SON'VARACHIM SUNGTTAM - Anil Chandrakant Devulker - Agllo-Vegllo Kolakar

 

SON’VARACHIM SUNGTTAM: 

                                 Anil Chandrakant Devulker  - Agllo-Vegllo Kolakar

-      Jose Salvador Fernandes

Gõychea sonvskrutik mollar khubxea kolakaramni ap-aple porim Gõychi sonvskrutay rakun dovorpacho vavr kelolo disun yeta. Kaim zonnamni ho sonvskrutay rakun dovorpacho mhotvacho vavr kortanam, te sonvskrutkayek aplem oxem khub kitem diun, ti sonvskrutay anik-ui girest ani mol-mhotvachi kelea. Taka lagun te sonvskrutayechem pallam-mullam Gõyche matiyent anik-ui mozbut zaleant hem zalench, punn tech borabor sonvskrutayek visvaxi ravun tantum kalla promannem koxe bodol keleat tem-ui disun yeta.

Gõyant girest sonvskrutayechim kitlinch rupam asat tanche modlem ek rup mhollear Tiatr. Gõycho tiatr az jitlo loukik asa titlo Gõycho dusro anik khuinchoch prokar nam. Toso to loukik korta-korta tachim pallam Gõyche sonvskrutayent anik-ui mozbut korpant khubxea tiatristancho hatuch nhoi, punn otmo asa. Tantuntloch ek tiatrist mhollear Xri Anil Chandrakant Devulker.         

Xri Anil Chandrakant Devulker. Tiatrist. Tacho zolm’ Marsache 12ver, 1951 vorsa, Gõyantlea itihasik Chandor ganvant zalo. Tiatr mollar tannem Anil Kumar hea nanvan dor eka tiatr pollevpiachea kallzant ghor kelam.

Anil-bab ho tiatr mollavelo mhalgoddo kolakar, borovpi ani digdorspi. Konknni machier tachi bhumika korchi ji aglli-veglli rit asa, te ritichem vornnon korunk utranchem bhanddar unnem poddta. Tannem az meren aplea bhitorlea kolakarak kolechem ani onnbhovachem sarem ghalun jivo dovorla.  

 

Sorgest Prem Kumaran boroylolea ‘Ordi Bhakri’ hea tiatrantlean, 1980 vorsa tannem tiatrache vevsayik machier pavl dovorlem. Konknni machiechim khoddegantt kolakaram sorgest M. Boyer, C. Alvares, Remmie Colaco, Jacinto Vaz, Kamat de Assolna, Chris Perry, Nelson Afonso, Shalini Mardolkar, Alfred Rose, adi. hanchea vangdda tiatramni bhumika korchem taka bhag favo zalem. 

Anil-baban, az meren somazantlea chalu vixoyancher kholayen tiatr boroun machier haddleat. Aple tiatrache girest borpavollintlean tannem tiatr mogiancher boroch probhav kelolo asa. Az meren tannem ‘Otmo’, ‘Bhirant’, ‘Saulli’, ‘Divea Pondak’, ‘Dev Podvedar’, ‘Dennem Devachem’, ‘Noxib’, ‘Axechi Bhuk’, ‘Maim, What Is This?’, adi. tiatr boroun ani machier haddun, tiatr machier tannem kolechim sabar angam dakoyleant.

Konknni machiecho khoddegantt tiatr borovpi ani kolakar M. Boyer hacho ‘Ekuch Rosto’ ani ‘Sonvsar Sudorlo’, Prem Kumaracho ‘Ordi Bhakri’, ‘Pai Tiatrist’ Joao Agostinho Fernandesacho ‘Goy’yo Put’, ani ‘Tandllanchem Kestaum’ he tiatr tannem fixalkayen digdorsun porot machier haddle, ani apunn eka unchlea panvddeacho digdorspi mhonn tannem apli sumara bhaili tank dakoyli.

Tiatrantlean tannem apli kola Gõyam, her rajyamni ani Evropachea desamni legit prodorxit kelea.        

