Tiatr.....Ixtt.....Ani Koddu Mon...

Son'varachim Sungttam

TIATR-------IXTT---------- ANI KODDU MON...

-Jose Salvador Fernandes

“Faleam sanjer tiatrak vochum-ia?” Chav piyeunk boslole kodden ixttan vicharlem.

“Hanvem tiatr polleunchem soddlear kitlim vorsam zalim zannam?” Hanvem chavek ghontt marit mhonnlem.

“Tiatr pollevpachem soddlem?” Hanvem kitem sonvsara bhaili gozal sanglolea porim  ixttan ojapun vicharlem.

“Pollevpa sarkem mullavem kitem asta tor tantum?” Hanvem chavek porot-ui ghontt marit vicharlem.

“Kainch nastananch itlo lok tiatrank veta?” Ixttan mhojea prosnak prosnanuch zap dili.

“Lok veta mhonn hanvem-i vochunkuch zai oso kaido nam nhoi?”

“Kaido aslolo zalear vochpacho?” Ixtt mhaka ulovpant sanddpachi vatt sodtalo.

“Zoim tiatristank lokak tiatrak apouncho kaido nam, thoim lokamni tiatrak yeunkuch zai mhonn anik kaido astolo?” Hanvem-i taka prosnanuch zap dili.

“Sodd to kaido. Lok apli avodd mhonn tiatrank  vetat.”

“Kaim vorsam fattim mhaka-i toslich avodd asli.” Hanvem-i mhoje ‘avddichi’ khobor sangli.

“Zalear kednanchean sanddli?” Ami uloytolea vixoyacher zoxem kitem apunn ‘project’ korpacho aslolea vori ixtt mhaka bariksannen vichartalo.

“Tea vorsa bapay vangdda tiatr polletanam, tiatracho poilo ani dusro pordo mhonn hanv mhojench ek-anki nattok polletalom... toch dekavo... tich borpavoll...”

“Oxem koxem zaum yeta?” Ixttan koplak mirio ghalit dubavan vicharlem.

“Mhaka-i toch prosn poddlolo. Punn ji kolakarn mhojea ek-anki nattkant nhestali tinnem machier proves kelo, tednam mhojea prosnachi zap mell’li. Tednanchean tiatr pollevpachi avodduch uddli.” Atam mhonnosor ixttacho mhojea gozalincher visvas boslo mhonn tachem mukhamoll sangtalem.

“Zalear tednanchean tum tiatr pollenam tor?”

“Fattlea vorsa, osoch khuxie bhair gelolom. Modinch uttun ailom!” Tiatra vixim  mhozo anik ek onnbhov sangpachi palli darachea umbrear ubi ravloli.

“Kitem? Modinch uttun ailo? Oxem kitem ghoddlem tor?” Ixttachi porot-ui tich bariksann.

“Tiatracho chovto pordo meren, adim Kala Academyche Tiatr Spordhent pollelolo tiatr hanv tea disa, vegllea nanvan, vegllea kolakaranchea rupan porot polletalom. Don disamni tea tiatracho mullavo borovpi mhaka dhoddlo. Hanvem taka soroll vicharlem – tuzo xxx tiatr tunvem xxx haka kitlea duddvank viklo? To mhonnunk laglo apnnem vikunk nam, punn to dakoyta. Toxi knnachi-i sahityakruti gheun konnachean-ui aplea nanvan koxi dakoum yeta? Tacher kes kiteak dghalinam, oxem hanvem tiatrachea mullavea borovpiak sangtoch, tannem diloli zap mhoje tokler danddo koso bhoglo!”

“Oxi danddeanchi bhas uloyta to, kitem vegllem sanglem tuka tannem?” Ixtt zannam zaunk boroch itsuk zalolo.

“Mhonnunk laglo, apunn-ui tea tiatracho mullavo borovpi nhoi! Mullant to tiatr Moratthi nattkachi kopi. Zalear kes ghalpacho prosnuch yenam nhoi?” Mhojem hem sangnnem aikun mhozo ixtt-ui goddibhor ogoch urlo. “Tuje-i tokler danddo poddlo?” Hanvem fokannam korpacho yotn kelo.

