Friday, November 29, 2013

NATTKAM

SON’VARACHIM SUNGTTAM: 

N A T T K A M
   
 -          Jose Salvador Fernandes


Dha zonnanchea kol’leanna khatir
Okhondd buzanchi tuka machi dili
Machiyer nam-nam torechim nattkam khellun
Tunvem tuje pãy mozbut kele…
Itle mozbut kele….
Atam tech machiyek tum khontto marunk lagla…

Hoi! Machi sodanch pãya tolla asta
Punn pãyanchea furamni
Tujea gorva itli nhoi zalear
Thoddi tori zomni poros-ui voir asta hem-ui titlench khorem!

Kol’leannachim nattkam tujim
Polloytoleank khub avoddlim…
Punn tea nattkam fattlim tujim khorim rupddim
Ekleakuch khobor asa…
Tie machiyek

Tika tum fottounk xokonam
Kitench lipounk xokonam
Atam ti moddta zalear
Tika samballunk-ui dhozonam
Svotak vattaunk-ui zaunchem nam

Tuzo fondd tunvem uspila

Tantum dusro poddchonam!



www.goa-world.com
Novembre 30, 2013

Friday, November 8, 2013

ENCLIDAS DE ELLY – ROMI KONKNNI POTROKARITENTLO MOILAM-FATOR


SON’VARACHIM SUNGTTAM:

 ENCLIDAS DE ELLY – ROMI KONKNNI POTROKARITENTLO MOILAM-FATOR

 

         -Jose Salvador Fernandes

 

Xri Enclidas de Ellycho zolm’ Junache 20ver, 1942 vorsa Mumboi zalo. Mullavem xikxonn, Mumbointlea Our Lady of Dolours High School-ant Hindi ani Moratthi vixoy gheun Inglezintlean kelem. Satvi tem dhavi meren Mumboichea St. Xavier’s Night High School-ant xiklo. Uprant B.Sc.-chem xikop korunk Dil’li gelo, ani Dil’lintuch tannem Pusa Institute-ant Potrokaritecho eka vorsacho kors purnn kelo.




Att vorsanchie pirayer Enclidas de Elly avoy koddchean Konknni vachunk ani borounk xiklo. Pirayechea dhavea vorsant astanam tacho bapuy somplo. Tea uprant ghorabo mottea augoddayank sampoddlo. Hea augoddayank fuddo korunk, ghorabeantlo dor ek vangddi, dispotto soddounk koslo nam koslo vavr korun ghorabo choloyt ravlo. Oxe poristhitint, ghorabeantlea vangddianchea ani aplea udarposonna khatir, Enclidas de Elly Konknni potram ani Romansi vikun don poixe ghorant haddtalo. Iskolant xiktanam, chhapkhanneant okxoram zoddchem ani chhap’pachem-i kam’ xiklo. Oxem korun tannem aplea vhoddlea bhavachi kadom’bori ‘Mog Somestank’ chhapun haddli. Hie kadom’borichio protio vikun zoddlolo faido polleun, Konknni vixincho taka aslolo mog anik-ui vaddlo.

 

1956 vorsa Enclidas de Elly aplea bhava sangata Dil’li gelo. Thoimsor xikop kortanam Evagrio George hachi utrayloli kadom’bori chhapun haddunk purnn yogdan dilem, kiteak tea kallant Dil’lint Konknni pustokam chhap’pi nasle. Hea kallar Gõyche suttkechi chollvoll borich nettan choltali, ani tednam tachi vollok Chandrakant Keni, Gurunath Kelekar, Dilip Sardessai hanche kodde zali. Konknni ani Gõyche suttke chollvoll polleun, Konknni vixinchi tachi umed anik-ui vaddli.

 

1961 vorsa to porot Mumboi ailo. Dor satolleak ek potr chhapun porgottunk Enclidas de Ellyk adinch thaun khuxi asli. Ek potr koxem toyar korchem asta he vixinchie vichar monant golloun, tannem ‘Ave Maria’ hem Konknni potr uzvadda yevpi chhapkhanneant chakri melloyli. 

 

Don vorsam uprant, apunn ek satollem uzvaddaunk xokta mhonn Enclidas de Ellyk atm-visvas yetoch ani khatri zatoch, Dezembrachie 3rer, 1963 vorsa aplea som’padokponna khal tannem ‘CINE TIMES’ satollem uzvaddaun tannem porgottlem. Hem satollem uzvadda haddunk taka tachea dog-ui bhavamni – ek vhoddlo ani dusro dhaktto -  khub yogdan dilem.   

