MAGNNEACHEM KHOREPONN

 

SON’VARACHIM SUNGTTAM:

MAGNNEACHEM KHOREPONN

-Jose Salvador Fernandes

 

“Magnnem hem zannttie ostoriecho bekarponnachio khell nhoy. Magnnem mhonnlear kitem hem khorea orthan somzolem zalear, ani tem chalik laylem zalear, tem upayanchem vhodd mhotvachem ani bhitorlie tankichem hatiyar,” oxem Mahatama Gandhin mhonnlam. Magnneachi tank kitem ti, Afrikent vavr kelolea eka voizan nond kelolie ani khala dilolioe govayentlean disun yeta.

“Bhurgeank zolm’ diunk jea vorddant gorbest avoyank dovorlolio, tantuntlie eke ostoriek tichea parta vellar mozot korunk te rati hanv bharim vavurlom. Punn itlem-i korun, nov mhoine zaunk naslolea ballkak tinnem zolm’ dilo ani ti meli. Apli avoy meli mhonn tichi don vorsanchi dhuv eksarki roddtali. Amche kodde ‘incubator’ naslo (kiteak ‘incubator’-a khatir bizli nasli) dekun tea nigteach zolmololea ballkak jivem dovrunk amche mukhar oddchonn ubi zali. Zolmololeank pivonn diunk amche kodde kherit sovloti-i naslio.”             

“Ami ravtaleanv tea vattarant zorui gormi asli, torui ratchea vellar khub thondday poddtali. Dekun amchi ek vavurpi, toslea ballkam khatir aslolem boks ani tankam revddaun dovrunk kapsacho vul haddunk geli.” 
   

“Dusri ekli, gormie khatir uzo vaddounk ani gorom’ udkachi botl’ haddunk  geli. Rokddich ti niraxi zaun portoli, ani udok bhortanam botl’ futtli mhonn mhaka sanglem. Atam amche kodde ani tosli botl’ nam mhonn tinnem fuddem sanglem.”  

“Ballkak ujeaxim zata titlie surokxit ritin dovor, ani tea ballka ani ujeachea modem tum nid. Ballkak zata titli gormi divop hem kam’ tujem,” oxem hanvem tika sanglem.”

“Dusrea disa don’param, magnnem korunk hanv onath bhurgeanchea ghorant gelom. Magnnem korunk tea bhurgeank hanvem veg-vegllio suchovnnio dilio ani tea ballkachi-i tankam khobor sangli. Ballkak gormi diun jivem dovrunk amkam gorom’ udkachie battliechi goroz asa ti tea vellar thoim sangli. Toxench, apli avoy meli mhonn tea ballkachi don vorsanchi bhoinn roddta ti-ui khobor tanchea kanar sadoyli.”            

“Magnneachea vellar, dha vorsanchie pirayechea Ruthan promannik ontoskornnan oxea utramni magnnem kelem – ‘Deva, upkar korun az amkam gorom’ udkachi botl’ dhadd. Faleam dhaddlear faido aschonam, kiteak tem ballok mortolem. Dekun upkar korun az don’param mhonnosor dhadd.”    

“Tem magnnem aikun hanv bhitorlean fugar zatalom tednam tinnem Devak fuddem mhonnlem, ‘Tea don vorsanchie pirayechea cheddvacho tum khorench mog kortai mhonn taka kollounk, upkar korun taka ek bavlem dhadd nhoy?’

“Promannikponnan ‘Amen’ mhonnchem vo naka tem hanv chintunk poddlom. Ami magtanv tem Devachean diunk zatolem hem mhojean sotmandunk zainaslem.”

“Tachean sogllem korunk zata; oxem Povitr Pustok mhonnta. Punn khoim tori xim’ asta nhoy? Mhojea ganv ghora thaun ek parsel dhaddun Devachean hea magnneak zap dium yetali. Tea vellar hanv chear vorsam Afrikent aslom, ani mhaka ganv ghora thaun kednanch koslench parsel yeunk nam. Ani konnem-i mhaka parsel dhaddlem zalear, tem dhaddpi tantum gorom’ udkachi botl’ kiteak ghaltolo aslo?”  