“Mhonntoch, atam soglle tiatr hache-tache kopi korunuch toyar kelole astat oxea nirnnoyacher tum pavla. Oxench mum?” Ixttan aple porim mhojea sangnneacho nixkorx kaddpacho proyotn kelo.

“Nam. Hanga nixkorx kaddpacho mud’do yech nam. Toxem kelem zalear, khubxe zonn je svota tiatr boroun dakoytat tancher onit zatoli.” Mhojem chintop tachea chintpa poros vegllem mhonn hanvem ixttak thavem kelem.

                         

“Tunvem kitlem-i toxem mhonnlem zalear, tujea ulovpacho orth hanv mhonntam tosoch zata!” Ixtt aplench khorem korunk sodtalo.

“Zaunkuch nozo.”

“Kiteak?” Ixtt umollxiken mhoje zapechi vatt polleun aslo.   

“Tum, hanvem sanglolea ghoddnniancher adarun tuzo nixkorx kaddta. Mhojem toxem nhoi. Tiatram vixinchea onnbhovamni mhojem mon koddu kelam, monan nixkorx mat kaddunk nam. Ek-don gozalincher adarun nixkorx kaddop pixeponnachem thartolem! Disonam tuka?” Ixttan zap diunk nam. Tea bodlek, vichar korun uprant sangtam mhonnlem, ani to vixoy bond korun vegllench kitem ulounk lagle.           

www.goa-world. com

GULF-GOANS e-NEWSLETTER (since 1994)

http://www.yahoogroups.com/group/gulf-goans/ http://www.colaco.net/ http://www.live365.com/index.live

EKVISVE PAVTT MODDEM USTILEM...... TICH GHANN-GUTT’TANN

SON’VARACHIM SUNGTTAM:

EKVISVE PAVTT MODDEM USTILEM...

... TICH GHANN-GUTT’TANN

-Jose Salvador Fernandes

Kristi dhormant, monis ontorlo mhonntoch taka ‘matiyecho kelolea mon’xak’ matiyek laytat. Fuddlim tin vorsam bhorlea bogor tacho fondd ustinant. Uprant gorje promannem to fondd ustitoch tantum melltat fokot melolea mon’xachim haddam. Hindu dhormantlo monis hea sonvsarak ontortoch tachem moddem mosunddient vhorun dohon kortat. Uprant jeo osti urtat teo Gangechea povitr udkachem mon ballgun vhanvtea udkant soddtat. Musolman dhormant-ui, zanazak tanche ritin matiyek laytat. Veg-vegllea dhormant, ontorlolea mon’xachem moddem oxem man-adoran, tore-toreche ritin xevottak pavoytat. Sonvsarantlea sogllea dhormam modem, Konknnichea mollar anik ek dhorm’ asa – komunal dhorm’. Devache nagri lipieche ani zannim apli bud devache nagri lipiechea  ghannant dovorlea te pattlavdar hea dhormache vangddi asat. Ani he lok, dor don vorsamni ‘Akhil Bharoti Konknni Sommelon’ nanvachem moddem ustun, Konkan vattarantlea veg-vegllea rajyachea khandar diun bhonvddaytat, ani uprant fuddlim don vorsam tachi khoboruch asonam.

Sod’deak hem ‘Akhil Bharoti Konknni Sommelon’ nanvachem moddem, ekvisve pavtt Gõyant kal sanjer porot ustilam. Ani tea ustilolea moddeak sodam porim ‘ek bhas, ek lipi, ek somaz’ hea sutrantlean sumara bhaili ani sosunk zainam titli zati-katichea bhed-bhavachi, komunalponnachi, bhaxechea mollar dusreank damun ani chepun  dovorpachi ghann yeta.

Fattlim vis vorsam hem moddem ‘ek bhas, ek lipi, ek somaz’ani ‘ekcharachi goroz’ hech ghannint add ani soroll vatten kusot ani ghannot asa, ani fuddarak-ui tachi poristhiti tich astoli hem khatrien sangum yeta. Kiteak, hea kuslolea moddeacho ‘ek bhas, ek lipi, ek somaz’ ho khotto hetu zoddop kottinuch nhoi, punn oxokyo asa. Hea kuslolea moddeacho mharu ‘ek bhas, ek lipi, ek somaz’ ani ‘ekcharachi goroz’oxe torechi bhas uloyta, punn ho ‘ekchar’ ghoddoun haddunk sodtat tednam her lipianchea konknneank, Konknnichea sonvsthank mud’dom zaun nodre add kortat. Nam tor, jea rajyant ekvisvem Akhil Bharoti Konknni Sommelon ghoddoun haddlam, teach rajyantle Dalgado Konknni Akademik hea Sommelonak kiteak amontronn nam? 