 

Aplem ‘CINE TIMES’ satollem zata titlea vachpiamni, ani kherit bhaxen tornnatteamni viktem gheunchem ani tem tanchie avddichem zaunchea hetun, Enclidas de Ellyn tea satolleachem mol survatek fokot 10 poixe dovorlem. Survatek ‘CINE TIMES’-achio 1,000 protio chhaptale. Mhoine sorunk lagle toxe satolleachim vachpi vaddot gelim, dekun fuddem vochun dor satolleak tachio 7,000 protio chhapunk lagle.  Mumboi, Gõy, Pune, Gulf, London, Sweden oxea zageancher ‘CINE TIMES’-achi vikri zatali. Punn tie vikrien satolleacho chhaplolo khorch bhoronaslo. To bhorun kaddunk her kamam korchim poddtalim.

 

1978 vorsantlea Julay mhoineant ‘CINE TIMES’ satolleacher odruxtt upraslem. Satolleacho chhapkhanno asloli imarot kosllun chhapkhanneak boroch mar boslo. Tacho porinnam’ mhonn satollem bond korcho vell ailolo, punn Mumbointlea Padri Agnel Axromachea borem dekpi padrimni ani Gulfantlea tornnatteamni favo tea vellar adar-palov diun, Konknni porjechem avddichem ‘CINE TIMES’ satollem chalu dovrunk mozot keli. Tie mozotin, imaroticho kosllun poddlo bhag porot bandun ubo kelo.

‘CINE TIMES’ satollem porgottpa xivay, Enclidas de Ellyn Konknni kadom’borio-i porgottpacho vavr hatant ghetlo, ani zanntteank toxench tornnatteank avoddtat toslio kadom’borio uzvaddaylio. Novol Kannio-i uzvaddaylio. D’Elly Porgottnnie khal, poilim dor pondroxiek ani uprant dor mhoineak, oxeo mellun 250 romaxi uzvaddaylio. ‘Ordi Bakri,’ ‘Mogachem Tufan,’ ‘Padricho Lob’, ‘Kumsar,’ ‘Guneanvkar’, ‘O Mhoje Maim’ hio tantuntlio kaim romaxi asat.  

 


1987 vorsa Gõyant Rajbhas Kaido pas zatoch, ‘CINE TIMES’ satolleantlean  Konknnichie Devnagorichem ek pan suru kelem, ani tench hea satolleak mharog poddlem. ‘CINE TIMES’ satolleant Devnagori pan suru kortoch, tacho porinnam’ mhonn 1993 vorsa thaun  satolleak mellpi jairatimni ani satolleachie vikrent-ui tutt yeunk lagli. Enclidas de Ellyk apnnem chukichem pavl marlem mhonn kollun ailem. Oxe poristhitint, mhargayek anik tondd diunk zainam zaun, 1995 vorsa Novembrachea nim’nnea satolleant ‘CINE TIMES’ uzvadda haddchem bond kelem.

1963 tem 1995 hea 32 vorsanchea kallant, ‘CINE TIMES’ satolleantlean Enclidas de Ellyn Konknnichie Romi lipientlea vachpianchea - zanntteanchea ani tornnatteanchea – monanchi bhuk marli, ani vangddach tanchea kallzamni Romi lipientlie Konknnicho upott mog nirmann kelo. Tiatracho palk dil poddunk laglo tednam to mozbut korunk tannem tiatr machier haddle. Tiatristank ani tiatrank ‘CINE TIMES PUROSKAR’ diunk suru kele.

 


Enclidas de Ellyn Konknni mollar kelolea vavrachi nond gheun, ‘Goan Review Art Foundation’ sonvsthen tacho don pavtti bhouman kelo. Konknni bhaxek ani Konknni potrokaritek tannem dilolem yogdan mandun gheun, Dalgado Konknni Akademin (DKA) 2008 vorsa tacho bhouman kelo.  Konknni pasot tannem kelolo vavr vakhannun, Jivit mhoineallean-ui tacho bhouman kela.

 

Sod’deak Enclidas de Elly Kepemchea Ambleam vattarant aplie ghorkarni, puta ani sunie vangdda jiyeta. Aplo Konknnintlo vavr azun-ui sompunk nam oxem Enclidas de Elly mandta, ani Konknni bhaxantoram korpacho vavr adlie itliech umedin ani Konknnichea mogan korta.  
 
