Son'varachim Sungttam: SON’VARACHIM SUNGTTAM: Gõykaranchem Khorem Rup Hench!

SON’VARACHIM SUNGTTAM:
Gõykaranchem Khorem Rup Hench!

- Jose Salvador Fernandes

Te sanjer, Kongres Pokxacho tea rajkornnean, Ponnje Mandovi Hotelache bazuk apli Fortuner gaddi ubi keli. Gaddientlean denvun, aplea Personal Assistant-a vangdda chav gheunk Mandovi Hotelant vochunk choltalo. Okosmat taka rosteavelean vochpi Scorpio gaddien dhopko dilo, ani to rajkornni thoinch melo!

Melea uprant, hea rajkornneacho otmo sorgachea darvontteaxim pavlo. Darvontteaxim taka Sant Pedru mell’lo. “Sorga rajyant yevkar….” Sant Pedrun hansot taka yevkar dilo, ani fuddem uloylo - “Tum hanga bhitor sorche adim, hanga ek oddchonn asa. Rajki pokxanche monis choddxe hea zageancher pavonant. Mhonntoch, tuje vixim hanga kitem korchem tem mhaka somzonam.”
“Kosli oddchonn Sant Pedru? Mhaka bhitor vochunk di, ani tuji oddchonn suttavi zali.” Tea rajki mon’xan Sant Pedruk sanglem.

“Rav, rav… tuka bhitor soddtam…. Punn tea adim, mhoje voir thaun nigtoch mhaka ailolo hukum’ hanv palltam. Tum ek kam’ kor. Tum ek dis Ifernant rav, ani ek dis Sorgar rav. Ani tea uprant, sasnnak tuka khuinchea zagear ravunk zai tem tuje tunch tharay.”

“Khorench? Zalear hanvem mhozo nirnnoy adinch ghetlolo asa. Mhaka sasnnak Sorgaruch ravunk zai.” Tea rajkornneachea otmean Sant Pedruk sanglem.
“Polle, amkam amche kaide asat. Sonvsarant itle kaide toyar kortat, punn te choddan chodd lok pallinant, fokot pustokancheruch astat, punn hanga toxem nam. Hanga kaideam xivay kainch cholonam. Mhonntoch, hanv sangtam toxem tunvem korchench poddtolem.”
Oxem sangun, Sant Pedru tea otmeak eke lift-ixim gheun gelo. Tantum dog-ui bhitor sorle, ani ti lift, sokol, sokol korun Ifernant denvli. Lift-ichim daram ugtim zalim, ani rajkornneak apunn eka pachvea char vattarant asa mhunn kollun ailem. Matxe mukhar ek bar aslem tem tannem pollelem, ani tea bara’racher taka tachim vollkichim ixttam, ani apunn jea rajkornneam vangdda vavurlolo ani zhogoddlolo, te-ui taka thoimsor disle. To ojap zalo! Te tache ixtt ani sangati rajkornni thoimsor khaun-piyeun borich mouza kortale.

Tannim hea nigteach ailolea otmeak polletoch, te mouza korpi tacheo ixtt-ixttini ani her sangati rajkornni taka bhettunk aile. Tache kodde khub-khub uloylim. Sonvsarant motdaranchea khustar koso mitta porim duddu korun girest zale, konnak koso luttlo to ugddas korun aplech bhitor khuxal zale. Te uprant, te thoimsor sabar torecho khell khell’le ani xevttim jevnnak gele. Jevnnak nam-nam toreche prat asle… ani tantlea tantum Gõychem jevonn… tea bhair soro, biyer, adi. Zai tem khavpa-piyevpachem… Vichartolo ani addaytolo konnuch naslo. Thoimsor Devchar-ui hajir aslo!

Ho Devchar khub ixttallo aslo. Thoim aslolea sogleankuch “kha baba, piye baye, lojeum nakat” oxem sangtalo. Modinch aple porim nach korun ani hanspacheo gozali sangun thoimsorlem vatavoronn anik-ui khuxalkayechem ani moujechem kortalo.

… ani oxea vatavoronnant astanam, tea rajkornneak, thoimsorlo vochpacho aplo vell zalo mhunn kollun ailem. To porot lift-int bhitor sorche poilim, sogleamni taka maye-mogan vengoylo ani adeus kelo. Ani dusrech ghoddiek ti lift voir-voir geli…

… itli voir geli, ani xevttim thambli. Lift-ichem dar ugtem zalem. To Sorgar pavlo. Thoimsor Sant Pedru tachi vatt polleun aslolo tannem pollelo.

“Atam tunvem Sorgak bhett divpacho dis udelo.” Sant Pedrun taka sanglem.

Ani tea uprant to rajkornni, thoimsor khuxalkayen gitam-gayonam korpi ani eka kupar thaun dusrea kupar aste-aste bhonvpi otmeanchea zomeant bhitor sorlo. Tannem tea zomeant khuxalkayen dis sarlo, ani titlean tannem thoimsorlo vecho vell ailo. Thoimsor Sant Pedru taka vhorunk ailolo tannem pollelo.

Te dog-ui porot lift-int bhitor sorle. Lift voir thaun sokla denvtanam modinch thambli.

“Tum sod’deak Sorga ani Ifernachea modemkot asa. Ani atam tunvem, sasnnak tuka khuim vochunk zai tem tharavpacho vell aila.” Sant Pedrun taka sanglem.

Tea rajkornnean thoddeo goddio chintlem, ani uprant uloylo – “Khorem mhonnlear, Sorgar borem, punn hanv Ifernant boro astolom oxem mhaka dista!”

“Borem tor!” Oxem Sant Pedrun mhonnlem, ani ti lift khala, khala anik khala Ifernant denvli. Tichim daram ugtim zalim. To rajkornni te lift-intlean denvlo. Zalear kitem?

aka apunn Sonsddear va Curca kusloli ani ghanniari garbej asta toslea zagear pavlo dislem. Tannem aplea ixttank ani vollkichea her rajkornneank thoimsor pollele. Tim soglim thoimsor pinzkim angvostram ghalun, kusloli ghann kallea potiamni bhortanam taka dislim.

Title mhonnosor Devchar tachexim ailo, tachea khandar hat ghalo ani taka gheun tea kuslolea ni ghannichea kochrea vatten gheun vochunk laglo.

“Mhaka ek gozal somzonam. Kal hanv hangasor ailolom tednam hanga khellop, nachop, gavop ani khavop-piyevop choltalem. Khub moujen vell sarlo. Ani az… az hanga fokot kochro…. garbej… soglem kuslolem… ghanniarem… ani mhoje ixtt ani her sangatianchi doxea pollevpa sarki nam…!”
Tednam Devcharan tacher ek nodor marli, ani hansun taka sanglem, “Kal ami prochar (campaigning) kortaleanv. Az tunvem amkam mot dilem!”

Rupantoraylole he sondex divpi lhan kothechem khoreponn amkam Gõyant dor vinchnnukam nimitan polleunk ani onnbhovunk mellta, hem vegllem sangpachi goroz nam!

www.goa-world.com
Sonvar, 12 Novembr 2011