Sumar dedd voros fattim, ‘Jagotik Konknni Songhotton’ nanvachi ek sonvstha zolmak ailea. Sonvsarantlea 13 desantleo 126 Konknni sonvstha - Gõyantleo 35, Maharaxttrantleo 17, Kornattokantleo 43, Kerollantleo  9, Dil’lintli 1, U.A.E. hangachi 1, Qataracheo 2, Kuveittcheo 5, Omanantli 1, Bahrainantli 1, Saudiantleo 2,  Amerikentleo 2, Canadantleo 2, Australiantli 1, U.K.-cheo 2, Pakistanantli 1 ani Izraelantli 1 –  hea Jagotik Konknni Songhottonecheo vangddi asat. He-ui sonvsthek hea Sommelonak amontronn nam?  Mongllurant sonvsarbhor famad zaloli ‘Mandd Sobhann’ sonvstha asa. Tika-i amontronn nam! Oxim anik-ui Konknni sonvstha ani mon’xam astolim, zankam hea Sommelonachea ‘sobhyo’ mon’xamni bhairayleat zaum-ie. Zalear, ‘ek bhas, ek lipi, ek somaz’ ani ‘ekcharachi goroz’ hem sogllem dolleank udok lavpacheo khobro, ani xakek upkaro nasloleo zun bhajio mum? Osleamni Konknni mon’xacho ekchar ani ekvott zata? Ekchara ani ekvotta poros, fattlim kitlimxinch  vorsam, kitlexech pottin Konknni mollar Konknni mon’xam ani Konknni somaza modem hea moddean ghaloli ani kednanch bhorun yeunchi nam tosli hi futt asa! 

Konknni mollar jeo gozali fuddarache nodrentlean Konknni mon’xachea boreponnak hatbhar lavcheo nant, teo ekdancheo sompovop xanneponnachem asta. Te nodrentlean, ‘ek bhas, ek lipi, ek somaz’ ani ‘ekcharachi goroz’ oxe toreche Konknni mon’xancher ani Konknni somazacher dusvasache fator xevttun, Konknni mon’xank ani somazak doxi korunk zababdar aslolem Akhil Bharoti Konknni Sommelon atam bond zauncho vichar korunk zai. Jim Konknnichim Akhil Bharoti Sommelonam sorv lipincho, zati-katincho bhed-bhav pois korun, komunalponnak khuinch zago dinastanam konknneank KONKNNI bhaxechea nanvan eka panvddear haddunk vo zomounk xokonam, sogllim ekech avoy bhaxechim bhurgim mhonn somzonam zaunk monache nodrent khotteponnachem ‘ful’ pikoun aplea dolleancher addechi say haddlea, toslim Sommelon zaich kiteak? Toslea Sommelonank bhaxechech nhoi, punn khuinchech nodrentlean orth ani mol asonam.

Toxem polleunk gelear, portun-portun ustilolea moddeak-ui orth ani mol asonam. Asta ti fokot tea moddeachi ghann ani gutt’tann. Konknni mollar hi ghann-gutt’tann ekdanchi sompounk, dor don vorsamni ustun don-tin dis hea-tea rajyachea khandar dovrun Akhil Bharoti Konknni Sommelonachem moddem toxench gheun bhonvun, Konknni mon’xank ani somazak ghatki tharche poros, jea khottea hetun ghoddoylam tech khottie matiyek lavunk zai... tachem dohon korun tacheo osti Konknni Gangechea vhanvtea udkant soddunk zai...  tachem zanazak matiyek launk zai.            

Jose Salvador Fernandes

Son'var, 16 Febrer 2013

www.goa-world.com 

Foto: DKA-chea upkarant.

