Konnachem Kitem Oddchota ?

SON’VARACHIM SUNGTTAM:   

Konnachem Kitem Oddchota ?

                                                                     - Jose Salvador Fernandes

• Devak ani gorvak
  Poddonam mhonn kitem zalem ?
  Devak ani patkiak poddta nhoy ?
   
  Avoy-bapaycho
  divors zalo mhonn kitem zalem ?
  Dogaincho-i mog
  Lipun-chorun mellta nhoy ?
   
  Petrol ani dizol
  Mhargelam mhonn kitem zalem ?
  Cholovpi choloyta
  Gaddio ghevpi gheta
   
  Boroytolo boroyta
  Konn vachinam mhonn kitem zalem ?
  Zhankun-zhankun ganvkar zata
  Boroun-boroun borovpi zata
   
  Kortolo korta
  Taka konn addaunk sokonam
  Ani taka kitloi addaylo mhonn
  Tachem kainch oddchonam.
  
  
  
  
   
  

Son'var, 12/7/2014

www.goa-world.com

SURING PETTOYLAM… - Jose Salvador Fernandes

Son’varachim Sungttam:

 

SURING PETTOYLAM …              

                                             - Jose Salvador Fernandes

 

Suring pettoylam

Tem konnuch palounk sokonam

Pettoylolem suring futtlam

Atam konnuch vattovchonam

 

Tea suringachea sfottant

Kailolleanche tove futt’tole

Podanche kopdde lastole

Khotte te vinglle distole

 

Tanninch pettoylolem suring

Tankanch mharog poddtolem

Dusreank lasunk manddlolem suring

Tankanch girastolem !

 

 

Son'var, 5/7/2014

www.goa-world.com/goa/music/

B O R E P O N N ....…

Son’varachim Sungttam: B O R E P O N N ....… 

-Jose Salvador Fernandes

Boro nheslo mhonn

Boro monis zainam

Boro monis aslear

Boro nhesunkuch zay oxem nam

 

Boreponnak vaittacho ‘design’ lagonam

Punn….

Kottonachi mousann lagta

Silkachi sobitay lagta

Linenachi togsann lagta

Woolachi gormi lagta

Leatheracho kall lagta

Ramieche gunn lagta

Hempachie jinne kall lagta

Juteachi ghottsann lagta.

Son'var, 28 Jun 2014

www.goa-world.com

Konkani Kovita: PIXE KELEAT (Boroupi: Cajetan Godinho)

    (

  

Pixe Keleat

 

Astanam bhurgo lhan, mai-pai taka zaiteo khellneom adun dita

Sogllea khellneank to vengoita, pun ekuch khellnemcho taka chod mog asta

Paem tache sarke zomnir lagonam, choltana alta ani dolta, te khellnem fattlean danvtanam podta, dukovta ani rodta

Dusrea disa portun khellunk toear, tea bollachi vatt kednanch nam to sodta.

 

 

 

Vhadon vodlo zatoch, bollacho mog tachea kallzant vadta

Bolla vorvim apun ek dis nanvostik zatolom, oxem chintun to jivit jieta

Zaite sacrifis korun, tokos gheun, dis-rat bollachea fattlean to asta

Aiz bollakuch lagon Pele, Sachin Tendulkar, Michael Jordan, Pete Sampras, Steffi Graf oslim, kitlim noketram hea sounsarant porzollta.

  

 

Zaitea khellanim, taka vengoilolo ami polleta

Tore torechim tachim rupam, tennis ball, cricket ball, basketball, volleyball, baseball  hea rupanim to amkam dista  

Pun taka football rupan polletoch, sogllo sounsar dhadosta

 

  

  

 

Kitle zan taka lagon, aiz girest ani famad zaleat

Todde noxib futtke, zokmi zaun antonar podleat

Sezari, Bhav, Ixtt ani Ganv, taka lagon zogodleat

Toxench tachea mogan, dusmanank passun tannem ektaim keleat.  

 

Voros bhor veg vegllea khellamnim, to amkam khuxeal dovorta

English Premier League, NBA, IPL, Wimbledon, osle  khell polloun jiv dhadoxi zata

Pun ekuch khell pollounk, chear vorsam  sogleamchem kalliz axen rauta

Kitli khuxealkai, akho sounsar football World Cup polloun sontosta. 

