SON’VARACHIM SUNGTTAM:
Eka Monacho Bodol… !
- Jose Salvador Fernandes
Pink….
pink…. pink…
Moddganvchem postt ofis. Postt ofisachea
samkar Nogorpalikechi bag. Tie bagichie futpativelean hanv choltalom. Tednam, rostean
cholpi te mottarsaikolicho to eksarko vazpi horn mhojea kanar poddlo.
Futpaticher, mhojea fuddlean-fattlean cholpianchi ani mhoji nodor, ekach
vangdda horn vazovpi mottarsaikoli vatten ghunvli. Mottarsaikol cholvpian
porot-ui horn vazoylo ani mhakach polleunk laglo. Hanv cholpachom thamblom.
Tachie tokliek helmett aslem. Vollkunk mellonaslo. Ho anik konn kay? Hanvem
monant mhonnlem. Tannem futpatichie degek, hanv ubo ravlolom tea zagear apli
mottarsaikol thamboyli. Helmettantleanuch mhaka zap keli. Tednam tachea
talleavelean hanvem taka vollkolo.
“Khub dis zale tuka sodtalom hanv!” Atam
aplo sôd khoim tori somplo oxie bhavnen to uloylo.
“Kiteak baba?” Hanvem hanstea tonddan
vicharlem.
Rav, mottarsaikol thoimsor ‘park’ kortam
poilim.”
“Rav…. ami Tateant (Tato) vochun
uloum-ya.” Hanvem suchoylem.
Mhoji suchovnni taka avoddli vo nam ti
mhaka khobor nam, punn to don goddio ogich urlo. Uprant tannem mhonnlem -
“Bos tor.”
Hanvem tachie mottarsaikolicher boslom.
Fuddlea sat mintam modem ami Tateant bosun asleanv.
“Amkam ‘Tiatr’ vixoyacho paper asa, tuka
khobor asa. Punn je ritin amkam tiatra vixim xikoytat, xi sangpachem nhoi.
Tiatr ho dorzo naslolo prokar zalolea vori xikoytat… Khub vaitt dista aikun…
Klasint dusrea-i dhormanchim xikpi astat nhoi? Oxie ritin paper xikoyle zalear,
tim amchea Tiatrak unnie nodren kiteak polleunchim nant? Tiatr Romi lipientlean
boroylole astat mhonntoch, Romi lipiek-ui tim tiroskarchech nodrentlean
polletolim nhoy? Kitem tori korunk zay he vixim.” Tannem ekach doman sanglem.
To Gõy Vidyapitthant xikta. Konknni.
M.A. panvddear. Konknni hi panch lipiamni boroytat. Panch lipiamni Konknni
borovp hem Konknnichem khaxeleponn ani vhoddponn dische bodlek, Konknnichea
Devnagorivaleank hio panch lipi mhollear Konknnicher poddlolem maldisanv oxem
dista. Dekun Konknni Devnagorintleanuch borovpachi ani her lipio gollak
kaddpachio oxem tankam khub kalla adim thaun dista. Monantlean dista. Dekun,
Konknnichio her lipio gollak kaddche khatir, tio bhairaunk ani nam-nopoyt
korunk apnnak jitlio sondio melltat, titlea-i sondiancho Devnagorich tambddi
mhonnpi faido uttoytat. Gõy Vidyapitthant to xikpi sangatalo tich gozal hi!
“Polle. Tumi sangtat ti gozal tumchea
xikpa mollaveli. Tumi sangtat tie poristhitek toxem khas vokhod nam. Tumchie
chear vonttinchie klasint Romi lipie add onit zata oxem tumchea osleank dista,
ani tache add tondd ugoddpachem tumkam dhaddos asa zalear tumich xikovpiank tonddbhor vicharpachem!” Hanvem sol’lo dilo.
“Konknni mollar toxio khubxio gozali
Romintlean poilio suru zalio tumkam khobor asa. Punn he lok…. Xi……xi…. Romi
lipiek tichem xreyuch diunk sodinant. Konknnichea itihasant poili Kadom’bori
Romi lipientlean uzvadda aili. To itihas-ui tim
noxtt korunk sodtat… Khub vaitt dista… Rogot xizta… Romicher zatoli hi
onit mhojean sosunk zainam! Rag yeta…” Teach ragan to uloytalo.
Anik-ui kaim gozali uloun ami
koddsorleanv.
* * *
Sumar
ikra mhoineancho kall sorlo. Ani ek dis, khobrampotrancher ek khobor vachli.
Khobor Konknnichie Devangori lipientle puroskar jahir zaloleachi. Att zonnam
modem tachem-i nanv aslem. Konnachem? Tea disa mhojea vangdda Tateant sangata
bosun asloleachem… Apunn xikta thoimsor Konknnichie Romicher onit zata mhonn
sangtoleachem… Hanv ojap zalom! Hi kosli mejik zali kay? Taka koso Puroskar
favlo? Vo favonaslo torui dilo? Hanv
chintunk poddlom….
Dusrea
disa tacho fon numbor melloun ghetlo. Taka fon kelo. Porbim dilim, ani
vicharlem – “Tumkam-so Puroskar jahir
kelo tannim?”
“Tantum
kitem vaitt asa? Atam Konknnicho fuddar Devnagorich nhoy? Romintlean poilim-i
vhoddlemxem kainch zaunk nam, ani fuddarak-ui kainch zaunchem nam! Matso busy asam, uprant mellche.” Tannem
goddboddin fon bond kelo.
Bhitorlean
khobor kaddli. Zalear kitem? Haka
klasint xikovpi cholun yeunk sangtalim tednam ho khoim tanche khatir zomnir
zhorkuttun yetalo!!! Aikun khub vichitr dislem! Monant mhonnlem – Podvi, duddu
ani pusroskar mon’xak kitlo bodoltat ani kitlo mhonnun taka khala vhortat nhoy?!!!
Jose Salvador Fernandes
Sonvar, 15 Mars 2014
