtalo kay? Nam zalear, tea vellar Rajbhas Kaideant Romi lipiecho-i

aspav ascho mhonn tannem  fuddarponn gheun, aplem sopon purem korum yetalem nhoy?

Kiteak, Rajbhas chollvollint tednam bhag ghevpi choddant chodd lok Romi lipiek tenko divpi

asle.

1995 tem 1999 meren Tomazinho-bab Cardozo Gõychie Vidhan Sobhecho Sobhapoti aslo. Khoinchea-i desant vo rajyant rajki mon ani khuxi aslear ti-ti gozal rokddich follak yeta. Tomazinho-bab tednam protyokx vo oprotyokx ritin rajki mollar aslo mhonntoch, Rajbhas Kaideant Romi lipiecho-i aspav korpache proyotn korun tachean aplem sopon purem korunk zatalem. Tem kiteak korunk nam kay?

Gõy Rajbhas Kaideant Konknniche Romi lipiek-ui hok’kan ani kaidean zago mellche khatir bhasabhas korunk, ani fuddli dixa sodunk, 2013 vorsa Otubrachie 12ver Dalgado Konknni Akademin (DKA) Ponnje Tiatr Academy Goa-chea Vosreant ek kherit zomat apoyloli. Tie zomatint bhasabhas kortanam, Tomazinho-baban xevttim oxem mhonnlolem – “aichi hi zomat Dalgado Konknni Akademin apounk naka asli oxem mhaka dista.” Kiteak kay? Tomazinho-babak tachem sopon khorem zalolem kiteak naka aslem kay?   

Fattlea vorsa, 2014 Agostachie 15ver DKA-chie novie kocherichi ugtavnni keli. Hie ugtavnniechea dobajeak Gõycho tednancho mukhel montri Manohar Parrikar mukhel soiro mhonn hajir aslo. Tea vellar tachea sangata machier Tomazinho-babui aslo. Aplea ulovpantlean Tomazinho-bab Romi Konknni vixim khubxio gozali uloylo, punn modem tannem mukhel soireachea tonddak polleun oxem-i mhonnlem “… kaideak (mhonnje Rajbhas Kaideak) tumi hat laynam, naka lavum, punn zata zalear bhurgeank iskolamni xikovpak Romi lipin sondi diunchi… ” Hacho puravo Agost 15, 2014 disachea ‘Prudent Media’ chenolachea ‘Konknni Khobro’ mathallea khal azunui mellta.

Hem sogllem niyalltoch, “Konknnintle Romi lipiyek nit mellovn divpachem ani Raj bhas kaideant tika manan bhitor kaddpachem tachem (mhonnje Tomazinho-babachem) sopon azun orde vatter asa” oxem Agnel-babachean koxem mhonnum yeta? Hanga sopnacho mud’doch nam, zalear “sopon azun orde vatter asa” mhonnpacho mud’do koso yeum yeta?

Romi Konknnichea mollar, “hanv tuji fatt thapttitam, tum mhoji fatt thaptti” mhonnpache dis somple mhonn Agnel-baban zannam zavpachi goroz asa. Agnel-bab zor apnnak khoro potrokar mandta zalear, tannem apunn boroyta tea vixoyacho ani tea vixoya vixinchie poristhiticho kholayen obheas korchi goroz asa. Fuddarak tannem toxem korun, Romi Konknnicher ani Romi Konknni vixim sot gozalincho aspav aslolim borovpam korchim mhonn mhoje anvdde.

 

Jose Salvador Fernandes

76, Igramoll, Deao,

Kepem, Gõy

Fon 9881810832

 

 

 

Kal Sukrar. Sanjechim 3.56 orancher ‘Amcho Avaz’ satolleachea som’padokan mhojie tie chittik vichitr zap dili. Ti vichitr zap tannem ‘sompadpi@herald-goa.com’ ani ‘amchoavaz@herald-goa.com’ he-ui e-pot’teancher vangddach dhaddli. Ti zap oxi asli:  

 

 

Tumi dhaddloli som'padokak chitt mell’li.

 

Lokmot vibhagan jeo chitti ami porgott kortanv tancho akar 300 utram poros komi aspak zai. Tumchi chitt khup lamb asa.

 

Tea khatir 300 utram poros komi shobdanchi chitt dhaddlear

ani ti chitt porgottpak yog'ya aslear ami jerul porgott’teleanv. 

 

Sompadpi

Amcho Avaz

 

Ti zap vachun zatoch mhojea monant kaim prosn upzole:

1.       Chittichie survatek zaka chitt dhaddlia taka nanvan ‘address’ korunk nam. Kiteak kay? ‘AMCHO AVAZ’-achem tem dhoronn kay? ‘AMCHO AVAZ’ hem satollem nanvostea ‘Herald Publications’-achem. Nanvostea Prokaxonanchem mhonntoch, chitt dhaddpiak nanvan ‘address’ korchi rit tori asunk naka asli?

2.       Zap mhonn dhaddloli chittichi poili voll, “Tumi dhaddloli som'padokak chitt mell’li” oxea utramni boroyloli asa. Ti voll vachtoch, ti chitt ‘AMCHO AVAZ’ som’padokachea nanvan ani konnem boroylia kay kitem oso dubhav yeta.

3.       Aplie zapent som’padok mhonnta – “Lokmot vibhagan jeo chitti ami porgott kortanv tancho akar 300 utram poros komi aspak zai. Tumchi chitt khup lamb asa.” Mhojem mot ugtavpi ti chitt ‘Lokmot’ vibhagant chhapunk oddchonn asa zalear, ti “Amcho Avaz’ satolleachea ‘Lokmot’ vibhagant vo her vibhagamni uzvaddaunk hanvem mhojem borovp hie chitti vangdda zoddlam” oxem hanvem spoxtt ritin boroylolem. Torui, ‘AMCHO AVAZ’ satolleacho som’padokan tea satolleachea dusrea zagear, zoim utranchi xim’ nam thoim  kiteak chhapun  haddunk nam?

4.       Ti chitt sompoytanam, ‘Amcho Avaz’ satolleacho som’padok oxem boroyta – “Tea khatir 300 utram poros komi shobdanchi chitt dhaddlear ani ti chitt porgottpak yog'ya aslear ami jerul porgott’teleanv.” Atam hie vollintlo ‘yog’ya’ hea utracho orth kitem mhonnun ghevpacho? ‘AMCHO AVAZ’ satolleacher jem kitem chhapun yeta tem vachpiamni sogllem sot ani khorem mhonn gillun ogich ravpachem? ‘AMCHO AVAZ’ satolleacher ailolie khoinchie-i khobre vixim vachpiank aplem mot tea satolleacher manddun dista zalear, som’padokan tanchem ‘Freedom of Expression’ kiteak chepun-damun dovrop? Zalear, Romi Konknnichea mollaveli hi kosli potrokarita?

 

5.       Vo, ‘Amcho Avaz’ satolleacho som’padok mhoji chitt chhapunk zainam mhonn orth naslolim karonnam diun, khoim tori mhotvachie ani sotachie gozalicher dhampnnem ghalunk sodta kay?

 

Chintunk ginean asloleamnim chintchem….

 

Chotray: “Romi lipiyentli Konknni kiteak dara bhair vollvolltta?” hem borovp http://www.amchoavaz.in/epapermain.aspx?queryed=69&eddate=1%2F24%2F2015#.VNWlLs9udos.gmail linkacher vachuink mellta.

Febrer 7, 2015

www.goa-world.com