Punn Anil-baban aplo bhumika korcho gunn tiatr machie purtoch rakun dovrunk nam. M. Dasachea ‘Girestkai’ ani Pundalik Naikachea ‘Doulot’, hea don cholchitramni bhumika korun, cholchitrachea pordear-ui tannem bhumikechea gunnacher soglleanchi nodor thiraun dovorli. Hea xivay, ‘Zababdari,’ ‘To Dis Udetlo,’ ‘Bhitorlea Monacho Monis,’ ‘Ordem Chador’ he-ui viddio filmamni to veg-vegllea angamni vavurla.

‘Dev Podvedar’, ‘Divea Pondak’ ani ‘Bhirant’ he tache tiatr pustokachea rupan uzvadda haddun, fuddle pillgeche nodrentlean to xanno tharla.

‘Anifa’, ‘Dennem’, ‘Hello London’, adi. oxea nanvancheo Konknni gitancheo kesetti uzvadda haddun tannem Konknni gitanchi ruch kantaram aikotoleank dili. Durdorxon ani Akaxvanni he-ui madyomantlean tannem torekvar karyakrom’ dakoun lokak dhadoxi keleat.

 ‘Goa State Film Festival’ hantum Anil-babak 2000 vorsa ‘To Dis Udelo’ cholchitracho ‘Ut’tom Son’vad Borovpi Puroskar’, 2005 vorsa ‘Kantteantlem Ful’ cholchitra khatir ‘Ut’tom Gitam Borovpi Puroskar’ ani 2008 vorsa ‘Bhitorlea Monacho Monis’ cholchitrantlo ‘Ut’tom Kolakar Puroskar’ favo zalo.

Tiatr machiek tannem dilolea moladik yogdanam khatir, az meren ta zaite puroskar ani inamam favo zaleant. Kala Academy Goa, Dalgado Konknni Akademi ani her kitleaxeach sonvskrutik sonvsthamni puroskar bhettoun Konknni sonvskrutayechea mollar Anil-babak man-bhouman diun ubarun dovorla.  

Sonvar, 29 Jun 2013
www.goa-world.com

Sonvskrutik Timoteo Fernandes

SON’VARACHIM SUNGTTAM:

Sonvskrutik Timoteo Fernandes

 

-          Jose Salvador Fernandes

Timoteo-bab Fernandesacho zolm’ 1937 vorsantlea Janerache 23ver, Gõy rajyachea Ponnje xarant zalo. Ponnjechea ‘Liceu Nacional Afonso de Albuquerque’ hantum tannem Purtugezintlean ‘Curso Geral dos Liceus’-achem xikop kelem.

 

Timoteo-babak songitacho ani sonvskrutayecho upatt mog. Heach mogan to Maestro-Profesor Antonio de Figuereidochea margdorxona khal songit vachunk, gavunk xiklo.

Bharotacho tednancho Prodhan Montri Pandit Jawaharlal Nehru Gõyak bhett diunk ailolo tednam, tache mukhar Gõycho lok-nach manddpi don’xim odik vangddianchea pongddant tacho-i aspav aslo.

Gõyachem lok-songitachem ani lok-nachachem daiz zata titlem Gõyche matiyent tigoun dovrunk, umedin bhorun Timoteo-baban 1965 vorsa ‘Timoteo’s Folklore Troupe’ sthaplo. Konknni lok-songitchi, ani taka som’bond aslolea lok-nachachea daizachi vollok soglleank korun diunchea hetun, to pongodd ghottmutt ani okhondd korunk to khubuch thokos gheun vavurlo. Gõychea lokvedacho ani lok-nachacho tannem sôd-vavr kelo, ani tacho gabho samballun, tantum noveponnache ani adhunikponnache bodol ghoddoun haddle.