Adlea lekh:
http://sonvarchimsungttam.blogspot.com/2011/11/jks-achem-goyantlem-poilem-itihasik.html
 http://www.goa-world.com/goa/goenchoulo/issue1/sorvbhonvtim.html.
______________________________________________________________________

http://www.worldlanguage.com/Products/Konkani-SeeMarathi/Dictionary/Page1.htm

POILO KOMUNHANV - BHURGEACHEA KAZARACHI ‘PRACTICE’?

SON’VARACHIM SUNGTTAM:

POILO KOMUNHANV -  

                                      BHURGEACHEA KAZARACHI ‘PRACTICE’?

-Jose Salvador Fernandes

Fattlea Aitarachi gozal. Aple ekuch ek dhuvechea poilea komunhanva nimitan, tin ganvam poltoddi chovtea ganvant ravpi mhojea ixttan dobazo tharaylolo. Sokall ordi zaloli. Vatter, dhovi nhesonn nhesun, ani sozoyloleo vati eka hatant dhorun, kaim bhurgim aplea avoy-bapay vangdda umedin, nettan cholun ghora portotanam pollelim. Kaim zonnam saikolincher ani mottor-saikolincher bosun portotalim. Khuinchean? Ganvche igorjek thaun. Mhonnche, mhojea ganvant tea aitara bhurgeank Poilo Komunhanv aslo.

Poilech pavtt komunhanv ghetololim bhurgim, avoy-bapay vangdda cholun vo saikolir bosun yeta-vetanam, konnachem-i mon oddpi to dekavo mhaka poilincheanuch khub avoddta. Hea dekaveantlean khubxeo gozali thaveo zatat – Bhurgeank Poilo Komunhanv mhonntoch, tea disa ganvant ek vegllem vatavoronn nirmann zata. Ganvantlea xezari vaddeank aplea xezariak konn poilo komunhanv gheta, vo konnem ghetla tem choddxea promannan kollun yeta. Poilea komunhanvachi ti dhovi nhesonn nhesun, bhurgeank-ui apunn monam-kallzamni dhovim-dhovinch asat oxem bhogta, ani tem tanche chalintlean dista. Tanchea mukhamollavelem tem deivik inosentponn, khuxalkayentlean poilech pavtt angant upzololo to tancho agllo-vegllo nett, vatten yevpi-vochpiamni mud’dom zaun apnnak polleunchem oxi tanchea monant lipun asloli ti opekxa, tea disa khatir mud’dom amontronn diun apoylolea vori tanchi ti dhove nhesounnentli sobhyo vagnnuk, adi. Khuinche-i firgojent zaum, vorsantlean ekuch pavtt ho dekavo polleunk mellta! Ho dekavo monache tablet-icher polletanam, tea disa ixttachea ghora sodam poros matxe vegim pavlom dislem.

Somarombha khatir mattvant zomlolea itlea loka modinch ixttachi dhuv mell’li. Tika borem anvddetoch,  bhair-bhitor zaun ixttak sodlo. Punn to kamani gul’l aslo. Monant mhonnlem, ho az mukhel montria poros-ui chodd okupad asa. Taka uprant bhettop xanneponnachem zatolem. Mattvantle eke bosker boslom. Thoim bosun fattlean-fuddlean man ghunvddaun sogllem nirkitanam (observe), ixttachea xezariak aslolea ghoracher nodor geli. Thoimsor-ui dobazo aslo, punn kazaracho. Ghora mukhar ubi asloli dhovi Volkswagen Passat nomuneachi, uncha-molachea lesimni ani fulamni nhesoyloli gaddi moneamni tench sangtali.

“Fokot gaddiek polleum naka, amkam-i polle,” konnem tori mhojexim yeun mhonnlem. Polle zalear ixtt mhozo!

“Va! Ekach vaddeant don sonvskar. Tumger poilo komunhanv, ani tanger kazar!”

“Kazar nhoi, thoimsor-ui poilo komunhanv. Mhoje porim taka-i ekuch dhuv.” Ixttachem sangun somptanch taka konnem tori apoun vhelo.

