Friday, February 28, 2014

Kotta! Bharot Desachem !


SON’VARACHIM SUNGTTAM:

Kotta! Bharot Desachem !

-Jose Salvador Fernandes

 

Apleponnan jiyevpi mon’xank, apnnak kitem zay vo naka ti bori khobor asta ani tea promannem tannim aple hetu tharylole astat. Dusreachem boreponn chintche khatir te monis apli xokti ibaddinant. Sonvsarant jitlem-i asa, tacho zata titlo vantto te aplea vantteak gheunk proyotn kortat ani vavurtat.    

 

Apleponnan bhorun apunn chint’ta tio sonvsarantlio aplio sogllio ruchi ani avddi zata titlio bhoglolio deki amkam itihasantlea patxayam modem dolle bhorun polleunk mellta. Sonvsarantlea jitlea-i desancher apnnak tabo aslo titlea-i desantlean sonvsari bhog ghevpachi ji purvonn zatali ti hache poilim Romantlea razamni bhogloli asa hem vegllem sangpachi goroz nam.

 

Adhunik itihasacher nodor firoylear, sonvsari sontosa ani bhoga khatir Henry VIII ani Charles II hannim Inglanddantlea her raza-patxayam poros aplie porjechea boreponnacher chodd durlokx kelolem-i sonvsaran pollelam.        

 

Punn oslem apleponn fokot raza-patxayam modem polleunk mellta oxem nhoi, punn tem somazantlea dor eka panvddear polleunk mellta.

 

Bharotant sod’deak 2014 Lok Sobhechie vinchnnukechem varem suttlam, ani hi vinchnnuk loddounk Bharotantlea lhan-vhodd pokxank duvalle lagleat. Tech khatir, dor ek pokx apleponnachie golint ravun dusrea pokxancher nam-nam torechea guneanvanche fator xevttun martanam distat. Lok Sobhechie vinchnnukek pokxachi apnnak tikett mellchi mhonn, khubxe umedvar apleponnachea goreak duddvanchem hains lavun purtea umedvarancher onit kortanam distat. 2014 Lok Sobhechie vinchnnukent aplie khuxie ani opekxe pormannem pokxachi apnnak tikett mellchi nam dekun kaim zonnamni ap-aplo pokx soddla, kaim zonnamni dusrea pokxant uddi marlia ani kaim zonnam pokxa kodde temam korunk bosleant. Ani tantuntlea tantum, thodde pokx ekttaim yeun tannim ‘Third Front’ ghoddla!

 

Itlean sompunk nam. Kaim pokx, apleponnachie ganttik dhorun, 2014 Lok Sobhechie vinchnnuke khatir teach-teach adlea umedvarank tiketti diun aple umedvar motdarancher thapunk lagleat! Hea soglleachim pallam-mullam apleponnant nant zalear, anik kiteant asat oxem amchean mhonnum yeta?

 

Amchea desantli khoinchi-i rajki vinchnnuk chintun-niyallun pollexi zalear, vhodd-lhan pokxan ani pokxachea mon’xamni tie-tie vinchnnukecho vichar rajyachea ani desachea boreponnan kelolo disonam. Portench zalear, rajya ani desa poros aplea pokxak ani tea pokxantlea mon’xank kitlo faido zatolo, koslem boreponn melltolem, tantuntlean apnnak fuddli vatt koxi ugti zatoli hacheruch nodor thiraun vichar kelolo polleunk mellta. Ani hem tor khorem nhoi zalear, amkam zaum rajyachea vo desachea panvddear zavpi vinchnnukamni dor pavtti choddan-chodd novim tonddam, novea pokxanchi sot’ta kiteak disonam? To-to pokx, teach-teach zagea khatir, porot-porot vinchnnuk loddounk aplea adleach umedvarank kiteacher adarun tiketti dita? Hantuntlean kitem thavem zata? Ani oslea chintnamni ani vevharan khoinchem-i raj ani des kitlo fuddem pavtolo? Desantlea pokxank ani rajki mon’xank desachem boreponn zaunk zay aslolem te bhaxen zalolem naka mhonn hantuntlean thavem zata mum? Hem amchea desachem dolldirponn nhoi zalear anik kitem mhonnpachem?                

 

Rajkaronn hem vevosthit ritin raj cholunche khatir asta. Rajya-rajyamni porjechi udorgot korun xevttim desachi progoti korche khatir asta. Punn amchea rajki mon’xamni ho hetu aplea dolleam add kela. Taka apleponnachie matiyent puroyla ani mostila. Dekun Bharot desachea rajki pustokant tea hetuch kosloch chhap disonam.               

