Laddli Laxmichem Mol Logna Purtench?

SON’VARACHIM SUNGTTAM:

Laddli Laxmichem Mol Logna Purtench?

 

-Jose Salvador Fernandes

Mars 2012 Gõy Vidhan Sobheche vinchnnukent aplo pokx nivddun haddche khatir, prochara vellar Bharoti Janata Pokxan (BJP), aplea jahirnameantlean motdaram mukhar khubxe torechim lolipopam manddlolim. Tantulim don him –

1.     Laddli Laxmi Yevzonne khal, cheddum bhurgeak 18 vorsanchi piray zatoch, tachea kazarachea khorcha khatir benkint tachea nanvar ek lakh rupoy zoma kortole. (Hem hajir zatoch khubxea avoy-bapayanchea jivak ‘su’ zalem.) 

2.     Ghorchea ghora kam’ korpi dor ostoriek, mhargayek tondd diunche khatir mhoineak 1,000/- rupoy ditole.      

BJP sorkar Gõyant sot’ter yeun 10 mhoine bhorle, ani 18 vorsanche pirayer pavche poilinch laddli Laxminche fuddar bavunk lagle! Hachem khoreponn amkam Vaskuchea eka iskolant halinch cheddvacher zalolo bolatkar, Assagao zalolo bolatkar-khun, Moddganv xarant halinch eka cheddvak dog tornnateamni besud’dh korun ekusrea zagear vhorun tacho khun korpacho kelolo yotn, oxea ostoriam add zalolea sabar onitim udexim dollebhorun disun yeta. Ani oxe torechem hem angar kantto ubo korpa sarkem ani dukachem chitr polleun, Gõyantlea cheddvam-ostorianchem surokxechem pangronn ubun gelolea porim bhogunk laglam.

Dil’lint zo sonvsarbhorchea dor dadleak lojek ghalpacho bolatkaracho prosong ghoddlo tednam, Gõycho mukhel montri aslolea Manohar Parrikaran sanglolem – “toslo bolatkaracho prosong mhojea Gõyant ghoddcho nam.” Punn atam, puray Gõyak nidentlean zhollpaun eka pãyar ubo korpi bolatkarachoch nhoi, khunacho legit prosong ghoddla… Atam mukhel montriak te vixim kitem mhonnpachem asa kai? Teach Dil’lintlea prokoronna vixim mukhel montrian fuddem vochun ek prosn kelolo – “tea pulisamni bolatkar zalolem cheddum aplich khas bhoinn mhonn kiteak chintunk nam?” Teach prosnacher adarun mukhel montriak, zo Ghor Montriachem-i pod samballta, taka vicharun dista – “Vasku, Assagao cheddvancher onit zalolea guneanvkariank rokddea rokdde kiteak sodun kaddunk nant? Bolli poddlolim cheddvam tumkam azun-ui tumcheo bhoinni mhonn tumi kiteak chintunk nam? Ani toxem chintlam zalear, bhavponnache lagnnuken azun meren guneanvkariank nitiche kheastik ube korunk kiteak upay gheunk nant?” Eka cheddvachean aplea benddachi runday unni korunk zainam, ani aplea avoy-bapaycho sobhav bodlunk zainam mhonntat te gozali poros-ui te upay gheunk Manohar Parrikarak dobradan oxokyo (impossible) kai?

Gõyant jeo atam cheddvam ani ostoriam add krur ghoddnnio zaunk lagleat, tem polleun atam Gõycheo laddli Laxmio apleach ganv-ghora ani rajyant chintunk poddleat… huskeant poddleat… tim atam apnna vangdda bhirantichem pangronnuch gheun bhonvtat. Sod’deak Gõyant laddli Laxmiank aple surokxecho husko nirmann zala to ‘Laddli Laxmi Yevzonn’-echean dhuun-pusun uddounk zauncho nam. Kiteak, duddu mon’xak bhitorle surokxechi sovostkay diunk xokonant. Sogllench proxasonn duddvamninch cholounk zainam. Duddavamni soglleach khotteponnancher soglleach vellar dhampnnem ghalunk zainam. Ani zoim rajyachea proxasonnacho vixoy yeta, thoim somudayachea boreponnacho vichar unch urta, thoim duddvancho khell cholonam.

Gõyant laddli Laxmiancher je atak ani akromonnam zatat, tem polleun atam hea laddli Laxmiancheo avoyo-i bhiraten kampeunk lagleat. Tanchea-i monancho tann atam disan-dis vaddunk lagla. Lhan cheddvache avoyk dhorun tem lognak tenklole vhokleche avoyk atam teoch gozali chintun nid poddonam, kiteacheruch mon lagonam. Aplea cheddum bhurgeak iskolak dhaddunk nhesoytanam tika husko zata… apli dhuv kolejik, kivam nokriek vochunk toyar zatanam tichea kallzache ttok’ke nettan vaddunk lagtat… kalliz nema bhair dhodd’dhoddunk lagta. Iskolak, nokriek geloli apli dhuv surokxit ghora pavchi mhonn ti atam porot-porot ghora bhailea umbrear bosun tichi vatt polleun asta. Apli dhuv surokxit ritin porot ailea bogor tika sukh lagonam. Atam tea laddli Laxmichea avoyank mhoineak 1,000/- rupoy asle te apunn 5,000/- rupoy dita mhonn sorkaran kitlem-i sanglem zalear tanchea monancher ailolo tann sompcho nam, tancho husko pois zauncho nam.