Gõyant 1983 vorsa ‘Commonwealth Heads of Government Meeting’ (CHOGM) zali. Tea vellar tannem aplea ‘Timoteo’s Folklore Troupe’-achea asrea khal, Gõyant ailolea her desantlea Raxttrpotim, Prodhan Montri, Raza ani Ranniam mukhar lok-nachantlean Gõychea daizachem chitr manddlem. Hench daiz tannem fuddem vochun 1975 vorsa Gõyche bhetter ailolea Tanzaniacho Prodhan Montri Roshidi Kawawa mukhar, 1984 vorsa ailolea ‘Soviet Cosmonaut’-am mukhar, Vanuatuacho Prodhan Montri Fadar Walter Hadya Linichea samkar, 1985 vorsa Rusiechem Protinidhi Monddoll ailolea vellar, teach vorsa Bengllur zalolea ‘SAARC Conference’-a vellar, 1986 vorsa Juanv Paul Dusro Pap Saib Gõyche bhetter ailolo tednam, Netherlandachi Ranni Beatrix ani Norwaycho Rajkunvor Harold ani Rakjkunvor Sonja hanche mukhar, Jaipur, Varanasi ani Novi Dil’lint ghoddoun haddlolea ‘Goan Food Festival’-a somoyar, thoinchea Hotel Taj Polasint, 1988 vorsa Gõyant zalole ‘World Economic Geneva and Confederation of Indian Industry’-chea protinidhi monddolla mukhar, tin disanchea ‘Shillong Festival’-ant tednancho Prodhan Montri Rajiv Gandhi ani Ut’tor Asientlea Protinidhi Monddolla mukhar, Bhubaneshwar ani Kolkot’ta xaramni tannem Gõychea lok-nachachea daizachem khorem ani borem dorxon ghoddoylem.            

‘Timoteo’s Folklore Troupe’-achea madeomantlean, Gõychea lok-nachachea daizacho bavtto ontor’raxttrik mollar-ui ubounk Timoteo-bab pengott bandun vavurlo. 1987 vorsa Dubai International Hotel-ant ‘Festa de Goa somarombha vellar, Mauritius-antlea ‘International Ocean Festival’-ant tannem aplea pongddantlean Gõychea lok-nachachem, ani taka zullun aslolea Gõychea Songitachem daiz ontor’raxttrik mollar dollebhorun polleunk dilam dekun, gõykarank tacho obhiman bhogta.

Fattlim sabar vorsam, Gõyant Karnaval ani Shigmo daizacho ek bhag mhonn vhodda dobajean monoytat. Gõychea daizachea mogan hi kolponam Timoteo-babachea monantlean xizun bhair aili, ani ti chalik launk tannench fuddariponn ghetlem. Az he don-ui utsov Bharotachea her Utsovanche vollerint aspavlole amkam polleunk melltat, ani tachem xrey Timoteo-babakuch favo zata.

Rajyachea panvddeavelea Lok Kola Utsovant tannem eksarkim 12 vorsam bhag gheun, Gõychem lok kolechem daiz kitlem girest, ani hangache matiyent tachim pallam-mullam kitlim khol asat tim tannem dakoun dileant.     

1977 vorsa Janerache 26ver, Novi Dil’lint Lokrajyachea Disa zalole ‘Parade’-int tachea pongdda udorim tannem ‘Viva Carnival’ Gõychea ‘Float’-acho bhag zaun, Gõychea songitachea daizacho hajir asloleank gost dilo.

1975 tem 1980 hea vorsam pottim, Gõychea bhitorlea ani khanchim-konnxantlea talukeamni ani ganvamni Gõychem daiz aslolea lokvedacho, tachea nhesnnancho ani chali-ritincho tannem khub kholayen obheas kelo. Tacho porinnam’ mhonn, Gõychea 24 zageancher ‘Goa with Love’ nanva khal 40 vangddianchea zomeachi tannem bhouch hikmotin dakounn ubi keli. Tantutlean, Gõychea daizacho bhag aslolea lokvedantlo lok-nach, vazovp, lok-gitam thuku-thuku korun polleunk ani aikunk dilim, tachi tokhnnay korinastanam ravunk zainam.    