Ixttachi ti zap aikun kallzant ‘ghosss’ zalem! Poilea Komunhanvak-ui atam oxeo gaddio nhesoun vhortat?! Mhozo mood-uch off zalo! Yetanam vatter, dhovi nhesonn nhesun, ani nettoyloleo vati hatant dhorun, aplea avoy-bapay vangdda cholun ghora portotalim tea bhurgeamni hem komunhanvachem mottor pollelolem zalear, tankam kitem bhogpachem kai?    

Poilea komunhanvacho dis lagim pavta-pavta, igorje kodde tea disa sogllem vevosthit ani xistin zaunchem mhonn igorjeche vhoddil, bhurgim-umedvaram khatir tanchea avoy-bapyk orthabhorit nem’ghaltat – misak omkeach vella adim pavop, dhovich nhesonn nhesop, hatant vat asunkuch zai, misachi rit choltanam modem konnench fottu kaddunk zainam, adi. Avoy-bapuy aplea bhurgeam khatir he nem’ hum-kum korinastanam palltat ti khub bori gozal. Mhojea motan, hea nemant, igorje koddchean anik eka nemachi bhor poddop gorjechi – Poilo Komunhanv ghevpi bhurgeank sozoylolea motor-gaddiamni haddop nam!

Khubxe pavtti bhurgim, apnna sorbhonvtim aslolim konn bhurgim aplea poros chodd kitem kortat, kitlim borim nhestat, gaddiam-mottoramni koxim bhonvtat, ani tosleank somaz koso unchle nodren polleta tem zanniv kortat; ani tantuntleanuch khubxe pavtti tanchim tornnim monam unneponnanchea bhavnank zolm’ ditat. Him unneponnanchim bhavnam, fuddem vochun vaddtea bhurgeanchea jivitacher vaitt porinnam’ korchi xoketay asa.

Apnnak ekuch dhuv vo put, vo aplea ghorant bhurgeacho poiloch komunhanv mhonnit dobajea nimitan pivnnank, jevnnam-khannank zo hixeoba bhair khorch kortat to, Gujratcho mukhel montri Narendra Modik desacho prodhan montri korop vo nam oxe torecho vadacho vixoy. “Hanv tea bhurgeacho podon” vo “hanv tachea bapaycho ghott ixtt dekun hanvem taka poilea komunhanvachea somarombha khatir to vosro sponsor kela” ho-ui bhasabhaxecho vixoy. Punn, poilea komunhanvacho mukhel dobazo zaupi zagear – igorjek - yetanam, bhurgeam-umedvarank gaddio-ghodde aslolea avoy-bapaymani teo sozoun haddop nam oso-i ek nem’ asop mhotvachem.

Nam zalear, fuddarak aplea bhurgeanchea poilea komunhanva nimitan konn-ui avoy-bapuy utt’tolim, ani kazarank kortat toxeo komunhanvam khatir-ui bhaddeacheo gaddio nhesoun haddtolim. Ani oxem ekdam’ suru zalem zalear, tantuntlean anik-ui khubxea noxttea khorchacheo gozali suru zaunchi vatt ugti zatoli. Lhan bhurgeank, tanchea bhurgeponnantuch thaun khospayechea jivitachi khotti odd ani avodd nirmann zaum yeta. Dekun avoy-bapayamni, aplea bhurgem sovem dobajeam nimitan mog ugtaytanam, tea mogak khoim tori ximechi voll oddpachi goroz asa.          

(Jose Salvador Fernandes)

www.goa-world.com

9-Febrer-2013

VIVA CARNAVAL

                                                                                      www.goa-world.com/expressions

THOMAS STEPHENS KONKNNI KENDR...KONNACHEA HATANT TOL’LUK?

SON’VARACHIM SUNGTTAM:

THOMAS STEPHENS KONKNNI KENDR...

KONNACHEA HATANT TOL’LUK?

-Jose Salvador Fernandes

 

Gõyant Konknnichea mollar asloleo sonvstha mezunk, amchea don-ui hatanchim bottam khub zalim. Hea Konknni sonvsthancho ankddo hatanchea dha-ui bottam poros unno asum yeta. Punn aichea kallar, ankddeank (quantity) vhoddlemxem mhotv asonam, gunnak (quality) mat asta. Gõyant aslolea Konknni sonvsthancho gunnache thir nodrentlean niyall kelo zalear, bhou thoddeo sonvstha amchea monanchea pordear yeun ubeo ravtat. Tantuntli ek mhollear, Thomas Stephens Konknni Kendr. 