 
-Jose Salvador Fernandes
 

(c) All rights reserved. gaspar almeida [for www.goa-world.com]

 

Saturday, November 2, 2013

Sonvsarantli Lhan Kotha !


 SON’VARACHIM SUNGTTAM:

 
Sonvsarantli Lhan Kotha ! (2)

                                                             -   Jose Salvador Fernandes

 

 Bazarant astanam, to jigantt ani khorkhos monis apnnakuch polleta mhonn tea    
 
cheddvak zannvolem. Tem bhiyeun vegim-vegim ghora vochunk laglem. 
 
 
 To bhirankull monis aplea fattlean cholun yeta to tannem pollelo.
 
 Tem ghorant bhitor sortanch tachea fattafatt to-ui ghorant bhitor sorlo.
 
Bhoinnin bhiyeun bhavak sanglem – “Ho mhojie fattik lagla…!”
“Bhiyeum naka, to mhozo ixtt !” Bhavan zobab dilo.
 

 Sogleank Xantichim, Uzvaddachim, Khuxalbhorit DIWALI Anvddetam.



 
____________________________________________________________________________________________________
 

 
      JIVIT - GOA`S LEADING MONTHLY COLOUR MAGAZINE IN KONKANI.
JIVIT Otumbrachea Ankar Apurbayen and Urben Vachat Mhozo Lekh
"KODDSANN". 
Tosoch Anond Gheiat Vachunk Shri @[100002440147418:2048:Teddy Teodosio Rodrigues]-acho Lekh "FACEBOOK", Shri @[100000430425817:2048:Lino Dourado] Nettan Boroita "GOENKAR `MARS` PLANET-AR PAVLO ZALEAR...", Shri Domnic Fernandes Sakxi Dita Aplea Borovpant "KUWAIT-ANT KONKNNI PORZOLLTTA", Adi.
JIVIT GOYANT KONKNNI BHAS GAZOITA, KUWAITANT KONKNNI BHASHECHO PORMOLL XIMPDDAITA. HICH URBA ANI URJA UK-ENT ANI EROPANT-UI AMKAM ZAI ANI TEACH KHATIR JIVIT-AK TUMCHO OMOLIK SOHOKAR ZAI .... LET`S PROMOTE JIVIT MAGAZINE IN THE UK AND EUROPE. 
FOR MORE INFORMATION ABOUT HOW TO GET YOUR COPY of JIVIT IN UK, EUROPE AND WORLDWIDE, PLEASE CONTACT THE EDITOR Shri Michael Gracias. Email : michaelgracias@rediffmail.com and queeny@queeny.com
VIVA KONKNNI !
 
 

Saturday, September 21, 2013

Romi Lipi Niticho Panvddo Choddtanam…


SON’VARACHIM SUNGTTAM:

Romi Lipi Niticho Panvddo Choddtanam…
-          Jose Salvador Fernandes


Gõyant, Konknniche Devnagorintlean Rajbhas Kaido pas korche kaim vorsam adim, Kala Academy Gõy he nanvoste sonvsthen Konknni pustokank Sahitya Puroskar diunk survat keli. Ho Sahitya Puroskar Konknniche don-ui lipientlea  - Romi ani Devnagori – pustokank ditale. Dusrea utramni, sorkari panvddear Konknniche Romi lipiek-ui maneotay asli oso tacho somoz. Punn 1987 vorsa, Romi lipientlea Konknni pattlavdaranchea visvasak ghat korpi Konknni (Konknni mhollear Devnagorintlean boroyloli Konknni mhonnpi) Rajbhas kaido pas zatoch, Kala Academyn Romi lipientlea Konknni pustokank Sahitya Puroskar divpachem bond kelem. Konnachem aikun? Kala Academyche Bud divpi Somitichem sangnnem aikun. Bud divipi Somitichem sangnnem kitem aslem? Konknniche Romi lipientlea pustokank Sahitya Pusroskar divpachem bond korchem, kiteak te lipientlea pustokank Sahitya Puroskar dilear tem Gõychea Rajbhas Kaidea add vetolem!