Gõychea lokved daizachi sonvsarak vollok dita-dita tem samballunk, rakunk ani tigounk Timoteo-babak az meren sorkari ani rajachea panvddear sabar man, bhouman ani pusroskar favo zaleat. Tannem Gõyche sonvskrutayek tomam’ yogdan dilolea khatir tacho obhiman ballgun Dalgado Konknni Akademicho taka ‘DALGADO DAIZ PUROSKAR 2012’ favo zala.

 

Sonvar, 22 Jun 2013
www.goa-world.com

 

Sonvarchim Sungttam: BJP v/s BJP ?

SON’VARACHIM SUNGTTAM:

BJP v/s BJP?

 

-          Jose Salvador Fernandes

Fattlea satolleant, BJP-chea ghorant boroch gondoll ani ghuspagondoll zalo. Lok Sobhechi vinchnnuk 2014 hacher nodor dovrun, Gujratcho mukhel montri “Narendra Modi fuddlo Prodhan Montri aspi umedvar” mhonn BJP-an Gõyant zalole aple raxttrik zomatichea xevottak ucharinastanam, veglle ritin jahir kelem. Hem polleun, survatekuch thaun aplea koxttanchem sarem ghalun raxttrik panvddear BJP-chem sallok fuloylolo, ani fuddlo Prodhan Montri zaunk pottantlean anvddevpi  L. K. Advani monan, kuddin ani ak’khoch koso moddlo, ani tacho porinnam’ mhonn, tannem BJP-ant aplea podacho rajinamo diunk dhaddlole chittichi soglleankuch khobor asa. Punn BJP-chea unchlea monddollan tacho rajinamo mandun gheunk nam, thoinchean raxttrik mollavelea rajkaronnant novem moddon (turn) ailem.

Lok Sobhechi vinchnnuk 2014 hicher nodor dovrun Narendra Modik BJP-ant jem unchlem pod favo kelam, taka lagun fuddle vorsa kendrant BJP sot’ter yetolich yetoli oxem eke vatten BJP-ak aplea kallzant nhoi tor monant tori suvat aslolea khubxea zonnank dista. Zalear dusre vatten, teach Narendra Modik lagun atam BJP-acher far yetolo ani mar bostolo oxem kaim zonnamni somoz kaddla. Ani ho somoz atam raxttrik rajki mollar rup dhorunk laglolo disun yeta.

Narendra Modik BJP-cho fuddlo “Prodhan Montri” zauncho umedvar mhonn eke veglle ritin fuddem kaddtoch Pox’chim Bengolchi Mukhel Montri Mamta Banerjeechem firlem. Fuddle Lok Sobhechi vinchnnuk loddounk, BJP ani Kongres naslolo ‘Federal Front’ ghoddounk tinnem nanv ghenastanam prantik pokxank ulo marlo.

“Narendra Modi fuddlea Prodhan Montriachea poda khatir aplo umedvar nhoi” oxem BJP ugteponnim sangonam te meren ‘National Democratic Alliance’-ache bhageli mhonn JD(U) taka atam sangat diunk xokchinam, oxea utramni Biharcho Mukhel Montri Nitish Kumaran Narendra Modik aplo virodh dakoyla.

 Narendra Modi Bharotacho fuddlo Prodhan Montri zalo zalear, NDA-k tacho faido zaunche poros chodd mar bostolo, oxem Shiv Senachem mot. Ani Shiv Senachem hem mot tor khorem zalem zalear, atam JD(U) pokxachea rupan NDA-k 25 zageancher mar bospachi bhirant asa.

Fuddem Rajasthan, Madeo Prodex, Chhattisgarh ani Novi Dil’lint zavpi vidhan sobhechea vinchnnukamni ‘Modi Effect’ disun yetolo hantum il’lo-i dubav nam. Hea zageamni zavpi vidhan sobhechea vinchnnukamni soglle mellun 590 zage, ani Lok Sobheche vinchnnuke khatir 72 zage asat.