Sonvsarbhor nanvostem aslolem Thomas Stephens Konknni Kendrak (TSKK), Gõy-Poona  Prantachea Jezvitamni Janerache 26ver, 1980 vorsa mull ghalem. Hi sonvstha 1982 vorsantlea Mars mhoineant ‘Societies Registration Act XXI of 1860’ hache khal nond kortoch, 23/Goa/82 oso tika Nondnni Ankddo favlo.  He sonvsthechea ‘Memorandum of Association’-acher 10 zonn jezvitamni nixanni keloli, tantuntle az fokot panch zonn jive asat - Pa. Vasco do Rego, S.J., Pa. Pratap Naik, S.J., Pa. Leslie Francis, S.J., Pa. Braz Faleiro, S.J. ani Dr. Teotonio de Souza.     

TSSK-antlean Konknnichi khorea orthan udorgot korche ani zaunche khatir, Konknni bhaxechi tollmoll aslolea tea jezvitamni ghoddoylole kaim hetu oxe asat:

 

·                     Konknni bhaxecho obheas ani udorgot korop.

 

·                     Ulovpam, xibiram, prokaxnnio, prodorxonam ani her favo tea upayam udexim sôd-vavrachi zagrutay korop.

 

·                     Konknnicho sôd-vavr korche khatir vachop-ghoracheo ani margdorxonacheo lagu zavpi her sovloti divop.

·                      

Zollim-mollim ximpoddlolea Konknni lokachea sahityak ani sonvskrutayek lagu zavpi daklle, rikordd ani her vostu ekttavop  ani samballop.

 

·                     Konknni bhaxecho ani tika lagu zavpi bhasancho obheas korunk ut’tejon divop. 

 

·                     Konknni bhaxechea adlea ani sod’deachea sahityacheachea ani sonvskrutayechea sôd-vavrak hatbhar lavop.

 

·                     Konknni bhaxechi udorgot dolleam mukhar dovrun xibiram ani porison’vad ghoddoun haddop.

 

 

Konknnicho sôd-vavr toxench xikxonnik ani sonvskrutik vavr korche khatir Thomas Stephens Konknni Kendr sthaplem. Alto Porvore aslolea hea Kendrak, sollavea xekddeantlo Inglez Jezvit Pa. Thomas Stephens hea bhaxik zannarachem nanv dilam. Konknni bhas, sahitya ani sonvskruti udexim Konknni lokacho ekvott ghoddoun haddop, he nodrentlean Thomas Stephens Konknni Kendr kal meren vavurlam.

Eke ratin faleam zainaslolea hea sonvsarant, Thomas Stephens Konknni Kendr niz Konknni mon'xancho mozbut ekvott ghoddounk khub toramni vavurlam. Mon'xan, ani kherit bhaxen Konknni mon'xan zannvayechea jevnnan aplea monachi bhuk bagounche khatir, hea Kendrant adhunik vachnaloy (library) asa. He vachnaloyent Konknniche Romi, Devonagori ani Kon'nodd lipiantlim pustokam poilo-unchlo zago samballun aslolim distat. Toxench, her Bharoti bhasantle sobdkôx, vyakoronnanchim ani sahityachim pustokam hi vachnaloy aplem manachem ghor korun asat. Gõycho ani Konknnicho itihas, bhas-xastr, sonvskrutik monis-xastr, totv-ginean, Bharoti sonvskrutay oxea sabar vixoyancher adarlolea pondra hozar odik gronthamni hem Kendr borench girest asa. Fattlim sabar vorsam, hea Kendrache vachnaloyecho Konknni vixincho obheas korpi sonvsarantlea sabar zannaramni faido kaddla.     

