Son'varachim Sungttam

Vinchnnuk 2012: Motdar Jikhtolo Va Hartolo?

2012-02-10T21:28:00.000-08:00

Vinchnnuk 2012: Motdar Jikhtolo Va Hartolo?
- Jose Salvador Fernandes

Ami amchea Gõyant amcho sorkar vinchun kaddpacho povitr vell pavla. Amchea Gõyant bhorxttacharachim pallam-mullam kitlim khol ani bhitor-bhitor rigleant tachi amkam ugteponnim khobor asa. Amchi svotontray rakhpacho, ani ti rakhtam-rakhtam amchi dignidad-ui rakhapacho ani samballpacho vell amchea jivitachea umbrear aila.

Gõychi rajki poristhiti vaitt doxer thaun paxtt doxer pavot asa. Sot’ter aslolo dor ek pokx Gõy rajyak apnnak zai toso ani zai te ritin lutt’ta, nagoyta ani chorta. Zannim aplea kallea duddvancho konnakuch vas lagunk diunk nam, amchea soimachem ani poryavoronnachem zannim nisonnton ani idvas kelo, dhondea khatir xetanche zomnichem zannim rupantoram kelim, tankam sogleank ami guneanvachea pinzreant bond korop gorjechem ani mhotvachem.

Amchea somazant jem sonvskrutayechem ani soimachem nisonnton zait veta tem addaupachi goroz asa. Bholaikechea mollar, nagri sovlotinchea mollar, xikxonnik pod’doticho ani her yevzonneancho zo dorzo denvot asa, tacher porot vichar korpachi ani tea-tea mollancher sudaropam haddpachi bhouch goroz asa. Amchea bhurgeank tanchea jivita khatir goroz teo tekniko xikoun ani mul’liam diun vaddovpachi goroz asa.

Favo te ritin aplo dispott’to zoddche khatir amchea tornnateank favo title soeg nam zaun, te hata bhair poddleat, tanchi poristhiti bigddot veta. Amchea vhoddilank apunn onath, eksurim ani osurokxit koxim asat mhonn bhogta. Disa uzvaddar chorio ani dhormanchea vostunchi fodd-modd korop hi atam sodanchi chal zalea. Amchi fuddli pillgi jednam amkam he vixim prosn vichartoli, tednam ami tankam koslo zobab ditoleanv?

Vinchnnukank ubo ravpi khoinchea pokxacho koslo hidden agenda asa to ugteponnim disonam. Ek raxttrik pokx nivddun ailear to dhormvadache buniyadir rajkaronn choloyta; zalear dusro rajki pokx nivddun ailear taka svontontrayecho orth khoborasonam. Oxe poristhitint, Bharotantlea nagrikanchem ani motdaranchem jivit monisponnachem, sukhachem ani folladik koxem zatolem?

Bhroxttacharachim pallam-mullam umttaun kaddcho, rajki mollar motdarank ghat korpiank ani motdarank unnem lekhtoleank xevttun konnxak marcho, ani Gõyant nitoll rajkaronnacho surya udeunk vatt meklli korcho vell udela. Porjen aple udorgoti khatir vinchun kaddlole je rajkaronni rajkaronnantlean dhondo kortat tankam kitlimxinch metram pois dovorpacho xubh vell aila.

Mhargay, bhroxttachar, soimik girestkay luttop, vavraddiank unno muxaro divop, ani favo teo sovloteo divop nant, bekarponn, svotacho dhondo korpi zoxe porim xetkamati, nustekar, gaddekar, lhan-lhan dhondekar hanchi poristhiti ani oddchonni, oxea vixoyancher vichar korpachi kallachi goroz asa, ani to kall atam pavla.

Gõychea Gõyant konn-ui khoimsor-ui vochum, vochot thoimsor dolleank kitem tori khottokta. Uprant to santtlolo ani kuslolo kochro zaum, khollio kochrean fugar zalolean budd’tti yeta, mullavea ani mhotvachea vostunchi ani jevnnachi mhargay, udkacho unnav, bizlecho apa-lipa khell, gaddio ubio korunk favo to zago nam, udkachea painnimni chikol ani produxon.

Eka vhodd karonna khatir sangatan ekttaim yeum-ya. Hache poilim Gõykar sabar ani vhodd-vhodd zhuzam zhuzleat ani jikhleat. Atam ami zhuzak vochpacho vell aila. Mhonntoch, hem zhuz bhouch dittayen ani ekvottan zhuzpachi toyari atancheanuch monantlean suru zaunchi goroz asa.

Gõyantle soglech pokx, tannim uprant koslem-i rup gheum, te ekach nanneacheo don bazu distat. Bhroxttachar ani dhormachea nanvan zhogddim-zhuzam zaunchim ani loka modem futti poddcheo mhonn, ani lokache prosn-oddchonni toxea toxeoch chalu urcheo mhonn, te sogle bhitorlea bhitor ani guptim ekamekak mellun ani bhettun asat.

Somuday bandpachea vavrak ani soglem kaidean cholta toslo somaz ghoddovop hea hetuk ami visvaxi asanv. Chaltea mon’xache prosn-oddchonni ami somzotanv toxe anik konnuch somzonam.

He khepek Gõy Vidhan Sobheche Vinchnnukent pokxak nhoi, umedvarak mot marpachi goroz asa. Pokxamni hache poilim apunn konn, kitem-kat to sobhav dakoyla. Dekun, nitoll sobhavachea, tankichea ani Gõykaranchea ani Gõychea mogan promannik ritin vavrunk khuxi aslolea umedvarank moladik ani povitr mot ghalpachi goroz asa.

Marsache 3rer, 2012 jea disa Gõyant Vidhan Sobhecheo vinchnnuko zatoleo tednam, porjeche, ani kherit bhaxen somazant chepun-damun dovorloleanche, ani somazantlea oskot-durbollanche udorgoti khatir pott’tiddken vavurpacho hetu ballgilolea umedvarank nivddun haddche khatir dor eklean aplea moladik ani mhotvachea motacho vapor korop xanneponnachem thartolem.

www.goa-world.com
Sonvar, 11 Febrer 2012

Noman Saibinn Ghoramni Bhonvddaytanam…

2012-01-20T22:32:00.000-08:00

SON’VARACHIM SUNGTTAM:
Noman Saibinn Ghoramni Bhonvddaytanam…
- Jose Salvador Fernandes

… ani tisre sanjer Saibinnichi murti amger haddpachi asli. Dekun, vaddeantli somudayachi vangddi asloli tika hanvem sanglem – “ he khepek hanv amchea ghora Saibinnich murti vhorchonam.”

“Kiteak vhoronam?” Somudayechi vangddi.

“Mhaka khuxi nam.”

“Kiteak khuxi nam?” Ti.

“Ti tuka sangpachi-i mhaka khuxi nam.”

“He khepek tum vhoronam zalear, fuddarak tuka ti kednach vhorunk mellchinam.” Diozechea Gonvlli Bapan firgojechea Vigara kodde uloun ani tharaun, vaddeant ghora-ghoramni Saibinnichi murti bhonvta te vixim nirnnoy gheunk soglo odhikar tikach dilolea porim ti uloyli.

“Fuddarak Saibinnichi murti mhaka vhorunk mellchinam tachi mhaka khont nam. Kiteak, tichi murti ghoramni haddtat tinch faleam sorgar vetolim, ani vhoronant tim ifernant vetolim oxem nam nhoi?”

“Toxem zalear, tuje vixim mhaka Vigara kodde ulounchem poddtolem.” Vigara fattlean firgojecho karbhar cholovpachi zababdari aplech tokler ghalolea vori ti uloyli.

“Atam Vigara kodde anik kitem ulovpachem urlam? He khepek hanv ghorant Saibinnichi murti vhoronam zalear, fuddaracho nirnnoy tunvem sangloloch asa nhoi?”

“Hanvem toxem sangpa fattlean dhormik karonn asa.”

“Dhormik karonn? Anik koslem?” Hem anik koslem novem karonn oxem yevjit hanvem koplak mirio ghalit vicharlem.

“Dhormachea kaidea promannem, Saibinnichi murti ghora-ghoramni vhorop compulsory.” Tinnem apunn ek pavl fuddem asa mhonn dakouncho proytn kelo.

“Dhormacho ho novo compulsory kaido tor?”

“Hoi. Kiteak vicharta tum? Tuka khobor nasli?”

“Mhaka compulsory dhormik kaideanchi khobor asli ti itlich… Agostache 15ver ani Dezembrache 25ver misant bhag ghevop dhormache nodren mhotavchem ani kaideachem.”

“ … … …”

Ti ogich ravli, ani dusrech goddiek cholunk lagli. Koddsorli.

Ghora-ghora Saibinnichi murti vhorop… xezriam modem ani vaddeant ekvott, boreponn vaddche khatir… kai bori kolponam… punn halinchea kallar somudayachea vangddiamnich nhoi, punn ghora-ghoramni Saibinnichi murti vhorpiamni he kolponecho orthuch bodlun uddoyla…

Xezariank xezarianchem tondd polleunk naka mhonn tannim atam durgam ubim keleant. Bhair chirea-fatranchim, ani bhitor kallzant dusmankayechim… dusvasachim… dvesachim… dekun az Saibinnichi murti eka ghorant thaun dusrea ghorant vhortanam, ti durgam-addeavelean ubarun vhortat… Saibinniche murtiek high jump marunk laylolea porim…

Xezarim xezariam kodde dusmankayen uloynant. Oxe poristhitent, jea ghorant Saibinnichi murti vhorpachi asta, tea ghorachim ghorchim Saibinniche nimitan aplea soireank apoun haddtat, ani dusman xezariachea ghorantlean Saibinnichi murti soireank haddunk dhaddtat…

Fattle pavtt, vaddeant eka xezariager Saibinnichi murti haddpachi asli. Tanger Saibinnik vechem poddta mhonn tika apli dusman lekhpi xezarn’n aple avoyger geli… Ani tichea ghorant Saibinnichi murti haddpachi asli tednam, poile xezarn’nin Moddganv Ravindra Bhovonant sanjechea 7.30 vaztanchea tiatrak poll kaddlo… Oxe gozalik lagon hanv chintalom, hea dog-ui xezariam modem kitem forok urlo, ani ghoramni Saibinnichi murti haddpache gozalik kitem orth ani mol urlem?

Fattlea mhoineant ganvchea eka vaddeant ghora-ghoramni Saibinnichi murti bhonvddaytalim… ti murti khoinche manddavollin bhonvddavpachi hem thoimsorlea somudayacheach vangddiamni tharaylolem. Te manddavollinuch soglem choltalem. Okosmat somudayachea eka vagddian te manddavollint eka disa khatir bodol kelo.

Koslo?

Aplea soireanchea bhurgeacho zolm’dis aslo dekun, chear disam uprant jea ghorant Saibinnichi murti pavunk zai asli, ti chear disam adinch pavli. “Bhottak zai toso omas ani punov” he gozalik uprant somudayachea tea vangddian kitem justification dilem ti mhaka khobor nam, punn tea vaddeantlea lokan mat hea kumparponnam add tallo ubarunk nam hem mat khorem.

Ghora-ghoramni Saibinnichi ji murti bhonvddavpachi ji orthabhorit chal asli ticho orth atam khoinchea khoim sanddun uddoyla. Dekun, Saibinnichi murti ghora-ghoramni bhonvddavop hi atam xezariam modem ani vaddeant ekvott ghoddoun haddpachi chal uronk nam. Tacho fattlo ho hetu sanddoyla. Ani hachem khoreponn amkam, Saibinnichi murti ghoramni bhonvta tea vellar xezariam poros soirinch chodd aslolim distat. Dusrea utramni, ghora-ghoramni Saibinnichi murti bhonvddavop ho atam family utsav zala! Famil party zalea!

Ghora-ghoramni Saibinnichi murti bhonvddavpachi orthabhorit chalicho orth gela, ani fokot ti atam chal mhonn cholta. Faleam vochun, ghora-ghoramni Saibinnichi murti bhonvddavpachem bond kelem zalear-ui konnak kosloch forok poddcho nam, hem mat khorench khorem.

www.goa-world.com
21/01/2012

GÕYCHO FUDDAR KITEM?

2012-01-06T22:27:00.000-08:00

SON’VARACHIM SUNGTTAM:

GÕYCHO FUDDAR KITEM?
- Jose Salvador Fernandes

Gõyant Vidhan Sobhecheo Vinchnnuko 2012 umbrear pavleat.
Tea nimitan, Gõyant khubxim rajki nattkam disun yetat.
He fuddem yevpi vinchnnuken, fattlea panch vorsanchea kallant amdar mhonn nivddun ailolea boreach zannanchea ani tantuntle kaim zann montri zaloleanchea pottant bara vazounk survat kelea. Ani vinchnnuke nimitan pottant bara vaztat mhonnonuch, he amdar-montri atam add vatten fuddle vinchnnukent nivddun yevpachi toyari kortat. Tachi zhollok khobram-potrancher vachunk mellta, ani kaim pavtti porxim konna-konnachea-i tonddantlean, gupit ritin aikunk mellta. Dis sortat toxe, tancheo osleo anik-ui add vatto nodrek yevpacheo asat.

Konn montri khoim aplea motdarsonghantlea motdarank, vinchnnuk umbrear pavloli astanam sorkari nokrent bhorti korunk vavurtat. Ani tem-ui zalear, vinchnnukecho Code of Conduct chalik laglolo astanam… Oxem kiteak kai?

Thoddea sorkari khateamni vinchnnukecho Code of Conduct chalik laglolo astanam-i sorkari nokrent tea umedvarank aspaun ghetleant mhonn nemnnukecheo chitti dileo. Punn tancheo teo nemnnuko bekaideacheo mhonn jahir keleat. Atam hanga prosn yeta to, tea umedvarank oxea, samkea nhoi tea vellar sorkari nokrent kiteak aspaun ghevpachem? Oxem kiteak kai?

Amdar-montriamni him vinchnnukechea nimitan kelolim thoddinch uzvadda ailolim nattkam. Punn uzvadd yeunk naslolea nattkancho ankddo konnakuch khobor nam. Zoxe dis sortole, toxim him nattkam khubxe konnamni, khubxe torenim ani khubxea nettan choltolim. Tantuntlim thoddim uzvaddak-ui yetolim, punn chodd lipun urtolim.

Hea sogllea nattkam modem anik ek nattok cholta. Dor eka pokxacher apnnak tikett divpachi prexor haddpachem. Pokxache eke tiketti khatir kitlech umedvar…. Pokx taka tikett dinam zalear, to tea pokxak adeus korpachi dhomki dita. Oxe toren to-to umedvar tea-tea pokxachi kholay ani thav polleta. Ailear dongor ailo, gelear sut gelem oxe vagnnuken proyotn kortat.

Vinchnnuko lagim pavtat tednam, khubxim motdaram-i aplo khell khellunk lagtat. Amdar-montriamni fattlim panch vorsam aplim kamam korunk nant tim vinchnnukechea vellar korun ghevpacho nett dhortat. Vinchnnukent nivddun yeun-ui to-to amdar-montri motdaranchim kamam korinam, tea-tea amdar-montrianchi xempddi vinchnnukechea vellar dhorpachi ani ti apnnak zai toxi oddpachi-halovpachi koramot atam motdarank bori sadlea.

Hem soglem niyalltoch, vinchnnukank kitlo ani koslo orth urla hoch prosn monant uprasta. Punn, lokxayechea hea desantlea Gõyant oso vinchnnukancho orth bigddodla taka zababdar konn tachi zap khoinche-i gozali poros spoxtt asa. Dekun, apo-ap fuddlo prosn ubo zata to ho – fuddarak-ui hem oxench cholpachem? Tachi zap ‘hoi’ zalear, Gõycho fuddar boroch marekar asa oxench mhonnchem poddta.
Nam tor, anik kitem mhonnum yeta?

7/01/2012
Goa, India
www.goa-world.com

GÕYCHI SUTTKA ZAVCHE POILIM…

2011-12-16T21:24:00.000-08:00

1961 vorsa porkianchea chopkeantlean Gõychi suttka zali. Dezembrache 19ver, 2011 he suttkek pon’nas vorsancho kall bhorta. Mhonnon Gõycho Sorkar hea vorsa he Suttkecho Bhangaracho Utsov monoyta. Punn tea monoupant vhoddlixi khuxalkay, kholay ani orth disonam.

