Romivaleank Puroskar Zai?

Romivaleank Puroskar Zai?

-Jose Salvador Fernandes



24 ani 25 Janer, Volvoi-Fonddem, nanvosto ani vhodde tankicho Konknni borvpi, kothakar, kovi, nattok'kar Xri Pundalik N. Naik hachea ghora-vattarant Chitrangi nanvachi ostoream khatir karyavoll zali. Te karyavollint, Konknnint halinch Gneanpitt Puroskar favo zalolea bhou manest Ravindrabab Kelekarachi mulakhat ghetli tednam taka ek proxn vicharlo – "Sodeak lipivad cholta tacher tujem mhonn'nnem kitem?' Tednam Ravindra baban zap dili – "taka vatt na….. Romivaleank puroskar zai."



Romivaleank puroskar zai mhunn ho lipivad, Romivad oso tacho orth zata!



Aiz tor Konknniche Romi lipicho itihas ustun pollelear, Romintlea vavrak khubxe puroskar favo asle. Punn, aple ganttiche duddu moddun Konknniche Romi lipintlean vavrun geloleamni ani azun-ui Konknni kodde promannik ravun Konknni khatir aple duddu khorchitoleamni kednach puroskarancher dollo dovrunk na, nhoi mhunn puroskaram fattlean dhanvunk nant. Toxem aslem zalear, aiz Konknniche Romi lipik khubxe puroskar 'DITOLE' asle. Punn Romivaleanchi vrut'ti oxi asa…… Puroskar FAVO zalearuch ghevpache, na zalear puroskaranchem poddlam konnak?



Khorem mhonnlear. Gõychea Rajbhas Kaideant Romi lipik-ui nit mellchi mhunn Konknni mollar fattlim 20 vorsam ji xanneponnachi chollvoll chol'lea, ti 'puncture' korunk Devnagorivale eke gozalicho bhonvun-bhonvun vapor kortat, ani ti mhonnlear " Romivaleank puroskar zai, dekunuch te boball kortat."



Romivale jednam Rajbhas Kaideant nit magunk tondd ugoddtat, tednam Devnagorivaleank gham' sutt'ta…..kiteak, Rajbhas Kaideant tannim onit kelea tachi tankam bes-bori khobor asa. Punn he onitik vav mellcho nhoi mhunn, "khorem mhonnlear tankam puroskar zai" oxem sangun Devnagorivale lokachem mon dusre kodden oddunk sodtat. Mon'xachem mon onitiche gozali pasun kitle-i kodden oddlem zalear, onitichi gozal kednam ogi urta? Faleam Romintlea eka pustokak Sahit'ya Akademicho Puroskar FAVLO zalear-ui Romicher ji onit zalea ti niti khatir bobo martolich mum?



Toxem kholayen pollevnk gelear aiz Devnagori lipintlea sahit'yak zaitech puroskar DITAT. Thoddeanchea pustokank, sabar zann Devnagorivale zaka sorgavelo puroskar mhunn mandtat to Sahit'ya Akademicho Puroskar legit sahit'yache gunn naslolea pustokank dila hacheo kesi asat. Devnagorivale khuim jivitant ek tori apleak puroskar mellcho mhunn puroskarancher dollo dovrun pustokam boroitat. Taka lagun aiz Devnagorintlea pustokamni sahitik 'quality' poros 'quantity' bori asta khuim. Halinch Kornattokantlea Kundapur vattarant 19vea Akhil Bharoti Konknni Sahit'ya Sommelonant legit Sommelonacho Odheokx Kovi Ramesh Veluskaran hoch sur kaddlo.



Konknni mollar Devnagorivale aplea sahityik 'quality' naslolea pustokank puroskar anvddetat, axetat ani laletat toslo anvddo Romivaleank na. Toxem pollevnk gelear, aiz Devnagorivaleamni AILEM TOXEM GAILEM mhonnot kumparponnachea bollgear sahity'ache puroskar DIVN tannim puroskaranchi povitrtai ibaddlea, puroskaracho orthuch bigddaun uddoila. Dekunuch, Romivaleank oslea puroskaranche anvdde nant, gost na. Devangorivale puroskaram fattlean dhanvtat toxe Romivaleank puroskaram fattlean dhavpachi odd na, khuxi na. Zai zalear puroskarank aplea fattlean dhanvot yeum-di oxem mhonnit te Konknni khatir aple tanki pormannem kam' korit astat. Sahit'ya Akademicho puroskar mellcho mhunn Devnagorivale 'lobby'-ing kortat tem Romivaleanchea matui totvant bosona. Dhormachea ani zati-katinchea naddear ji puroskar DIVPACHI chal asa, ti Romivaleam modem na! Puroskar zoddun ghevche khatir Devnagorivale "tum mhoji fatt khorop, hanv tuji khorpitam" kortat toslo apleponnacho khell Romivaleam modem na. Romi mollar zankam puroskar FAVTAT tankanch te aiz meren dileat… dhormancho, zati-katincho vo her kosloch bhed-bhav korinastana… 'tum mhozo, to tacho' mhonninastana…


