Favona Tem Mellona?

Favona Tem Mellona?

-Jose Salvador Fernandes



Baravi sompli. Fuddlea xikpa khatir kolejint proves kelo. Kolejint novoch, kitleoxeoch noveo gozali. Ani tantum hi gozal kitlexech zann, hem fokot mhojem oxem mhonnot choli nanvachem 'handbag' gheun bhonvtale. Mhaka-i ek gheun bhonvchem-xem dislem. Nodrentleanuch ek dis mhojeach nograntlea Celinak 'choose' kelem. Ghott monant dovorlem. Punn monantuch dovrun faido kitem? Celinak ti gozal sangunk naka? Punn sangop koxem? Te her ghevn bhonvtat tannim koxi survat kel'li kay? Oxench vochun sangop? Naka! Toxem sanglem ani naka aslolem kitem-i vegllem ghoddlem zalear? Tea bodlek 'tea' mhojea ixttak vicharlear koxem? Ani ek dis takach vicharlem. Tannem budh dili: 'Khoxi aslear osleam kamanim 'round the bush' vochunk upkarona. Tem kednam-i eklench asa mhonnpacho sumar kor. Ti sondi ghe ani tichexim voch. Poilim hans, uprant taka sang "I am interested in you. What about you?"
'Piklolo ambo hatan kaddcho itlem sompem mure hem!' Monantuch mhonnlem, to dis dusrea disach korum-ia . Dusrea disa Celinak vicharpachi toyarich korun gelom. Punn poileach tasak monant ek proxn udelo, Celinak toxem vicharlem ani tannem "nam" mhonnlem zalear? Loz nhoi fukeachi? Ani "oi" mhonnlem zalear? Vikti loz? Fukeachi na tor vikti zaum. Tantum kitem asa? Zata tem zaum, oxem yevjit tichea ektteponnak dolle layt boslom.
Modli sutti, mhonnche 'interval' aslo. Horxim tem bhair vetalem. Punn tea disa tem vorgantuch bosun ravlem. Eklench aple bosker aslem. Mhojech khatir ravlam gay? Toxem zalear tika soroll sangchem poddlem. Oxem mhonnit tachexim vochunk panvlam ubarlim. Punn panvlam tori khoim sottasott voir sortat? Tosoch yotn korunt tachexim gelom. Are! Kallzachea tok'keancho nett vaddlo-so? Oxem hem anik kitem vegllench zata tor?
'Eka cheddvak tacher mog korta mhunn sangpachi hi poilich pavtt mure tuji? Poilim-poilim oxench zata, kainch bhiyeum naka!' Hanvem mhakach dhir dilo. Tachea mhoreant pavtoch addechi 'style' marit mhonnlem "Hai Celina?"
"Hai!" Tannem hansot zap dili! Arecha! Hanvem poilim hansunk zay aslem. Hem kiteak poilinch hanslem? Asum-di! 'Serious' gozali kodden oso vell ibaddum yeta? Mukhel mud'deak hat ghaunkuch zay. Kolltam-na kolltam Celinak I love you sangunk tondd ugoddlem. Punn 'am' zal'lea tonddantlean utram khoim futt'tat?
Hanv tondd 'am' korun ani Celina tondd dhampun - dogaim borinch vell ogi urlim.
"Az 'interval'-ak bhair vochunk nam oxem?" Hanvench zaun ogeponn moddlem.
'Nam!' Tannem hansot mhonnlem, ani ogich ravlem.
"Magir? Kitem mhonnta tum?" Porot-ui hanvuch ulylom.
"Hanv kitem mhonnum? Tunch kitem-i sang!" Celinan-ui mhoje porinch ek addechi 'style' marli. Hanv boroch khoxal zalom!
"Oi!? Sangum?" Ticheach utranchi sondi gheun hanv uloylom.
"Sang re tum! Aikotam hanv!"
"Khoreanch sangom mugo?" Hanvem addkhollot vicharlem.
"Sangpachem aslear sang! Na zalear chol tum hangacho!" Celina ordem hansot, ordem gombhir zaun uloylem.
"Borem sangtam! Aik tor! I......I......I....." KItloch vell utram suttoch nant!
"Tum gagyo?" Celinan vicharlem.
"Nam. Kiteak vicharta?" Hanv.
'I.... I.... I... korta so?"
"Nhoi! Inglezint ek git asa. Tem gavun dakounk sodtalom hanv! Asum-di! Dusre pavtt kednam-i gavun dakoytolom. Tuvem tor modem tondd ghalunk naslem zalear, sogllem git tuka gavun dakoytolom aslom. Borem! Vetam hanv!" Oxem sangit hanv thoimsorlo kednachoch sottokolom.
"Xea! Bad luck! Jinnechea umbrear ailoli sond ogddayli hanvem. Voilean gageponnam. Osli sond atam porot yetoli kednam? Kednam-i yeum, vatt pollet ravpachi!