Virodhi Pokxacho fuddari astanam Manohar Parrikar aplo ‘homework’ korun je ritin soroll ani kalljidarponnan uloytalo, tantuntlean tannem gõykarachea kallzamni  suvat zoddloli. Gõychea rajkaronnant aplo pokx sot’ter yeuncho, ani apnnak puray panch vorsancho kall mukhel montri mhonn rajyachim sutram hatallunk mellchim, oxe itlim vorsam anvdde ghonttpi Manohar Parrikar fattle nov mhoine mukhel montriache kodelir bosun asa. Ani tachea rajyant atam cheddvam-ostoriancher agllik zaunk laglea. Teoch gozali to Virodhi Pokxant astanam ghoddloleo zalear, mollob mathear ghetolo aslo… BJP-chea nanvan morcha kaddtolo aslo… Gõy bond kortolo aslo… apunn sot’ter aslolo zalear apunn toslea ghoddnniancher khor karvay kortolo aslo oxe torechem chitr toyar kortolo aslo. Punn az tachi ti anvdde ghonttpachi poristhiti urunk nam. To rajyache mukhel kodelir boslolo asa. Rajyachim sutram tachea hatamni asat. Zalear, Virodhi Pokxant astanam je-je poristhitint apunn koso vavrun vatt kaddtolo aslo, ti kuxolltay tannem atam dakouncho vell aila. Sod’deak BJP sorkarachem raj cholpi Gõyant BJP-cher babot proxasonnanchim khotam poddunk survat zalea. Tea khotancher rajyantlea laddli Laxmianche ani ostorianche osurokxechim anik-ui khotam poddun aplea pokxachi doxea zaunchi nhoi mhonn Manohar Parrikaran pettun uttpachi goroz asa. Uttot to?                        

   

    

 

Dr. Jack de Sequeira… 46 Vorsam Uprant-ui Jivo Itihas

SON’VARACHIM SUNGTTAM:

Dr. Jack de Sequeira… 46 Vorsam Uprant-ui Jivo Itihas

-Jose Salvador Fernandes

 

Gõyant zaitem korchem asa…. ani Gõyant zaitem korunk zata hachi khori  somzonni hache poilim bhou thoddeank asli. Tantuntlo eklo gõykar mhollear Dr. Jack de Sequeira.        

Dr. Jack de Sequeiracho zolm’ Abrilache 20ver, 1915 vorsa tednanchea Burmant zalo. Az tea desak Maynmaar nanvan vollkhotat. Erasmo de Sequeira ani Ana Julia de Sa hanchea ekvottak zolmol’lo to dhaktto put. Lyseumant Purtugezintlean xikop kortoch, tannem aplem unchlem xikop Escola Medical de Goa hantum kelem. Bhouch huxarkayen tannem ekvis vorsanche pirayer Medico Ciugiao hi podvi zoddli. Fuddem vochun to voizuki mollar rogtachea sôd-vavracho vixoy hatallunk toyar zatalo, tednam tacho bapuy bhair poddlo. Hangachean tannem voizuki mollak adeus kelo, ani fuddem vochun bapaycho dhondo samballunk laglo.

Gõyche suttke uprant, Dr. Jack de Sequeira rajkaronnant bhitor sorlo. 1962 vorsantlea May mhoineant tannem ‘Gõycho Pokx’ ghoddlo. Gõyak Rajyacho panvddo mellunk zai oxea hetun ani fuddarache nodrentlean, eka vorsa uprant tannem Gõycho Pokx ani teach hetun vavurpi her pokxank ekttaim korun tancho Ekvottit Gõykarancho Pokx (United Goans Party) ghoddoylo.

Gõy Purtugezanchea chopkeantlem mekllem zatoch,  1961 vorsa Bharoti Foujen Gõy aplea tabeant kelem. Uprant 1962 vorsa tannim Gõycho Bharoti Songhant aspav kelo. 1963 vorsa Dezembrache 9ver Gõychi poili vinchnnuk zali.

He vinchnnuke khatir don mukhel pokx ghoddoylole asle - United Goans Party (UGP), ani dusro Maharaxttr Gomantak Pokx (MGP).  Don-ui pokxanche hetu ani sopnam ekameka add aslim.  Gõy Maharaxttrant vilin korop ho MGP-cho pengott bandun hetu also. Zalear, Gõy Maharaxttrant vilin korunk divop nam, tem vegllem dovrop ho UGP-cho adar khambo aslo.

Vidhan Sobhechea tis (30) zageantle attavis (28) zage Gõyche asle, ani Damanvcho ek ani Diucho ek zago aslo.

Vinchnnuko zaleo. MGP-ak 16 zage mell’le, ani UGP-k 12. 1964 vorsantlea Janerache 9ver Gõy, Damanv ani Diu Vidhan Sobha ekttaim zali. MGP-cho Dayanand Bandodkar Gõycho Poilo Mukhel Montri zalo.

 MGP ani Maharaxttrantle-i rajkarnni hem polleun satvea sorgar pavle, ani hem sogllem kitem ghoddlam tem Gõy Maharaxttrant ghalche khatiruch ghoddlam mhonn boballunk lagle. Gõy Maharaxttrant ghalpacho boball chodduch vaddunk laglo. Tednam, MGP-chem khottem ani Gõychi vollok nam korun uddounchem sopon khorem ani purem zainam zaunk, Dr. Jack de Sequeiran Lokmot gheunk  desacho adlo Prodan Montri Jawaharlal Nehruk sanglem. Nehruchea mornna uprant tich gozal Lal Bahadur Shastrik sangli. Bengllurant Akhil Bharoti Kongres Somitichi zomat choltali thoim vochun Indira Gandhik-ui tich lokmotachi gozal sangli. Kongresicho Gõy fantteacho odhyokx aslolea Purshottam Kakodkaran-ui tench mot Nehru zomea kodde ugtaun lokmot gheunk anik-ui cheponn haddlem. Ani te nodrentlean, gõykaramni Gõy Maharaxttrant vochpachem kiteak addaunk zai tem Gõybhor aplea sangatiam vangdda Dr. Jack de Sequeiran prochar kelo.  Ho boball puray desant zalolo. Hich gozal itihasache nodrentlean sangtolo zalear:

31.05.1955 – Desacho adlo Prodhan Montri Jawaharlal Nehrun Gõychi osmitay sodanch aglli-veglli urtoli mhon sanglem.

1963  – Jaipurant Bharoti Raxttrik Kongresachem sommelon zalem. Gõy vegllem  rakun dovorpachi goroz asa mhonn Prodhan Montri Jawaharlal Nehrun tea sommelonant porot ek pavtt ugddas kelo.