“Don’par ordo zata mhonnosor, norsinchea iskolant zoim hanv xikoytalom thoim mhaka ek sondex  ailo – ‘tujea ghora fuddlean ek gaddi thambun asa.’ Hanv ghora pavtam mhonnosor tem mottor gelem, punn mhojea varandant 22 pounddanchem parsel aslem. Mhojea dolleamni dukham udeunk laglim. Mhojean ekleachean tem parsel ugddunk zaunk nam dekun, hanvem onath bhurgeanchea ghorantlea bhurgeank apoylim. Zotnay gheun ami tem parsel ugddunk lagleanv. Soglleanchio nodro parselacher thirun aslio. Tea parselantlean voir aslole ani vinnlole rongit kopdde bhair kaddle. Te bhair tantum koddkaram khatir aslolio vinnlolio benddagi aslio. Khannam toyar korpache thodde jinos-ui asle.”                

“Hanvem porot boksant hat ghalo ani kitem tori bhair kaddlem. Polle zalear gorom’ udkachi botl’! Hanv roddlom. Hanvem Deva kodde ti magunk nasli. Tachean ti dhaddunk zata mhonn hanvem khorench sotmandunk naslem.”

“Devan botl’ dhaddlia zalear, tannem bavlem-i dhaddlam astolem!” Oxem mhonnit Ruth fuddem sorlem. 

Ani dusriech goddiek tannem tea boksantlean, lhan, sundor ritin nhesoylolem bavlem bhair kaddlem. Ruthache dolle chokchokunk lagle. Tika kednanch dubav naslo.

“Jezu ticho khorench mog korta mhonn tika kollunk, hanv tujea vangdda yeun tea lhan cheddvak hem bavlem dium?” Ruthan mhojea mukhamollak pollet vicharlem.

 “Vhoy, ye tum,” hanvem zap dili.

“Panch mhoine porian tem parsel vatter aslem. Hanv adim Aitaracho xikoytalom tea klasintlea bhurgeamni tem parsel pek’ kelolem. Tea klasichea fuddarian gorom’ udkachi botl’ dhaddunk Devacho tallo aikun taka pallo dilolo.” 

“Afrikechea tea cheddva khatir panch mhoine adim eka cheddvan tem bavlem ghalolem, ani ‘tea don’param’ tem pavunk dha vorsanchie pirayechea Ruthachea magnneak ti zap asli.”

“Tannim ulo marche poilim, hanv zap ditolom” oxem Izaias provadiachea pustokant (Izaias 65:24) mhonnlolem asa.                                                                                                                   

Magnnem hem amche khatir aslolem ek boreantlem borem fukott dennem. Taka duddu poddonant, punn faido zaito asta!

 -------

Son'var, 31/5/2015

Kovichim utram polletat tednam kovitecho zolm’ zata!

SON’VARACHIM SUNGTTAM:

Kovichim utram polletat tednam kovitecho zolm’ zata! 

-Jose Salvador Fernandes

 

 

Sahityachea bhov pornnea prokarantlo ek prokar mhonnlear Kovita. Sahityachea her prokaram poros sahityachem unchlem rup aslolo Kovita ho prokar survatek tonddim aslo, ani uprant to borovpant ailo.  Inglezintlean zaka ami ‘Poetry’ mhonntanv tea utrachem mull Grik bhaxentlea ‘Poësis’ utrant asa. ‘Poësis’ mhonnlear ‘a making’ ani kovi asta to ‘maker’. Grik bhaxent ‘Poeio’ mhonnlear ‘I make,’ ‘I create.’ Mhonnche, kovi ho ghoddovpi asta. Punn khoinchea orthan? To kitem ghoddoyta vo boroyta tem heram poros vegllem asta oxea orthan.