 

Fattlim 30 odik vorsam hem Kendr Konknni mollar pott'tiddken vavr korit ailolea khatir, Gõyant Konknni bhaxechim mullam, zomnint riglolea maddachea pallam poros-ui ghott zaleant. Kal meren hea Kendran Konknnintlean sôd-vavrachim ani xikxonnanchim pustokam uzvaddaylim. Hea xivay, lhan bhurgeam khatir gavpachea gitancheo, bhokti gitancheo CD uzvaddayleo ani Konknni bhas xikunk lagu zavpi bhou mhotvacheo gozali legit bhou fixalkayen toyar keleo. Xikpiank, xikovpiank ani sôd-vavr korpiank Konknni xikounk, hea Kendran fattlim sabar vorsam tanche khatir xibiram, karya-xallo ani borovpache kurs manddun haddle, ani Konknni mon'xank Konknnint odikuch thirayle.

Xikxonnik voros 2005-2006 thaun, hea Kendrak ‘Postgraduate’ Konknni Sôd-vavrachem Kendr mhonn Gõy Vidyapittha koddchean durmill man ani maneotay mell’li.  Sorgest Pa. Matthew Almeida ani Pa. Pratap Naik hankam Gõy Vidyapitthan Ph.D.-che margdorxok ani Konknni bhaxeche zannar mhonn nemle. Hea Kendrant sôd-vavr korpiamni Konknni bhaxecher adarlole aple zannvayeche ‘papaer’ thollavea, raxttrik ani ontor’raxttrik porison’vadamni manddun Kendrak, Konknnik ani Gõyak unchlo man haddlo.  

 

Konknni mollar zatolea borea vavrak, kherit bhaxen Romi lipintlea vavrak mozuri ani tenko diunche khatir, Thomas Stephens Konknni Kendran borovpiam, kolakaram ani xikpiam khatir sabar puroskar ani skolarxipo sthapleo, zaka lagun Konknni mollar zatolea vavrak anik-ui dorjeachem mol ailem. Hantum, Jezvit Antonio Pereira Konknni Puroskar, Carvalho Ghorannem Puroskar, TSKK Kola Puroskar (Mungllurchea Mandd Sobhannachea sangata), Konknni Martir Floriano Vaz Puroskar, adi. hancho aspav asa.

Hea Kendrachem anik ek khaxeleponn mhollear tichi ‘botanical’ bag. Kal meren jivi-jivall aslole he Kendrache bagechi konnak-ui nosay dispa favo itli ti sobit-sundor ani vevosthit asli. He bagentlea dor eka fulam-follanchea zhaddak thollavem, inglez ani ‘botanical’ nanv diun Konknni mon'xak zhadda-peddanchi-i vollok divpacho boro vavr zatalo. 2008 vorsantlea Janerachea mhoineant, Kendrache he dorjedar bagik ‘Botanical Society of Goa’-acho puroskar favlo.

Konknni bhaxe sorbhonvtim ghunvpi ani te bhaxek lagu zavpi sabar torecho vavr hea Kendrantlean zalo, Konknni bhaxek ani ti bhas uloytoleank, boroytoleank ani ap-aple porim samballunk vavurtoleank Konknnichi protixtthechi vollok favo zali!  

2010 vorsa Dezembrache 9ver, Konknni bhaxek molachem yogdan dilolea sonvsarantlea 25 Konknni sonvsthancho, tednanchi Bharotachi Raxttrpoti Xmt. Pratibhadevi Patil hichea hatantlean bhouman zalo. Tea sonvstham modim TSKK-acho aspav aslo!

Survatek thaun niz ani fixal Konknni jezvit padrimni zoxe porim Pa. Vasco do Rego, S.J., (sorgest) Pa. Moreno de Souza, S.J., (sorgest) Pa. (Dr.) Matthew Almeida, S.J. ani Pa. (Dr.) Pratap Naik, S.J. hannim aplea mozbut buzancher Kendrak bhouch dittayen samball’lem. Hantuntlea (Sorgest) Pa. (Dr.) Matthew Almeida, S.J. ani Pa. (Dr.) Pratap Naik, S.J. hannim hea Kendrak aplea monanchem, kuddinchea ghamachem sarem ghalun tust-tokhnnay korpa sarkem ximplem, vaddoylem ani sonvsarbhor Konknni soit famad kelem! Tantuntlean tannim Jezvit sonvsthek, Konknni bhaxek ani Kendrak nanv haddlem. Punn az...