07.04.1964  – ‘Congress Parliamentary Board’-an bhasabhas korun Gõy vegllench urtolem mhonn nirnnoy ghetlo.

21.01.1965 – Gõyche Vidhan Sobhent, Gõy Maharaxttrant ghalchem mhonn bhoumot zalem. Tednam Virodhi Pokxacho Fuddari Dr. Jack de Sequeira  ani tache vangddi Vidhan Sobhentle uttun bhair gele, sobha-tyag kelo.

21.01.1965 – Gõycho Mukhel Montri Dayanand Bandodkar Maharaxttrantlea lokan Gõy Maharaxttrant ghalunk zai mhonn magnnim korunk ut’tejon ditalo.

10.03.1965  -  Mharaxttrache Vidhan Sobhent Gõy Maharaxttrant vilin kelolem zai mhonn soglleanchem ekmot zalem. Toso kaido pas korun, fuddlea vevhara khatir to tannim Parliamentak dhaddlo.   

05.05.1965 – Zata title vegim Gõyche vixim nirnnoy gheunk Gõycho Khasdar Janardhan Shinkren Lok Sobhe kodde maglem.

17.10.1965 -  Gõyam vixim lokmot gheunk tharav ghetlo.

21.11.1966  - Lokmotachea Bilacher bhasabhas korunk Bil Lok Sobhent manddlem.

01.12.1966 – Goa, Daman ani Diu (Opinion Poll Act) 1966 pas kelo.

03.12.1966 – Mukhel Montri Dayanand Bandodkaran aplea podacho rajinamo dilo. Raxttrpotin Gõychi Vidhan Sobha virgollayli.

13.12.1966 -  Mukhel Vinchnnuk Odhikarian 16.01. 1967 disa Lokmot zatolem mhonn tharaylem.

30.12.1966 – Gõy Maharaxttrant vilin korunk zo konn mozot ani adar korta, tankam duddvanchi mozot melltoli mhonn Maharaxttracho Mukhel Montri V.P. Naik ap-khuxen sangtalo.

16.01.1967 – Itihasik Lokmotacho dis. Sokallim 8.00 tim sanjer 5.00 meren lokmot  zalem.

19.01.1967 – Lokmotacho nikal jahir zalo. Niz gõykaramni Gõy rakun dovorlem. Dr. Jack de Sequeira vangdda khorea gõykaranchem sopon purem zalem.

Lokmotacho zo nikal zalo to khorench ojap zavpa sarko aslo. Gonnitachea rupan sangtolo zalear:

·                    Lokmotantlim puray motam – 3,88,392
·                    Motam ghalolea gõykarancho ankddo – 3,17,633
·                    Sarkim marlolim  motam – 3, 10, 361
·                    Ibaddlolim motam -  7,272
·                    Gõy rakunk marlolim motam – 1,72,191
·                    Gõyam add marlolim motam -  1,38,170
·                    Gõy vegllench urchim mhonn marlolim motam – 34, 021
 

Lokmotacho nikal jahir zaun Gõy vegllem urtolem mhonn kollun ailem tednam, niz gõykar khuxal zale. Gõykaramni  Dr. Jack de Sequeirak ‘Lokmotacho Bapuy’ mhonn ubarun dovorlo. Ani azun-ui tosoch ubarun dovorlolo asa.  

Dr. Jack de Sequeira. Niz ani kalljidar Gõykar. Fuddarachi nodor aslolo promannik rajkarnni. Lokmotacho ekuch ek bapuy! Gõykarancho khoro obhiman. Konknni avoy bhas samballun ani rakun samajik, sonvskrutik ani arthik nodrentlean Gõycho dorzo samballunk  Ekvottit Gõykaranchea Pokxacho (United Goans Party) sthapnnar ani odhyokx. Ani heach Virodhi Pokxacho adlo khoddegantt fuddari. Kalcho ani aicho, chalto ani sado ani unchlea panvddeavelo legit Gõykar sorgest Dr. Jack de Sequeirak itlo mandta, taka khoro ani favo zavpi man diun te tache bhitor ek boro monis polletat… khoro Gõykar choytat… totvam-muliancho ani xisticho nagrik dektat.

Dr. Jack de Sequeira aplea jivitant sodanch boreponnache, niz gõykarponnache ani totvam-mulianche tatt manen panvdde choddun aplea sangati gõykarank, tantuntlea rajkarnniank to dekh dovrun gelo. Punn aichea rajkarnniank tachi ti dekh tannem ghoddoun dovorlolea itihasant gudd’ddeak marlea he gozalicher uloun-boroun orth nam. Dr. Jack de Sequierak lagun Gõy vegllem dovrunk jem itihasik lokmot zalem tacho foll ami azun-ui jivo itihas mhonn bhogtanv ani fuddaracho-i gõykar to jivo itihas bhogtolo hantum il’lo-i dubav nam. 

- Jose Salvador Fernandes
www.goa-world.com
Sonvar, 12 Janier 2013

Chuk Korta Eklo, Sonsta Dusro?

Chuk Korta Eklo, Sonsta Dusro?

Chuki vinnem monis jiyelolo zalear ho sonvsar amkam ek voinkutt zata aslo. Soglleam thaim chuki ghoddttat. Khorem mhollear, jedna chuk zata te chuki velean ami kitem tori xikunk pavtat ani, ti porot na adarpak khupuch zotnay ghetat. Punn thodde zonn apli chuk mhunn manun ghevpak toyar asonant. Nimitam diun apleo chuki dusreancher thaptat. Tedna mat tanchea oxir chintnachi doxa kollun yeta. Osle monis apnnali zababdari visortat, hem mat visrunk favo na.

Barik-motteo chuki ghoddun yetat tea vellar, tum manun gheta zalear, tujem jivit dhasti vinnem sarta ani tuka sust nhid poddtta. Tuzo goirsomoz chukin aspavop zatolea vellar, tuji chuk naslear porian, tuvem zababdari gheunk zai. Ani hatuntlean kitem tori tum dusreank xikonn diun tanche dolle ugte korpa sarkem korta. Koreanim chuk nastana chuk manun ghevop hem ek vhodd muskil kam. Punn hatuntlean tum dakhoita ek vhoddponn monisponnachem.