Tea kallant, Bud divpi Somitiche vangddi konn asle? ‘Ekuch Lipi, Ekuch Boli ani Ekuch Sahitya’ hea pixeanchea sunnean ghans marlole Purtugezanchem nhesonn nhesun bhonvpi bhembro, dukoynastanam kenddpi keni, korpololo kormoli, moujecho mauzo ani Romi lipieche tancheach monanche her sabar dusman. Mhonnche, Konknniche Romi lipiecho xevott korpacho liplolo ghutt tednam tanche udorim chalik lagunk suru zalolo.

Konknniche Romi lipientlea Konknni pustokank Sahitya Puroskar divapchem bond kelam tem porot suru korunk, Abrilache 18ver, 2006 vorsa zalole Kala Academyche Vavurpi Somitiche zomatint porot vixoy ailo. Te promannem, Romi lipientlea pustokank kuxin Sahitya Puroskar sthapunk, ani tea Puroskara khatir Romi lipientlim pustokam topasunk tech lipientlea mon’xank porikxok (judges) nemche mhonn, te Vavurpi Somitiche zomatint tharav pas kelolo tachi boroyloli govay asa.

Setembrache 19ver, 2006 vorsa zalole Vavurpi Somitiche Zomatint, Moratti bhaxek, Konknniche Devonagirik ani Konknniche Romi lipiek, oxe tin veg-veglle, Kala Academyche protixttheche (prestigious) Gomantak Sharda Puroskar -  suru korunk tharav pas kelo.  

Vavurpi Somitichea tea tharava promannem, Kala Academychea Vangddi Sekretaran Konknniche Romi lipientlea Sahitya Pusroskara khatir Romi lipientlim pustokam jahir ritin maglim. Konknniche Romi lipientlea borovpiamni-i umedin aplim pustokam-i dilim. Punn Romi lipientlea pustokam khatir kuxin sthaplolo Sahitya Puroskar te-ui vorsa diunk nam. Karonn? Kala Academyche Bud divpi Sahitik Somitin, aple khottie budin Romi lipientlea Konknni pustokank kuxin Sahitya Puroskar ani ‘Gomantak Sharda Puroskar’ diunche vatter addkholliche fator ube kele. Khotti budi divpi he, Kala Academyche so zonnanche Sahitik Somitint konn asle? Purtugezamni bhaxe soit Gõychi sonvskrutay noxtt keli mhonn aplea ulovpamni ani potrancher add’ddupi, punn tea purtugezank konnem Gõyant haddle to ghutt lipoun dovorpi ‘purtugez’ bhembro, ani her chear zonn vangddi!

Mayache 18ver, 2007 vorsa zalole Kala Academyche Vavurpi Somitiche Zomatint Romi Lipientlea Konknni Pustokank Kala Academycho Sahitya Puroskar divpa vixim porot-ui vixoy ailo. Tednam, Kala Academyche Bud divpi Sahitik Somitin Romi lipientlea Konknni pustokank kuxin Sahitya Puroskar diunche vatter dusvasache kantte ghaleat mhonn kollit kelem. Tea zomatint hea vixoyacher borich bhasabhas zali ani ekmot tharalem – Kala Academyche Vavurpi Somitiche Zomatint ani Sogott Vangddianche Zomatint (General Body) pas kelole tharav chalik launk zai, ani tea tharavancher Bud Divpi Somitin porot vichar korpacho nam.

Toxench, tech zomatint Moratti bhaxek, Konknniche Devonagirik ani Konknniche Romi lipiek, oxe tin veg-veglle, Kala Academyche protixttheche (prestigious) ‘Gomantak Sharda Puroskar’ -  suru korunk porot ek pavtt tharav pas kelo.

Xevttim hem thartoch, hea mhoineant (Setembrache 3rer, 2013) devadin zalolea Padri Planton Fariachea ‘Kunkolle – Ek Mahan Ganv’ hea pustokak Kala Academyn kuxin Romi lipientlea pustokam khatir sthaplolo Sahitya Puroskar favo zalo. Punn tea uprant…

…. 2007 vorsant-ui Kala Academycho Odhyokx aslolea Pratapsingh Ranen, Romi lipientlea pustokam khatir kuxin Sahitya Puroskar sthapunk Vavurpi Somtiche don veg-vegllea zomatimni ekmotan tharav pas korun-ui, to Pusrokar anik ek pavtt bond kelo!