SON’VARACHIM SUNGTTAM:
GÕYCHI SUTTKA ZAVCHE POILIM…
- Jose Salvador Fernandes

Toxem polleunk gelear, sorkarak Gõyche Suttkechem mhotv ani gombhirponn nam tem tannim anklolea kariavollinchea yevzonneancher nodor marlear dolle bhorun disun yeta. Kitem-i zaum, unnea-punnea fattlea tis vorsanchea kallant Gõyant sorkar mhonn sodrer ailoleamni Gõyche vixinchi kednach koslich gombhirtayechi nodor ballgunk nam. Ti vrut’ti ani vagnnuk az meren chalu asa.

1961 vorsa Gõychi Suttka zaunche poilim Gõyam som’bondan khubxeo gozali ghoddleo. Gõy Suttkechea Bhangarachea Vorsa nimitan, soglea nhoi zalear choddan chodd gozalincho hanga addavo ghevpacho proyotn kela.
1)           Kristachea 200 vorsam Adim – Gõy hem Xrextt Raza Ashokachea Mauryan razvottkecho ek bhag aslo.
2)           Kristachea 400 Vorsa - Kadamban Gõyant aplem raj sthaplem.
3)           1367 – Vijaynagarche razvottken Kadambachi razvott aplea tabeant keli.
4)           1380-1454 - Gõy hem Hindu Vijaynagar razvottke khal ailem.
5)           1469 - Musolman Bahmani raza, Muhammad Shah II hannem Gõy aplea tabeant kelem.
6)           1454-1471 - Gõycher Bankapur mukheliamni aplo xek’ choloylo.
7)           1488 – Bijapurcho Sultan, Yusuf Adil Shahan Gõy aplea tabeant kelem.
8)           1471-1489 - Bijapurcho Sultan, Adil Shahan Gõycher aplem raj choloylem.
9)           1498 - Vasco da Gaman Bharotant yevpachi doryantlean vatt sodun kaddli, Calicut ailo.
10)        1489-1510 - Bijapurcho Sultan, Yusuf Adil Shahachem Gõycher raj cholovpachem chaluch aslem.
11)        1510 - Novembrache 25ver Alfonso de Albuquerquean Gõy aplea tabeant kelem.
12)        1515 - Purtugezamni yesesvi ritin Ismail Adil Shaha add Gõy rakhlem.
13)        1524 - Dom Vasco da Gama Gõycho Viceroy zalo, ani teach vorsa Calicut ontorlo.
14)        1534 – Purtugezamni Diu apnnaylem.
15)        1540 – Jezuchi Sonvstha ghoddli.
16)        1542 - St. Francis Xavier Gõyam ailo.
17)        1543-1783 – Purtugezamni Adil Shaha koddchean Bardez ani Saxtti apnnayli.
18)        1552 – Chinachea Sancian zunvear Bhagevont Francis Xavier ontorlo.
19)        1554 – Matui kusonk nasloli Bhagevont Francis Xavierachi kudd Gõyant haddli.
20)        1556 – Asiantlo poilo chhapkhanno Gõyant ailo.
21)        1557 – Gõychi Arkidiocez sthapli.
22)        1560 - Gõycho poilo Arsebisp mhonn Dom Caspar Leao Pereiran tabo ghetlo.
23)        1560 – Gõyant Inkvizisanv ailem.
24)        1561 - Purtugezamni Damanvcher akromonn kelem.
25)        1570 - Adil Shahan Gõy addaylem.
26)        1622 - Gregory XV Pap Saiban Bhag. Francis Xavierak sant kelo mhonn jahir kelo.
27)        1623 - Gregory XV Pap Saiban konverter zalolea hindu bamnnank apli zat samballunk porvangi dili.
28)        1639 – Dutchan Gõycher akromonn kelem.
29)        1642 - Ingland ani Purtugala modem korar sthaplo.
30)        1683 – Shivajicho put Sambajichea khal marathamni Gõycher akromonn kelem.

31)        1695 - Purtugex Viceroy Pornnem Gõy xarantlo bhair sorlo.
32)        1739 - Marathamni Gõycher akromonn kelem.
33)        1741 - Marathamni ani Bhonsleamni purtugez bollak haroylem.
34)        1749 - Purtugezamni Jezuitank bhair uddoyle.
35)        1759 - Purtugez Viceroy-an aplo rabito Ponnje kelo. Purtugezamni Maratham kodde xanti keli. Jezuitank Gõyantle bhair uddoyle.
36)        1763 – Purtugezamni Noveo Kabizadi (New Conquests) apnnaunk survat keli.
37)        1794 - Purtugezamni Kankonn apnnaylem.
38)        1778 - Purtugezamni Peddnnem apnnaylem.
39)        1783 - Purtugezamni Peddnnecho tabo ghetlo.
40)        1787 – Yesesvi zaunk naslolem ‘Pinto Bondd’ zalem.
41)        1788-1799 – Puray Gõycher purtugez razvott vistarli.
42)        1797 – Brittix Foujen Gõy aplea tabeant ghetlem.
43)        1812 – Gõyant Inkvizisanvacho xevott.
44)        1813 - Brittix Fouz Gõyantli fattim sorli.
45)        1821 - Purtugalache Sonsodent Gõychem protinidhitv zalem.
46)        1835 – Gõycho poilo Rajpal Bernardo Peres de Silvachem bondd oyesesvi zalem.
47)        1842 – Ponnje Escola Medico Cirugao de Goa sthaplem.
48)        1843 - Ponnjek ‘Nova Goa’ nanv dilem, ani Gõychem xar mhonn jahir kelem.
49)        1881 – Gõyant relve chalu korpachi yevzonn suru keli.

50)        1900 – Gõychem poilem purtugez disallem ‘O Heraldo’ chalik laglem.
51)        1905 – Gõyant lokhonddacheo ani magnezicheo mina khonddi suru zaleo.
52)        1910 – Gõyant purtugez razvottkecho xevott zalo.
53)        1926 - Hukumdar Dr. Antonio Salazaran Purtugalachim sutram aplea hatant ghetlim.
54)        1946 – Moddganv Ram Manohar Lohian Satyagra keli.
55)        1947 - Agostache 15ver Bharotan Brittixichea chopkeantlean svotontrtay zoddli.
56)        1950 – Janerache 26ver Bharotak Lokraj favo zalem.
57)        1954 - Dadra ani Nagar Havelichi suttka zali.
58)        1961 – 9 tem 19 Dezembr Bharotachea Fouje Dollanchea ‘Operation Vijay’-antlean Gõychi suttka zali ani itihas ghoddoylo.

Ani tednanchean Gõyant Dezembrachi 19 tarik Gõy Suttkecho Dis mhonn monoytat.

Gõy Suttkechea 50 vorsanchim Khuxalbhorit porbim
sogglea Goykarank!
Jose Salvador Fernandes
www.goa-world.com

[as forwarded to gaspar almeida]
(c) All Rights reserved.

JKS-achem Gõyantlem Poilem Itihasik Pradexik Sommelon

2011-11-18T22:11:00.000-08:00

SON’VARACHIM SUNGTTAM:

JKS-achem Gõyantlem

Poilem Itihasik Pradexik Sommelon

- Jose Salvador Fernandes

Sonvsarant zollim-mollm ximpoddlolea Konknni mon’xanchem ani tanchea prosn-oddchonneanchem protinidhtv (representation) korop, Konknni bhas anik-ui girestavop, ani tika tichea sogllea khaxeleponnan ani veglleponnan samballop, ani fuddarak yevpi Konknni pillegek he bhaxechem daiz rakhun dovrop, oxea hetun Agostache 20ver, 2011 Jagotik Konknni Songhotton (JKS) Mongllurant zolmak aili. Sonvsarbhor ximpoddloleo Konknni sonvstha va songhottona, jeo Konknni Sonvskrutayechea, Sahityachea ani Somajik mollar vavurtat teo soglleo ekttaim yevn, Jagotik Konknni Songhotton ubi zalea.

Faleanchean he Songhottonecho vavr khorea orthan suru zata. Dusrea utramni, sonvsarantlea sogott lipinchea, bolinchea, dhormanchea ani her anganchea Konknni mon’xank khorea orthan eke sotre khal haddpachi mokh dolleam mukhar dovorun suru kelole JKS-acho mullavo, vhodd, bharadik ani mhotvacho vavr faleanchean tiche odhikari chalik laytole. Vanttun-futtun poddlolea Konknni mollar hi anik ek khub bori ani itihasik survat oxem mhonnchem poddta.

JKS-achem Poilem Itihasik Pradexik Sommelon faleam Gõyant bhorta. “Gõyant Konknnichi Poristhiti ani Ticho Fuddar,” “Raxttrik ani On’tor’xattrik Mollar Konknnichi Poristhiti ani Ticho Fuddar,” ani “Konknni Bhaxecheo Lipi: Prosn ani Upay” hea vixoyancher hea Sommelonant disbhor vichar ani bhasabhas zatoli.

“Gõyant Konknnichi Poristhiti ani Ticho Fuddar” ho hea Sommelonantlo chodd mhotvacho vixoy tharta. Gõyant Konknniche poristhitecher vichar zavop hi kallachi goroz khub adim uprasloli. Karonn, Gõyant lipianchea, dhormanchea, zatinchea nanvan Konknni bhaxek ver haddloli asa, he bhaxechea loka modem futt ghaloli asa, onitichim ani futtichim durgam ubim kelolim asat. Oxe poristhitek lagun, Konknni mon’xa bhitorli apleach bhaxechi vat minn-minnunk laglea. Taka lagun Konknni monis aple sonvskrutaye pasun pois vochpachem chodduch nettachem varem khub adim pasun suttunk laglam. Bhas hi sonvskrutayechem protik. Konknni monis apli bhas ani sonvskrutay sanddun, bhaxeche ani sonvskrutayechea mollar onath zavpachem chitr disunk laglam. Taka lagun, Gõyantli Konknnichi poristhiti samkich hata bhair veche poilim, tin nam-nopoyt zaunche poilim tacher kholayen ani bariksannen vichar zavpachi goroz asa. Sot poristhiti asa ti ustun kaddpachi nibel goroz asa. He poristhitecher danv-pallantlean vichar-bhasabhas zavpachi goroz asa.

Gõyant Konknni bhaxechea mollar, bhitorlean ek, ani bhailean dusrem rup oxe torechem chitr ugtea dolleamni polleunk mellonam khorem, punn somajik-bhaxik nodrechim oklam lavun pollelear tem voilem sot khubxea gozalintlean zannvota. Him don rupam Konknni bhaxecheche udorgotiche vatter addkholliche fator zaleant, ani bhaxek-ui chodd nhoi zalear thoddo tori tacho mar bosla. Gõyant Konknni bhaxeche mukhelponnan, voir-sokol thaun Romi ani Devnagori mhunn lipinchea nanvan don ube-addve vantte zalole asat, hem sot konnacheanuch nhoikarunk zainam. Fuddarak hem don rupanchem nattok chaluch urlear, tea addkhollinchea fatrancho Konknnichea vikasache vatter vhoddlo dongor zavpachi bhirant asa. To zauncho nhoi mhunn zotnay ghevpachi goroz asa.

Konknnichea mollar Konknni bhas surokxit ani vevosthit ritin tigtoli-zogtoli zalear “Veglleponnant Ekvott” (Unity in Diversity) hem totv bhouch mhotvachem asa. Dekunuch, Konknni bhaxechea nanvan lipianchem tondd pollenastanam, Gõyant zavpi faleanchea aplea Poilea Itihasik Pradexik Sommelonak hajir zaunk, JKS-an Devnagori ani Romi mhonninastanam hea rajyantlea sogott Konknni sonvsthank ani lagu zavpiank, aplo hetu dolleam mukhar dovorun amontronn-apovnnim dhaddleant. Konnakuch bhairaynastanam. Oxem korun, rajyachea panvddeavelean sonvsarik panvddear Konknni mon’xancho veglleponnant okhondd khoddpa poros-ui mozbut ekvott ghoddovpacho ani Konknni mon’xak Konknni bhaxechea sutan bandpacho JKS-acho mukhel hetu asa. Dekun, sonvsarachea panvddeavele he Songhottonechea faleanchea Gõychea Pradexik Sommelonant Gõykaramni bhaxechea mollavele vad-vivad, ton’tte ani lipianchem zhogddem kuxin-konnxak dovorun va tem toxea toxem gheun tantum bhag ghevop khubuch mhotvachem asa.

Gõyant JKS-achem hem poilench Pradexik Sommelon. Bharotant ani Bharota bhair jea-jea zageancher Konknni monis asat tancho bhaxechea navan khoro ekvott ghoddoun haddche khatir, JKS oslinch Pradexik Sommelonam Kornnatokant, Maharaxttrant, Kerollant, Hyderabad (Andhra ani Tamil Nadu), Gulfant (Saudi Arabiak dhorun Gulfantle her'r des), Londonant (UK, Evrope, Izrael ani Pakistan) ani Canada (ani America, Australia, New Zealand) oxim soglim mellun 9 Pradexik Sommelonam ghoddoun haddchi asa. Ani hea Pradexik Sommelonancho kollos mhunnon, Dezembr 2012 vorsa Gõyant dobajik “Jagotik Konknni Sommelon” zatolem. Him Pradexik Sommelonam heach “Jagotik Konknni Sommelon”-achi aste-aste keloli toyari asa.

JKS-achea hea sogllea Pradexik Sommelonank upatt yes anvddetam.

Sonvar, Novembr 19, 2011

www.goa-world.com

http://sonvarchimsungttam.blogspot.com/2011/08/yevkar-jagotik-konknni-songhotton.html

SON’VARACHIM SUNGTTAM: Gõykaranchem Khorem Rup Hench!

2011-11-11T21:12:00.000-08:00

SON’VARACHIM SUNGTTAM:
Gõykaranchem Khorem Rup Hench!

- Jose Salvador Fernandes

Te sanjer, Kongres Pokxacho tea rajkornnean, Ponnje Mandovi Hotelache bazuk apli Fortuner gaddi ubi keli. Gaddientlean denvun, aplea Personal Assistant-a vangdda chav gheunk Mandovi Hotelant vochunk choltalo. Okosmat taka rosteavelean vochpi Scorpio gaddien dhopko dilo, ani to rajkornni thoinch melo!

Melea uprant, hea rajkornneacho otmo sorgachea darvontteaxim pavlo. Darvontteaxim taka Sant Pedru mell’lo. “Sorga rajyant yevkar….” Sant Pedrun hansot taka yevkar dilo, ani fuddem uloylo - “Tum hanga bhitor sorche adim, hanga ek oddchonn asa. Rajki pokxanche monis choddxe hea zageancher pavonant. Mhonntoch, tuje vixim hanga kitem korchem tem mhaka somzonam.”
“Kosli oddchonn Sant Pedru? Mhaka bhitor vochunk di, ani tuji oddchonn suttavi zali.” Tea rajki mon’xan Sant Pedruk sanglem.

“Rav, rav… tuka bhitor soddtam…. Punn tea adim, mhoje voir thaun nigtoch mhaka ailolo hukum’ hanv palltam. Tum ek kam’ kor. Tum ek dis Ifernant rav, ani ek dis Sorgar rav. Ani tea uprant, sasnnak tuka khuinchea zagear ravunk zai tem tuje tunch tharay.”

“Khorench? Zalear hanvem mhozo nirnnoy adinch ghetlolo asa. Mhaka sasnnak Sorgaruch ravunk zai.” Tea rajkornneachea otmean Sant Pedruk sanglem.
“Polle, amkam amche kaide asat. Sonvsarant itle kaide toyar kortat, punn te choddan chodd lok pallinant, fokot pustokancheruch astat, punn hanga toxem nam. Hanga kaideam xivay kainch cholonam. Mhonntoch, hanv sangtam toxem tunvem korchench poddtolem.”
Oxem sangun, Sant Pedru tea otmeak eke lift-ixim gheun gelo. Tantum dog-ui bhitor sorle, ani ti lift, sokol, sokol korun Ifernant denvli. Lift-ichim daram ugtim zalim, ani rajkornneak apunn eka pachvea char vattarant asa mhunn kollun ailem. Matxe mukhar ek bar aslem tem tannem pollelem, ani tea bara’racher taka tachim vollkichim ixttam, ani apunn jea rajkornneam vangdda vavurlolo ani zhogoddlolo, te-ui taka thoimsor disle. To ojap zalo! Te tache ixtt ani sangati rajkornni thoimsor khaun-piyeun borich mouza kortale.