Chuki adarloleo konnakuch nakat. Punn, hanga-thoim chuki-xivai tujean eksarkelem jivit fuddem vhorunk zaina. Ani zori chuki velean fuddlim panvlam tujean sarkim ghalunk zatat zalear, henvui bi ami somzunk zai; chuki zaun asat jinnecho ek gorjecho bhag, apleaponnan sudharpacho. Guneanvan har gillop ani dukhi zaunchea bodlek koxe toren dusre pavtti chuki na korop, hem niyallun pollelear odhik faideachem. Tuje chukin dusreank dukhapott korpa sarkem zalem zalear, gorjechem mhollear mannsugechi kxoma magun tuzo visvas vaddounk zata. Lojen vo gorvan ani khuxi naslolean zori tum chuk magona zalear opman kel'lo monis tujer rag dovorun ravtolo. Durdoivan, amchea soimbik korneamni amcheo chuki lipoun, dusreank bottam dakhoun guneanvkari tharaitaum tedna ami, somaza koddsun soklla poddttanv.

Ek dis konnem tori dar dhoddoilem. Dar ugoddlem. Ek bail ani dadlo mon'xam. Tannim mhaka Iglez bhaxen Mr. & Mrs. Varghese khoim ravtat tem vicharlem. Hanv novoch tea bilddingant. Hanv noko mhunn sanglem. Ani teach vellar samkarachem flat-achem dar ugddun, mhaka disa-dispottim bilgdingache iskadir mellpi mon'xam bhair sorlim, ani mhaka zap korun, mhojea tthaim ulovpi zoddiek veng marli. Hanv thottaklom. Mhojea xezareanche nanv vo tim khoinchim hem zanna zaunk, hanvem kednanch khottpott keli na vo toxem kitem kat vicharpachi sonvoy mhaka nasli ani na. Punn ek mat. Vollkhotolea mon'xank vollkhona sanglem mhunn, te zoddiek mat mhozo rag ailo astolo. Chuk konnachi? Havem ti mhoji mhunn manun ghetli? Hoi! Kiteak? Havem sangunk zai aslem hea poilea mozleacher (1^st floor-acher) khub zatincho lok ravtta. Tankam tonddan vollkotam, punn tanchim nanvam mat nokllom.--- Ani ek dis.

Fon ailo. Ostorecho vichar. Boil ghora asa?

 Na Ghoddie sodam porim mhoji konn tori ek vollkichi, vicharta dislem

Khuim gela?

Atam mhaka kollun ailem jea mon'xak ti sodta taka add nanvan boil mhonntat asot. Ani hanvem tichea vicharak moskoreamni zap diun mhonnlem.

Xetant

Kiteak?

Gayek sodpak

Hmmmm! Kitem? Konn tum? Sangchem nhoi aslem? Ho wrong number mhunn?

Chukun fonache ankdde dusrea fonar lagle mhunn sorry magche bodlek mhoji chuk zal'lea porim ti uloili. Poilea voile suvater fonache ankdde pollenastana fon korop hi tichi chuk asli. Mhoje ixtt-mitr opatt; ani mhozo mobile number zaite zonnank khobor aslolean hatuntlean konn tori vollkichi astoli mhunn somzun, hanv soroll nitt ulounk laglom. Horxim tichea mobile-ache fona-ankdde mhojea mobilar nond zal'le. Fon korun tichi chuk tonddar marchi dislolem. Punn hatunt mhaka faido aslo? Chukloleank bhogsuchem oxem Kristi Povitr Pustokar mellta. Punn ek mat. Hanv kitem tori xiklom. Thodde monis apli chuk vollkhun ghevpak toyar nant mhunn, spoxttponnim tea disa kollun ailem.

Lino B. Dourado

Voilo lekh, GULAB Abril 2009 ankar chhapun aila

Ostorianche Zome … Kitle Khore?

SON’VARACHIM SUNGTTAM:
Ostorianche Zome … Kitle Khore?

 

-Jose Salvador Fernandes

2012 voros sompunk pondra dis astanam, Dil’lint monisponna bhaili bolatkarachi ghoddnni ghoddli. Te ghoddnniechea gombhirponnan puray des haloun uddoylo… tantum Gõy raj-ui hal’lem koxem dista. Oxem dispa fattlem karonn?  

-       Active Citizens Forum Ponda, Nari Shakti Ponda ani India Against Corruption hannim Dezembrache 26ver Fonddem xarant te ghoddnne add nixed ugtaunk vati pettoun pursanv kaddlem. 
-      Bailancho Ekvott ani India Against Corruption (IAC) hannim sangatan  Miramar vati pettoun zagronn korun, Bharotbhor zavpi nixedak tenko dilo.
-      Moddganvchea Aquem vattarantlea nagrikamni-i aplo nixed ugtaunk Moddganvchea xarant vatinchi mirvonnuk kaddli.
-       Bailancho Saad sonvsthen-ui nixedachi zomat ghoddoun haddli.
-        Womens’ of India he-ui zomean Ponnje Azad Moidanar nixedachi zomat gheun men-vati pettounchi karyavoll keli.
-      Voice of Velim zomean Osonnemchea Lohia Chovker Janerache 3rer vatinchem pursanv kelem ani magnnea-zomat ghoddoun haddli.    
-      Dil’lint ghoddlole te krur ghoddnniecher aplo rag ugtaunk, Mahila Patanjali Yog hea zomean Gõychea sogllea ostorianche torfen Gõycho Rajpal Bharat Vir Wanchoo haka Janerache 2rer nivedon bhettoylem.

Dil’lintli bolatkarachi vaitt ghoddnni, voir ul’lekh kelolea ani her khubxea  Gõychea pongddank rostear yeun pursanvam, mirvonnuko kaddunk, vati pettounk, magnnim korunk, nivedonam bhettounk itli bhair kaddta ti gozal mhaka vichitruch disli. Hanv chintunk poddlom. Toxem korpa fattlean tanchem anik koslem-i karonn nam mu oso ek dubav legit ailo. Khuinche gozalivelean nam khoro zaum yeta to dubav?