 

Monis kalloka thaun kalloka kodde veta tachem hem chitr asa. Hem chitr rajki mon’xam sombondan jitlem khorem, titlench tem rajki pokxam sombondan khorem asa. Dusrea utramni sangchem zalear, sot’ter aslole monis aplea boreponna khatir dusreancher onit kortat. Dusreanchi porva korinant. Somzachem ani desachem boreponn ani aplem ontoskorn te apleponnachea gidank khavoun khub adim meklle zaleat. Tanche koddchean rajya ani desa khatir koslem boreponn anvddeum yeta ho vhoddlo prosn!

      

Jose Salvador Fernandes
1-Mars-2014

Friday, February 14, 2014

JAI HO BHAROT ! JAI HO DIL’LI !



SON’VARACHIM SUNGTTAM:

JAI HO BHAROT ! JAI HO DIL’LI !

-Jose Salvador Fernandes

 

Don dis fattim, mhollear Febrerachie 13ver Lokxayechem Devull aslolie Sonsodent (Parliament) Lok Sobhechea khasdaramni aplea apnnak sobhava vinglle korpachio jio kornnio kelio, tio Bharotachea dor eka nagrikak lojek ghalpachio tharleat hem khorem. Rajyanche motdaranche protinidhi mhonn nivddun ailolea tea khasdarank tosleach, mhonnche fodd-modd korpiamni, lokxayecho khoro orth khobor nasloleamni, kaidea add vochpi sobhavachea motdaramni nivddun dileat kay kitem oso prosn monant ubo zata.


 

  • Lokxayechea Devllant bosun Bharot desacho man rakhun vevhar cholounk zay aslolea Bharotachea khubxea khasdarank lokxayecho khoro orth khobor nam hem Bharotantlie khuinche-i ugti aslolie chiklachie ani ghanniarie khollie poros odik ugteponnim disun yeta.  

  • Jea rajyachea sorbhonvtonnchea vatavoronnant he khasdar lhananche vhodd zaleat, tea rajyachi ani khasdaranchi fattbhuim hie ghoddnnientlean ugddapi zata. 

  • Favo tem xikop ani rajkaronnachi khori vollok naslole khasdar Lokxayechea Devllant pavtoch, khoinchie poristhitent apnnak koxe samballunk ani vagunk unnem poddtat, ani eka borea khasdarak sobonam toslio kornnio adarunk te kitlea khala denvtat tem-ui chitr hi kalli ghoddnni dollebhorun polleunk dita.

 Kal Febrerachi 14 tarik. Dil’lint Aam Admi Pokxacho (APP) mukheli Arvind Kejriwal zo 49 dis adim Dil’lichea mukhel montriache kodelir boslolo, tannem aplea podacho rajinam dilo. Bhroxttachar sompounchie yevzonnen to jem Janlokpal Bil Vidhan Sobhent manddun pas korunk sodtalo taka, AAP-k bhailean thaun tenko divpi Kongres Pokxachea amdaramni ani Virodhi Pokxachea - Bharoti Janata Pokxachea - amdaramni ekttaim yeun virodh kelo. Ani heach karonnachem nimit dhorun Arvind Kejriwalan aplea mukhel montripodacho rajinamo dilo.

 

Dil’lintlie he-ui ghoddnnien desantlea pokxanchie monanchie vrut’ticher ani sobhavacher boriech kholayen uzvadd ghalolo dista.

 

  • Dil’lintlie Vidhan Sobhechie vinchnnukent apnna poros AAP-k chodd zoit favo zalem hem Kongresik sosunk nam. Dekun hea pokxan AAP-k thoim sorkar ghoddounk khuxi nastanam-i bhailean thaun tenko dilo, ani soeg mellta toso teach pokxache pãy oddle. Haka sondi sadunchem rajkaronn mhonntat. 

  • Dil’lintlie Vidhan Sobhechie vinchnnukent Kongres Pokx sarkocho sokoilea zagear. BJP-kui sorkar ghoddounk ani cholounk Dil’lintlea motdaramni bhoumot diunk nam. Sorkar ghoddounk Kongresin bhair thaun AAP-k tenko dilo to BJP-k matui avddunk nam. Toxem zalolem tea pokxak naka-i aslem. Mhonnun BJP-n ‘mhaka nam zalear chol tuka-i nam’ oxem dhoronn apnnaun Virodhi Pokxacho sobhav samball’lo. 