Ani atam, mhollear hea vorsa thaun Kala Academycho ho, Romi lipientlea pustokank kuxin Sahitya Puroskar divpacho nirnnoy St. Andrecho amdar ani Kala Academycho odhyokx Vishnu Surya Wagh hannem chalik launk kaidea promannem nitichem pavl ubarlam! Tannem hea Pusroskara vixim ugteponnim kollovnni-i kelea. Dusrea utramni, Konknniche Romi lipientlea borovpiancher fattlim 25 vorsam Kala Academynt ji onit zaloli ti Vishnu-baban nitichea kaideak dhorun sompoylea. Oxem korun tannem, Romi lipientlea borovpiank tancho hok’k porot melloun dila, ani tantuntlean tannem Konknniche Romi lipiek sorkari panvddear maneotay dilea. Romi lipientlea pustokam khatir Kala Academycho kuxin Sahitya Puroskar sthapunk itlim vorsam magtale tea Konknniche Romi lipientlea sogott fuddaraianchea, borovpianchea, sonvsthanchea ani borem magpianchea, toxench sogott Gõykaranchea nanvan Vishnu-babak Dev borem korum mhonntam.

Punn hi gozal, itlean hanga sompta oxem mhonnunk zainam. ‘Ekuch Lipi, Ekuch Boli ani Ekuch Sahitya’ mhonnpi bhaxeche ‘fanatic’-anchea ani Romi lipieche dusmananchea pottant atam porot chabunk suru zalam. Dekun, Romi lipientlea pustokam khatir sthaplolo Kala Academycho vegllo Sahitya Puroskar porot bond korche khatir te atam bombleche dentt khorpit chintunk poddleat. Khorpun-khorpun tea denttantlean khotteponnache ani dhormvadache kidde zolmun te chalik lagche poilinch te  nam-nopoyt korunk vicharanchem dettol ghalpacho hok’k, fuddlea Son’varak heach vibhagant rakun dovortam.   


Jose Salvador Fernandes
Son'var, 22 Septembr 2013
www.goa-world.com
________________________________________________________________________________


http://sonvarchimsungttam.blogspot.com
_________________________________________________________________________________

http://aitaracheokaskuleo.blogspot.com 

_____________________________________________________________________________________________



http://goablog100.blogspot.com

_________________________________________________________________________________




www.artandculturegoa.gov.in


Friday, September 6, 2013

KOVNAM - SONVAR - SEPTEMBRE 8, 2013


SON’VARACHIM SUNGTTAM:

KOVNAM
                                          -Jose Salvador Fernandes

 
Duddvanchi ras
Mon’xachi as
Kainch nam khas
Sonvsarantli polki kax
 
 
    ***

Bhitorlem bhair uddounk vetanam
Tambiant udok vhelem,
Portotanam,
Teach tambiant devak ful chorun haddlem
 

        Vandergrift family of fourteen

Bhurgim naslolim mhonntat
“Bhurgem zai”
Bhurgim aslolim mhonntat
 – “Ek vhor…. Khub sovay!”
   

        ***
 
 
Sonvar, Sept. 8, 2013
 

 

 

Saturday, August 31, 2013

KOVNAM

  


SON’VARACHIM SUNGTTAM:
KOVNAM
          -          Jose Salvador Fernandes


DOLLEANT OGRACHIM DUKHAM

KALLZANT DORYACHIM LHARAM

TUKA SODTAM-SODTAM

HANV MHAKACH SANDDLAM…

 

***

 

 

ANVAK CHUKTA TO DANVAK CHUKTA

DHANVAK CHUKTA TO GANVAK CHUKTA

ANI GANVAK CHUKTA TO?

KHOBOR NAM… AZUN KOLLCHEM ASA!

 

***

 

HANV MHOZO NHOI

TUM MHOZO NHOI

DOGAIM KONNACHINCH NHOI

TOXEM POLLEUNK GELEAR


KONN KONNACHINCH NHOI.




 




http://sonvarchimsungttam.blogspot.com/2013/08/kovnam_31.html
Sonvar, 31-Agost-2013
Jose Salvador Fernandes
www.goa-world.com


 

Saturday, August 17, 2013

KOVNAM

SON’VARACHIM SUNGTTAM
                       -Jose Salvador Fernandes

 

KOVNAM…

 

Dukacho khando moddlo
Odruxttacho khub dink vhanvlo
Tea dinka vangdda
Jinnecho orthuch sorlo


***
 

 
Devak zai zalear sogllem
Ani mon’xak zai tednam kitem?
Kednam-kednam chintunk poddtam
Deva hem koslem fokanndd tujem?  Big Picture


***

Bapayn Putak mhonnlem –
“Puta, kednam kazar zaunk ravlai?”
Putan mhonnlem –
                                                       “Zaunk mhaka kitle hozar dita?”
 