 

Toxem polleunk gelear, dor ek monis mhonnlear kovi. Punn tea fuddem vochun monis kovi porosui anik khub kitem asa oxem mhonnum yeta, kiteak jivitachea dor khinnak to novo sonvsar polleta. Ho novo sonvsar bhurgeachie nodrentlean pollevop hem dor eka kovichem kortovyo asa. Bhurgem poilech pavtt aplie nodren sonvsar polleta tednam taka apo-ap utram futt’tat. Poilech pavtt aplie nodrek ailolo sonvsar tem bhurgem utranchea ani avazachea madeomantlean polleta. Kovitechem-i oxench asta. Kovichim utram jednam sonvsar polleunk lagtat tednanch tachie kovitecho zolm’ zata.

 

Amurpikea jivitachea moddnnar pavlolea Lino-bab Douradochea ‘Sundoreacho Beij Pavsachie Rati’ kovitam-pustokant aspavlolea khubxea kovitancho zolm’ utranchie nodrentleanuch zala hantum dubav nam. Lino-baban jivitachie dor goddiek novo sonvsar onnbhovla mhonn hea pustokantlio ‘Ami Porki Zaleat’, ‘Aili Hansun, Geli Roddun’,‘Chat’, ‘Facebook,’ ‘Ragar’, ‘Sundoreacho Beij,’ oxio boreochxio kovita tachi govay ditat.

 

Amkam kovita vachtanam vo konnachea-i tonddantlean kovita aikotanam amkam ti avoddli zalear, amchea tonddantlean ‘Va! Sundor kovita!’ oxim apxinch utram bhair sortat. Ami jika amchea utramni ‘sundor kovita’ mhonntanv, ti kovita toxi sundor asonam, kiteak kovi aplie kovitentlean kednanch sundortay rochinam. Punn amche sorbhonvtim asloli sundortay polleunk to aplie kovitentlean amkam mozot korta. Kovichie kovi nodrentlean ami khoinchi-i gozal polletanv tednam ti gozal amkam khoim tori bhavta ani amkam ti sundor disunk lagta! ‘Ailem-i Tum?,’ ‘Ani Magtanam,’ Ek Chitt,’ ‘Git,’ ‘Gõykar Ami,’ ‘Kaim Goxtti,’ ‘Loztat Kiteak,’ ‘Yo Vegim’ hea ani her kovitam udexim kovi amkam amchie bhonvtim ghoddtolio ghoddnnio sobitayechea oklantlean polleunk mozot korta. Ani tacho porinnam’ mhonn amchea tonddantlean tea kovitanchea xevottak ‘Va! Sundor kovita!’ oxim utram bhair sortat.

 

Kovi zaunk zay zalear mon’xan mogan asunk zay oxem mhonntat. Ani mogant to osufoll zalo zalear magir tache mukhar don roste ugte astat – ek,  tannem atmghat korpacho, nam zalear dusro, kovita borovpacho.‘Sundoreacho Beij Pavsachie Rati’ kovitam-pustokant kovi khubxe kodden mogan aslolo dista. Tea mogant xevott meren yesesvi zauncho mhonn kovi to mog samballunk sabar bhasamni proyotn korta, punn tea mogant yesesvi zainam vo fottovta tednam tachea nixpololea bhavnank utranchem tondd futt’ta ani kovi tim sogott bhavanam kovitanchea madeomantlean ugtayta. Hea pustokantli survatechi kovita ‘Adeus’, tea uprantchi ‘Ankvar,’ ‘Oso Ek Mog Aslo,’ ‘Uxir Zatoch,’ ‘Peletoddi Pavche Adim,’ ‘Pormoll Ubtoch,’ oxea kovitamni kovichi follak yeunk naslolea mogachi bazu probhavik ritin disun yeta.