(c) Jose Salvador Fernandes
www.goa-world.com
http://sonvarchimsungttam.blogspot.com/

14/02/2009

Vontt Lagim, Kalliz Pois!

SON'VARACHIM SUNGTTAM:




Vontt Lagim, Kalliz Pois





Jose Salvador Fernandes



Dezembr 20 ani 21, 2008 Moddganvchea Ravindra Bhovonachea Pai Tiatrist Joao Agostinho Fernandes vosreant, Poilem Konknni (Romi Lipi) Sahitya ani Sonvskruti Sommelon zalem. Dalgado Konknni Akademin (DKA) ghoddun haddlolem Sommelon Konknniche Romi Lipintlem itihasik Sommelon mhonnchem poddta. Hem Sommelon ghoddun haddlam mhunn, Romi lipichi sabar toreni seva korpeamni ani mogeamni khuxalkayeche svas soddle. Punn thoddeank, hem Sommelon ustuream gelem.





Hea Sommelona uprant 'net'-avelean DKA-chea hea Sommelon vixim khubxeo gozali, khubxea zannamni boroileo. Hea gozalim modem, halinch Goanet-acher mhaka ek UGTI CHITT vachunk mell'li. He Chittint tannem Sommelonachea Mukhel Ulovpeachea ulovpacher apleak dista te porim khubxe 'comments' ani proxn manddleat. Hi chitt borovpi asa Mumboint vosti korun aslolo Konknniche Romi lipintlea masikancho sompadpi. Herank amontronnam dhaddlolim tantum he sompadpeak-ui amontronn aslem. Punn te UGTI CHITT-int to survatechea dusrea 'paragraph'-ant oxem mhonnta, "Hanv Mumboint aslolean, mhojean hea sommelonak hajir zavpak xoklem na." Te chittichi hi voll vachli tednam, monant mhoje mhakach hanvem mhonnlem, Konknni mon'xachi hich doxea! Vontt lagim, Kalliz Pois!



DKA-chem Poilem Konknni (Romi Lipi) Sahitya ani Sonvskruti Sommelon asa mhunn Sommelonachea adlea disak jahir zavnk na. 2008 Otubrachea xevottak jahir zalolem. Mhonnche, unnech dedd mhoino adim hea Sommelonachi khobor Gõychea potrancher uzvadda ailoli. Gõychim khobram-potram Mumboint legit vikrek melltat mhonntoch, Mumboi aslolea "kirkol Konknni (Romi lipi) sevok"-ank hea Sommelonachi adinch khobor asli. Ani tantuntlea tantum, Konknniche Romi lipintlea masikanchea sompadpea(n)k tor hi khobor nond ghevpa sarki! Xevttim Konknniche Romi lipintlem Poilem Sommelon nhoi tem? Ta(n)ka(m) ti koxi chukom ieta? Ani Sommelonak ievpachem mhunn koxem chukom (vo chukom?) ieta? Punn xevottak to sompadpi tea Sommelonak pavloch na. Karonn, tacheach utramn sangtolo zalear, "Hanv Mumboint aslolean, mhojean hea sommelonak hajir zavpak xoklem na."






Konknniche Romi lipintlea masikanchem sompadpiponn cholovpi he sompadpean hache poilim, Konknni mollar Konknni mon'xacho koso ekvott zavnk zai, sangatan Konknnichi koxi-kat seva korunk zai, Konknni mollar koslea-i nimitan koxe sohokar diit fuddem vochun zai, Konknni mollar amchi fuddli dixa koxi tharavnk zai oxe aplea ogrlekhantlean ani her borovpantlean (Romintlean Devnagoricho legit prochar kelo) khub boroilem. Punn xevttim teach aplea utrank khoreponnachem rup divnk to unno poddlo.