 

 

 

Valor tuka zolmank adtoleak, taka aiz ami chepem kadtat   

Apurbaiechea amchea Bolla, tuvem amkam pixe keleat, portramcher ani tv-cher aiz tuzo khuimcho khell asa kai mhunon ami sodtat

Kon jikot ani kon harot, soglle  khonti ani uskeanim bhortat

Zogdiam vinnem xhantikaen, har ani jit tujea khellamnim, soglleamnim mandun gheunk ami magnem kortat. 

 

Cajetan Godinho

Soccer Legend in Kuwait

KOVNAM -3

SON’VARACHIM SUNGTTAM:

 K O V N A M   -   3

• *Jose Salvador Fernandes
   
  DUSREACHEM KORUN APLEM
  NANV ZODDUNK KHUB SOMPEM
  VELL YETOCH
  UZOCH THARAYTOLO MOL BHANGRACHEM!
   
  ***
   
  MHOJEA KALLEA SVARTHA KHATIR
  PORJEK GHEUN TUKA ADDAYLO!
  VELL YETOCH
  TIECH PORJEN MHAKA DHADDAYLO!
   
  ***
   
  KALLOKA THAUN UZVADDA VOCHUNK
  KHUB SOMPEM
  TUM KALLOKA THAUN KALLOKAK VETAY
  KARONN SOMZONAM MHAKA KITEM.
   
  ***

Son'var, 14 Jun 2014

www.goa-world.com  

SONVARACHIM SUNGTTAM: Nim’nno Pordo!

SON’VARACHIM SUNGTTAM:

 

Nim’nno Pordo!

• Jose Salvador Fernandes
•  
• Fattlea vorsachi gozal. Kala Academychie (KA) Tiatr Spordhent tacho tiatr machier yevpacho aslo. Tacho mhollear mhojea konn eka vollkicheacho. Tacho tiatr machier yeunche panch dis adim to mhaka Moddganvam mell’lo. Mhonnunk laglo, tiatrak yeunkuch zay.
  “Tiatrachem nanv kitem?” Hanvem umollxiken vicharlem.
  “Nim’nno Pordo!” Tannem jhetan ani nettan sanglem.
  “Zaloi mum toyar spordhe khatir sarko?” Hanv.
  “Toso zalam, punn azunui nim’nno pordo borovpacho urla! Koso-kat borovpacho tem chint’tam hanv.” Tannem hansun-hansun sanglem. Tea tachea hanxeant ordem motteponn ani ordi besarmay asloli mhaka disli.
  “Anik panch disamni tiatr tuzo. Ani azunui nim’nno pordo toyar zaunk nam? Kednam korop tor to?”
  

  “Mhojem zannam nhoy tum? Tiatr suru zaunk panch mintam-i astanam mhojean to toyar korunk zata.” Tiatr borovp mhollear aplea bottam voilo panch sekenddancho khell zalolea porim to atm-visvasan uloylo.
  
• 
  
  “Ani tachi praktis kednam korop tor? Tiatr suru zatoch panch mintam uprant?” Mhojea hea vicharan to hanslo, punn zap kaddunk nam. Tea uprant anik don vegllea vixoyancher uloytoch, ami dogui ap-aplie vatten geleanv.
  Bosint bosun ghora vechie vatter astanam mhojem mon oxench tea vollkicheachea tiatrachea ‘nim’nno pordo’ vixoyacher bhonvadde marunk laglem.
  Hacho anik panch disam uprant tiatr… to-ui zalear spordhe khatir…. Ani azunui boroun sompunk nam! Hachem oxem kiteak kay? Tiatr borovp tor hachi avodd zalear, tannem to kednam boroun sompounk zay aslo! Kiteak monis jednam aplie avddichim kamam korunk hatant gheta, tednam to tim kamam umedi itleach nettan sompoylea bogor ravonam. Oxem asa zalear, magir tiatr borovp hi tachi avodd koxi mhonnum yeta?
  Dusrem, spordhe khatir hacho tiatr anik panch disamni machier yeuncho asa, punn azunui hacho nim’nno pordo boroun zaunk nam! “Tiatr suru zaunk panch mintam-i astanam mhojean to toyar korunk zata” oxem mhonnpi ho monis aplie kolek kitlem mhotv dita, aplie kolek kitlem mol dita ani aplie kole kodden kitlo gombhir asa tem disun yeta. Tiatr prokarak to khoinchie nodren polleta tem-ui borounk naslolea okxoramni vachunk mellta. Hea soglleavelean xevttim ek gozal thavi zata – Tiatr prokarak vhoddlemxem mhotv dinant….. tiatr mhollear kitem-i dakoylear cholta…. Tiatr prokorak konnuch man dinam.