Tannim hea nigteach ailolea otmeak polletoch, te mouza korpi tacheo ixtt-ixttini ani her sangati rajkornni taka bhettunk aile. Tache kodde khub-khub uloylim. Sonvsarant motdaranchea khustar koso mitta porim duddu korun girest zale, konnak koso luttlo to ugddas korun aplech bhitor khuxal zale. Te uprant, te thoimsor sabar torecho khell khell’le ani xevttim jevnnak gele. Jevnnak nam-nam toreche prat asle… ani tantlea tantum Gõychem jevonn… tea bhair soro, biyer, adi. Zai tem khavpa-piyevpachem… Vichartolo ani addaytolo konnuch naslo. Thoimsor Devchar-ui hajir aslo!

Ho Devchar khub ixttallo aslo. Thoim aslolea sogleankuch “kha baba, piye baye, lojeum nakat” oxem sangtalo. Modinch aple porim nach korun ani hanspacheo gozali sangun thoimsorlem vatavoronn anik-ui khuxalkayechem ani moujechem kortalo.

… ani oxea vatavoronnant astanam, tea rajkornneak, thoimsorlo vochpacho aplo vell zalo mhunn kollun ailem. To porot lift-int bhitor sorche poilim, sogleamni taka maye-mogan vengoylo ani adeus kelo. Ani dusrech ghoddiek ti lift voir-voir geli…

… itli voir geli, ani xevttim thambli. Lift-ichem dar ugtem zalem. To Sorgar pavlo. Thoimsor Sant Pedru tachi vatt polleun aslolo tannem pollelo.

“Atam tunvem Sorgak bhett divpacho dis udelo.” Sant Pedrun taka sanglem.

Ani tea uprant to rajkornni, thoimsor khuxalkayen gitam-gayonam korpi ani eka kupar thaun dusrea kupar aste-aste bhonvpi otmeanchea zomeant bhitor sorlo. Tannem tea zomeant khuxalkayen dis sarlo, ani titlean tannem thoimsorlo vecho vell ailo. Thoimsor Sant Pedru taka vhorunk ailolo tannem pollelo.

Te dog-ui porot lift-int bhitor sorle. Lift voir thaun sokla denvtanam modinch thambli.

“Tum sod’deak Sorga ani Ifernachea modemkot asa. Ani atam tunvem, sasnnak tuka khuim vochunk zai tem tharavpacho vell aila.” Sant Pedrun taka sanglem.

Tea rajkornnean thoddeo goddio chintlem, ani uprant uloylo – “Khorem mhonnlear, Sorgar borem, punn hanv Ifernant boro astolom oxem mhaka dista!”

“Borem tor!” Oxem Sant Pedrun mhonnlem, ani ti lift khala, khala anik khala Ifernant denvli. Tichim daram ugtim zalim. To rajkornni te lift-intlean denvlo. Zalear kitem?

aka apunn Sonsddear va Curca kusloli ani ghanniari garbej asta toslea zagear pavlo dislem. Tannem aplea ixttank ani vollkichea her rajkornneank thoimsor pollele. Tim soglim thoimsor pinzkim angvostram ghalun, kusloli ghann kallea potiamni bhortanam taka dislim.

Title mhonnosor Devchar tachexim ailo, tachea khandar hat ghalo ani taka gheun tea kuslolea ni ghannichea kochrea vatten gheun vochunk laglo.

“Mhaka ek gozal somzonam. Kal hanv hangasor ailolom tednam hanga khellop, nachop, gavop ani khavop-piyevop choltalem. Khub moujen vell sarlo. Ani az… az hanga fokot kochro…. garbej… soglem kuslolem… ghanniarem… ani mhoje ixtt ani her sangatianchi doxea pollevpa sarki nam…!”
Tednam Devcharan tacher ek nodor marli, ani hansun taka sanglem, “Kal ami prochar (campaigning) kortaleanv. Az tunvem amkam mot dilem!”

Rupantoraylole he sondex divpi lhan kothechem khoreponn amkam Gõyant dor vinchnnukam nimitan polleunk ani onnbhovunk mellta, hem vegllem sangpachi goroz nam!

www.goa-world.com
Sonvar, 12 Novembr 2011

Lapitt

http://aitaracheokaskuleo.blogspot.com/

Photo courtesy:
http://www.heraldgoa.in/News/Main%20Picture%20News/Chief-Minister-Digambar-Kamat-along-with-Urban-Development-Minister-Joaquim-Alemao-at-the-Sonsodo-dump-yard/34252.html

Ek Gozal. Borovpiachi Ani Vachpiachi

2011-10-28T23:23:00.000-07:00

SON’VARACHIM SUNGTTAM:

Ek Gozal. Borovpiachi Ani Vachpiachi

- Jose Salvador Fernandes

Tea dukonacher mhozo mobail fon top-up kelo, ani fuddle kamak vochunk motorsaikol chalu korunk vetalom. Itlean fattlean thaun konnem tori mhonnlem –

“Fattlea son’varak tunvem amkam Sungttank voir uddoyle mure!”

Hanvem vollun fattim polleunche poilim to mhoje mukhar ubo zalo. Polle zalear ho! Kolejint mhojea sangata xikpi, punn atam tarvotti. Hanv hanslom ani ogich ravlom!

“Khubxe pavtti tum Son’varachim Sungttam boroynastana amchea sarkea vachpiancher onit korta, zannam tum?” Dor Son’varak hanvem Sungttam borovpacho stamp paper-acher kontrad kelolea porim to odhikaran koso uloylo.

“Rampnnik kainch sampddonam tednam hanv mhunn kitem kortolom?” Hanv mhoje porim uloylom.

“Mhonnche?” Tannem mhojea sangnnecho somoz maglo.

“Jednam mhoje kodde Son’varachim Sungttam borounk vixoy asonam, tednam hanv boroynam.” Hanvem mhojea chintnanchem pustok taka vachun dakoylem.

“Che! Toxem mhunn anik zaum yeta? Borovpi tum! Kainch na zalear-ui vachpiam khatir tunvem koxem-i korun, kitem-i tori borounkuch zai!” Tannem ulovpantlean hott dhorlo.

“Monant nastanam, koxem-i korun ‘kitem-i’ borovpachem kam’ mhoje kodde zaich nam.” Hanvem soroll sanglem.

“Mhonnche, tujea vachpianchem tuka poddlolem nam tor?”

“Vachpianchem poddlolem asa mhunnonuch ‘koxem-i ani kitem-i’ boroynam hanv!” Hanv anik-ui spoxtt zalom.

“Polle! Tunvem zoddun ghetlolim jim vachpi asat tim tukach visvaxi astat. Dekun, tunvem ‘koxem-i ani kitem-i’ boroylem zalear-ui tim motte umedin vachtat hacho tum sodanch ugddas dhor!” Apnnem jivitachem vhoddlem sot sanglolea vori to uloylo ani toso ubo-i ravlo.

“Borovpi aplea borovpantlean vachpi zoddta te taka zoddunk vell lagta, punn te taka koxe luksonn zatat ti tuka khobor asa?”

“Koxe?” Apunn hartolea porim tannem vicharlem.

“Aplea borovpantlean borovpi vachpiank man-respeit dinastanam ‘koxem-i ani kitem-i’ boroyta tednam tache vachpi taka luksonn zatat. Ani toxem korun, mhaka mhoje vachpi mhaka luksonn zalole nakat. Dekunuch, borovpachem kainch asonam tednam, ‘koxem-i ani kitem-i’ borovche bodlek hanv boroynastanam ravtam!”

Hem mhojem sangnnem aikun, tea vixoyacher tannem anik uloylolem mhaka naka aslem. Torui to uloyloch –

“Zalear, vachpiancher onit korpachi tuji ti sonvoym itlench mhonnchem poddta!” Tannem mhojea sangnneacho apnnak zai toso orth kaddlo.

“Toxem ‘koxem-i ani kitem-i’ borovp vachpiank okman-ui zaum yeta oxem tum kiteak chintinam?” Hanvem mhozo orth sanglo.

“Tujea ulovpantlean tum tujea borovpa poros vachpiank chodd mol dita koso dista!”

“… ‘dita koso’ nhoi, ditanch hanv. Borovpian zaitem boroylem ani taka vachpi na zalear tachi got, bhat asa punn gironn na oxe torechi zatoli!” Hanvem rupatmok bhas vaporpacho proyotn kelo.

“Apnna kodde borvpa sarkem kainch asonam mhunn apunn boroynam oxem mhonnpi poiloch borovpi hanv tuka polletam ani aikotam.” Tannem ojap ugtaylem. Punn dusreach khinnak prosn kelo –

“Mhaka ek gozal sang… Tum kiteak boroyta?”

“Mhoje kodde kitem tori sangpachem asa mhunn boroytam. Na zalear boroynam. Borounk zai mhunn boroyta taka orth asonam… mhoje ani vachpianche-i nodrentlean. Vachpiam khatir ‘koxem-i ani kitem-i’ boroun tanchi vachpachi ani vicharanchi ruch ibaddche bodlek, ek vell borounk mhojea monant kainch xizonam ani tizonam tednam boroynastana ravun mhojea vachpianchi bhuk vaddounk mhaka avoddta. Khavpi asat mhunn tankam kitem-i khaunk dilem mhunn zaina nhoi? Khaunk ditolean khavpiacho-i man rakhcho poddta.” Hanvem sade ritin sanglem.

“Torui, hea vixoyacher tunvem sangloleo gozali mhaka pottonant.” Tannem apleach vadeacho rong dakoylo.

“Tantum koslench veglleponn na. Borovpiacheo soglleoch gozali vachpiank pott’ttatuch oxeo nant. Ani soglleoch gozali vachpiank pottapakuch zai oxem-i nam. Dekun boroytanam, borovpian heo-ui gozali monant dhorpacheo astat. Hea gozalinchem bhan dovrinastanam to ‘koxem-i ani kitem-i’ borounk lagta, tednam vachpianchi vicharanche nodrentlean tea borovpiachi asloli ruch bigoddta. Mhojea vachpianchi ruch toxe toren bigddavpachi mhaka khuxi nam.” Hanv mhojea chintpak visvaxi ravlom.

“Ani toxi kednam-i vochun bigoddli zalear….”

“Ti bigoddche poilinch mhojem borovop bond korpachi mhaka bud favo zaum mhunn mag!”

Mhoji sosnikay bigoddche poilinch hanvem hansot toxem mhonnlem, ani “borem mellche kednam-i” mhonnit motorsaikol chalu korun fuddli vatt dhorli.

www.goa-world.com

Kitlem Sot, Kitli Fott?

2011-10-28T23:04:00.000-07:00

SON’VARACHIM SUNGTTAM:
Kitlem Sot, Kitli Fott?
- Jose Salvador Fernandes

Anik sumar sov mhoineamni Gõyant kitem zavpachem asa? Vinchnnuko!
Gõyant vinchnnuko mhonninam fuddem, vinchnnuko loddovpiank jitlo nivddun yevpacho uzo marta, tache poros chodd uzo vinchnnukank umedvarank nivddun divpi motdarank marta. Motdarank koslo uzo? Vinchnnukank ubi ravpi umedvarank blackmail korun, tanche koddchean aplim kamam sadovpacho! Punn aiche rajkarnni, aplea rajki onnbhovan motdaram poros dupettin xanne zalole asat. Dekunuch, motdaramni apnnak blackmail korche poilinch, vinchnnukanche fattbhuimier apunn tankam asvasonnam diun te svota motdarank blackmail kortat.

Toxem polleunk gelear, rajki mollavelem eka vegllea panvddeavelem hem blackmailing asam. Tache xivay, rajki mollar anik eke torechem ani anik eka vegllea panvddeachem blackmailing cholta. Vinchnnuk loddounk xrextt pokxancheo tiketti mellovpachem. Aichea kallar, ani aiche poristhite promannem sangtolo zalear –

Khub kall zalo, Bhouxik Bandkam’ Montri Churchill Alemao aple dhuve, Valanka Alemao-a khatir fuddle vinchnnuke khatir Ban’navelechea Motdarsongha khatir apunn bhag aslolea Kongres Pokxachi tikett magta. Tich got tacho bhav, Xar Udorgot Montri Joaquim Alemao hachi asa. To aplea puta, Yuri Alemao-a khatir fuddle vinchnnukek Sanguem Motdarsongha khatir apunn bhag aslolea Kongres Pokxachi tikett magta. Punn, eka ghorabeant eka pokxacheo eka poros chodd tikett diunk zainant mhonntat tem aikunk yeta. Oxe fattbhuimier, Alemao bhavamni ek yevzonn anklea mhunn khobro xizunk lagleat. Tanchea bhurgeank Kongresicheo tiketti mellonant zalear, aplea bapaychea panvalamni cholpi ani dhangamni vaddlolea hea tornnateank Raxttrvadi Kongres Pokxacheo tiketti divpachem tharaylam mhonntat.

Kitlem sot, ani kitli fott ti khobor nam!

Divchole Motdarsonghant itlo kall Bharotiya Janata Pokxacho (BJP) amdar aslolea Rajesh Patnekaran aplea mullavea pokxacher khontt marun Kongresint bhitor sorla. Bholaike Montri Vishwajeet Ranechi hi koramot mhunn sogleankuch khobor asa. Punn taka Kongresint haddun rajki mollar pirayen dhaktto ani onnbhovan girest aslolea dhakttea Raneak tacho kitem faido?

He vixim khubxea toranchem ulovp aikunk yeta – Poilem, ut’tor Gõychea BJP-chea zata titlea amdarank BJP-ntlean Kongresint haddun dhaktto Rane Kongresint aplem sthan mozbut korun, hea pokxant heranchea bollgear aplem raj cholounk ani vistarunk sodta. Dusrem, to Gõycho fuddlo Mukhel Montri zaunk sodta. Nam zalear, anik ek nim’nne pavtt aplea bapayk Mukhel Montri korunk sodta.

Hea som’bondan anik ek gozal – Rajesh Patnekarak Kongresint haddla toso dhaktto Rane ut’torentlea BJP-chea anik-ui kaim zann amdarank Kongresint bhitor haddunk vavurta. Hache fattlean anik ek karonn aikunk yeta – Alemao bhav Kongresik khuinchea-i vellar ghat korpachi bhirant asa khuim!

Hantum kitlem sot asa, ani kitli fott ti khobor nam!

Kaim mhoine adim, Ponnje Mhapalikecheo vinchnnuko asleo. Hi vinchnnuk loddounk, Xikxonn Montri Atanasio (Babush) Monserratean aplea umedvaranchi folli toyar keloli. Xevttim tacheach umedvaranchi folli nivddun aili. Tednam, Virodhi Pokxacho Fuddari Manohar Parrikaran-ui aple porim aple umedvar vinchun kaddun te vinchnnukek bosoylole. Ani tednam, Xikxonn Montri Monserrate ani Virodhi Pokxacho Fuddari aslolea Parrikara modem utranchem ani temanchem zhuz choltalem. Dekun, Vidhan Sobhechi 2012 vorsantle vinchnnuk apunn Ponnje Motdarsonghantlean loddoytolo mhunn Montri Monserrate-an arodd ghal’li. Tache te aroddek Virodhi Pokxacho Fuddari kitlo mov poddlo to khobor nam, punn tache add ti vinchnnuk loddounk xevttim Xikxonn Montrean adlo amdar Somanth Zuwarkarak porot Kongresint haddlo. Oxe fattbhuimiecher khobro aikunk yetat – Zuwarkara bhitor Parrikarak harovpachi tank asa? Vo ho Xikxonn Montri Monserrate ani Virodhi Pokxacho Fuddari Parrikara modlo gupit deal asa?

Kitlem sot, ani kitli fott ti khobor nam!

Santa Cruz Motdarsonghantli vinchnnuk Xikxonn Montri Atanasio (Babush) Monserrate loddovpacho asa mhunn konn-konn futfut’tanam aikunk yeta. Oxem? Zalear, he khepek Taliganv Motdarsonghant kiteak bosonam tor to? Bostolo koso? To motdarsongh atam rakhiv (reserved) kela nhoi?

Hantum kitlem sot asa, ani kitli fott ti khobor nam!

Moddganvcho Motdarsongh zaka sod’deacho Mukhel Montri Digambar Kamat motdaranche nodrentlean aplem ‘povitr sthan’ mhunn mandta, thoim tache add vinchnnuk loddounk BJP-k azun-ui umedvar mellcho asa. Kantto kantteanuch kaddpacho asta mhonntat toxem, BJP Digambara add tachech zatichea mon’xak ubo korunk sodta khuim. Itlench nhoi, Moddganv motdarsonghantle bhanddari somazachim motam taka poddchim nhoi mhunn, bhanddari somazantle-i kaim lok BJP-k bhettleat, ani Moddganv motdarsonghant bhanddari somazacho umedvar BJP-che tikettir ubo korcho mhunn maglam mhonntat.

