SON’VARACHIM SUNGTTAM:
Ixttagot
vo Ixttachi Got?
-
Jose Salvador Fernandes
Faleam
Agostachi 4 tarik. Ixttagoticho Dis. Agostache 4 tarkek ani ixttagotik
som’bondacho koslo itihas asa ti mhaka khobor nam. Asa zalear tachi foddnnixi
korun konnem-i sanglear, mhoje xivay anik-ui khub zonnank kolltolem aslem.
Ixttagotiche umbre choddtanam mhaka je onnbhov ailole te mhaka khub kitem
xikoun gele, ani tednanchean ixttagot kolpone vixim mhojem mon….
1.
“Mhojea fattlean cholum naka, ghoddie hanv fuddem aschonam. Mhojea
mukhavelean-ui cholum naka, ghoddie hanv tuje fattlean yeunchonam. Fokot mhojea
vangdda chol ani mhozo ixtt za,” oxem Albert Camus ixttagoti vixim mhonnta.
Mhojem mot: Albert Camusan jem kitem
mhonnlam tantum kitlem khoreponn asa ani tem kitlem vevharik tem chalik laun
polleunchem poddtolem. Kiteak aichea kallar, ixttagoticho orth bodol’la ani
tachem tem mhonn’nnem khore ixttagoti pasun khub pois asa.
2.Tuje vixinchem
sogllem zannam zaun-ui tuzo mog korta to tuzo khoro ixtt” oxem Elbert Hubbard mhonnta.
Zalear, “ Ixtt tuka asa toso vollkota, tum khuim aslo tem somzota, tum zoso asa
toso tuka mandun gheta, ani torui, tuka
bore bhaxen vaddunk meklleponn dita” oxem William Shakespeare mhonnta.
Mhojem mot: Aichea kallar khuinchoch
ixtt aplea dusrea ixttak itleo-i gozali ugtio ani foddun sangonam. Dusrea
utramni , khubxe zonn je ixtt mhonnun som’bond dovrun asat tacho orth te taka
apleo soglleoch gozali sangtat oxem nam. Ani aplo ixtt mhonn zaka tum tujeo
borea vangdda nam boreo gozali sangta tednam, aikopi ixtt tuje pasun matso
chotur zata ani tuje pasun matso pois-ui ravunk monantlean toyar. Zalear hanga
ixttam modem visvasak ani ekamekak asat toxe mandunk gheunk zago koso
astolo?
3. “Tum tor 100 vorsam ravunk sodtai
zalear, hanv fokot 99 vorsanch jiyeunk sodtam, kiteak uprant mhaka tuje xivay
ravunk naka,”
A.A. Milne-an ixttagotichea vixoya vixim khuim
tori mhonnlam.
Mhojem mot: Aichea kallar ixttagotichea sonvsarant oslea ‘utopian’ chintnank khuinch zago nam.
4.“Tum mhozo ixtt
mhonn yevjitam title-i pavtti mhoje kodde ful aslolem zalear…. mhoje bagintlean
mhojean sodamkal cholunk zatolem aslem” oxem ixttagoti vixim Alfred Tennyson mhonnta.
Mhojem mot: Az te kitle-i bore ixtt
zaum, tannim apnnak khuim tori ixttagotichi xim’ ghalun dovorlea, dekunuch
ixttam kodde sodamkal ixttagotiche bagintlean cholunk zainam. Te rokddech
thoktat.
Mhojem mot: Az khubxea zonnamni bore ixtt nasun-ui ho sonvsar boroch godd kelolo
asa.
6. “Uzvaddantlean eklich veche bodlek, kallokantlean ixtta vangdda cholunk mhaka chodd avoddtolem,” oxem Helen Keller-an mhonnlam.
Mhojem mot: Konn ixtt apunn kallokantlean cholun veta mhonn sangtole? Sangpa
poros te tuka vangdda vhortole, ani apnna vangdda tuka-i bhogchem mhonn monant
gantt marun ogich ravun tuzo sangta veglle ritin samballtole.
7. Aristotleache
sangnne promannem, ixtt mhollear don kuddintlo ek otmo.
Mhojem mot: Toxem zalear, ixttam
modim sabar gozalim vixim bhed-bhav asunkuch zainam asle nhoi? Punn te asat hem
sot ani konnuch nhoikarunk sodinam. Ixttagot mhollear don kuddincho ek otmo
zalear legit te monan, chintnamni ani vagpant ekuch toreche asunk naka asle?
Kazari jivitant legit don kuddi ek zatoch teo titlea purtioch eka monacheo ani
eka otmeacheo astat…. Punn tea vella bhair tanchem chintop ani vagop khuim tori
vegllem asta, ani tich tanchi zonn ekleachi osmitay asta. Oxe poristhitint ani
poristhiti bhair porian, ixtt mhollear don kuddintlo ek otmo koso zaum yeta?
Sonvar, 3 Agost 2013
8. “Ixttagoticho
orth sangop hi sonvsarantli chodd kottin gozal. Ixttagoticho orth tuka iskolant
xikunk mellonam. Punn tum ixttagoticho
orth xikunk nam-i zalear, tum khorench kainch xikunk nam-i” oxem Muhammad Alichem sangnnem
asa.
Mhojem mot: Onnbhovantlean
ixttagoticho orth somzololoch ixttagoti vixim chodd chotur ravtolo, ani ixtt
asop borem vo vaitt tem xem’bor pavtti chint’tolo.
9.
Mon’xachea jivitant pustokam ani ixtt thodde, punn bore asunk zai, oxi Latim
bhaxen mhonn’nni asa.
Mhojem mot: Adim ixtt ani pustokam-i borim astalim. Atam,
pustokanch borim asat, ani ixtt…
10. Rozoyechem ekuch ful mhoji bag zaum yeta….
ekuch ixtt, mhozo sonvsar zaum yeta, oxem Leo Buscaglia
mhonnta.
Mhojem mot: Ekuch fulachi bag, ani ekuch ixttacho sonvsar
zavpache dis sorle.
No comments:
Post a Comment