Khubxe pavtti kaim tiatr borovpiamni “hanvem tiatracho nim’nno pordo boroynastanam tiatr dakoylo, ani sonvsarant hem fokot tiatristuch korunk sokta” oxem-i uloylolem hanvem aikolam. Apnnachi kat samballunk ani apli chuk hi chuk nhoy mhonn dakounk tea tiatr borovpianchea oslea dubllea chintpantlean Tiatr prokar koso girest zatolo ani Tiatr koso fuddem vetolo?

Tiatr ho ek sahitik prokar. Dekun Tiatr borovp mhollear aplea bottam voilo panch mintancho khell zaunk sokonam. Tiatr borovpian aplem sahitya patranchea rupan machier ubem kortolo ani tanchie udorim Tiatr prokarachem vorteponn, mhotv, mol ani gombhirponn somazak dakoytolo zalear, taka poilim apnnakuch hio sogllio gozali somzupachio astat. Tednanch taka Tiatr prokaracho thav kollun yetolo. Mol kollun yetolem. Mhotv somzotolem. Apunnuch zaun tea prokarak man-mol ani mhotv dinam, zalear ti gozal korpant kosloch orth nam oxench mhonnchem poddta. Ji gozal je meren apnnak avddonam ti gozal  magir dsureak koxi avoddtoli? Apunn apliech gozalik mol-mhotv dinam zalear dusro kiteak ditolo?

Oxi nim’nnea pordeachie gozali nimitan ekar-ek oxim chintnam monant gholltanam, xevttim hanv thikannear pavlom…. Ani mhojea monantlo nim’nno pordo thoinch thamblo!

 

Son'var, 7 Jun 2014

www.goa-world.com  

SON’VARACHIM SUNGTTAM: Môd! Mosti! Urmottponn!

SON’VARACHIM SUNGTTAM:

 

Môd!  Mosti! Urmottponn!

                                                                                             - Jose Salvador Fernandes 

• Ut’tor Prodexantlea Badaun jil’leantlea Katra ganvant ghoddlolie bhirankull ghoddnnien, mon’xachem mol ani orth somzotolea mon’xanchea angar kantto ubo kela, ani vangddach tanchea monant xim’-mer naslolo kinvantto-i nirmann kela.
   
  Aplea ghora kumanv naslo dekun, tim dogaim, 14 ani 15 vorsanchie pirayechim soirim cheddvam apli soimbachi goroz korunk laginchea xetant gelolim. Ani thoincheanuch tim nam zalim! Soroll mell’lim tim dusre sokallim –  tanchim moddim ambeachea rukhar gollar lambtalim! Voizuki riporttant thiraylolea pormonnem, poilim tea cheddvancher zomea-bolatkar kelo, uprant tankam fugar korun marlim, ani xevttim rukhar gollar lamboylim!
   
  1.2 bilhanv lokvosti aslolea Bharotant dor 22 mintam uprant bolatkar zavpi hie zati-katinchie fattbhuimiecher  ghoddlolie ghoddnniecher pulisamni-i favo tea vellar upay gheunk nam mhonn provar zalam!
   
  Aichea kallar, Bharotachea kaim rajyamni azun-ui oslio krur ani desak toxench desachea nagrikank sonvsarbhor lojek ghalpi ghoddnnio ghoddtat mhonn polleun ani aikun vichitr ani ojap dista!
   
  Dil’lint, Dezembr 2012 vorsa eke dhanvtie bosint 23 vorsanchie pirayechea cheddvacher zalolie bolatkarachie  ghoddnnien puray Bharotak haloun uddoytoch, hea desant ostoriancher zavpi oniticher bhasabhas ani boball zalolo. Tednanchean bolatkaracho guneanv adarpiam add hea desan koddok kheastui jahir keloli. Torui….
   
  Dil’lintlie Dezembr 2012 famad bolatkarachie ghoddnniechea guneanvkariank kaidean mornnachi kheast divpachi tharaytoch, 2003 tem 2007 meren Ut’tor Prodexacho mukhel montri aslolo Samajwadi Pokxacho mukheli Mulayam Singh Yadavan te vixim fattlea mhoineant  oxem mhonnlolem – “Chedde te chedde, tanche kodde tosli chuk zata, bolatkar korpiank gollar kiteak choddounk zay?”
   
