SON’VARACHIM SUNGTTAM:
‘KHUIM GEL’LO KHUIM NAM…
KITEM HADDLEM KAIM NAM…’
-
Jose Salvador Fernandes
Krikettiche
khellgoddi Sreesanth, Ajit Chandila ani Ankeet Chavan hankam Indian Premier
League (IPL) hantum ‘spot-fixing’-a
khatir sampddayle, ani krikett khellachea mogan pixe zalole ani vhanvun gelole khubxe
bharoti matxe bhannar aile. Sabar zonnamni aplo rag ugtaylo. Aplea rajyantlo
nanvosto khellgoddi mhonn Keroll rajyan Sreesanthak Keroll rajyachea sortinchea
prochara khatir taka jahiraticher dakoylolo…. To-ui kaddun udoylo. Her
desantlea dusreamni bharotak lojechim bottan dakoylim!
Toxem
polleunk gelear, krikett khellachea mollar hem jem kitem ghoddlam tem novem
nhoi. Hache poilim-i osleo kesi zaloleo asat…
punn dusrea desantlea krikett khellgoddiam som’bondan… Atam tich kes
Bharotant ghoddlea dekun itlo vhoddlo boball…
Krikett
khellachea mollar ghoddloli hi gozal mhollear bharoti lokacho ani desacho anik
ek harso!
Sreesanth,
Ajit Chandila ani Ankeet Chavan hannim ‘spot-fixing’ korpachem dhaddos kiteak
kelem?
- Duddvanchi
axea: Krikett khellant khellgoddiam
khatir khub duddu ghollta…. Tea khellgoddiank khell jikhlear-ui duddu
melltat ani khellant up-ostad zalear-ui duddu melltat. Tea bhair
duddvanchea rupan her faide… her sovloti… mhonnche dudduch duddu…. he
khatir, rajki mollar-ui duddu korunk sompeponn asa oxem chintun khubxe
zonn vinchnnuko loddounk fuddem sortat toxe krikett khellant-ui khubxe
zonn bhitor sorunk ravtat… khella vangddach duddvanchea mogan.. duddvanche
axen…. Ani ekdam mon’xak duddvanchi axea zatoch, taka anik-ui duddu zai
dista. Ani oxem disunk lagtoch anik-ui duddu add-vatten zomounk to
add-vattenuch veta. Sreesanth, Ajit Chandila ani Ankeet Chavan geleat
toxe….
- Ontoskornacho Tallo: Khubxe zonn aplem jivit dhormacher, devacher adarun manddtat ani aplea jivitachi naka asloli xim’ hupunk vochonant. Punn anik-ui oso ek vorg asa, zo devak mandinam … punn ontoskornak mandta. Ontoskornacho tallo aikun to aplem jivit jiyeta. Aplem ontoskorn sangat dinam zalear, to teo-teo gozali korinam. Ontoskorna promannem aplem jivit jiyeunk taka konnachech porvangiechi goroz poddonam. Punn kaim zonnank tanchea jivitant dev-ui lagonam ani ontoskorn-ui lagonam. Ani oxe toreche monis jivitachi xim’ hupun monisponn denvoytat, moniskullak lojek ghaltat tosleo gozali adartat. Sreesanth, Ajit Chandila ani Ankeet Chavan adarleat toxeo.
….
- Bhroxttachar:
Don dis adim krikett khellachea mollar uzvadda ailole te lojek ghalpi
ghoddnniek, mhojea motan lojecho bil’lo asunk favonam. Karonn, Bharotant
je toren bhroxttacharachim veg-vegllim rupam asat, toslench hem-ui
bhroxttacharachem ek rup. Mhonntoch, he ghoddnniek lagun bharoti
nagrikamni aplea kallzak vhoddlo dhoko gheunchi matui goroz nam. Dusrea
utramni, Bharotant bhorxttacharchim mullam-pallam khella moidanar legit
patoll’leant hantum koslem ojap ani vichitrponn? Bharotachea khubxea, ani
bhou korun bhouxik ani unchlea podar aslolea nagrikank ho bhroxttacharacho
oso laglo asa. Zalear krikett mollar, unchlea panvddear pavlolea
khellgoddiank-ui to laglo zalear tantum koslench noveponn nam oxem
mhonnchem poddta. Sreesanth, Ajit
Chandila ani Ankeet Chavan hankam to bhroxttachar khub porno, novo nhoi… Mull
borem aslear kandd borem asta mhonntat!
Duddvanche
axen ontoskornak pallo dinastanam bhroxttachar korop hi chal khubxea zonnamni
apnnaylea…. Sreesanth, Ajit Chandila ani Ankeet Chavanachi ti uzvadda ailea…
veg-vegllea mollamveleanchi lipun asa… sampoddta to chor… nam sampoddnam zalear
XXX todd mhonntat tosleo gozali heo. Heo gozali Bharotant itleo chalteo ani
sodancheo zaleat, tankam atam orth urunk nam… gombirtay urunk nam… teo az
ghoddtat… faleam choukoxe khatir lambnner poddtat… tea mhonnosor khubxim vorsam
dhanvtat… ani teoch gozali porot ghoddtat… vegllea rupan.. vegllea mon’xam
udorim…
Zalear,
‘Spot-Fixing’-ache gozalik kiteak itlem mhotv diunk zai? Ani nagrikamni ti itli
gombirtayen gheunk zai? ‘Khuim gel’lo khuim nam…kitem haddlem kaim nam’
mhonntat tosleo gozali heo! Jai ho Bharot!
Jose Salvador Fernandes
Sonvar, 18 Mai 2013
No comments:
Post a Comment