Gõyant ostorianche zome ani zomeant asun-ui “ami azun-ui te ghoddnniecher nixed marunk nam mhonn amkam konnem-i bott dakounchem nhoi” hem tea fattlem tea zomeanchem karonn asum yeta kai?

Vo hea zomeank khorench ontoskorn asa, ani taka lagunuch te rostear aile?

Bãycho thav kaddunk jitlem sompem, titlo hea gozalincho thav kaddop sompem nam. Torui monachea fatracher ek gozal addkhollta –

Gõyant-ui cheddvam-ostoriancher bolatkar zatat, tanche khun kortat, Aguadche bondkhonnint kheast bhogpi Mahanand Naik bondkhonniche chear vonttim modem ravun, apunn marunk sodtalo tea cheddvak soroll fon korun sotayta… hem sogllem Gõychea Gõyant ghoddtanam voilea nixed marpi zomeank tacho matui tras zalolo disonam. Karonn, tednam konnuch hea vaittancher vo kaidea bhailea ghoddnniancher nixed marunk pursanvam-mirvonnuko kaddinam, vati pettoynam, rajpalak nivedonam bhettoynam, magnnim korinam! Karonn? Tednam he zome tem pulisamni pollevpachem mhonn fattim ani ogi ravtat kai? Punn oslea ghodnniam vellar pulis he sorkar cholovpi ani virodhi pokxa vori zatat, tannim te poristhitent kitem tori korchem oxi porjek tanche koddchean opekxa asun-ui te kainch korunk xokonant hem hea zomeank khub kall adim somzunk zai aslem oxem dista.    

Oxea sonvsthanche kednam-kednam mhaka ek tor churchure distat, nam zalear ‘tankam orth nam’ hi voll mhojea monant anik eke kolponechi bhor ghalta. Magir mhojeach monant hanv mhonntam – oslea sonvsthank teo ‘jiyetat’ oxem mhonnunk zainam, teo ‘asat’ oxem mat mhonnum yeta. Ani asta tacho sodanch faido zatoloch oxem dhorun cholunk zainam. Karonn teo uprant nanvak asum yetat, vo teo cholovpi nant mhonn toxea toxeo asat, vo tantuntlean konnak kainch korunk naka mhonn teo ubeo keloleo toxeoch asat. Tancho asun-ui faido nam, ani nasleo mhonn koslem luksonn-ui nam.

Gõyant ostoriancher-ui khubxea rupamni onit ani akromonnam zatat hem konnuch nakarunk xokonam. Punn tim zaunchim nhoi mhonn azun-ui meren Gõychea ostorianche ani ostoriam khatir aslole zome vangdda yeun ostoriam add zavpi oniti add, akromonnanchea virodhant vavurlole disonant. Ani vavurleat zalear-ui tacho foll khuinch ani probhavikponnan disunk nam. Dusrea utramni, khubxea rupamni onitik sampoddlolea ostoriank apnnacher ailolea sonkoxtta add zhuzunk tankam mozot, tenko ani vell divpi  ostorianche ek-ui sonvsthen Gõyche bhuyncher azun-ui toll dhorunk nam hem mat khorench khorem!

Onitil ani akromonnank bolli poddlolea cheddvam-ostoriank khuincheach ostorianchea zomeanchim pursanv-mirvonnuko nakat, tanche khatir vati pettoun nixed kelolo naka…. tankam kornnio zai… aplea sangati bhoinnamni te-te oniticher upay ghetlole zai…. jea upayantlean Gõychea Gõyantle ostorie kodde konnuch oniticho ani kosleach akromonnancho bhirankull ani monisponna bhailo khell khellche poilim eka poros kitexech pavtti chint’tolo!

Tea panvddeacher pavpachi dittay amchea Gõychea ostorianchea zomeam kodde asot? Hea prosnachem khoreponn dislearuch ti tachi zap thartoli mhonn somzotam.  

Jose Salvador Fernandes
www.goa-world.com

Gõy Sonvskrutik ani Somajik Kendrantlean Sonvskrutayechi Zhôr Vhanvot?

SON’VARACHIM SUNGTTAM:

Gõy Sonvskrutik ani Somajik Kendrantlean
Sonvskrutayechi Zhôr Vhanvot?

-Jose Salvador Fernandes

 

Bhas hem sonvskrutayechem protik he vixim konnakuch dubav nam. Sonvskrutayentlean bhas fuddem sorta, tigun urta. Gõyant sonvskrutayentlean bhas fuddem kaddpacho, ti rakhpacho  ani tigoun dovorpacho vavr khuinche-i sonvsthen eksarko kela zalear, to bhou purvilea Gõy Sonvskrutik ani Somajik Kendran kela mhonnunk zai.

16 Janer, 1969 vorsa Gõy Sonvskrutik ani Somajik Kendran zolm’ ghetlo. Hea Kendran fattlim 40 odik vorsam, kosloch faido sodinastanam, sabar bhasamni Konknnichi seva kelea. Hea Kendra khal 1969 vorsa sabar voxoyamvelim Konknnintlean pustokam uzvadda ailim, Konknni sonvskrutayecho ani somazacho vistar zaunche khatir he Sonvsthe khal Gõychea Kovincho Zomo, Gõychea Borovpiancho Zomo ani Dramatik Zomo toyar zalo. Tea bhair hea Kendrantlean Gõyam bhailea lokak Ponnje xarant Konknni xikovpacho-i vavr hache adim zalolo asa. Hea Kendrachea Dramatik Zomeantlean Fottkiri Savlli, Kirmidoracho Rosto, Dukan, Jesjudas oxe tiatr machier ailole asat. 1969 vorsa thaun eksarkim chear vorsam hea Kendrantlean Gõychea Lok-gitancheo, Nachacheo, Kantarancheo, Khell Tiatr Utsovacheo karyavolleo ghoddoun haddleo.    