    ---
Sonvar, Agost 17, 2013

 

 

 

Friday, August 16, 2013

Konkonn Divo June 2013 hacher chappun ailoli khota

Konkonn Divo June 2013 hacher chappun ailoli khota
 
Dev Konnancho?
To ganvcho ek vhodd bhattkar. Hixeob korunk zaina titlo tache kodde duddu. Tachean zai te toren vilaxi (luxurious) jivit jiyeunk zata. Punn ekdom sado monis. Vortea molacheo vo chodd mhargayecheo gaddyeo tachean ghevn zatat, punn to adlich pornni Lambretta skuttor moddlear mekanika thaim vhorun dadai-boddoi korun cholpa sarki korta. Dekhunuch taka ganvche bhurge imtto bhattkar mhonntat.
Tachem bhitorlem doyallponn fokot ganvche igorjechi seva korunk. Ganvant ail’lech padri tachi gozal zannot. Gelea pon’nas vorsam ganvchea somudayechi ani igorjichi seva korunk ailole padri tache ghott ixtt zatat. Hachem karann mhonnlear, to lip-choriam ganvche igorjek, iskolak, dublleank uzvea hatant dan dita tem davea hatak kolloinastana dita. Hench tachem guptim kelolem vhoddponn
Horxim choddso to dhormik karyavollin igorjent disona, punn konnui ganvcho somplo zalear kosloch bhed-bhav, lhan-vhodd, girest-durboll ho veglozar dovorinastana somplolea-chea mornnak chukoi-nastona hajir zata. Ani hakach lagun ganvche malgodde tachem sadeponn vakhanntat. Punn ganvche tornnatteank mat to ek imtto-chamtti bhattkar dista. Ganvchea klubak to kednach ek domddi dinam, nhoi mhunn klubanchea vangddeank lagim ghena. Hachem karann toch zanna .
Eke sanje, pavsachea vadoll-moddan ganvche dortorer thorthoro haddlo. Rukh-zhaddam umttun rostear poddlim. Igorjeche padrink ravpachea ghorar (residential home) tenkun aslolo vhodd ambeachem zhadd poddun ghorak sumar 10-12 lakh rupianchem luksann zalem. Devache vhodd upkar. Tea disa Padr Vigar ani Padr kur eka dobajeak gel’le.
Ganvchea sogllea lokan adar dilo. Punn ekloi tea bhatkarager vochunk raji naslo. Tannem sodam porim lip-choriam Padr Vigaraxim yevn padrink ravpachem ghor novean bandunk duddu dilet. Tori ektthailole duddu pavonasle. Konn tori eka igorjichea karbharean ganvchea vhodd dhondekarak fon korun adar maglo. Tannem sorti ghalunk suchoilem ani apnnench inamam bhasailem. Punn sortincher aplem ani aplea dhondeanchem nanv ghalunk lailem. Heo sorti soglleak khopunk lagleot. Ganvche iskolantlea bhurgeam kodde sorti vikunk dileot.
Lhan toxim vhodd sorti ghevn tea bhatkarager vochonaslim.To ekdom darunn kallzacho ani imtto mhonn, tim zannam aslim. Ani chukun tachea darant pavlear to dengxe ani boball korun danvdaitalo. Punn tea disa boltench ghoddlem. Ek xikpi Sylvia bhatkarager gelem. Bhatkaran dar ugoddlem ani Sylvian amurkea hanxan tachea hatant sorti dileot. Hatant kitem dilam tem pollenastana tannem tea cheddvak pollenvkuch urlo tachea dolleam samkara ek veglech torecho svobhav tea cheddvachea tonddar khelltolo dislo. Tichem gunest rup ani nitoll hanso eka anj-bodveachem disnnem koxem zollkunk laglem. Bhatkarak monisponnachea rupan dev-dut khorench sonvsarant bhonvtat mhonn gomlem. Poilech khepek tannem thonddayen ani movalle utramni tea porak zap dili. Taka kodelir bosoun tachi bariksannen khobor ghetli.Thondd piyeupa borobor khavbpakui dilem. Tacheo sorti soglleo tannem ghetleot. Bhatkarachea ghorant konnuch dusro monis naslo. Sokallchea adesa vaddeantli ek ostori ani daddlo monis randunk ani ghorachi sap-safai korunk yetalim.
Sortichem abertur. 25 lakh rupiancheo sorti kopun kobar zaleo mhunn Padr Vigaran lokak kolloun adhar ani denngi ditoleanche abar mandle. Ganvchea lhan bhurgeanchea hatantlean sortiche ankdde kaddche mhunn Padr Vigaran poilench sanglolem. Sortichem inamachem ek-ek korun abertur zatalem ani thoinche thoim topasnni korun inam’ jahir kortale. Xevottak vhodd poilo inam’ Hyundai gaddiecher pali aili. ho lucky number kaddpak Parish Councilachea odheoxan Sylvia-k apoilem ani tinnem 230953 ankdo kaddlo ani thoddeach vellan poilo inam’ jikhpi bhatkar Sebastiãok laglem. “Dev konnacho? Asloleankuch dita?”, sortichem poilem inam’ jiknarachem nanv aikun Menino challvolo.
“Dev girestankuch girest korta”, sokoilea vaddeantlem Philun mhonnlem. Ani oxem toren poilem inam’ eka vhodd ganvchea dusmanan favlolea porim lok zai te toren uloit ravlo. Dusre disa sanje bhatkar Sebastião, Padr Vigarak mellunk ailo ani sortik favloli motor-gaddi vikun te duddu igorjek dovorpak suchoilem. Padr Vigaran Hyundai motorichi chavi tachea hatant divn mhonnlem.
Polle Senhor Sebastiao, Igorjichem moddlolem ghor porot ubem korpak zai aslolea duddvam von odik duddu bhitor aila. Tuje lagim motor-gaddi nam mhunn Devan hi tuka bhett divnk nam. To mona pormannem donn dita. One gets wealth according to one psyche. Tujean, osleo don-tin mottor-gaddiyeo gheum yetat punn tum pollki boddai dakhoina. Gupttim kel'em dan Devak mandta tea khatir tujea borea vavra khatir Devan dil'lem inam igorjek portem divn, Devak opman korinaka mhonn Padr Vigaran sanglem.
Lino B. Dourado
<Right click -> Save as> to download star_tip_hat_md_wht.gif!
Lapitt
http://aitaracheokaskuleo.blogspot.com/
 