Somzum-ia oxem zalem. Zalear, musolman ani kristi somazachim Digambarachim jim bhou-sonkhechim motam asat tim khuinch vechim nant, tim takach poddtolim.

Kitlem sot, ani kitli fott ti khobor nam!

Son'var, Octubr 29, 2011
www.goa-world.com

(c) All rights reserved.

Anna ani Bhroxttacharachim Sonn’am!

2011-08-20T02:37:00.000-07:00

SON’VARACHIM SUNGTTAM:

Anna ani Bhroxttacharachim Sonn’am!

- Jose Salvador Fernandes

Hea disamni Bharotant ekuch ek nanv gazta – Anna Hazare! Bharotant disandis matot vetoli bhroxttacharachi khotti ani nagrikank lojek ghalpi kidd kaddun uddovpache nodrentlean, Anna Hazare aple porim vavurta. Kendr Sorkar tachea hea proyotnache vatter kannte ghalpacho khottpott korta taka lagun, Anna Hazarechem nanv chodduch gazunk laglem. Anna Hazaren bhroxttachara add zhuzunk poilem pavl ubarlam taka Bharotantlea khubxea nagrikancho-i tenko asa! Punn nagrikancho ho tenko kitlo promannik ani khoro to somzunk vatt na. Karonn?

Bharotant sogllea panvddeancher xim’-mer naslolo bhroxttachar cholta hem kott’ttecho bhikari aslolea nagrik legit khobor asa. Ani bharoti nagrikank he vixinchi khobor astanam, bhroxttacharacho bolli zavpacho apnnak butt legit ailolo astanam, kal meren tannim khuincheach panvddear, bhroxttachara add tondd ugtem korunk na. Atam Anna Hazare fuddem sorla, ani taka mat upatt tenko diunk fuddem sorleat! Hantum iskolancho, kolejincho, sabar xarantlea ani sabar ganvchea sabar lokancho aspav asa. Anna Hazarek bhroxttachara addche chollvollint tenko diunk, Gõyant tor kitleaxeach zannamni kitleaxeach zomeanchea nanvam khal morcha ani pursanvam rosteancher bhair kaddlim. Konn-konn kortt ‘arrest’ mhunn zalo. Atam mhozo prosn itloch – hea lokak tor bhroxttacharachi itli vitt ailoli, bhroxttachar ekdancho sasnnak sompcho oxem kallzachea ani ontoskornnachea soglleach khanchim-konnxantlean distalem, zalear aplo nixedh uttounk tea vaitta add zhuzonk he lok khuinche adde kuxik nhidun aslole?

Anna Hazaren bhroxttachara add pavl ubarlem ani iskol-kolejintlea tticherink-ui aplea xikpiank gheun rostear yevchem dislem. Hache poilim kednach disunk na. Kiteak? Itlo kall meren xikpiank pustokantlench xikoylolem, ani jivitak lisanv mhunn bhroxttacharachea vixoyacher matui tondd ugtem korunk na dekunuch mum? Bharotant ani Gõyant khuinchea panvddear thaun bhroxttachar koso-kat suru zata he vixim xikpiank tor zanniv keloli zalear, aiz tea xikpiank gheun rostear yevpachi kosli goroz asli? Xikpiank bhroxttachara add zhuzpachem lisanv xikounk na mhunnonuch hem rostear yevop mum? Na zalear kosli goroz asli?

Bharotachea dor eka rajyant bhroxttachar khuinche tenkxer pavla ti khobor naslolo hea desacho ek-ui nagrik aschona. Itlo kall, sogott lok bhroxttachar cholta, bhroxttacharak lagun sarkim kamam zainant, favo tankam favo tem kaidean mellonam, adi. oxem fokot utramni boddboddtalo. Punn tache add avaz uttounk, nixedh marunk konnuch kednach ekvottan fuddem sorunk na. Kiteak?

Anna Hazare atam pondra dis, Bharotant choltolea bhroxttacharak virodh dakounk ani tache add nixedh marunk upasak bosla. Punn tachea hea pondra disachea upasantlean bhroxttachar kitlo meren somptolo tache vixim tornno, punn khoro dubav asa. Kiteak, hanga konn-ui kitle-i dis upasak boslo mhunn konnachem kainch vochonam, konnak kosloch forok poddonam. Zalear, Anna Hazarecho ho pondra disancho upas bhroxttachara add vegllem ani khas oxem kitem ghoddoytolo kai? Tacho pondra disancho upas somptoch fuddem kitem kai?

Anna Hazare eklo-eksuro Bharotantlo bhroxttachar sompounk unno poddtolo. Bharotantli bhroxttacharachi lambay-runday ani kholay pollelear, tachean ekleachean to bhroxttachar mullantlean umttaun kaddunk zauncho na hem sot. Toso konnem-i to mullantlean umttaun kaddcho zalear, mullavea panvddear chaltea-sadea nagrikamnich to poilo aplea kallzantlean umttaun kaddcho poddtolo. Apunn bhroxttacharak bolli poddche nhoi mhunn tannim sumara bhaili zotnay gheunchi poddtoli. Oxem korun, nagrikamni soglleo gozali kaideak dhorun zatat te porim vavurchem poddtolem. Toxem kelear, bhroxttacharak khuincheach khanchi-konnxant tokli voir kaddunk mellchi na. Ani oxe poristhitent, nagrik ani lagu zavpi odhikari-i kaidean promannikponnachea rosteavelean cholunk pavtole.

Sonvar, Agost 20vi, 2011

http://www.goa-world.com/

Yevkar ! Jagotik Konknni Songhotton !

2011-08-13T01:07:00.000-07:00

SON’VARACHIM SUNGTTAM:

Yevkar ! Jagotik Konknni Songhotton !

- Jose Salvador Fernandes

Itlo kall, sonvsarantlea sogott lipinchea, bolinchea, dhormanchea ani her anganchea Konknni mon’xank khorea orthan eke sotre khal haddpache askar-suskar, Agostache 20ver, 2011 Mongllurche Mandd Sobhann sonvstheche kuddintlean, Jagotik Konknni Songhotton (Global Konknni Organization) nanvan rup dhortole.

Sonvsarbhor ximpddun poddlolea Konknni mon’xanchem ani tanchea oddchonneanchem protinidhtv (representation) korop, Konknni bhas girest korop ani tika tiche soglle suropayen ani veglleponnan samballop, ani fuddle pillgek Konknnichem daiz pavtolem hachi khatri korop, he fuddlea satolleant Mongllurant zolma yevpi Jagotik Konknni Songhottoneche hetu asat.

Sonvsarbhor ximpoddloleo Konknni sonvstha va songhottona, jeo Konknni Sonvskrutayechea, Sahityachea ani Somajik mollar vavurtat teo soglleo ekttaim yevn, Jagotik Konknni Songhotton ubi zaunk ap-aple porim xinvacho vantto ditoleo.

Khuincheo-i Konknni sonvstha va songhottonam, jeo Konknni sonvskrutik dakovnno, konsert va khell ghoddoun haddtat, va Konknni kantarantlean, tiatr/nattkantlean, nachantlean, lok-vedantlean sonvskrutayek hatbhar laytat, va Konknni porampora, chali-riti, daiz samballunk vavurtat, toslea sonvskrutik sonvsthank Jagotik Konknni Songhotton-eche vangddi zaunk tichem dar vixall ugtem asa.

Konknni Bhaxek, Konknni Sahityak, Konknni Sod-vavrak, Konknni zagrutayek, adi. hatbhar lavnk, vistarunk, posraunk vavurpi Konknni sonvsthank yevkar diunk Jagotik Konknni Songhotton-a aple lamb-rund hat ugte korun asa. Konknni lipianchim ani bolianchim Kendram, Potram-masikam, Prokaxon Ghoram, adi. hankam-i tantum zago asach asa.

Khuincheo-i Konknni sonvstha, jeo kherit somudayachea va vattarachea Konknni lokak ekvottan dovorche ani samballche khatir, somajik dobaje ani porbo ghoddoun haddtat, va somajik vixoy gheun vavurtat zalear, toslea-i Konknni somajik sonvsthank vengounk Jagotik Konknni Songhotton thattun toyar ravlea.

Oxe fattbhuimiecher, Jagotik Konknni Songhotton zolmak yeta hi dor eka borea monachea Konknni mon’xak bori khobor. Kiteak, he Songhottnent sogllea Konknni lipiank, sahityak, vavrak, sonvskrutayank zago asa. Hi Songhottnna ‘Vividtayent Ekvott’ (Unity in Diversity) hea totvacher choltoli, teach totvacher ghottmutt ubi ravtoli, ani tech dixen, nodren vavurtoli. Konknnichea sabar lipianchea ani vavrachea lokak eka sutan ani dhagean vinntoli. Konknni mon’xank sonvsarache fattir ekamekak lagim haddtoli, tancho ekvott ghoddoytoli ani Konknnichi ‘Global Village’-int rupantor zatolem. Dekunuch, Konknni mon’xam khatir oxe torechi Jagotik Konknni Songhotton hi kallachi goroz asa. Ani ‘tempa promannem mathear kurponnem’ mhonntat te bhaxen, nixchitponnan hi Jagotik Konknni Songhotton Agostache 20ver, 2011 zolmak yeta.

Khuxalkayen ani rund Konknni monan ani kallzan, tika dor Konknni mon’xan yevkar divpachi goroz asa! Sonvsarache fattir ani Konknni mollar tika sogllem yes anvddepachi goroz asa!

Agost 13, 2011
http://www.goa-world.com/

1992 vorsantlea Agostache 20ver, Konknni Bhaxek-ui her bhasam vangadda Son’vidonache Attve Vollerint zago mell’lo. Teach disacho ugddas ani somarombh monoun, hea vorsantlea Agostache 20ver, Jagotik Konknni Songhotton chalik lagta. Gõyant, “Konknni mhonnlear Konknniche Romi lipientlean boroyloli Konknni,” oxea utramni Rajbhas Kaido pas korit porian, ani Konknni bhaxek Son’vidonache Attve Vollerint zago mellot porian, Konknnintlea bamonn lokamni dhormachea, lipinchea ani zati-katinchea nanvar Konknni bhaxechea her lipiancho chodduch ugteponnim dves ani bhairavop suru kelem. Aiz Gõyant tin ttok’ke lokak porian ji Konknnichi Devnagori lipi naka, tich lipi Konknnichi sobhavik lipi, dusreanchi addechi ani khotti mhonnot tea bamonn lokamni Konknni lokam modem ubi futt ghali. Konknni mhonnli ki ti Devnagori lipientleanuch asunk zai, her dusrea khuincheach lipiamni nhoi, oxem tanchem azun-ui khottem ani sokoilea panvddeachem chintop chalu asam.

Konknni mhonnlear fokot aplea bapaychi miras zalolea porim mirounk, dusrea lipianchea lokak kikont korunk, tancheo lipio unnak mhunn dakounk ani fattim uddounk, tannim khub vorsam adim ‘Akhil Bharoti Konknni Porixod’ suru keli. Dor don vorsam uprant ‘time pass’ mhunn zavpi he porixodek thodde zann ek ‘moddem’ mhonntat; kiteak te Porixodek jiv na, ani dor don vorsamni tea moddeak khand marunk hatachea bottancher mezpa itlech te bamonn ani tanche pattlavdar hajir zatat. “Ek bhas, ek lipi, ek sahitya’ hem totv bam’nnanchea khottea monantlean ani te Porixodentleanuch ailam. Mhonnche, tea totvant her lipiank, tantuntlean uzvadda yevpi sahityak kuskuttachem-i mol-mhotv na, oso tacho orth zata. Aplo ekvott samballche khatir, ekach ghorabeant jiyetolea avoy-bapayn ani bhurgeamni ami sogllim ekuch torechim ani rongachim angvostram ghalum-ia oxem mhonnlear zata?

Sonvarchim Sungttam

2011-08-05T23:31:00.000-07:00

Ek Gozal. Borovpiachi Ani Vachpiachi

2011-08-05T22:55:00.000-07:00

SON’VARACHIM SUNGTTAM:

Ek Gozal. Borovpiachi Ani Vachpiachi

- Jose Salvador Fernandes

Tea dukonacher mhozo mobail fon top-up kelo, ani fuddle kamak vochunk motorsaikol chalu korunk vetalom. Itlean fattlean thaun konnem tori mhonnlem –

“Fattlea son’varak tunvem amkam Sungttank voir uddoyle mure!”

Hanvem vollun fattim polleunche poilim to mhoje mukhar ubo zalo. Polle zalear ho! Kolejint mhojea sangata xikpi, punn atam tarvotti. Hanv hanslom ani ogich ravlom!

“Khubxe pavtti tum Son’varachim Sungttam boroynastana amchea sarkea vachpiancher onit korta, zannam tum?” Dor Son’varak hanvem Sungttam borovpacho stamp paper-acher kontrad kelolea porim to odhikaran koso uloylo.

“Rampnnik kainch sampddonam tednam hanv mhunn kitem kortolom?” Hanv mhoje porim uloylom.

“Mhonnche?” Tannem mhojea sangnnecho somoz maglo.

“Jednam mhoje kodde Son’varachim Sungttam borounk vixoy asonam, tednam hanv boroynam.” Hanvem mhojea chintnanchem pustok taka vachun dakoylem.

“Che! Toxem mhunn anik zaum yeta? Borovpi tum! Kainch na zalear-ui vachpiam khatir tunvem koxem-i korun, kitem-i tori borounkuch zai!” Tannem ulovpantlean hott dhorlo.

“Monant nastanam, koxem-i korun ‘kitem-i’ borovpachem kam’ mhoje kodde zaich nam.” Hanvem soroll sanglem.

“Mhonnche, tujea vachpianchem tuka poddlolem nam tor?”

“Vachpianchem poddlolem asa mhunnonuch ‘koxem-i ani kitem-i’ boroynam hanv!” Hanv anik-ui spoxtt zalom.

“Polle! Tunvem zoddun ghetlolim jim vachpi asat tim tukach visvaxi astat. Dekun, tunvem ‘koxem-i ani kitem-i’ boroylem zalear-ui tim motte umedin vachtat hacho tum sodanch ugddas dhor!” Apnnem jivitachem vhoddlem sot sanglolea vori to uloylo ani toso ubo-i ravlo.

“Borovpi aplea borovpantlean vachpi zoddta te taka zoddunk vell lagta, punn te taka koxe luksonn zatat ti tuka khobor asa?”

“Koxe?” Apunn hartolea porim tannem vicharlem.

“Aplea borovpantlean borovpi vachpiank man-respeit dinastanam ‘koxem-i ani kitem-i’ boroyta tednam tache vachpi taka luksonn zatat. Ani toxem korun, mhaka mhoje vachpi mhaka luksonn zalole nakat. Dekunuch, borovpachem kainch asonam tednam, ‘koxem-i ani kitem-i’ borovche bodlek hanv boroynastanam ravtam!”

Hem mhojem sangnnem aikun, tea vixoyacher tannem anik uloylolem mhaka naka aslem. Torui to uloyloch –

“Zalear, vachpiancher onit korpachi tuji ti sonvoym itlench mhonnchem poddta!” Tannem mhojea sangnneacho apnnak zai toso orth kaddlo.

“Toxem ‘koxem-i ani kitem-i’ borovp vachpiank okman-ui zaum yeta oxem tum kiteak chintinam?” Hanvem mhozo orth sanglo.

“Tujea ulovpantlean tum tujea borovpa poros vachpiank chodd mol dita koso dista!”

“… ‘dita koso’ nhoi, ditanch hanv. Borovpian zaitem boroylem ani taka vachpi na zalear tachi got, bhat asa punn gironn na oxe torechi zatoli!” Hanvem rupatmok bhas vaporpacho proyotn kelo.

“Apnna kodde borvpa sarkem kainch asonam mhunn apunn boroynam oxem mhonnpi poiloch borovpi hanv tuka polletam ani aikotam.” Tannem ojap ugtaylem. Punn dusreach khinnak prosn kelo –

“Mhaka ek gozal sang… Tum kiteak boroyta?”

“Mhoje kodde kitem tori sangpachem asa mhunn boroytam. Na zalear boroynam. Borounk zai mhunn boroyta taka orth asonam… mhoje ani vachpianche-i nodrentlean. Vachpiam khatir ‘koxem-i ani kitem-i’ boroun tanchi vachpachi ani vicharanchi ruch ibaddche bodlek, ek vell borounk mhojea monant kainch xizonam ani tizonam tednam boroynastana ravun mhojea vachpianchi bhuk vaddounk mhaka avoddta. Khavpi asat mhunn tankam kitem-i khaunk dilem mhunn zaina nhoi? Khaunk ditolean khavpiacho-i man rakhcho poddta.” Hanvem sade ritin sanglem.

