SON’VARACHIM SUNGTTAM:
- Jose Salvador
Fernandes
- 2014 Lok Sobhechie Vinchnnukentlean don gozali dollebhorun disun ailio. Poili gozal, Bharoti Janata Pokxak (BJP) desachem spoxtt bhoumot. Dusri gozal, Kongres Pokxachem hie vinchnnukent rajki mollar nakanuch nhoy, puray ritin apttop!Raxttrik mollar ubo ravun Kongres Pokxacho 2014 Lok Sobhechie Vinchnnuke nimitan niyall ani vichar kelo zalear, hie Lok Sobhechie vinchnnukent Kongres Pokxak 10 ttok’keam poros-ui unne zage mell’leat. Hea mud’deavelean, atam Kongres Pokxak Sonsodent Raxttrik Pokxacho panvddo melltolo vo nam hacho dubav asa. Itlench nhoy, tor Sonsodent hea Pokxantlo Virodhi Pokxacho Fuddari mhonn konn asum yeta kay nam ho-ui prosn asa.Hie khepek Lok Sobhechi Vinchnnuk loddounk mukhar vetanam, Kongres Pokxan kallachi ani poristhitichi goroz mhonn korunk zay titlo ‘homework’ korunk nam hem khubxea nirikxonnantlean (observations) disun yeta. Dusrea utramni, tannim BJP-a poros tea Pokxacho ‘phenomena’ aslolea Narendra Modichea fuddariponnacho probhav gheunk zay aslo titlea gombhirponnan gheunk nam. Tachea probhava poltoddi vochun to addaunk tannim matui pavlam ubarunk nant. Itlim vorsam desachie porjen Kongres Pokxak vinchnnukamni ubarun dovorlolo toso he-ui khepek porza taka ubarun dovortoli oxi tea Pokxachea fuddarianchi somjikay zaunk nam oxem-i mhonnunk zaynam. Tea bhair, Kongres Pokxa kodde Narendra Modik zullpachie tankicho fuddari-i naslo hem-ui titlench sot. Povitr Pustokant bhurgea Davidan jigantt ani tankichea Goliathak marlo. Punn sogllech pavtti Golaithak konnachean-ui marum yeta oxem nhoy. Goliath Narendra Modi mukharui ‘bhurgea’ Rahulachi got tich zali, tachean tachea pokxak add ghalunk zaunk nam. Hea sogllea gozalintlean Lok Sobhechie hie khepechie vinchnnukent Kongres Pokxak aplea hetucher thiruch naslo mhonn thavem zata.
2014 Lok Sobhechie Vinchnnukecho Gõychea sombondan vichar kortanam, Gõyant Lok Sobheche don zage asat – ek, Ut’tor Gõyant, dusro Dokxinn Gõyant. Hea donui zageamni Kongres Pokxan hie khepek har khali. Lok Sobhechie Vinchnnukent, choddxe pavtti Dokxinn Gõycho zago Kongresichea khankent urtalo. Hie khepek to-ui zago BJP-ak gelo. Toso to zago BJP-ak vochunk xevttim Kongres Pokxacher unch sorlole monisuch zababdar asat.Dokxinn Gõyant Advogad Narendra Sawaikarak 1,98,776 motam poddlim. Kongres Pokxacho Alexio Reginaldo Lourencok 1,66,446 motam poddlim. Advogad Narendra Sawaikarachea motam kodde toxi tachea motanchi sor keli zalear, Alexio Reginaldo Lourencok jim motam poddlim, tacho ankddo ‘decent’-uch mhonncho poddtolo. Zalear Saxttint chovtea zagear aslolea ani Trinamool Kongresichea nanvar 2014 Lok Sobhechi Vinchnnuk loddoylolea Churchill Alemaoak 11,941 motam poddlim. Dusrea utramni, apnnak nhoy mhonn aplie dhuvek legit Kongresin 2014 Lok Sobhechi Vinchnnuk loddounk tikett diunk nam mhonn Kongresichea ragan ani teman Kongresintlean bhair sorlolea Churchill Alemaoan Kongresichim borinch motam khalim. Itlench nhoy, hea vattarant Aam Admi Pokxui aplim motam khaunk sokta mhonn vinchnnuke adim Kongres Pokxan vichar korunk nam. 
Hem sogllem polletoch, 2014 Lok Sobhechie Vinchnnuke adinch Kongres Pokx khoim tori hie vinchnnuke khatir unno poddlolo, ani poddtolo mhonn distalem tem khorem zalem. Hie vinchnnuke adim Kongres Pokx khoim tori vinchnnukam khatir thoklolo distalo to atam Lok Sobhechie vinchnnukecho nikal polletoch, vhoy khorench thoklolo, ani zaynastanam vinchnnuk loddounk fuddem sorlolo mhonn dista.2014 Lok Sobhecho puray nikal polletoch Kongres Pokx itlo khala poddla to atam koso ubo zatolo tachem chitr dolleam mukhar matui ubem zainam. Prosn asat te, hea Pokxak ubo zavpachi ani apli adli mhoima zoddun ghevpachi azunui tank urlia kay?Zap kalluch ditolo!
Sonvar, 17 Mai 2014
No comments:
Post a Comment