Hea Zomeanchea hetuk visvaxi ravun, kolechea, vijneanachea ani Konknni borovpachea mollar nanv zoddlolea vhodd manestanchea nanvan, hem Kendr 1969 vorsa thaun dor vorsa 'Eminent Goans Day' ghoddoun haddta to ami polletanv. Kal meren Gõy Sonvskrutik ani Somajik Kendran ghoddoun haddlolo 46vo Manddeancho Utsov 1965 vorsa Ponnjechea Clube Nacional-an suru kelolo. 1974 vorsa thaun Gõy Sonvskrutik ani Somajik Kendran ho Utsov ghoddoun haddta, ani tantum Gõyche khubxe zome bhag ghetanam ami polletanv.  Oso ho Manddeancho utsov ghoddoun haddun, hem Kendr Gõyant bhovuch purvili manddeanchi sonvskrutay ani girestkay samball’lit fuddem sorlem. Hea itihasa khatir Kendrak porbim favo!

Az 44 vorsancho itihas aslolea Gõy Sonvskrutik ani Somajik Kendrachea vavracher niyall korunk bostam tednam, hem itihasik Kendr vorsantlean donuch pavtt zagem zalolem dista. Poilem, 'Eminent Goans Day' karyavoll ghoddoun haddta tednam, ani dusrem Manddeam Utsova vellar. Hea don karyavollim uprant hem Kendr hat kovllun boslolem dista.

Gõy Sonvskrutik ani Somajik Kendrachea nanva promannem, hea mhotvachea Kendrachea bavttea khal Gõyche sonvskrutayechea karyavollink az meren oto yeunk favo aslo, punn to ailolo disonam. Fuddle pillge khatir hea Kendrantlean Gõyche sonvskrutayechea sogllea prokarancho sôd-vavr, ‘documentation’, ani tea som’bondinche her prokolp toyar zalole disonant. Ganvam-ganvamni sonvskrutay ani tiche veg-veglle prokar rakhun-samballun dovrunk dor mhoineak nhoi zalear, don vo tin mhoineak ek pavtt tori sonvskrutayecheo karyavolli zaunk favo asleo. Gõychea Lok-gitancher, Nachancher, Manddeancher, adi. gozalincher akademik bhasabhas, karyaxallo, adi. ghoddoun haddun tea-tea prokaranchi kholayen vollok gheunk, ani tantuntlean to-to prokar avoddtoleanche umedik anik-ui fulam fulounchi goroz asli. Punn he vixim kaddiecho-i vavr zalolo disun yenam.

Vorsantlean ek pavtt Manddeancho Utsov ghoddoun haddlo mhonn Gõychi sonvskrutay tigun urchi nam. Vorsantlean ek pavtt ‘Eminent Goans Day’ karyavoll ghoddoun haddli mhonn taka vhoddlo-so orth nam. Dekun, Gõy Sonvskrutik ani Somajik Kendran, Gõyche sonvskrutayeche nodrentlean, vorsavollichea  hea don gozalim poltoddi vochun vichar korchi ani vavurchi nibel goroz asa. Hea rajyache sonvskrutayechim pallam-mullam sabar angamni mozbut-okhondd korunk zata title vegim hea itihasik Kendran pavlam ubarchi goroz asa.  

Gõy Sonvskrutik ani Somajik Kendr tor voir ul’lekh kelolo vavr hatant ghetolo zalear, hea Kendrant Gõyche sonvskrutayecho mog ani avodd aslolea fuddariancho ani vangddiancho aspav asop gorjechem asa. Fuddarache nodrentlean amchi sonvskrutay samballunk ani tigoun dovrunk kosle-kosle upay sôdun kaddum yetat ani te koxe-kat ritin chalik laun, girest, orthabhorit ani mol-mhotvache sonvskrutayechem bhanddar sôd-vavrachea, pustokanchea, ‘CD-VCD’-inchea rupan koxem ekttaun dovrunk zata, ontor’raxttrik mollar porian Gõyche sonvskrutayechem prodorxon korcho vichar aplea monant khelloun to koso chalik laum yeta oxe nodrentlean vichar korpi fuddari Gõy Sonvskrutik ani Somajik Kendrachea mhotvachea kodelancher vo somiticher asunk favo. Fokot nanvam khatir itlo-titlo kall hem-tem pod samballtat tacho Gõyche sonvskrutayek, nhoi mhonn tea Kendrak kosloch faido zauncho nam. Ani az meren tacho khuinchech nodren to zaunk-ui nam.

Gõy Sonvskrutik ani Somajik Kendrak ek itihas asa. Hea Kendrak ek kherit hetu asa. Hea itihasachi nond gheun, ani aplea hetucher nodor thiraun, hea Kendran atanch nidantlean ani aplea brom’antlean zagem zavop hi kallachi goroz asa. Nam zalear, fuddlea dha vorsam modem hea Kendrak orth aschonam, an tacho konnak forok-ui poddchonam.

Sonvar, December 8, 2012
 

Ek Gozal… Vellachi ani…

Son’varachim Sungttam:

      Ek Gozal… Vellachi ani…
                                              -Jose Salvador Fernandes

 

Tea son’vara osoch vellant vell kaddun ‘Son’varachim Sungttam’ borounk boslolom. Tea vellar mhoje chintpache ani borovpache vatter konnuch addkhollicho fator zaun ubo ravcho nam hachi-i hanvem khatri korun ghetloli… punn ti mhoji khatri chukichi asli. To darar ubo zalo, ani monant xiztalem tem borounchem thoinch urlem. Vicharlem –

“Kitem zalem?”

“Matso ulounk ailolom…”

“Kitem tem?”

“Tuka vell asa?”

“Vell nastananch tuka ‘kitem tem’ mhonn vicharlem hanvem?”

 “Borounk boslolo kai kitem?”

“Boslolom…. Punn survat korchea vellar tum ailoi.”

“Toxem zalear vetam, uprant yetam.”

‘Upkartalem, punn uprant hanv nam zalear?”

“Tem-ui sarkem.”

“Tum ulounk ailoloi hench tem?”

“Nam… nam… dusrem kitem…”

“Dusrem kivam tisrem…. Ekdanchem suru kor nhoi?”