“Torui, hea vixoyacher tunvem sangloleo gozali mhaka pottonant.” Tannem apleach vadeacho rong dakoylo.

“Tantum koslench veglleponn na. Borovpiacheo soglleoch gozali vachpiank pott’ttatuch oxeo nant. Ani soglleoch gozali vachpiank pottapakuch zai oxem-i nam. Dekun boroytanam, borovpian heo-ui gozali monant dhorpacheo astat. Hea gozalinchem bhan dovrinastanam to ‘koxem-i ani kitem-i’ borounk lagta, tednam vachpianchi vicharanche nodrentlean tea borovpiachi asloli ruch bigoddta. Mhojea vachpianchi ruch toxe toren bigddavpachi mhaka khuxi nam.” Hanv mhojea chintpak visvaxi ravlom.

“Ani toxi kednam-i vochun bigoddli zalear….”

“Ti bigoddche poilinch mhojem borovop bond korpachi mhaka bud favo zaum mhunn mag!”

Mhoji sosnikay bigoddche poilinch hanvem hansot toxem mhonnlem, ani “borem mellche kednam-i” mhonnit motorsaikol chalu korun fuddli vatt dhorli.

- Jose Salvador Fernandes
http://www.goa-world.com/

Agost 6, 2011

Adim Konknnichem Mullpitth ! Atam Fonddpitth?

2011-07-08T21:57:00.000-07:00

- Jose Salvador Fernandes

SON’VARACHIM SUNGTTAM:

Adim Konknnichem Mullpitth! Atam Fonddpitth?

Gõyant, mullavea xikxonnachea nimitan Konknni poros choddxea Moratthi mon’xamnich pettoylolo virodhacho uzo bhogbhogpacho mat thambla, punn mumor mat jito-gorom’ asa. Karonn? Boreach avoy-bapayamni aplea bhurgeanchem xikxonnachem mullavem madeom inglezintlean zaunchem mhunn vinchlem, ani te gozalichem xellem udok Bharoti Bhaxa Surokxa Monchachea (BBSM) ujear poddlem.

Mell’lole khobre promannem, novod tok’ke sorkari iskolamni xikpi bhurgeanchea avoy-bapayamni, mullavea panvddear inglez madeomak magnni kelea.

Gõyantlea sorkari onudan mellpi mullavea panvddeachea xallamni 30, 084 xikpim asat. Tantuntlea, 27,202 zannamni mullavea panvddeavelem xikxonn Inglez madeomantlean maglam. 1,887 zannamni Moratthintlean ani 995 zannamni Konknnintlean!

Konknni madeomachea 121 iskolantlea 80 iskolamni, xikxonnachea mullavea panvddear Inglez madeom zai mhonnlam. Tis ani tin iskolamni Inglez ani Konknni madeom zai mhonnlam. Char iskolamni Moratthi madeom zai mhonnlam. Tin iskolamni Konknni ani Moratthi zai mhonnlam. Don iskolamni Moratthi, Konknni ani Inglez madeom zai mhonnlam, Urdu madeomachea eka iskolan Inglez madeomacho nirnnoy ghetla.

Hea soglleacho vichar korit zalear, he babtint Konknnichi poristhiti chodduch huskeachi dista! Sogllea bhasam modem, Gõychea Gõyant, zoim Konknni Gõychi Rajbhas asa, tea rajyantlo lok Konknniche khor dusman aslolea vori dista. Gõykarank Konknnicho mog ani apleponn na koxem dista. Gõykar Konknni aple avoy-bhaxecho dves kortolea vori bhogta.

Khuinchich gozal automatic ritin ghoddona. Mhonnche, dor eke gozali fattlean karonn asta. He nodrentlean, Gõyant Konknnicho kiteak husko dista? Svota Gõykaruch aple avoy-bhaxeche dusman koxe vagpachi poristhiti koxi-kat nirmann zali? Gõykarank Konknnicho mog ani apleponn na koxem dista tem konn karonna khatir kai? Gõykar aple avoy-bhaxecho dves kortat koxe distat, tache fattlem karonn kitem asum yeta?

Fattlea chovis vorsanchea kallant bodol zalolea Gõychea Gõyantleach maddak fatt tenkoun barik-sarik niyall kelear, voile poristhite fattlean khubxim karonnam asum yetoleachem chitr zollkhota. Mhojea monachea pordear tantuntlim kaim karonnam vachunk melltat tim 10 oxim asat :–

1. Niz Gõykar, zannim dhormacho ani lipincho bhed-bhav pollenastana, sogott Gõykaranchea buzak buz laun Konknnik Gõychi Rajbhas korunk vavurlole tankam, kallokant dovorun, muttbhor lokamni ratiam modem, Rajbhas Kaideant Konknni mhonnlear “Devnagori lipienytlean boroyloli Konknni” mhonnot, Konknni mogiam modem lipiechi vonott ubi keli. Tanchea visvasak ghat kelo. Konknnichech Romi lipiek Konknnichim daram bond kelim.

2. Khuinchech poristhitent Gõychi Rajbhas zaunchi nhoi mhunn jiche add jem andolan choloylem, tech Moratthik Rajbhas Kaideant, tika ang soddunk mellta titlo-i zago dilo.

3. Fuddem vochun, mullavem xikxonn Konknnintlean zaunchem mhunn rajyantlea tea dusongi mon’xamni aplo xek’ choloylo. Konknniche Devnagorintlean mullavem xikxonn chalik laglem. Lipiechem porkeponn sodduch, boli mhunn khuinchi aschi? Bam’nnanchi. Muttbhor lokachi. Konnench mandun gheunk nasloli. Choddan chodd lok vaprinasloli.

4.Uprant, Devnagori lipientle Konknnichem fottkirem raj Konkan vattarant vistarche khatir, dhormachi ontor korpi hea muttbhor lokamni, zati-katicher adarun “ek bhas, ek lipi, ek sahitya ani ek somaz” hem tontr bhair kaddun, Konknnichea her lipiancho ghat ghevpachi mann’ni kaddli.

5. Konknniche unchle zage-podam favo asloleank dinastana, aplea-apleach lokak diun meklle zale.

6. Konknniche Devnagorintlean unchlo panvddo porian xikop korun, Konknni tanchem pott bhorunk xokli na.

7. Konknniche unchle zage-podam favo asloleank dinastana, aplea-apleach lokak diun meklle zaleat.

8. Konknniche Romi lipiecho dusvas ani ti sompoupacho guddmell. Mhonnche, bhaxik mollar lipianchem-i rajkaronn.

9. Konknnichem mhotv pottoun sangpachem, ani te nodrentlean Gõychi osmitay samballunk tannim kednach pavlam ubarunk nant.

10. Dusre lipiantlea Konknneank, utramni lagim korun khottea monan tancho faido kaddla.

9 Julay 2011
http://www.goa-world.com/

Live Konkani Music at http://www.live365.com/cgi-bin/directory.cgi?autostart=konkani
Brought to you by Ulysses Menezes & Gaspar Almeida, http://www.goa-world.com/

‘Tum Atam Kiteak Boroyna?’ -Jose Salvador Fernandes

2011-07-01T22:49:00.000-07:00

http://www.goa-world.com/

SON’VARACHIM SUNGTTAM:

                  ‘Tum Atam Kiteak Boroyna?’

                                                   - Jose Salvador Fernandes

“Tum atam poilim bhaxen Konknni potram-masikancher kiteak boroyna?” Khub kallan, nhidentlean uttun konnem tori mhaka proxn kelolea vori dislem. Proxn vicharpi aslo ‘To.’ Potram-masikancher boroytalom tednacho mhozo vachpi. Ponnje Bhosle Hotelant to-ui mhoje porinch sanjeche chavek ailolo. Hanv boslolom teach mezar taka suvat mell’loli. Tem mez fokot amkam dogaimkuch rakhun (reserve) dovorlolea porim.
Tacho to proxn vachun hanvem tondd hanstem kelem… punn bhitorlean mon mat fattleo gozali jiteo korunk ugddasachea umbrear yevn ubem ravlem.

“Borovpachem soddlem tem soddlem…. Ulovpachem-i soddlem?”
To mhaka barik niyallit ravlo. Mhoje zapechi vatt pollet. Khuinche-i poristhitent hanvem tachea proxnachi zap diunkuch zai mhonnlolea porim. Apnnem vicharlolea proxnachi zap xikpi ditolo mhunn xikovpi taka eksarko polleun ravta toso.

“Hanvem borovpachem bond korunk na. Azun-ui borovp chalu asa!” Hanvem mhoji borovpachi dhadoskay ghonttit taka zap dili.

“Masikancher tor disonant tujim borovpam? Khuim boroyta ani khuim chhapun yetat tor tim?” Chavek taneloleak chavecho ghontt marlea xivay suseg na zalolea vori tannem mhaka fuddem proxn kelo. Titlean thoim veittor ubo zalo.

“Mhaka ek bun ani chav. Sakor chodd ghalum naka.” Veittorachea tonddak pollenastanach tannem order dili.

“Tor sang mure amkam, khuim chhapun yetat tim...” Tannem mhojea tonddak pollet proxnachea rupan atam mhaka order dili.

“Son’varachim Sungttam hea mathallea khal atam ‘net’-avelean boroytam. Poillea Gulf-Goans e-Newsletter (http://www.yahoogroups.com/group/gulf-goans); http://sonvarchimsungttam.blogspot.com/;    http://www.goa-world.com/ hacher mhojim borovpam dor son’varak vachunk melltat.”

“Oxem? Ami baba khuim tim nettam-fettam vaprunk zannanv? Tim tumkanch borim! Atanchea bhurgeank!” Tannem mhaka bhurgo mhonnlo tachevelean tachi piray kitli pasun astoli hacho hanvem sumar marlo.
Ani titleanuch sumaranxi sakor ghaloli tachi chav ani bun veittoran haddun mezar dovorlo.

“Punn tunvem Konknni masikancher borovpachem kiteak soddlem tem mat azun sangunk na?”
Plettintlea bun-acho kuddko kaddit to porot-ui mull proxna kodde ailo.

“Taka karonn asa.”

“Mhaka sangunk zaina itlem ghuttachem tor tem?”
Tem karonn zanna zavpa fattli tachi umollxik azun-ui toxich asli. Ani tache te umollxikek niyallit mhoji yen’na mhonnosor chav piyeun somploli. Hanv uttun vochpachich vatt polletalom. Itlean thoim ek giraik yevn ubem zalem. “Tujem zalem,atam hanv bostam” oxe nodren to ubo aslolo monis mhaka polletalo.

“Dusre pavtt melltam tednam sangtam. Chodd-so hangach yetam hanv chav piyeunk.” Oxem sangot, veittoran bil haddche poilinch hanv mhoje boskevelo uttun gol’leaxim gelom. Duddu farik korun ghora yevpachi vatt dhorli.
Bambolle Goa Medical College (GMC)-xim pavta mhonnosor to mhozo vachpi mhojea monachea porddear ubo zalo. Porot-ui tench ‘karonn’ vicharit. Tednam mhojea monan tem ‘karonn’ porot jitem-jivem kelem…

… tea masikak tharaylolea vella ani utram bhitor original lekh boroun dhaddlo… punn mhozo lekh tea mhoineant chhapun ailoch na… Tea bodlek masikacher mhaka anik ek lekh dislo… ekach vixoyacher hanga-thoim konnem-konnem kitem boroylolem tem ekttaun toyar kelolo to tea borovpeacho lekh… porikxek hachi-tachi kopi marun ordkutti zap toyar kelolea vori. Zannun gheum-ia mhonnit som’padpiak chitt boroun, mhozo lekh na uzvadda haddpa fattlem karonn vicharlem. Zalear tannem mhaka kitem zap diunchi?

“Tujea lekhak zago naslo mhunn chhapunk na.” Hi zap vachun som’padpiak rokddich porot zap boroyli. “Mhozo original lekh chhapun haddunk tuje kodde zago naslo, punn hanga-thoim boroyloleache kope kaddun lekh toyar kelolo to chhapunk mat tuka aito zago mell’lo tor? Konknnint vachun kaddpa itlinch pustokam asat. Tannem khuinchean te kope kaddun aplo lekh toyar kela tachi tuka Konknnintlo som’padpi koso khobor asunk zai asli! Punn ti tuka na mhunn sangunk mhaka duk bhogta!” Duk bhogli mhaka, punn te dukicho porinnam’ mat tea som’padpiacher zalo. Itlo porinnam’ zalo, xevttim hanvem dhaddlolim borovpam chhapun haddunk zaina titlo to osokt ani dubllo zalo – monan! Punn hanv mat girest zalom – tachea onnbhovan!

Son'var, 2-07-2011
http://www.goa-world.com/
http://sanjoao2011.blogspot.com/

Mullavea Xikxonnachea Madeoma Nimitan Vichitr Gozali

2011-06-25T00:57:00.000-07:00

SON’VARACHIM SUNGTTAM:

Mullavea Xikxonnachea Madeoma Nimitan Vichitr Gozali !

- Jose Salvador Fernandes

Xikxonnachem mullavem madeom inglezintlean-ui korpachea vixoyan tokli voir kaddli, ani tea nimitan khubxea zannanchim rupnnnim gollun poddlim. Choddan-chodd konnachim-i rupnnim pallam-mullantlean gollun poddleant zalear, tim Konknniche Devnagori lipientlea mon’xanchim oxench mhonnchem poddta. He lok itlo kall, bamonnponnachim angvostram nhesun dhormache bhed-bhavache bottint bosun zati-kati miroytale. Te atam tech bottivelean fottingponnachea doryant poddun, tancheach kormanchem paddem udok tankam buddounk laglam. Te atam itle buddunk lagleat, ani tachi tankam itli bhirant disunk laglea, te atam Moratthiche tonnache kaddiek dhorun aplo jiv salvar korunk khottpott kortat.

Kitem-i zaum, xikxonnachea mullavea madeomachea vixoya nimitan, Devnagorivaleancheo kaim vichitr gozali disun aileo, jea gozalink lagun somazant tannim aplich loz kaddlea.

GOZAL 1: Mukhel Montri Digambar Kamat sorkaran, khuxi tankam Inglez bhaxentlean-ui mullavem xikxonn ghevpacho rosto ugto kela. Dekun, Moratthivaleam vangdda Konknnichea Devnagorivaleank-ui Diagambar Kamatan apli budh sanddlea oxem dislam. Dekun, te Moratthivaleanchea uleak pallo diun Gõychea sabar devllamni Devak gharannim ghalunk gele. Mukhel Montreak bori budh diunchi, ani tannem zo Inglez-ui mullavea madeomacho rosto ugto kela to porot bond korunk tannim Deva kodden maglam. Punn, Moratthivaleanchem sodd, Romi lipientle Konknniche bhokt ani mogi itlo kall Romik Rajbhas Kaideant hok’kacho zago magtale to Devnagorivaleamni addaylo. Khorem mhonnlear, mullantuch tannim Romi lipientlea Konknnichea lokak ratiam modem ghat kelo. Atam, tannim khottea monan Romi lipientlea lokak kelolo ghat tankanch badla. Mhonntoch, Devnagorivaleanchim gharannim Deva meren pavchim nant. Ghoddie Dev-ui bamonnponn ani zati-kati mandta toslo aslo zalear, Devnagorivaleanchea gharanneank foll mellpachi xoketay asli !

GOZAL 2: Xikxonnachem mullavem madeom inglezintlean korpacho vixoy suru zalo. He yevzonnek virodh korunk Bharotiya Bhasha Surokxa Manch (BBSM) zolma ailo. Gõychi adli mukhel montri ani Moratthi visvaxi Shashikal Kakodkarak BBSM-achi mukheli keli. Konnem? Moratthivaleam vangdda ekech nodren mezunk melltat tea Konknnichea Devnagorivaleamni. Dusrea utramni, fuddariponnacho fatticho konno naslolea Konknnichea Devnagorivaleamni Shashikalak mathear ghetli. Konknnicho obhiman ballgun, tika diunk naka aslolem fuddariponn ani tenko dilo ani azun-ui diit asat. Niradari (helpless) Konknnichea Devnagorivaleanchea tenkeachea khustar Shashikala atam teach Devnagorivaleank tancheach surar nachoyta. Khobram-potrancher BBSM-ache potrokar porixodeche khobre vangdda fottui chhapun yeta tednam hachem khoreponn disun yeta.

