Sonvskrutik Timoteo Fernandes

SON’VARACHIM SUNGTTAM:

Sonvskrutik Timoteo Fernandes

 

-          Jose Salvador Fernandes

Timoteo-bab Fernandesacho zolm’ 1937 vorsantlea Janerache 23ver, Gõy rajyachea Ponnje xarant zalo. Ponnjechea ‘Liceu Nacional Afonso de Albuquerque’ hantum tannem Purtugezintlean ‘Curso Geral dos Liceus’-achem xikop kelem.

 

Timoteo-babak songitacho ani sonvskrutayecho upatt mog. Heach mogan to Maestro-Profesor Antonio de Figuereidochea margdorxona khal songit vachunk, gavunk xiklo.

Bharotacho tednancho Prodhan Montri Pandit Jawaharlal Nehru Gõyak bhett diunk ailolo tednam, tache mukhar Gõycho lok-nach manddpi don’xim odik vangddianchea pongddant tacho-i aspav aslo.

Gõyachem lok-songitachem ani lok-nachachem daiz zata titlem Gõyche matiyent tigoun dovrunk, umedin bhorun Timoteo-baban 1965 vorsa ‘Timoteo’s Folklore Troupe’ sthaplo. Konknni lok-songitchi, ani taka som’bond aslolea lok-nachachea daizachi vollok soglleank korun diunchea hetun, to pongodd ghottmutt ani okhondd korunk to khubuch thokos gheun vavurlo. Gõychea lokvedacho ani lok-nachacho tannem sôd-vavr kelo, ani tacho gabho samballun, tantum noveponnache ani adhunikponnache bodol ghoddoun haddle.

Gõyant 1983 vorsa ‘Commonwealth Heads of Government Meeting’ (CHOGM) zali. Tea vellar tannem aplea ‘Timoteo’s Folklore Troupe’-achea asrea khal, Gõyant ailolea her desantlea Raxttrpotim, Prodhan Montri, Raza ani Ranniam mukhar lok-nachantlean Gõychea daizachem chitr manddlem. Hench daiz tannem fuddem vochun 1975 vorsa Gõyche bhetter ailolea Tanzaniacho Prodhan Montri Roshidi Kawawa mukhar, 1984 vorsa ailolea ‘Soviet Cosmonaut’-am mukhar, Vanuatuacho Prodhan Montri Fadar Walter Hadya Linichea samkar, 1985 vorsa Rusiechem Protinidhi Monddoll ailolea vellar, teach vorsa Bengllur zalolea ‘SAARC Conference’-a vellar, 1986 vorsa Juanv Paul Dusro Pap Saib Gõyche bhetter ailolo tednam, Netherlandachi Ranni Beatrix ani Norwaycho Rajkunvor Harold ani Rakjkunvor Sonja hanche mukhar, Jaipur, Varanasi ani Novi Dil’lint ghoddoun haddlolea ‘Goan Food Festival’-a somoyar, thoinchea Hotel Taj Polasint, 1988 vorsa Gõyant zalole ‘World Economic Geneva and Confederation of Indian Industry’-chea protinidhi monddolla mukhar, tin disanchea ‘Shillong Festival’-ant tednancho Prodhan Montri Rajiv Gandhi ani Ut’tor Asientlea Protinidhi Monddolla mukhar, Bhubaneshwar ani Kolkot’ta xaramni tannem Gõychea lok-nachachea daizachem khorem ani borem dorxon ghoddoylem.            

‘Timoteo’s Folklore Troupe’-achea madeomantlean, Gõychea lok-nachachea daizacho bavtto ontor’raxttrik mollar-ui ubounk Timoteo-bab pengott bandun vavurlo. 1987 vorsa Dubai International Hotel-ant ‘Festa de Goa somarombha vellar, Mauritius-antlea ‘International Ocean Festival’-ant tannem aplea pongddantlean Gõychea lok-nachachem, ani taka zullun aslolea Gõychea Songitachem daiz ontor’raxttrik mollar dollebhorun polleunk dilam dekun, gõykarank tacho obhiman bhogta.

Fattlim sabar vorsam, Gõyant Karnaval ani Shigmo daizacho ek bhag mhonn vhodda dobajean monoytat. Gõychea daizachea mogan hi kolponam Timoteo-babachea monantlean xizun bhair aili, ani ti chalik launk tannench fuddariponn ghetlem. Az he don-ui utsov Bharotachea her Utsovanche vollerint aspavlole amkam polleunk melltat, ani tachem xrey Timoteo-babakuch favo zata.

Rajyachea panvddeavelea Lok Kola Utsovant tannem eksarkim 12 vorsam bhag gheun, Gõychem lok kolechem daiz kitlem girest, ani hangache matiyent tachim pallam-mullam kitlim khol asat tim tannem dakoun dileant.     

1977 vorsa Janerache 26ver, Novi Dil’lint Lokrajyachea Disa zalole ‘Parade’-int tachea pongdda udorim tannem ‘Viva Carnival’ Gõychea ‘Float’-acho bhag zaun, Gõychea songitachea daizacho hajir asloleank gost dilo.

1975 tem 1980 hea vorsam pottim, Gõychea bhitorlea ani khanchim-konnxantlea talukeamni ani ganvamni Gõychem daiz aslolea lokvedacho, tachea nhesnnancho ani chali-ritincho tannem khub kholayen obheas kelo. Tacho porinnam’ mhonn, Gõychea 24 zageancher ‘Goa with Love’ nanva khal 40 vangddianchea zomeachi tannem bhouch hikmotin dakounn ubi keli. Tantutlean, Gõychea daizacho bhag aslolea lokvedantlo lok-nach, vazovp, lok-gitam thuku-thuku korun polleunk ani aikunk dilim, tachi tokhnnay korinastanam ravunk zainam.    

Gõychea lokved daizachi sonvsarak vollok dita-dita tem samballunk, rakunk ani tigounk Timoteo-babak az meren sorkari ani rajachea panvddear sabar man, bhouman ani pusroskar favo zaleat. Tannem Gõyche sonvskrutayek tomam’ yogdan dilolea khatir tacho obhiman ballgun Dalgado Konknni Akademicho taka ‘DALGADO DAIZ PUROSKAR 2012’ favo zala.

 

Sonvar, 22 Jun 2013
www.goa-world.com