  • Bharotantlea rajyamni, ek pavtt mukhel montriachie kodelir boslolo rajkarnni ti kodel aplo kall somplea bogor tichievelo matui uttunk sodinam. Dekun modinch taka konnem tori uttoun konnxak uddouncho poddta. Rajkarnniche kopdde ghalolea Arvind Kejriwalan mat toxem ghoddum porian ravunk nam. Janlokpal Bil Vidhan Sobhent pas korunk taka tenko diunk nam, tannem mukhel montripodacho rajinamo dilo.  

    Arvind Kejriwalan mukhel montripodacho rajinamo dila tache fattlean tacho anik hetu asa oxem khub zonn chintat ani mhonntat. Chintum ani mhonnum. Punn jie poristhitint Arvind Kejriwalan rajinamo dilo, to fuddli bikott poristhiti addaunche vo tallche khatir dilo hem sot. Tannem to rajinamo diunk naslo zalear, tachea ani her rajkarnni lokam modem koslich ontor urchi nasli. ‘Aam Admi’ taka teach rebeachie rajki nodren polletole asle. 



  • Arvind Kejriwal AAP-chem rajki misanv gheun rajkaronnant aila tednam thaun raxttrik pokxanchea pottant bara vazunk lagleant. Lok Sobhechie vinchnnukechem gonnit hakach lagun kitem-kat zait tacho sumar kaddunk zainam. Porinnam’: APP raxttrik rajki mollar koslem tori ontor korunk xokta!

Sonvar, 15/2/2014

Saturday, February 8, 2014


SON’VARACHIM SUNGTTAM:
                                                   JAI HO!

-Jose Salvador Fernandes

 



Xevttim Devan nirnnoy ghetlo – atam sonvsar sompovpacho vell pavlo! Mhonntoch Devan, apnnak dispi sonvsarantlea teg zonn bolladik mon’xanchi zomat ghetli. Amerikecho Raxttrpoti Barrack Obama, Chinacho Raxttrpoti Xi Jinping ani Bharotacho Prodhan Montri Manmohan Singh, oxim tea teg zonnanchim nanvam.

 

 “Atam sonvsar somptolo, mhonntoch tumi vochun tumchie porjek sangat,” Devan tankam sanglem.

 

Obama TV-cher ‘live’ uloylo ani porjek sanglem – “Tumche khatir mhoje kodde bori khobor ani VAITT khobor asa. Bori khobor oxi – Dev asa mhonn ami itlo kall mhonntaleanv tem sarkem. Khorench to asa. Vaitt khobor – Dev atam sonvsar sompoytolo.”



 

Chinacho Raxttrpoti Xi Jinpingan sonvsarbhor sondex dhaddlo – “Tumche khatir mhoje kodde don khobro asat. Ek vaitt khobor, ani dusri tea von VAITT khobor. Vaitt khobor oxi – Ami Dev nam mhonntaleanv tem sarkem nam. Dev asa. Ani tea von VAITT khobor ti hi – Dev sonvsar sompoytolo.” 


 









Tisro urlo to Bharotacho Prodhan Montri Manmohan Singh. Tannem taktin Sonia Gandhik fon marlo ani sanglem – “Mhoje kodde don khobro asat - ek bori khobor, ani dusri tea von bori khobor. Bori khobor hi – sonvsarantlea teg bolladik mon’xam modlo hanv ek bolladik monis.
Tea von bori khobor mhonnlear, Modik Prodhan Montri zavpacho koso addaunk zay te vixim atam ami dasti kaddchi goroz nam!”       

 


Jose Salvador Fernandes

About Me

My photo
Goa/India, Hawalli/Kuwait, Kuwait
A big e-welcome to you. Tumcam Maie-mogacho ieukar. Enjoy Life - This is not a rehearsal! Konkani uloi, boroi, vach ani samball - sodankal. Hich Goenchi osmitai ani amchem khalxelponn. Goenchi amchi Konkani bhas! Ekvottachem saddon Goenkaranchem. This is Gaspar Almeida from Parra, Bardez, Goa, based in Kuwait and am connected with the www.goa-world.com website created by Ulysses Menezes, and as Moderator of the famous first of its kind Gulf-Goans e-Newsletter (since 1994) and The Goan Forum and several Goan and Indian associations and forums and e-forums in Goa, India, Kuwait, The Middle East and worldwide.