Tea fottvacher, fottingponnachea ani don panam korpachea kalloka fattlean sanddot vochpi BBSM-ache fuddari-vangddi tor distatuch. Punn tanche fattlean ube aslole te von’ttik, Gõycho anik ek adlo mukhel montri ani Moratthicho visvaxi ixtt aslolea Dayanand (Bhau) Bandodkaracho-i fottu laylolo dista. Itlench nhoi, BBSM-acho toktto legit Moratthintlean dista. Hachi barik-sarik monache nodrentlean topasnni korit zalear, BBSM-acheo teo porixodo Moratthivaleanchech kocherint zatat mhunn thavem zata. Ani, eka kallar Moratthivaleancher vikh vonkhpi Konknniche ghatki Devnagorivale atam teach Moratthivaleanchea pãyam kodde lolltat. Moratthivale apnnak zai tednam zomati apoytat, ani Devnagorivale Moratthivaleanche savllent lipunk tanchexim dhanvtat. Khuim urlo hea Devnagorivaleancho Konknni vixincho obhiman ani svabhiman?

GOZAL 3: Xikxonnachem mullavem madeom inglezintlean-ui suru korunk Gõy sorkaran nirnnoy ghetlo zalear, taka nixedh mhunn apunn Gõy Konknni Akademichea odheokx-podacho rajinamo ditolo mhunn N. Shivdasan jahir kelolem. Xikxonnachem mullavem madeom inglezintlean-ui suru korunk Gõy Sorkaran nirnnoy gheun, aiz ek mhoineacho kall sorlo, punn N. Shivdas mat azun-ui aplea odheokx- podavelean sorlo na. Potrokaramni vicharlear, apnnem rajinamo dilear to zago bhorunk Romivale toyar ravleat, dekun apnnem rajinamo divpacho vichar fattim ghetla oxem sangta. Punn khori ani sot ti gozal tannem tea sangnnea ponda lipoun dovorloli asa.

Dezembr 2011, N. Shivadasacho Gõy Konknni Akademichea odheokxache kodelir bospacho tin vorsancho kall sompta. Ani apnnak, odheokx mhunn fuddlea tin vorsancho kall mellche khatir, tannem bhitorlean atanch thaun toyari suru kelea mhunn gupit zhorintlean kollit zalam. Mhonntoch, atam podacho rajinamo dilo zalear, fuddlea tin vorsancho odheok zavpak tachean koxem aplem kolsanv haloum yeta?

GOZAL 4: Xikxonnachem mullavem madeom inglezintlean-ui suru korpacho nirnnoy ghet porian, aiz meren taka nixedh mhunn kaim zannamni apnnak sorkara koddchean rayjachea panvddear mell’lole puroskar portun dileat. Kaim zannamni sorkari panvddeavelea sonvskrutik ani bhaxik somitinchim podam soddleant. Hantum kaim Konknnichea Devnagorivaleancho aspav asa. Punn hea vixoya vixinchi vichitr gozal ti hi – ek-dogamni aplea Puroskar ani tachea vangdda mell’lole duddui porot kele. Punn heramni mat yadostikanch portun dileant, duddu mat diunk nant.

Sorkari panddeavelea sonvskrutik ani bhaxik somitinchim podam soddleant tanchi-i tich gozal. Jea podar ravlear apnnak duddu melltat tannim tim podam soddunk nant, duddu mellonant tannim soddleant !

GOZAL 5: Sorkar xikxonnachea mullavea panvddear inglez madeomak-ui porvangi ditolo hachi sulus lagona fuddem, tea vixoyak virodh korunk “Yuva de Goa” nanvacho pongodd toyar kelo. Konknnichea hea-tea Sommelonam ani Konknni Bhaxa Mondollachea Yuva Mohotsavachea nimitan toyar zalolea tornnateancho aspav aslolo ho zomo mhonntat. Punn hea zomeant Yuva Mohotsavachea mattvant dista tachea chovtea vanttean-ui tornnatim dislim nant. Hi gozal kuxin soddli zalear, “Yuva de Goa” hem tanninch vichun kaddlolem nanv tea tornnateank Konknni bhaxecho ani Gõycho kitlo obhiman asa tem dakoun dita. Konknni poros tankam Purtugez ani Inglez bhas ani Gõychea poros London ani Purtugaluch chodd avoddta mhunn tantuntlean khunnam distat.

June 25, 2011

Devnagorivaleancho Konknnik Visvas-ghat!

2011-06-11T02:37:00.000-07:00

SON’VARACHIM SUNGTTAM:

Devnagorivaleancho Konknnik Visvas-ghat!

- Jose SalvadorFernandes

Devnagorivaleancho Konknnik visvas-ghat? Hoi! Kiteak mhunnon? 1986 vorsa, Konknni Porjecho Avaz (KPA) hachea bavttea khal Konknni Rajbhas korpachi 555 disanchi akantachi chollvoll zali. Te chollvollen Gõyant Konknnik Rajbhaxecho man zoddun dilo. Morattik Gõyant zago na mhonnpi, tika dusman lekhpi ani ‘Ami Konknni’ mhonnpi sabar zann fottkire Devnagorivale, Konknni Porjecho Avaz-ache vangddi asle. Konknni bhaxent apli vollokh asa, apli osmitay asa, aplem Gõykarponn asa, oxem mona-kallzantlean pottlolea Gõykaramni, tea vellar KPA-chea uleak nhidentlean porian uttun zap diloli asa. Ani hi zap divpiancho choddan chodd ankddo konnacho-i aslo zalear, to Konknniche Romi lipientlea borovpiancho, vachpiancho ani Konknni mhonnlear fokot Romi lipi mhonnpiancho aslo! Ani Konknni Porjechea Avaz-a khal sogott Gõykarancho hetu zoitivont korpant Rajbhaxechea itihasant heach lokachem yogdan chodd aslem mhonnunk zai. Gõykar, ani tantuntlea tantum ‘kristanv somaz’ hanga sorkarachea khustar inglez xikun bhailea desant veta, ani thoim A for Ayahachi, B for Bottlerachi, C for Cuznerachi, D for ddraivorachi nokri korta oxem aiz addechea Devnagorivaleamni kitlem-i mhonnum, punn heach Ayamni, Bottleramni, Cuzneramni, ddraivoramni, khuinche-i poristhitent apli Konknni Rajbhas zaunchi mhunn, aplea bolsak-pottak chimtto kaddun, khorcha khatir tednam Konknni Porjechea Avaz-ak khorcha khatir duddu dhaddle! Punn niz Konknni mogiamni dhaddlolea tea duddvancho koso-kat vapor kelo, te khuim moddle tacho hixeob, aiz ani aichea khinnak meren Konknni Porjechea Avaz-an dakoyloch na!

Konknni Porjecho Avaz haka survat tem xevott meren, zaitech fuddari favo zale. Konknni porjek eka ulean koxi-kat rostear haddunk zai asli, ti utramni guttlayloli kherit-viprit kola tanche kodde asli. Konknni porjechea kallzant hat ghalun, bhaxechea mogacho uzo matui palonastana, koso jito-jivo dovorunk zai aslo hem tanchea fuddariponnantlean tednam distalem. Aple he fixal kolentlean tannim Konknni bhaxechem mhotv sanglem, Moratti bhaxek Gõyant zagoch na, Morattivaleank koxi tokli voir kaddunk diunk zaina, Moratti amcho koso ghat gheunk xokta, Gõyant Morattik zago dilear tika lagun amchi sonvskrutay koxi ibadd zaum yeta, oxeo sabar gozali tannim, khubxea zannanchea kallzak hat ghalun sangleo, ani tantuntlean khubxea zannanchim kallzam-i jikhun ghetlim. Punn tednam tanchi ti kola addechi ‘kola’ asli mhunn atam anik ek pavtt thavem zalem.

Mullavea xikxonnachea madeomak lagun Devnagoricher far yeta to polleun, halinch hea fuddariamni eka disalleacher vidan (statement) kelam – “Tai-in (mhonnche Shashikala Kakodkaran) Gõy Maharaxttrant vilin (merge) korunk tednam proyotn kel’lo mhunn kitem zalem? Ti Gõy Purtugalant kaim vilin korunk sanginasli. Gõy Maharaxttrant vilin korunk tinnem tenko divop soimbik (natural) aslem, kiteak Gõychi ani Maharaxttrachi sonvskrutay ek!” Ho Konknnik visvas ghat nhoi?

Niz Konknni mogiank don panam korpi hem tanchem vidan vachun, poilincheanuch, Devnagorintlean apnnacher Konknnicho addecho xik’ko marun ghetloleanche kuddint, Konknni poros Morattichench chodd rogot dhanvta mhunn anik porot thavem zalem. Tankam Morattin jem kitem diunk na tem Konknnin dilem, Konknnin tankam nanv dilem, vollok dili, khub kitem dilem. Je eka kallar Gõychi sonvskrutay ani osmitay Konknni bhaxent asa mhunn horddem fuddem kaddun sangtale, aiz tech monis teach tonddan Gõychi ani Maharaxttrachi sonvskrutay ek mhonntat, ani aplo khoro rong somazak dakoytat. Gõychi ani Maharaxttrachi sonvskrutay ek asa zalear, Konknni Rajbhas korpache chollvolle vellar hannim Moratti bhaxek Gõyant zagoch na, Morattivaleank koxi tokli voir kaddunk diunk zaina, Moratti amcho koso ghat gheunk xokta, Gõyant Morattik zago dilear tika lagun amchi sonvskrutay koxi ibadd zaum yeta, oxem kiteak sanglem tor? Tednam Gõychi ani Maharaxttrachi sonvskrutay ek mhunn khobor nasli hankam? Madeomachea vixoyavelean Devnagori lipieche dis atam bhorot aileat mhunn tankam disunk laglam. Atam tanchea pottant att vazunk lagleant dekun, tanchim tonddam kaiche kai ulounk ugtim zaleant. Fottingponnachea sonvsarant mon’xak jednam sot chepun-lipoun dovorunk anik vatt meklli asona, tednam tachech udorim tacho pindd somzunk mellta.

Addechem sovong khuim chodd kall tigona. Tem kitlem-i tigoupacho proyotn kelear-ui tem tigona. Ek dis ugtem zatach zata. Konknni Porjecho Avaz-achem chador Moratti otmeak pangurlolea Devnagorivaleanchem hem jitem-jivem chitr asa, oxench mhonnchem poddta. Ani hachem odik khoreponn amkam mullavea xikxonnache bhaxechea madeomantlean-ui disun yeta.

‘Devnagori hi Konknnichi nizachi lipi’ mhonnpi Devnagorivale, mullavea xikxonnachea vixoyak dhorun, aiz Bharoti Bhaxa Surokxa Manch (BBSM) hachea asrea khal Morattivaleanchea khandar hat ghalun bosleat tem disun yeta. Mullavea xikxonnachem madeom ekuch ek, Konknni bhaxentleanuch aschem mhunn tannim hott dhorlolo khuinch disun yena. Tanche vangdda, ‘Devnagori hi Konknnichi nizachi lipi,’ ‘atam Konknni Devnagorintlean Rajbhas zalea, atam Konknni lokancho ekvott zatolo’ oxem eka kallar sangtale te-ui Konknniche Devnagorivale atam dholint ogi boslole distat ! Don rupancho khell khellpi, ani Romi lipiecher onit kelolea Devnagorivaleancher aiz Morattik tenko divpachi palli ailea. Buddtoleak khuim kaddiecho adar mhonntat. Atam apli bambonnponnachi, dhorm’-dvesachi, khottea monachi kaddich buddonk lagta tednam, fuddem vochun te konna-konnak tenko ditole tem apo-ap disun yetolem. To dis ani vell chodd pois na !

Son'var, June 11, 2011

- Forwarded by http://www.goa-world.com/

24 Vorsam Adlo Kuraddeacho Ghavo!

2011-06-04T04:35:00.000-07:00

SON’VARACHIM SUNGTTAM:

24 Vorsam Adlo Kuraddeacho Ghavo!

- Jose Salvador Fernandes

Porvam, mhonnche Junache 6ver, dhongi Bharoti Bhaxa Surokxa Monchan (BBSM) ‘Gõy Bond’ jahir kelam. Karonn? Bhurgeank zai zalear inglez madeomantlean-ui xikovpachi sorkaran avoy-bapayk mekllik divpacho nirnnoy montrimonddollant pas kela ! He mekllikek BBSM-acho khor virodh asa. Hoch virodh korunk BBSM zolma aila. “Konknnik Rajbhas korunk amchem sumara bhailem yogdan asa” oxem mhonnpi fottkirea, dhormacher adarun bhed-bhav ani dves korpi, Konknnichem fottkirem rupnnem ghalolea, ani Konknnichea nanvan Morattichea pattosar boslolea ‘Konknni mon’xancho’ tantum aspav asa.

Mullavem xikxonn Konknni va Moratti xivay Inglezintlean-ui dium yeta mhunn halinch Gõy Sorkaran zo nirnnoy dila, tachim pallam-mullam fokot rajki rukhachea pallam itlinch khol nant. Tim tache poros bhitor asat mhunn barik chintun pollelear apo-ap kollun yetolem. 1987 vorsa Rajbhas Kaido pas zalo tednam, tea kaideant “Konknni mhonnlear Devnagori lipientlean boroyloli Konknni” oxem boroylolem vachunk mellta. Itlench nhoi, tea Rajbhas Kaideant Moratti bhaxek-ui ‘same cutting, but different folding’ oxea rupan zago dilolo asa. Rajbhas Kaido sorkari panvddear vachun dakoylo tednam, Morattik tea Kaideant zago dila tem polleun “hanv ani Luizinho Faleiro nixedh ugtaunk zomatentle uttun bhair gele” oxem tednacho opokx amdar Uday Bhembren zaite pavtti sanglolem hanvem mhojea khas kanamni aikolam. Punn to uttun gelo mhunn Moratti kitem Rajbhas Kaideantlean bhair poddli ? Na nhoi? Tednam thoimsorlo uttun veche bodlek, Rajbhas Kaideant Morattiche bodlek Romi lipi tori ghalchi mhunn sangunk tachem tondd ugtem zalem zaunk yetalem nhoi? Punn tannem Romi lipie khatir tea vellar aplem tondd ugtem korunk na. Morattik tea kaideantlean kaddunk tannem ‘Gõy Bond’ korunk ulo-i marunk na. Lokak rostear yevnk sangunk na. Punn aiz to BBSM-achea bavttea khal, xikxonnachea inglez madeomak virodh korunk Morattivaleanchea khandak khand lavun machier bosta! Zalear, Morattik nixedh mhunn uttun gelolo taka koslo orth urlo tor? Konknnichea nanvan bhitorlean Morattik-ui samballpachim him nattkam mum?

Aiz BBSM mullavem xikxonn avoy-bhaxentleanuch zaunk zai mhonnta. Kiteak, toxem kelear Gõychi sonvskrutay tigun-rigun urtoli oxem BBSM-achem mhonn’nnem asa. BBSM tor oxem chinta zalear, mullavem xikxonn Konknni va Morattintlean zait porian, kitlea Gõykaramni kitli pasun apli sonvskrutay tigun dovorlea kai? Dusrem, zaka konnak apli sonvskrutay ani osmitay samballpachi na, taka kitlem-i mullavem xikxonn avoy-bhaxentlean diun kitem faido? Ani apli osmitay ani sonvskrutay samballunk mullavem xikxonn avoy-bhaxentleanuch zai oxem kitem asa? Apli osmitay ani sonvskrutay samballpachi khuxi aslolo ti koxe-i ritin samballtach! Ani ti kitem samballpachi asa zalear Konknniche Devnagorintleanuch samballunk zai oxem kitem asa? Romi lipientlean samballunk zaina? Ani Konknnintleanuch tor Gõychi osmitay ani sonvskrutay rakhunk zata zalear, Morattik bhair dovorun Rajbhas Kaideant Devnagori vangdda Romi lipiecho kiteak aspav korunk na?

Rajbhas Kaido pas zalear, 24 vorsancho kall sorlo. Punn hea 24 vorsam pottim ho Kaido Gõychea Gõyant khuinch chalik laglolo disona. To chalik lagcho mhunnon, aiz meren “Konknnik Rajbhas korunk amchem sumara bhailem yogdan asa” mhonnpi fottkirea ani dusonghi mon’xamni ek-ui dis Gõy Bond korunk na, tea khatir zomati-i korcheo oxem konnakuch disunk na. Zalear, Rajbhaxecho ho polko husko atanch, inglez madeomantlean-ui xikovpachi sorkaran avoy-bapayk mekllik dili tednach kiteak?