 

YADI.....

PRESENTS
<Right click -> Save as> to download star_tip_hat_md_wht.gif!AITARACHEO KATKUTLEO
Lapitt 
 

<Right click -> Save as> to download star_tip_hat_md_wht.gif!
    Lapitt
 http://aitaracheokaskuleo.blogspot.com/

Ek Kovita: AGA PAVSA


 
 AGA PAVSA 

Pavsa tunvem ievncho ga
Punn itlo kiteak ievncho?
Pavsacho humvar ailerui
Udkacho noll mat suko

Tum vadolla sangata iet’na
Zhaddam-rukh humttun uddoita
Bizlecheo sorio tuntt’tun
Amkam kallokant nidhaita.

Adlea kalar segid atth dis porian
Tujem fest chalu astalem
Atam atth horam nachlear
Sobit Goem mhojem buddlem

Adim tuka ievkar divnk
Nodhi-doriache vall ugtte asle
Atam sudorpachea nanvan ga
Tuje bond keleat roste.

Ragar zavnchem nhoi pavsa
Tuje kaide tunvem pallche
Mhojem Goem padd korteleank ga
Ghusmottun buddoun marche.

 
<Right click -> Save as> to download star_tip_hat_md_wht.gif!
    Lapitt
 http://aitaracheokaskuleo.blogspot.com/

About Me

My photo
Goa/India, Hawalli/Kuwait, Kuwait
A big e-welcome to you. Tumcam Maie-mogacho ieukar. Enjoy Life - This is not a rehearsal! Konkani uloi, boroi, vach ani samball - sodankal. Hich Goenchi osmitai ani amchem khalxelponn. Goenchi amchi Konkani bhas! Ekvottachem saddon Goenkaranchem. This is Gaspar Almeida from Parra, Bardez, Goa, based in Kuwait and am connected with the www.goa-world.com website created by Ulysses Menezes, and as Moderator of the famous first of its kind Gulf-Goans e-Newsletter (since 1994) and The Goan Forum and several Goan and Indian associations and forums and e-forums in Goa, India, Kuwait, The Middle East and worldwide.