  Az teach Samajwadi Pokxacho mukheli aslolea Mulayam Singh Yadavacho put Akhilesh Yadav Ut’tor Prodexant mukhel montriachie kodelicher boslolo asa. Tachea rajyant ghoddlolie tie monisponna bhailie kornnie vixim taka eka potrokaran vicharlem tedna tannem tea potrokarak  urfatto prosn kelo – “Tuka kitem oddchonn zalia? Tum surokxit asa, sarkem? ”       
  
  
  

  
  He satolleantlea Budvaradis unchli ghoddnni ghoddli. Zalear, dusrea disa, Brestaradis Ut’tor Prodexantlea Azamgarhchea Saraimeer vattarant anik chear zonnamni zuvanponnant bhitor sorpi anik eka cheddvacher bolatkar kelo.  Itlench nhoy, tor heach satolleant teach rajyant anik eke bolatkarachie ghoddnnient, bolatkar kortoch guneanvkariamni cheddvak lasun marlem.
   
  Monisponnak sobonaslolio hio tinui ghoddnnio Yadav ghorabeacho xek’ cholpi Ut’tor Prodexantlea vattarant ghoddlio tachevelean rajki ani somajik panvddear vichar korpa sarkio kaim gozali ugtio zatat.
   
  Poilie-voilie suvater, Ut’tor Prodexant nagrikanchie nodrentlean thoim kaideak konn mol dinam, thoimsor kaido sunneank ghala, kaideak orth nam.
   
  Dusrea utramni, Ut’tor Prodexant sorkar asa, punn sorkarponn nam. Ani zo sorkar asa taka, ostoriam add zavpi oniticher upay gheunk kalljidarponn ani fatti konno nam oxench mhonnchem poddta.
   
   “Tuka kitem oddchonn zalia? Tum surokxit asa, sarkem?” oso Ut’tor Prodexacho mukhel montri Akhilesh Yadav potrokarak urfatto prosn vicharta tednam tantuntlean Akhilesh Yadavachi mosti, urmottponn ani ohonkar (ego) disun yeta. Dusrea utramni, mukhel montri Akhilesh Yadav aplie podviecher penvta, ani apunn mukel montriachie kodelir asum porian apnnak konnuch kainch korunk xokonam oxem yevjita, ani tosoch vagta. Podviecho môd, sot’techim pakham futtop oxem taka mhonntat. Zaka rajkaronnacho khoro orth somzonam, jea rajki mon’xak apnnak porjen apli bori seva korunk ani rakhunk vinchun kaddla, ani tea khatir apunn porjecho sevok mhonn to zannam zaun visorla, toslea mon’xanchi vagnnuk ani vrut’ti oslich asta.
   
  Yadav ghorabeacho xek’ cholpi Ut’tor Prodexantlea vattarant ghoddloli ti ghoddnni, rajki podviechem anik ek ang ugtem korta. Dog cheddvancher bolatkar korun, tea uprant tankam fugar korun marun ani uprant vochun ambeachea rukhar gollar lambounk tea guneanvkariank yedem vhoddlem kalliz zalem! Hie nodrentlean ‘koxem?’ ‘kiteak?’ he prosn mhotvache thartat.
• 
  
• Mukhel Montri Akhilesh Yadav guneanvkariancher lokx ghalunk sodinam tie vagnnukentlean, Ut’tor Prodexant kosli-i onit cholta, vichartolo konn nam, dekun konnui kosli-i ani monisponna bhaili onit adarta mhonn disun yeta. “Ami cheddvam-ostoriancher bolatkar kortoleanv ani uprant tankam marun gollar choddoytoleanv, tumchean amkam kitem korunk zata tem korat!” oxem thoinche zativadi lok aplea kortubantlean soroll sangtat. Kiteak? Sorkari monis tanche laginche ani vollkiche mhonn kay? Tea sorkari mon’xam kodde tanche som’bond bore asat mhonn kay? Vo sorkari monisui tech mallieche monni mhonnun kay?
   
  Vichar korpa sarki gozal! Kiteak ti bhirankull ghoddnni Yadav ghorabeacho xek’ cholpi Ut’tor Prodexantlea vattarant ghoddlia!                    
   

Son'var, 31 Mai 2014

www.goa-world.com