“Fuddlea vorsa Kala Academy-n Tiatrachi spordha don bhagamni gheunk chintlam khoim.”

“Mhonnche?

“ ‘A’ ani ‘B’ zomeamni.”

“Tacho orth kitem?”

“Mhonnche zankam inamam melltat, tancho zago ‘A’ zomeant… ani zankam inamam mellonant tankam ‘B” zomeant.”

“Hache fattlo hetu kitem?”

“Tiatracho dorzo vaddounk oxem mhonntat.”

“Zalear atam tuji oddchonn kitem?”

“Mhoji oddchonn itlich – hanv dor vorsa he Tiatr Spordhent bhag ghetanch…. Hi tuka ani soglleank khobor asa… hanv Mhapxemkar. Mhaka faleam ‘B’ zomeant tor ghalo zalear, hanv mat tiatr spordhent bhag gheunchonam.”

“Mhapxem, ‘B’ zomo hea gozalincho tiatr spordhent bhag ghenam te gozali kodde koslo som’bond asa?

“Asa. ‘B’ zomeant aslolea tiatranchi spordha Moddganv kortole khoim te.”

“Zalear tantum kitem vankddem asa?”

“ ‘Competition’-achea tiatrank Ponnje zata titlo lok Moddganvam zainam nhoi?”

“Tum tiatr ‘competition’-a khatir korta kai loka khatir korta?”

“Loka khatir nhoi?”

“Loka khatir korta zalear tiatr ‘competition’-antuch bhag gheun kiteak dakoun zai tor? Tantum bhag ghenastanam-i dakoum yeta nhoi?”

“Tuka somzunchem nam tem…”

“Khoim tori gozali tuka sarkeo somzunk nant mhonn tujea ulovpantlean thavem zata… Dusri gozal, Moddganvam tiatrachi spordha zata mhonn tum bhag ghenastanam ravlear, ti spordha kitem zainastanam urtoli?”

“Kednam-kednam he tiatr spordhek orthuch nam koso dista?”

“Karonn?”

“Xevttim vochun, zai asloleank inamanch mellonant.”

“Spordhentlim inamam ‘zai asloleam’ khatir asat vo favo tankam astat?”

“Tench tem… borea-borea tiatranche tonddantle inam’ vetat.”

“Takach spordha mhonntat nhoi?”

“Bore tiatr kuxin dovrun faltur tiatrank inamam? Fattle khepek zannam dusrem inam’ mhaka mellunk zai aslem. Mellunk nam. Boro aslo mhozo tiatr.”

“Baba, spordhek yetolea dor ekleak aploch tiatr soglleam poros boro asa oxem dista ani to toxem mhonnta-i. Ani oxea zalem mhonntoch, magir thoimsor ‘competition’-acho ‘spirit’ disonam. Ani thoinch sogllem chukta.”

“Tum mhonnta toxem nhoi tem. Tum kitem mhonntai thoinch tem chukta. Kiteak, tunvem tea ‘competition’-ant kednanch bhag gheunk nam, ani tuka tem somzonam.”

“Torui tum mhojexim mhaka gozali somzotatuch mhonn ailoloi nhoi? Atam kitem zalem?”

“Mhoje sarke je tiatr boroytat tech heo gozali bes-boreo somzunk xoktat hem mhaka atam thavem zalem.”

“Dekik sangchem zalear, tujea motan je konn machier ravun kantaram gaytat tankanch kantarancheo gozali somzotat… te kantaram gaytanam ‘off tune’ gele zalear tiatrak hajir zalolea konnakuch tem unneponn kollonam oxem zalem nhoi?”

“Fattlea tiatr ‘competition’-avelean tum mhaka ‘hint’ martai?

“Hea ‘hint’-a xivai tuka itlo vell anik-ui ‘hint’ marleat te tum somzunk nam-i?”

“Anik kosle ‘hint’?

“Hanvem te tuka kitle-i somzaylear tuka te somzunche nant… Dekun, svota tunch tem chint ani polle… te mhonnosor hanv….”

“Nam mhaka-i vell nam… hanv-ui….”

Mhozo vell kaddun haka vell dilolo, ani atam ho…

 

Boroinar, jose salvador fernandes' hankam sompork korunk email


konknno at gmail dot com

 

Sonvar, Tarik: 1/12/2012

www.goa-world.com

[30/12/2012: Kepem Motdarsonghacho Amdar Chandrakant Babu Kavlekarak DKA-cho sekretar Jose Salvador Fernandes-an (Fotvar uzvean disti podta] ani tizorer Walter Menezesan Konknniche Romi lipientlim pustokam bhettoylim ek kherit KONKANI PUSTOKANCHEM PRODORXON, KEPEM, GOA]

 

 

AITARACHEO KATKUTLEO

http://groups.yahoo.com/group/gulf-goans/message/31498

Koramoticho ‘Konkanverter’!

SON’VARACHIM SUNGTTAM:

Koramoticho ‘Konkanverter’!

-Jose Salvador Fernandes

 

Kalla promannem mathear kurponnem mhonntat toxem, Mongllurchea Vixv Konknni Kendran Agostache 11ver,  Konkanverter zolmak ghalo. Konknni bhaxechea itihasant bhouch mhotvachi hi gozal. 

Konkanverter hem ‘online’ tontrnean, zaka lagon Konknni bhas tichea panch-ui lipiamni – Romi, Devnagori, Kon’nodd, Molialom’ ani Perso-Arabik (hi lipi azun-ui Konkanverter-ant ghalchi asa) - atam lipeontor korun, zonn ekleak aple avddiche lipientlean Konknni vachunk sompem zatolem. Konknni bhaxechea itihasant hi ek itihasik gozal tharta. Tontrnean hem udorgotichem hatiyar asta. Ani hem tontrnean vaprunuch Vixv Konknni Kendran Konkanverter-a udexim Konknnicheo panch lipi eke machier haddleat.

Konkanverter-ak lagon,Konknnichea mollar atam khubxeo gozali zavpachi xoketay asa.