 

Kovita utramni ghoddoyloli asta. Dor ek utor mhonnlear avaz. Mhonntoch, kovi kovita rochtonam  fokot utrancho punzo ghoddoynam, taka avazacherui bhor diuncho poddta. Punn hi gozal itleacheruch somponam. Tea fuddem vochun tannem utrancho ani avazacho mell ghalun orth toyar korcho poddta. Ani oslio orthabhorit kovita vachunk, tea utram ani avazam itleach mhotvachem ogeponn zay poddta. Hie nodrentlean Lino-babachio kovita mhotvachea ogeponnan vachlio zalear tio fokot nikttim utram nhoy, punn utrank bosoylolea avazachi orthabhorit kola oxem somzunk zata. Tachie hie, utranchea avazachie orthabhorit kolent des-bhokti, mogachi, dukhachi ani bhoktichi kovita disun yeta. Tech khatir ‘Sundoreacho Beij Pavsachie Rati’ kovitam-pustokantlio kovita veg-vegllea rosamni toptoplolio asat ani takach lagun tio tore-torechio bhavnam ugtaunk yesesvi zaleat oxem mhonnchem poddta.

 

Kovita ho sahityacho kotthinn prokar oxem sabar zonn mhonntat ani sangtat tem aikunk yeta. Punn bhavnamni bhizlolea vicharank vevosthit utranchi nhesonn nhesoytanam tika kotthinnayen sompi korop hemui eka borea kovichem kosob mhonnunk zay. André Chémeran mhonnlam toxem – “Faison difficilement des vers faciles.” (Ami kotthinnayen sompe vers ghoddoum-ia. ‘Sundoreacho Beij Pavsachie Rati’ kovitam-pustokant ‘Aga Pavsa,’ ‘Ago Sundorea,’ ‘Git,’ ‘Nikal,’ ‘Ragar,’ ‘Soirik,’ ‘Tujea Moga Khatir,’ ‘Tuka Khobor Asa,’ hio kovita ghoddoytanam Lino-babak kitlem kotthinn zalem tachi mhaka khobor nam, punn tio kovita khorench sompio, mottvio ani orthabhorit vicharamni bhorlolio asat. Az-kal oslia kovitancho khubxe zonn odik bore bhaxen  asvad ghetanam distat.     

 

Jivit ani kovita mhonnlear kitem oxem konnem-i vicharlem zalear taka zap nam, kiteak jivit ani kovita don-ui jiyevpachim astat. Jivitant vicharanchi sundortay gorjechi titlich kovitentui vicharanchi  sundortay asop gorjechem, ani vicharanchie sundortaye vangdda utranchi-i sobitay nirmann zali zalear dubav viret te kovitentlean chodd khuxalkay mellta. Lino-babachea hea kovitam-pustokantlio kovita vachun pollelear tannem boroylolio kovita tachea jiyevpantlean aileat mhonn thavem zata.

 

Lino-bab mullant nibon’d borovpi. ‘Aitaracheo Katkutleo’ nanvachem tachem nibon’danchem pustokui hache poilim uzvaddak ailolem asa. “Lino-bab nibon’d boroyta tench borem, tannem kovitechea nadak kiteak lagunk zay aslem?” oso konnachea-i monant prosn yet. Lino-bab aplea kovitantlean lokak kitem tori sangunk sodta. Nibon’dam poros kovitantlean aple vichar loka meren chodd bore ritin apunn  pavounk soktolo oxem taka dista zalear taka tem madeom’ apnnaunk puray mekllik asa. Tech meklliken tannem kovitechem madhyom’ apnnaylam. Hea madhyoma udexim Lino-bab jerul khub lokam meren pavum oxe anvdde ghonntt’tam, ani fuddarak Konknni sahityachea molleant taka upatt yes anvddetam!  

 

 

(Voilem borovp manest Lino Dourado hachea ‘Sundoreacho Beij Pavsachie Rati’ kovita pustoka khator boroyoli Prostavana asa.)

Son'var, 10-01-2015