Az, zorui Narendra Modik Bharotacho fuddlo Prodhan Montri umedvar mhonn BJP-an mukhar kela zalear, faleam ‘Hindutva’-velean to BJP-a khatir khubxim ogllim motam zoddun, desantlea dhormvadak posvonn ditolo. Punn hea sogllea ghodda-moddim modim BJP-acho raxttrik odhyokx Rajnath Singhacho vichar kelear, to hea goddboddant bes-boro ani samballun rajki khell khell’la. Tannem bhouch fixalkayen Narendra Modi BJP-acho vinchnnuk fuddari ani odhikari mhonn nanv jahir kelam, punn tea nanvak Prodhan Montriachem rup ailam tednam, taka sabar rupamni khub virodh uprasla. Punn Rajnath Singhan to huxarkayen hatall’la. Apnna kodde zata te porim, halinch zalolea BJP-chea ghodda-moddim vellar L. K. Advanik sorv vattamni tannem thatharla. Mhonnche, eka zomeant vo pokxant hea-tea karonnak lagun voir-sokol zata tednam ek khoro fuddari ti poristhiti koxi zagear ghalta, koso soglleank ekvottan samballta, tosli bhumika Rajnath Singhan keloli polleunk mell’lea.

Hem sogllem vangdda ghalun sankllayelem zalear, hea sogllea ghodda-moddim fattlean Rajnathachoch hat asa kai kitem oso dubav yeta. Kiteak, Rajnath Singhak rajki mollavelea unchlea podanchi borich avodd ani anvdde asat. BJP-ant anik-ui khubxe zonn desacho Prodhan Montri zaunk monantlea monant anvddetat, tantum Rajnath Singhachem-i nanv aspavlolem asa. Desacho Prodhan Montri zaunchi apli khuxi to ugteponnim dakoynam zait, punn BJP-acho raxttrik sekretar mhonn jea Varun Gandhik tannem unchlem pod dilam, tachea tonddantlean to apli khuxi posraunk lagla.

Modik itlo virodh asa thoim xevttim Rajnath Singhuch deasachea Prodhan Montriache sodrier choddonam mum?         

Jose Salvador Fernandes

www.goa-world.com,

Sonvar, Jun 14, 2013

 

                  

BJP-ant Futt Poddta Tednam…

SON’VARACHIM SUNGTTAM:

BJP-ant Futt Poddta Tednam…

-          Jose Salvador Fernandes

 

 

 

“When the monkey goes up, its bottom can be seen” oxi Inglezintlean ek mhonn’nni asa. Te mhonn’nniechem khoreponn Gõyant kalchea disa zalole Bharotiya Janata Pokxache (BJP) Raxttrik Pod-Odhikarianche Zomatint, ani aichea disa suru zalole ani faleam disa somp’pi   Raxttrik Vavurpi Somitiche zomatint-ui disun ailam.

Rajyachea vo raxttrik panvddear zaum, BJP sodanch apunn her pokxam poros vegllo mhonn miroytalo. Aplea pokxachi ‘xist’ dusrea pokxak yeunkuch xokonam mhonn hordem boddoytalo. Pokxachea dheyancho (principles) ani hetuncho vixoy yeta tednam, aplea pokxant kitlea-i unchlea podar aslolea mon’xak ekoddo (individual) mhonn mhotv uronam, xevttim Pokxuch mhotvacho tharta oxem hem BJP-chem chintop aslem, ani to Pokx somazak toxench dakoytalo. Punn kalchea disa zalole zomatint, ani aichea disa chalu aslole Raxttrik Vavurpi Somitiche zomatint bhag gheunk BJP-acho mhalgoddo fuddari L. K. Advani pokxachea itihasant poilech pavtt yeunk nam! Tache xivay, kalchea disa zalole zomatint Pokxantlea her mhalgoddiamni-i zoxe porim Jaswant Sinha, Shatrunghan Sinha ani Uma Bharti he-ui raxttrik fuddariamni, pokxachea bhitorlea rajkoronnak lagun he zomatim pasun kus marli! Lok Sobhechi Virodhi Pokxachi fuddari Sushma Swaraj kalche Raxttrik Pod-Odhikarianche zomatik uxir aili!