Konknni mollar aple lipi xivay dusrea lipiamni koslem-kat borovop chol’lam hem atam kollun yevnk Konkanverter-an vatt ugti kelea. Dusrea utramni, Konkanverter-a udexim Konknnintlem yer lipiantlem sahitya zaka konnak aple avddiche lipientlean vachunk zai, taka tem aplea mukhar aslolea glasantlem udok piyevpa itle sompeponnim vachunk melltolem. Ani hacho porinnam’ mhonn, Konknnichea veg-vegllea lipiantlea vachpiank te-te lipiechea sahityachi ani sahitikanchi vollokh zatoli. Yer lipiantlea sahityachi ruch gheunk melltoli. Dusrea lipientlea sahityacho dorzo, panvddo, tank, sahityachem kellovop ani khellovop, vixoyachi ani axoyachi zannvay ji kal meren khobor nasli ti atam kollunk vell lagchonam

             Itihasik ghodda-moddink ani opghatak lagon Konknni somuday ximpddun poddlo. Khub zonn Kornnatokant gele, kaim zonn Kerollant gele. Az hea Konknni somudayache vangddi dusrea rajyamni Konknni bhas veg-vegllea lipiamni samballtat ani tigoytat. Az-ui amcho lok, duddvanche nodrentlean jiyeunk Gõyantlean ani Mumbointlean Gulfant, Evropant, Purtugez vosnnukamni veta. Ani hacho porinnam’ mhonn, dusrea rajyantlean Gõyant nokrek ani vostek ailolea lokacho ankddo Gõychea Gõyant ravtolea lokam poros-ui chodd asa. Gõyant dispott’tto vevhar cholounk 30 tok’ke odik bhailo lok asa. Ani vichitr mhollear, toch bhailo lok atam hangasor ‘Gõykar’ zaun jiyeta!

Gõyakar zorui Gõyam bhair gele, punn Konknni bhaxek mat fattim dovorunk nam. Vetanam tika aplea vangdda vheli. Apunn jea zagear vostek ravlo, thoinche lipien ti samball’lli. Oxe ritin Konknnik sabar lipi favo zaleo. Gõyant ailolea misionariamni Romi suru keli, Kornnatokant Kon’nodd vo Perso-Arabik, Kerollant Molialom’ lipi apnnayli. Atam hea veg-vegllea lipianchea Konknni somudayacho Konkanverter vividtayent ekvott ghoddoun haddunk pavum.

Punn hi fokot survat asa. Konknnichea yer lipiantlea sahityachi vollokh ani ruch ghetanam, Konkanverter-acho vapor, bhaxeche nodrentlean soglleoch gozali sopurnntayen manddtolo oxem nam. Kiteak, dor vattarant Konknni bhas ulovpachi xoili veglli asa. Bhas dor panch kilomittorancher bodolta oxem mhonntat. Konknni bhaxen apnnayloleo panch-ui lipio sobhavan veglleo asat, ani taka lagon lipeontorachea vavrant thoddi kottintay urum yeta.

Konkanverterak lagon atam Konknnichim lipianchim durgam moddun vetolim oxem konn-ui chintunk lagot zalear tachea tea chintpant chuk asa oxem mhonnchem poddtolem. Karonn, lipiancher zhuz manddunk vo teo nam-nopit korunk Konkanverter-acho zolm’ zaunk nam. Ti-ti lipi vaporpi aplech lipientlean dusrea lipiantlem sahitya, borovp vachtolo vo vachtoli. Taka lagon taka vo tika dusre lipiechi nhoi, punn te lipientlea sahityachi odd lagpachi, te lipientlem borovp avoddpachi xoketay asa. Konknniche eke lipient borem sahitya asa mhonn ti lipi yer lipianchea vachpiamni vo borovpiamni apnnaunk zai, ani apli ti soddun diunk zai oxem zaunk zainam, ani toxem zaunchem-i nam. Az eke lipientlea lokak aplich lipi Konknnichi ‘sobhavik lipi’, ‘xrextt lipi’, ‘unchli lipi’, promann lipi’ dista, ani dusreamni apli ti-ti lipi soddun ‘sobhavik lipi’, ‘xrextt lipi’, ‘unchli lipi’, promann lipi’ apnnaunk zai mhonn te zobordosti kortat. Konkanverter-an oslea motachea lokachea tonddak talem marlam, ani tanchem tem khottem chintop ani mhonn’nnem oskot korun uddoylam.

Konkanverter-ak lagon lipianchi oddchonn pois zatoli, punn maneotay mellum meren   lipianchem zhuz mat chaluch astolem. Zorui bhas hi lipiam khatir asonam, torui ap-aple lipien bhaxecho obhiman ballgun Konknni bhas samballchi oxem khub zonnank dista. Konknnichea mollar oxench chol’lam. Khuinche-i lipientlean konn-ui Konknni bhas samballpak ani tigovpak vavurta taka vo tika konnacheanuch khoinchech ritin addaunk zainam. Taka vo tika apnnak zai te lipiecho vapor korpachem meklleponn asa.

Konknni amkam amchi vollokh rakhunk ani samballunk zai. Mhonntoch, Konkanverter Konknniche te-te lipieche xoilichem ani utranchem khaxeleponn samballunk pavum hi amchi opekxa.    

Kitem-i zaum. Lipio ani lipink lagu zavpi khaxeleponn samballpachi opekxa kortanam, Konknnik bollixtt, mozbut ani khoddegantt korpachi tank aslolea Konkanverter-ak dor eka Konknni mon’xan aitea monan, ugta kallzan yevkar divpachi goroz asach asa. Tea bhair tem tontrnean upkarant ghaltoleank-ui porbim dilea xivay hem borovp sompounk zainam. Tankam amchi xabaski!

www.konkanverter.com hea sutracher Konkanverter mellta.  

 

____________________________________________________________________________

Boroinar, jose salvador fernandes' hankam sompork korunk email




konknno at gmail dot com

www.goa-world.com

____________________________________________________________________________

 

________________________________________________

 

KONKANI

not hidden anymore !!

For all these years, we were curious about Konkani Literature hidden in scripts we can't read. Now its time to read it all.

Let's Transliterate !

www.goa-world.com
6 October 2012