 

.... az hea Kendrachi poristhiti husko ani churchure korpa sarki zalea. Fattlim sabar vorsam hea Kendrant zo Konknnicho ani Konknni vixincho gorjecho, mol-mhotvacho vavr zatalo to bond poddla. Konknniche je udorgoti khatir hem Kendr sthaplolem tea udorgotichea vavrak atam mar bosla. Tutt ailea. Tea Konknni Kendrachi vollok atam fokot vonttim purtich urunk suru zalea. Karonn..?

 

Atam hem Kendr jea jezvitanchea hatant ghalam, tankam KONKNNI borounk yenam, KONKNNI-chi udorgot mhollear kitem ti somzonam, Sôd-vavrachi ‘ABCD’ kollonam... Dusrea utramni, tankam KONKNNI yenam. Ani tacho porinnam’ mhonn fattlea dedd-don vorsanchea kallant, hea Kendrantlean Konknnichea udorgotichea vavrak kainch borem yeunk nam. Khorench, Konknni mon’xam khatir hi ek durdoivachi gozal!

 

Itlench nhoi, 2008 vorsa Gõyantli boreantli bori ‘botanical’ bag mhonn pusroskar favo zalole Kendrache te bagik porian mar bosla. Bag sukun gelea, Konknni bag kabar zalea! Te bagint atam suknnim nhoi, sorop, xirle ani her jivannim ghoram korunk lagleant!

 

Punn, bhorun kaddunk zaunchem nam toslem Konknnichem luksonn zaunchi gozal hea Kendrachea jivitant ghoddouncho guddmell cholta. Thomas Stephens Konknni Kendrachea xezariak jezvitanchem Xavier Centre of Historical Research (XCHR) asa. Atam, TSKK hea XCHR-ant vilin (merger) korpache proyotn chalu asat. Ani hachem khoreponn Gõy Jezvit Prantachea ‘JIVIT’ (Vol. 20, No. 12, December 2012) ani “Report of Xavier Centre of Historical Research, 2012” hea khobram-potramni vachunk mellta.

 

XCHR hem Gõychea itihasak hatbhar launk sthaplolem. Zorui XCHR ani TSKK ekach durga bhitor, ekamekachea xezariak asat, torui tanche hetu, vavurpi, vavurpi somitio, bandavolli, vachnaloyam ani her sovloteo ekameka pasun puray ritin veglleo asat ani zullonant.

 

XCHR tor virgollaun uddoylem, tacho konnacheruch kosloch porinnam’ zauncho nam, ani konnak koslench luksonn-ui zaunchem nam. Karonn, Gõychea itihasacho vavr fuddem vhorunk anik khubxeo sonvstha asat. Punn TSKK hem Konknni bhaxechea, sahityachea, xikxonnachea ani sonvskrutayechea sôd-vavra khatir sthaplolem ekuch ek Kendr mhonntoch, Konknniche udorgoti khatir tachea asnneachi nibel goroz asa. Dekunuch, tem vattaunche khatir TSKK-chea borem magpaimni ‘SAVE TSKK FRONT’ suru kela. Tokli voir kaddun TSKK-ak manan pollevpiamni, zachea mukhelponna khal TSKK ani XCHR yeta tea Gõy Jezvitanchea Prantik Vhoddilak vilin korpa add nixed ugtaun chitti boroyleat. Titlench nhoi, TSKK-a bhitor Konknnichi udorgot korunk khub vav ani takot asa mhonn monantlean pottloleamni Roma xarant aslolea Jezvitanchea Vhoddilak-ui he vixim chitti boroun TSKK vattaunchem mhonn maglam.

TSKK porot adlea rullar yetolem ani tantuntlean Konknniche udorgotik adle poros-ui odik nett yetolo zalear don gozali zaunchi goroz asa:

 

1.   Gõychea Jezvitamni TSKK vilin vo virgollaupachi kolpona fattim gheunk zai, ani te vixim TSKK-chea borem magpiank ani Konknni mogiank asvasonn diunk zai.

 

2.    TSKK-acho Direktor mhonn Konknni bhaxechi khori ani bori zannvay aslolo, fixal Konknni mon’xak nemunk zai.

 

TSKK-achea borem magpianchim ani Konknni mogianchim-i hinch magnnim asat.