"Padricho sermanv khuim uniek nhoi" oxi Konknnintlean ek mhonn'nni asa. Ani hi mhonn'nni Konknniche Romi lipintlea hea sompadpea soit anik ami khubxea zannamni khori tharailea. Amkam Konknnicho mog asa mhunn thavo korunk ami vhoddlem-vhoddlem boroitanv, ruchi vixexonnam (adjectives) ghalun upxomam uzvaddaitanv...... punn hench borovp, ulovp, upxomam svota chalint ghalpacho vell pavta tednam amche kodde soglle torechim justifications-am astat.



Fattlea mhoineant zalolea Poilea Konknni (Romi Lipi) Sahitya ani Sonvskruti Sommelonachea nimitan Konknni mon'xam zagrutai korche khatir DKA-n thodde ganv vinchun thoimsor zagrutayecheo karyavolleo ghoddun haddpachem tharailem. Tantuntlo ek ganv Valpoi aslo. Konknniche Romi lipichea "mogan lastolea" Peddnne talukentlea ekleak te karyavollik 'observer' mhunn hajir zavnk hanvem sanglem. Tannem mhaka kitem zap divchi? "Valpoi mhaka 60 kilomitor pois poddta mure"



Aiz khorea orthan amkam Konknnichea mollar konnachi-i goroz asa zalear, Konknni khatir tollmollin vavurtoleanchi! Apnnak Konknni (Romi lipiche) kirkoll sevok mhonntoleamni aplim ulovpam, borovpam promannikponnan kornneamni bodlun dakovpeanchi. Aiz Konknni (Romi lipiche) chollvollek ogrlekhancho ani borovpancho xinvor keloch mhunn zaina. Konknnichea mollar oxem-toxem zavnk ani korunk zai mhonnit ogrlekh ani borovpam borovp hem sompem kam nhoi, (ghoddie UGTI CHITT borovp sompem kam' zait) punn tech Konknni khatir promannikponnan vavrop hem tea poros-ui kottin kam'. Jea vonttamni ami Konknnichi godd-godd tust gaitanv, husko ani mog ugtaitanv, ti khorea orthan amchea kallzantlean disun 'spontaneously' bhair sorpachi goroz asa. Na zalear, vontt lagim, kalliz pois osli got thartoli.



Aiz Konknni moll-ui Gõyche eke marekar piddek sampoddlam. Gõyantlo Gõykar oso asa, to apunn-ui borem kam' korcho na, ani tem korunk sodta taka-i tem korunk divchona. Konknni mollar konn-ui vavrunk fuddem sorlo zalear, ami Konknni monisuch tachea tea kamak sohokar divche bodlek tache vatter add-mellim haddtanv. Mhonnche, ami-i tem kam' korinanv, ani tem kortoleachi-i fatt thapttun ami taka "tum fuddem voch, ami tuje vangdda asanv" oxem mhonnonk amchea tonddantlean utor futtona. Konknni sompadpeamni aplea ogrlekhantlean ani borovpantlean Mungllurchea lokachi Konknni mollaveli ekvottachi ani sohokarachi tust-vakhann'nni aplea borvpantlean uzvaddailich mhunn zaina, punn tanchi dekh ghevn Konknni khatir apnnem-i tosoch vavrunk khol vichar korun te dixen panvle ghalpachi goroz asa. Na zalear, vontt lagim, ani kalliz pois dovrpi Konknniche Romi lipichea kirkoll sevokanchi seva kosleach faideachi tharchi na.



www.goa-world.com




************

CHOTRAI: Konknni (Romi Lipi) Sahityik ani Sonskruttik Som'melon - Vavurpi odheokxak Ugtti Chitt: GULAB ani TGR Sompadpi bab Fausto V. Da Costa-chi, hea link-ar http://groups.yahoo.com/group/gulf-goans/message/22950
vachunk mellta. Dor Son'varak, 'Son'varachim Sungttam' borovpi, amche sangati ani ixtt Prof. Jose Salvador Fernandes aplem ugtem mot dita.

Goa-world.com -Team, hancho ekuch hetu. Amchi Konknni Maim-Bhas sonvsarachea konxea-konxeamni vosti korun aslolea dhor ek Goykaranchea ghorant rigunk.


10/1/2009