BJP-achi Raxttrik panvddeaveli Vavurpi Somitichi zomat! BJP-che nodrentlean sangtolom zalear, 2014 vorsant zavpi Lok Sobheche vinchnnuke khatir bhouch molachi zomat! Ani te raxttrik mol-mhotvache zomatik hajir zavpiamni BJP-achi itlea vorsanchi koddok xist moddli! Atam pokxnche dhey ani hetu khuim konnxak poddle? Pokxachem mhotv sallkacheach mullant moddun poddle? Poristhiticher nodor marlear, Pokxache te dhey ani hetu Pokxantleach mhalgoddiamni aplea pãya tall mostun, apnnak Pokxa poros chodd mhotvacho tharavpacho gombhir khell choloyla! Mhonnche, atam BJP-nt ekoddo Pokxa poros vhoddlo zaunk sodta! BJP poros L K Advani vhoddlo zaunk sodta! Ani Pokxant apnna poros L K Advani vhoddlo zalolo Gujratcho mukhel montri Narendra Modik naka!

Rajki pokxancho itihas challun pollelear, soglleach rajkornniank aplea pokxachea unchlea podar aspache duvalle lagtatuch. BJP-achea L K Advanik te 2009 vorsa thaun chodduch laglole... Gujratant favlole prosid’dik lagun atam thooinchea mukhel montriak Narendra Modik-ui te duvalle lagleat... dog-ui Bharotache fuddle Prodhan Montri zaunk sodtat. Prodhan Montriacho zago ekuch asa dekun, dogainchea-i duvalleank boroch nett aila, ani tacho, vaitt vo boro to khobor nam, porinnam’ BJP-acher zaunk lagla. Mhonnche, BJP-ant atam desachea rajkaronna bhair pokxachem-i rajkaronn cholunk laglam, ani tem bhouxik-ui zalam! Taka lagun, BJP-a modem futt poddunk laglea kai dista. Hoi. L. K. Advani add Narendra Modi! Vo L. K. Advani add BJP?

BJP-achem hem suru zalolem raxttrik panvddeavelem gombhir rupachem ani svota pokxakuch mal poddunk yeupi hea nattkacho,  2014 vorsant zavpi Lok Sobhecheche vinchnnukeche nodrentlean apnnak koslo faido zatolo tachi Kongres Pokx sumar ani molavnni korunk lagla. Toxem polleunk gelear BJP-an Narendra Modi fuddlo Prodhan Montri zaupa khatir umedvar mhonn nemlo zalear, apnnak fuddli Lok Sobha avhanchi asa, ani te nodrentlean zodd yeum yeta hem kendrantlea Kongresak khobor asa. Kiteak Modin hache poilim Kongresintlea xarantlea modlea vorgak ani tornnateank adinch jikun ghetlolim asat. Modlea vorgan ani tornnateamni hache poilim 2009 vorsa ugtea monan ani kallzan Kongres Pokx vengoun, tanchea bollar UPA sorkar dusre pavtt sodrer ailo.

Punn atam nov vorsancho kall sorun gelear Prodham Montriache kocherint yo-voch korun sumara bhaileamni zotim zhoroylim. Ani hea nov vorsanchea kallant, kendrantlo UPA sorkar, desachi seva korunk, ani goroz thoim mhotvache nirnnoy gheunk brooch osokt poddlo disun yeta. Tantuntlea tantum Prodhan Montri Manmohan Singhachi-i loukiktay ani nanv denvot veta. Ani pinzloleant pãy mhonntat te porim, bhroxttacharachi sankoll, mhargayecho dhog Kongres Pokxak anik-ui osokt korit asa.       

www.goa-world.com
Sonvar, 8 June 2013