Tea uprant don satollim porian tichea ekleponnacho porot ekdam sumar kelo. Kolejint Celina sod'dam veginuch yetalem. Ek vor adim. Eklench astalem. Mhonnlem - 'hanvem-i vegim yeunk survat kelear bori!"
Zalem! Ek dis kolejint tachea poros-ui hanv vegim ailom. Punn Celina azun yeunk naslem. Az yena gay? Yetolem! Ani yetolem mhonntanch tem yeta tem pollelem. Yeun koleji bhairuch, aplea sodanchea zagear boslem. Hanstea tonddan tichexim gelo. Mhonnunk laglem:
"Az vegim-so?"
"Yeum-ia mhonnlem tuka sangat diunk!" Are! Yevjinastana tonddantlean kitem bhair sorlem tem koll'llench nam.Celina matxe 'serious' zalem....! Tachi mudra polleun mhojem-i kalliz ogich zoddxem zalem! Rag ailo gay?
"Sorry!" Okosmat amchea mhoreant ubi zalole sangati cholien mhonnlem ani fuddem uloyloem,"lets go in the library."
'Padd poddlolea, tujean ekleachean vochunk yena librarint? Celinachoch tuka kiteak sangat zay?" Te sangati choliek pollet hanv mhojech bhitor choddfoddlom!
Celina uttun tichea vangdda gelem. Vetana mhaka 'see you' mhonnunk mat visronk na! Zaum! Rag nivllolo mhunn tori kollun ailem!
Itle mhonnosor mhojea bhitorlem mon ulounk laglem. Punn atam dusre-i pavtt zomlem na mure? Zomtolem koxem? Modinchi ti 'library' aili nhoi? Borem asa! Jem don favtti zaunk na, tem tisrea dobkeak koxem-i tori korunkuch zay! Kosloch bhoim-bhirant nastana! Celina lagim na tednam oxem mhonnta tum! Punn tachexim pavtoch 'Himalaya'-antli thon'ddi poddlolea vori koddkoddta tum! Na re! Fuddle khepek 'jacket' bi ghalun yetam hanv! Ekach farak don bokim marop. Mhonnche? Mhonnche, koddkoddo-i vetolo ani vangddach 'handsome'-ui distolom! Magir Celina mhojea proxnak 'nam' mhonnunk ailam?
Dusreanchea adaran Celinacho fottu kaddlo. Ani tea uprant to fottu ghevn kolejint ailom. Fottvacher anik-ui sundor dista tem! Are teo gozali niyallpacho ho vell nhoi re! Tea disa bhaxen az-ui kolejint vegim ailom hanv! Punn Celina az-ui vegin yeunk na. Celina yeunche dixen dolle layle. Celina dislem! Sodche suvater koleji bhair boslem. Atam tichexim koslea nimitan vochum hanv? Bhirantxi dista! Kosli? Kormachi? Toxench addechem kalljidarponnan apnnaun tichexim gelom! Zap keli. Sodche vori tem hanslem! Atam ticho fottu tikach kitem mhunn dakovop? Aplo fottu mhoje kodde polleun 'surprise' zatolem gay? Zalear puro!
"Tor kitem mhonnta tum?' Hanvem hansot-hansot Celinak mhonnlem. Poilech pavtt tichexim gel'lom tednam osoch proxn kel'lo taka hanvem. Tednam tannem 'tunch kitem-i sang' mhonnlolem. Az-ui toxench mhonnlear dudant sakor poddlich mhonnpachi!'
"Kainch nhoi!" Celinan zap dili.
Kitem-i tori sang mugo!" Hanv.
"Tuje history notes complete asat?" Tinnem opekxe bhailo proxn vicharlo.
"Oi!"
"Mhaka matxe...." Vakyo purnn korinastana Celina thoinchem uttun gelem. Mhaka 'see you' mhonninastana. Cholot-cholot tem panch-sov panvlam poi aslole Hero Honda motor-saikolxim gelem. Hero Honda cholovpi cheddean Celina kitem tori sanglem. Tea borabor tem motorsaikolicher boslem. Hero Honda fuddem-fuddem vochot ravli. Mhoje nodre bhair. Hanv khub vell mhojech tondrent urlom zaum-ie! Ek motto mus 'am' korun aslolea tonddant gelo tednach bhannar ailom. Pustokant lipoun dovorlolo Celinacho fottu bhair kaddlo. Tache fattlean boroylem: "Celina, mhaka khorpotalem eke kodden, ani hanv khorpitalom vegllech kodden. Mhaka kednach 'direct' khorpupachi 'art' zomli nam."
Vegim-vegim vorgant gelom. Konnuch yeunk naslo. To fottu Celina bostalem tech suvater dovorlo. Celinak dista toso. Na tor, anik kitem kortolom aslom?




14/6/2008
(c) Prof. Jose Salvador Fernandes
http://www.goa-world.com/
Gulf-Goans e-Newsletter
http://www.yahoogroups.com/group/gulf-goans/
GULF-GOANS e-NEWSLETTER (Since 1994)