Mullavea xikxonna babtint Gõy Sorkaran zo nirnnoy dila, tachim pallam-mullam fokot rajki rukhachea pallam itlinch khol nant oxem voir mhonnlam. Rajbhas Kaideant Romi lipiek matui zago diunk tantum aichea mullavea xikxonnachea proxnanchim ani oddchonnechim mullam-pallam asat. Romi lipiek tednach tor Rajbhas Kaideant zago dilolo zalear, aiche poristhitek tondd diunk tankam anik-ui khubxea lokacho tenko mellpacho. Ani Devnagorivaleank aiz Morattivaleanche tenkeache gasicher jiyeunk poddpachi palli yevpachi nasli.

Khorem sangum? Bamonnponnachim, dhormachea ani lipiechea dvesachim voklam lavun Romi lipiek Rajbhas Kaideantli bhair dovorun, Devnagorivaleamni 24 vorsam fattim apleach pãymancher kuradd marun ghetloli, punn tednam tankam te kuraddeacho ghavo disunk na. To tankam atam disti poddta! 24 vorsam uprant ! Atam kitle-i pavtti ‘Gõy Bond’ kelem vo kitleo-i zomati keleo mhunn matui pekpacho na. Fattlim 24 vorsam to jito-jivo zaun urla, tosoch to urtolo. Pekonastana!

Salvador Fernandes
konknno@gmail.com
http://www.goa-world.com/

2011-05-30T07:04:00.000-07:00

Pulis Porjek, Gorjek vo….?

2011-02-05T03:44:00.001-08:00

SON’VARACHIM SUNGTTAM:

Pulis Porjek, Gorjek vo….?

- Jose Salvador Fernandes

Gõyant, pulisanchea monisponna bhailea kortub-kornneancher nodor marlear, Devan apli podvi hanchea hatant diloli zalear te kitem-kat korit hacho nem’ naslo mhunn thavem zata. Karonn, Deva fattlean konna-i lagim podvi ani sot’tea asa zalear, ti aplea kodde asa mhunn tim goir-somzotat. Fokot goir-somoz korun tim ogim ravonant. Ti apli vankddi somzonni vevharant haddunk soeg melltat tednam, tim monisponna bhaile ritin vagtat.

Pulisamni aple podvecho ani sot’techo goir-vapor keloleo sabar deki amchea dolleam mukhar asat. Halinchich jivi-jiti ghoddnni mhonnlear, famad Cypriano prokoronn. Hem prokoronn gazta-gazta, atam Divcholeche eke 29 vorsam pirayeche ostorek forforit zhoroyt-oddit vheloleachi ani fonttamni marloleachi ek khobor jahir zalea. Geeta Pednekar oxem tichem nanv. Dadlo vo ostori pulis zaum, Hea xivay, anik-ui tanchim khubxim, monisponnak sobonant toslim kortubam panttea ponda dhampun asat oso sumar kaddum yeta. Devan mon’xak rochlo, punn teach mon’xak marpa-dhoddaupacho, moddpacho ani jito-jivo marpacho pulisank konnem podvi ani odhikar dilo kai, oso khubxe pavtti monant proxn upzota.

Gõyant ‘pulis’ utrak pulisacho khoro orth soddun her soglle toreche orth asat. Gõyant pulis mhonnlear kumparponnacho khell, bhroxttachari, apto gheupi, tonddak polleun kamam korpi, onitik dolle dhampun ogich ravpi, chor konn te zanna zaun-ui nennarponnachim dhongam korun chorank sodunk bhonvpi, amdar-montreanche dhomkek bhiyeun aple nem’-kaide visorpi ani te koxe-i bagovpi, guneanv asum nasum mon’xank zon’varam poros paxtt lekhpi ani vagoupi, monisponnachea soimacho fator zaun sangati mon’xak moddpi-marpi ani tacho jiv legit kaddpi, oso orth dolleam mukhar ubo zata.

Mhoji ek ixttin asa. Dhorman hindu. Lognache pirayer pavlea. Fattim tika, benkint nokri korpi konn ekleachi soirik aili. Punn tinnem ti soirik fuddem vochun zullonk diunk na. Hanvem karonn vicharlem zalear, tinnem mhaka kitem sangchem?

“Benkint nokri korpi ani pulisachi nokri korpi hankam soddun, mhaka mhozo poti-dev mhunn dusro konn-ui upkarta mhaka!” Tinnem sanglem.

Aiz Gõyant, nagrikam sovem pulis-lok apli zababdari visorleant oxench mhonnchem poddta. Aiz tim porjek apli seva diunche bodlek tankam dhodd-foddaytat, kaido ubarun dovorpachi seva korche bodlek tim kaido porjecher thaptat. Kaide khuim nagrikamni mogan pallpache astat, punn Gõyche pulis porjek bhirant dakoun te kaide kudd’ddeponnim pallunk laytat.

Gõychea pulisanchea noitik sobhavachi-i porjek khobor asa. Pinzloleant pãym ghalpacho tancho sobhav polleun onitik sampoddlolo monis, ani kherit bhaxen ostori tankam patiyena. Ghovan marlear ani pavsan bhizoylear konnak sangum mhonntat te porim ti apnnacher zaloli onit ogeponnim sonsta. Aplea aplech bhitor jirun veta.

Hem sogllem niyallit zalear, pulisankuch svota apli zababdari somzunk na mhunn thavem zata. Porjechi seva koxi korop, tankam koxe kaidean faideache zavop hachi poili tankanch khobor na. Dekunuch tim, apunn kaideache dev zalolea porim apnnak zai tednam kaideachim fintam laytat, ani naka tednam tim aplea kornneamni tunttoun uddoytat. Hem koslem pulisponn, orth-mol ani dom’ naslolem?

Zoddiche, podveche ani motlobponnache nodrentlean konn-ui pulis zaunk fuddem sorta tacho xevott osoch zata. Hea vevsayant to apleach khottea kornneamni khotavlolo asta. Aplo sobhav dakoyta. Apunn monan-kallzan konn ani kitem tem-ui dakoun mekllo zata. Porjeche nodrentlean khala poddta.

Febrer 5, 2011
http://www.goa-world.com/

Mhonnche, aiz pulisanchim tim monisponna bhailim kortubam, lhan-vhoddank, soglleank khobor asa. Khorem mhonnlear, mon’xan khuim mon’xak vitteunk zaina. Punn Gõychea pulisank ani tanchea kornneank aiz sogottuch vitteleant. Tanchim karosthanam soglleankuch khobor asat. Dekunuch, aiz Gõychea pulisamvelo Gõykarancho visvasuch uddon gelolo chanttie-pavlak dista. Pulisanchea probhavikponnachi kharsann bigoddlea dekun, aiz nagrik kaido aplea hatant ghetana disunk lagla. Porza nit magunk rostear denvloli dista.

Eka Puroskara Nimitan…

2011-01-28T20:56:00.000-08:00

SON’VARACHIM SUNGTTAM:

Eka Puroskara Nimitan…

- Jose Salvador Fernandes

Tea disa tannem porot-ui mhaka bhett keli. Kitea khatir? XXX sonvsthechea nanvan aplem nanv sorkarachea Kola ani Sonvskruti Khateachea ‘Tornnato Puroskar’-a khatir suchounchea hetun. Hache poilim don-ui pavtti hanvem taka sanglolem – “Baba, tum oso Puroskaram fattlean dhanvum naka… vell yetoch Puroskar apo-ap tujea fattlean dhanvun yetole…”

Punn khuinche-i poristhitent Puroskarank pettlolea hea mhojea vollkicheak mhojem sangnnem pottlench na. Dekun tea disa tannem porot-ui mhojexim pavtt ghali, ani sanglem –

“Kitem asa zanna? Thodde Puroskar magun ghetlea bogor mellonant. Te forsan ani bollan magun gheunche poddtat. Tujem sangnnem aikun Kola ani Sonvskruti Khateacho ‘Tornnato Puroskar’ apo-ap mhojea fattlean dhanvun yetolo mhunn ravlear, hanv hangach zanntom zatolom. Anik don vorsamni konnak-ui mhoji piray sanglear, mhaka konnuch tornnato mhonncho na. Ani tea Puroskara khatir hanv patr-ui (qualify) tharchonam. Dekun, heach vorsa tea Puroskara khatir orji-potr (application) kelear borem. Tuje xivay mhaka…..” oxem to mhaka kitem tori sangunk vetana, okosmat mhozo fon vazlo… Ani fonache dusre vattentlean thaun ulovpean mhaka sanglem –

“ Tumkam ‘2010 vorsacho Dr. Jack Sequeira Konknni Puroskar’ favo zala. Porbim!”

Hanv aikunkuch poddlom, ani khub vell ogich urlom.

Pirayechea ottravea-ekunnisvea vorsant mhaka Puroskaranchi khub umed asli. Te pirayecho aslom tednam, Konknni mollar khubxea zonnank Puroskar melltale te porxim polletalom, ani potrancher vachtalom-i. Xezarea lagim gaddi asa, mhoje-i kodde ek asunk zai mhunn anvdde ghonntat toxe, mhaka-i Puroskar mellcho oxem mhaka distalem. Punn fuddem vochun Puroskaranchi umed sodd, ugddas legit khuinchea khuinch sanddlo...

… ani tea disa ‘2010 vorsacho Dr. Jack Sequeira Konknni Puroskar’ mandun ghetanam, monantlean mhonnlem - ‘vell piklo ani Puroskar mhojea fattlean dhanvun ailo!’

***

“Dr. Jack Sequeira Puroskar ami sthaplole asat, ani fattlim char vorsam ami te ditanv. Zalear, dusrea konnachean-ui tea nanvan anik koxe Puroskar sthapum ani dium yetat?” Mhaka Puroskar favo zala mhunn khobram-potrancher vachlea uprant konn eklean mhaka fon kelo.

“Ekach mon’xachea nanvan konnem-i, kitle-i Puroskar sthaple ani dile mhunn kitem zata?” Hanv.

“Toxem zaunkuch zaina. Ami sthaplea mhonntoch, tea nanvan anik konnacheanuch dusre Puroskar sthapunk zainant.” Dr. Jack Sequeira aplem khasgi bens zalolae porim to atm-visvasan uloylo.

“Tum Mumboi, Bengllur, Mongllur pavla? Him veg-vegllim rajyam khorim, punn hea sogllea rajyamni ‘M G Road’ hem nanv common asa. Tea bhair, tench nanv Gõyche Rajdanintlea eka rosteak-ui asa.” Tachea monacher uzvadd ghalpachea hetun uloylom.

“Are baba, M G mhonnlear Mahatama Gandhi. To ak’khea desacho bapui. Tachem nanv Bharotantlea khuinchea-i ani kitlea-i rosteank ghalem ani vaporlem mhunn kainch zaina. Punn ami jea nanvan Puroskar suru kelole, tea nanvan anik ek Puroskar anik konnachean-ui koso sthapum yeta?” To aplo hott soddunk toyaruch naslo.

“Mhaka ek gozal sang. Dr. Jack Sequeira konn mhunn ami mandtanv?” Taka dharer dhorpache nodrentlean hanvem taka vichar kelo.

“Gõy Opinion Poll-acho bapuy!”

“Raxttrachea Bapaychea manak ani ugddasak desantlea itlea rosteank ekuch nanv dium yeta zalear, Gõy Opinion Poll-achea bapayachea manak ani ugddasak konnem-i, kitle-i Puroskar sthaple mhunn tantum kitem vankddem asa?”

He proxnak mhonnlem to koso-kat zap dita ti polleum-ia oxem mhonntam thoinch asam, hannem fonuch bond kelo!

***

“Hello! Porbim tuka! Tuka Puroskar mell’la mhunn kaluch vachlam.” Gulfant nokri korpi mhojea ixttacho to fon aslo. “Khorem mhonnlear, tuka Puroskar mellpachi gorozuch asli. Chol, xekim to mell’lo.” Pordesantlean to fuddem uloylo.

“Hoi mell’lo! Punn na mell’lo mhunn kitem addkollpachem ani bigoddpachem aslem?” Hanv.

“Na, na… Koslo-i Puroskar melltoch mon’xak matxe vegllem mhotv yeta nhoi? Hem mhotv tuka khub adim ailolem mhaka zai aslem.”

“Puroskar mell’learuch mon’xak mhotv yeta…. Ani na zalear mon’xak mhotvuch na tor?” Tachem chintop mhaka chukichemxem disunk laglem.

“Sahit’ya Akademicho Puroskar mellta tednam, mon’xak somazache nodrentlean kitlem mol ani mhotv mellta tem tum visrolo?” Tannem aplea logic naslolea chintpachem ani ulovpachem mhotv mhaka zanniv korpacho proyotn kelo.

“Fuddlea don vorsank legit osle Puroskar adinch tharlole astat tea Puroskarank ani te gheupeank koslem mhotv asum yeta? Ani, raxttrik panvddear kole-sonvskrutayechea utsovant kovita vachunk fuddem sorloleak, “tunvem tea utsovant bhag ghetlear tujea Puroskaracher porinnam’ zatolo” oxi dhomki yeta tednam to kovi machievelean poll kaddta taka koslem mhotv asa?”

“Polle, Puroskar te Puroskar…. Romivaleank legit te koxe-i mell’le ani ghetle mhunn tantum kitem asa?” Ixttan porot-ui mhojea talleant hat ghalpacho proyotn kelo.

“Sangtam mhunn ragar zaum naka. Romi lipientlean Konknnicho vavr korpi konn-ui mon’xak, kumparponnacho holddi-pitto lavun Puroskar zoddpachem mon na. Kiteak, Puroskar mell’lo mhunn monis vhodd zaina, ani to Puroskar diupi-i vhodd zaina hem tanchea monant kenchlolem asa. Khorem sangum? Romi lipientlo Konknni monis ho rajkornneam vo sineama mollavelea kolakaram porim nhoi. Rajkornneank ani sinema kolakarank Puroskar mellona zalear khubuch dukta. Romi lipientlea mon’xachem toxem na… Puroskar na mell’lo mhunn tankam chukon-ui dukona.”

Mhoji hi zap aikun tannem ulovpacho vixoyuch bodol’lo.

Son'var, Janier 29, 2011
http://www.goa-world.com/

AMCHEO AVDDI, AMCHO FUDDAR …..

2011-01-22T02:56:00.000-08:00

SON’VARACHIM SUNGTTAM:

AMCHEO AVDDI, AMCHO FUDDAR …..
- Jose Salvador Fernandes

“Mhojea mogiak ek boremxem kam’ polle nhoi…”
Laginche ixttinin mhoje tea disa mhaka mhonnlem.
“To graduate mugo, khuimsor-ui, koslem-i kam’ melltolem taka.” Hanv.
“Toxim taka koslim-i kamam avddonant.” Ixttinin mogiacheo avddi sangunk suru kelem.
“Magir koslim kamam avoddtat tor taka?”
“Unchlea panvddeachem ani borea pogarachem…”
Aplea-i fuddarachea huskeachi il’li hollod ghalun ixttinin mhaka zap dili.
“Mhaka ek gozal sang…. Tacheo avddi (hobbies) kitem teo tuka khobor asat?” Mhonnlem, ekamekak him kitlim porian vollkotat tem-ui kollun yetolem.
“ Tacheo avdddi….. mhonnlear hobbies nhoi? To ek boro chitrakar….
Mogachea chittim poros to mhaka chitrantleanuch aplo mog ugtayta…”

Tinnem mhaka ixttinponnachea natean sanglem.
“Magir, to aple avddintleanuch kiteak zoddina?”
“Mhonnche?” Tinnem ordem ojapun, ani ordem sanddlolea vori zaun vicharlem.
“To tor chitarunk boro asa zalear, tea aplea gunnantleanuch tachean zoddum yeta! ”
Hanvem spoxtt korun sanglem.

“Punn tantuntlean fuddar kitlo sugur asum yeta?” Tinnem huskeabhorit mukhamollan vicharlem.
“Aiz khubxea zannamni osoch aplo sonvsar kela ani choloyla… tuzo dhoni tum… vell tujea hatant… Jinnechem bhangar zaum yeta! Hacher matso kholayen niyall kelear, tuka anik-ui khubxeo gozali thaveo zatoleo. ”

Mhojem hem sangnnem aikun, sokallchea aste-aste udetea suria porim tachea mukhamollar hanso udeunk laglo.
Khubxe pavtti, avddincho (hobbies) vapor mon’xan eksuro asta tednam korpacho asta oxi sabar zonnanchi somzonni asa. Thoddeank avddicho vapor korop mhonnlear vellacho ibadd korop oxem dista.
Punn hea avddintlean mon’xachean aple zoddi udexim aplo fuddar korum yeta hem bhou thoddeank khobor asa ani pottlam.

Toxem polleunk gelear, aiz mon’xancheo avddi tankam monanchi thaka-i, anond ditat. Monis aplea avddincho upyog korta tednam hea avddi mon’xak kriaxil (active) dovortat, dukh-huske visronk mozot kortat ani jivitantli zodday poisaytat. Itlench nhoi, avddi mon’xachea sobhavak-ui rup diunk mozot kortat. Jivitak orth ditat. Hea sogllea xivay, avddi mon’xak tacho dispott’to giras-ui zoddunk soeg ditat.

Khubxe pavtti mon’xak avddi astat tea avddinchem mol svota tea mon’xankuch khobor asona.
Aplea avddichea tankinchi tankam somzonni asona. Teo avddi tankam jivitant khuinchean khuim vhorunk xoktat hachi tankam zanniv na. Toxi ti zanniv korun gheupachi tankam itsa-i nasloli disun yeta.

Khorem mhonnlear, xalla-iskolamni bhurgim xiktat tednam, he-ui gozali tankam xikovpeamni thokos gheun sangun tanchea monancher uzvadd ghalpachi goroz asa.
Karonn, xalla-iskolamni xikpi sogllinch bhurgim voir pavtolim, ani voir pavlolea soglleach xikpeank bori borich nokri favo zatoli mhunn na.
Zankam xikpantlean aplo fuddar korpacho na tanchean aple avddintlean tori korum yeta nhoi?

Ek dis oso yevpachi xoketay asa… avddincho vapor korun dispott’to zoddpa xivay anik upay aschona.

Janier 22, 2011
http://www.goa-world.com/

Surokxechi Baguch Bagovta Tednam…

2011-01-14T23:45:00.000-08:00

SON’VARACHIM SUNGTTAM:

Surokxechi Baguch Bagovta Tednam…
- Jose Salvador Fernandes

Ghorachea ghotterantlim ami panch zonn bhurgim. Mhojea fattlea teg bhoinnam fattlo bhav. To aiz kuddinuch nhoi, monan-ui vaddla. To lhanacho vhodd zatana, xezarchea, tachech pirayeche cheddvanchea nanvan ami tachim khub fokannam kori. “XXX tuji vokol bori dista….”, “XXX kodde tum kazar zatai mum? Borim sangatan tumi iskolak veta-yetat…” oxea utramni taka challovop aslo. Ami jitle-i pavtti taka toxim kiddoytalim, tednam tannem mukhamoll bhouch gombhir korun, ‘strict’ oxea tallean “ hanv kazar zauncho nam, pulis zatolom” oxem sangop aslem. Ani tachi hi zap aikun, ami hans… hans… hanstalim. Punn tachi ti tednachi zap kednam-i hanv niyallunk bostam tednam, te zapentlea ‘pulis’ utrant khubxem kitem asa, oso pottak lagun sat somdiram poltoddi aslolo mhozo bhav somzotalo hem mhaka somzunk laglem.

Tachea motan ‘Pulis’ mhonnlear podvedar. Tache kodde konnacheanuch zobordosti korunk zaina. Taka konnacheanuch halounk ani harounk zaina. Taka konnacheanuch add ghalunk zaina. Taka konnacheanuch hat lavunk zaina. Dusrea utramni, pulis mhonnlear ‘strict’ pranni, xist samballpi. To dusreank attapona ani khottem-vankddem adarunk sodtelea konnacheanuch tache bhiranti add vochunk zaina.

Hoi. Kal meren pulis mhonnlear surokxechi moladik khunna oxech nodrentlean sogott polletale. Ani aiz? Aiz pulisanchi ti vollokuch bodol’lea. Khorem mhonnlear svota pulisamnich ti bodol’lea. Gõyant halinchea kallar prosar madeomantlean jeo gozali ami vachtanv-aikotanv tantuntlean pulisamni aplo svabhiman koso-kat khuntteak lamboyla ani ghannak dovorla to amkam dolle ani kan bhorun polleunk-aikunk mellta. Somaza sovem asloli apli zababdari aiz pulis samkech visrun geloleachi zanniv zata. Je pulis surokxeche bagechi khunna asle, tich bag aiz apunn zavun sabar kaideam add konsolltana dista. Kaide moddpachea prokoronnant svota tanchech hat tambdde aslole disun yeta. Ani hea karonnank lagun, aiz porjecho pulisamvelo visvas, suknnim uddun jitlim pois pavtat, tache poros-ui pois uddla. Ani uddun gelolo ho visvas porot jikun ghevpak sumara bhair moskil asa.

Unchlea tea sokoilea panvddea meren zuttier aslolea pulisank khorem mhonnlear chaltea mon’xa poros ‘moral’ ani ‘ethical’ mulianche nodrentlean goroz tache poros unchlea panvddear dovrunk zai asle. Apli zutti zababdaren ani probhavik ritin pallunk pulis odhikareank porjecho visvas ani man zai asta. Ho visvas ani man zoddunk, pulis lokak apnnem survatek ghetlolea soputantlean ani ‘ethics’-antlean sumara bhaili vatt meklli asa. Punn aiz pulisanchea somajik jivitachem chitr polletoch, somazachi seva korunk apnnem ghetlolo soput payma ponda mostilolo disun yeta. Apnnem somzum nastana ghetlolea soputacho porinnam’ ho, oxench mhonnchem poddta.

Adlea kallar pulis lok porjechi khorea orthan seva korche khatir kallzantlean soput ghetale, ani promannikponnan vavrun porjecho visvas zoddtale. Apleachem pod vaddche khatir, vo konnachi-i xabaski zoddche nodrentlean tannim aplem kam’ korunk na. Tim podam ani xabaski tankam apo-ap favo zaleant….

Osleach, promannik pulisanchi aiz amkam khori goroz asa!

http://www.goa-world.com/

Rosteaveli Xist

2011-01-07T22:52:00.001-08:00

SON’VARACHIM SUNGTTAM:

Rosteaveli Xist

- Jose Salvador Fernandes

Kal sokallchi gozal. Moddganvchean Porvore poinn kortalom. Mhojech motor-saikolin. Mhoje sodanche gotin (speed) vetanam, mhojea fattlean yevpi dusre eke motor-saikolin mhaka fattim ghalo. To boroch mukhar pavlo tednam, taka Devuch pavlo mhonnonk zai! Fuddlean yevpi ttrok sumara bhailea nettan yetalo, tachea to ghansak sampoddpacho! Monant mhonnlem, ttrok cholovpeache besarmayek lagun, 1 tem 7 Janer, 2011 cholpi 22vea Rosto Surokxa Satolleant sonvsarantlo anik ek jiv unno zavpacho vattovlo!

Aiz Gõychea rosteancher mottor-gaddio cholovpi khubxeank, aplea vangdda dusreanchea-i jivachi porva na mhunn dista. Ek pavtt tannim mottoram cholovpacho tabo ghetoch, puray sonvsarachim sutram aplea hatant aslolea vori te vagtat, ani sogllo sonvsar apleach hatant aslolea porim te gaddio choloytat. Fattim-fuddem porinnamancho vichar korinastana, apnnak zai toxe, rosten, yeradariche nem’ khuntteak lavun, ekdom’ bhann soddun te mottoram dhanvddaytat. Oxe poristhitint khubxe pavtti te lok aplo, ani guneanv naslolea her-ui lokancho jiv luksonn kortat.

Dor vorsa sorkar ‘Rosto Surokxechem Satollem’ jahir korta. Punn tem jahirponn fokot ‘oronneantlo tallo’ zalolem dista. Sorkaran rostea surokxechim toslim kitlim-i satollim ani vorsam jahir kelim mhunn rosteancher kitem oxich surokxa ani xist yeta?

Amchea Gõyant ‘MARG’ nanvachi ek osorkari sonvstha-i asa. Gõychea rosteancher surokxa ani xist vosche khatir hi sonvstha vavurta oxem mhunn uloytana aikunk yeta. Punn aiz Gõychea rosteancher ugtea dolleamni yeradarichi bexist ani sumara bhaile obsoeg pollelear, ‘MARG’-ui Gõychea rosteancher xist haddpant unni poddlea kai kitem oso monant dubav yeta.

Amchea rosteancher vevosthit ritin xist yevche khatir kaim zageancher yeradariche pulis ube aslole distat. Konn yeradariche kaide moddtat tankam talanv divnk. Anik khuim pavot zalear thoim ‘Interceptor’ gaddio ubeo korun porot yeradari pulis ube aslole distat! Ani itlem-i asun, Gõychea rosteancher xist yena ti pollevn vichitruch dista !

Khuim kitem chukta? Kitem unnem poddta?

Rosteancher xist haddpi odhikareamni ani osorkari sonvsthamni tem aplem karia mhunn mandun vavrak lagchem poddtolem. Hem karia chalik lavpachi tankam khori khuxi aschi poddtoli. Hem kam’ omkeach satolleamni ani mhoineamni sompchem na. Tea khatir kitlo vell lagot hem-ui sangunk zaina. Rosteancher khori xist yeum porian tannim jiv golleak lavun vavurchem poddtolem. Kiteak….

….. rosteancher bexistin cholovpeank yeradariche nem’ pallche mhunn khobor astana-i te pallche mhunn tankam kednach pottunk na. Ani zankam te zanna zaun-ui pottunk nant, tankam zagear haddpak khub vell… nhoi kall sortolo. Khub sosnnikayechem kam’ tem. Eke ratin ani eke vatin faleam zaina mhonntat toslem!

8 Janier 2011
http://www.goa-world.com/

____________________________________________________________________________________

‘Readymade’ Novem Voros?

2010-12-31T06:05:00.000-08:00

SON’VARACHIM SUNGTTAM:

‘Readymade’ Novem Voros?

- Jose Salvador Fernandes

Aiz Janerachi Poili tarik. 2011 Vorsacho Poilo ani Novo dis. Amchea jivitant aichean anik eka Novea Vorsak survat zalea mhunn ami mandtanv. Novem Voros mhonnina fuddem amchea monant bore-borech vichar ghollpak lagtat. Sogllem borem-borench amchea monant ghunvta. Novem Voros mhonntoch amchea monant tea disa novim chintnam-vichar xizpak lagtat. Khorem mhonnlear, amich te borea monan ghollytanv. Tea khatir ami novem-novem ulovnk suru kortanv. Hea disak, amchem bhailem rup legit ami novem kortanv. Ani tednam amkam, nigtench karkhanneantlean toyar zavn ailolea dhovea, koslench khot naslolea dhoveach lugtta porim amchem jivit dhovem ful’l koxem dista. Ani heach borea-dhovea monan, upatt umedin sabar nichev korpak toyar zatanv. Ekdom’ bori gozal mhonnchi poddta!

“2011 Novem Voros amchea jivitant kitem borem ghevn yevpachem asa oxem tuka dista? ” Iskolant porikxa lagim pavtoch, porikxek khuincho proxn yetolo kai mhunn ekameka lagim vicharun xikpi parkunk bhonvtat toxim, kal eka vollkichean gozali kortana mhaka vicharlem. Kaim proxnank khuim zapo asat oxeo distat, punn khoreponnim teo asonant. Hich got mhaka tachea tea proxna vixim disli. Ani rati khattir nhidun astana, tachea tea proxnan mhaka oddit-oddit chintnanchea somdirant vhelo.

Toxem pollevnk gelear, khuinchench Novem Voros amkam ‘readymade’ oxe ritin kitench borem ghevn yena. Novea Vorsak kivam her dobajeank ami ‘readymade’ khubxem kitem ghetanv toxem Novea Vorsant ‘readymade’ oxem kainch guntun vo manddun dovorlelem asona. Dor Novea Vorsant jem kitem ami boreponn anvddetanv tem amche bhitor toyar korchem asta, ani uprant tem kortubanchea rupan bhair kaddchem asta. Amchem jivit jiyetana ami tor khinna khinnak borem yevjilem, borem anvddelem ani tem tea rupan bhair kaddlem zalear, “Novem Voros amchea jivitant kitem borem ghevn yevpachem asa” hachi ami, ghora bosun nustekar koslem nustem ghevn yetolo kai mhonnit vatt pollet boschi poddta tosli goroz upraspachi na.

Ji zat uloyta ti khuim monis zat,, ani ji uloyna ti mon’zat. Mon’xa ani mon’zati modli ontor hich oxem mhonntana ami sabar pavtti vachlam ani aikolam. Khorea bhangarachi porikxa korunk xettik tem kosak lavchi goroz poddta toxi, he gozalichem khoreponn zanna zavnk amkam tokli foddpachi goroz na. Mon’xak mon’zati poros vegllo rochla zalear, dubav nastana borem kitem, ani vankddem kitem hachi taka zannvay asa hem sot ami mandun ghetanv. Zalear, borem vo vaitt ghoddta taka zababdar mon’zat nhoi, monisuch asa hem konn-ui dolle dhampun sangtolo. Dusrea orthan, Novem Voros voros-uibhor novem korunk, boreponnachem korunk tachim sutram-yontram mon’xacheach hatant asat oxem mhonnchem poddta. Zoso monis aplo sonvsar choloytolo toso to choltolo, zoso to ghoddoytolo to toso to ghoddtolo. Pettoylole vatik legit palonk karonn asta. Toxi khuinchich gozal apo-ap cholona vo ghoddona. Dor ek gozal ghoddpa fattlean karonn asta. Ani hech nodrentlean Novem Voros legit boreponnachem zavpa fattlean karonn asta. Monisuch tache fattlem tem karonn mhonnpak kosloch porvanno vo lisens kaddchem poddona.

Dor eka mon’xachea monant jem xiztolem tench to uloytolo, ani fuddem vochun kortolo. Tachea chintnam ani kornneam pormannem tachem puray voros borem vo vaitt tem toch ghoddoytolo. Novea Vorsa disa, Russientle nagrik zoxe ‘Father Frost’-achi vatt tellun ravtat, toxem aplea hatant aslolem Novem Voros koslem boreponn ghevn yetolem tem dolleant tel ghalun pollet ravpachi taka matui goroz poddchi na. Karonn tea vorsacho porzollit fuddar tachea hatant asa! Tea vorsak ani kallak rup divpi toch dhoni asta!

Sompoytana…

Sogtteanchea mona-kallazamni orthabhorit ani folladik Novea Vorsache anvdde nixeunk anvddetam. Novea Vorsachim porbim!

www.goa-world.com/goa/

Decembre 31, 2010

Sorkari Nokrechem Pixem…

2010-12-03T22:20:00.000-08:00

SORKARI NOKRECHEM PIXEM.......

- Jose Salvador Fernandes

Fattlea satolleant vollkiche eke ostorek bhett korunk gelom. Ghorcheo gozali uloyta-uloyta ti mhonnpak lagli – “baba, mhoje dhuvek kazar korunk sodtam. Konn-ui boro bhurgo asa zalear sang am… punn to mat sorkari kam’ korpich asunk zai. Uprant to ‘peon’ zalear porian kontak yeta.”

“Oxem kitem? Dhuvek sorkarich ghov kiteak zai?! Dusro kiteak naka?” Hanv.

“Dusreanche nokrianchi khatri asona. Tankam kednam kamavele kaddun uddoyt mhunn sangunk zata? Kaddun uddoyle zalear poddlo mum sonvsar varear?” Ti atm-visvasan uloyli.

“age mauxe, toso konn varear poddta? Ani tum je toren yeujita ani uloyta tech toren panvalm marlim zalear, hea sonvsarant anik fuddar korpachi mannsugi asa?”

“Baba, monis jivitant ek pavtt kazar zata. Mhonntoch, chintun panvlam marchim poddtat. Ani soglea avoy-bapayank aple kazari dhuvecho fuddar tichea ghovachea ghorant sodanch surokxituch aslolo zai nhoi? Zalear, mhoje dhuve khatir sorkari kam’ korta toslo cheddo hanvem sodlo zalear tantum kitem vaitt asa?” Tinnem anik-ui fuddem vochun aplem mon ugtem kelem.

“Punn okosmat tuje dhuvek konn eka tarvotti cheddeachi soirigot aili zalear tum tika tache kodde kazar korchi na? Tarvotteanchi zodd bori asta, ani tuje dhuvek tum sodta ti khatri ani surokxa-i bori melltoli.” Hanvem tichea monantlem anik-ui chintop bhair kaddpachea hetun vicharlem. Zalear tinnem mhaka kitem sangchem?

“Polle baba, kazar zalo mhonntoch ghov-bailen zatat titlim vangdda asop borem. Bail hanga, ani ghov nov mhoine tarvar… bailek jednam ghovachi goroz asta tednam to tika mellona… ghovak bailechi goroz asta tednam ti taka mellona…. Bailechea jivitant oddchonneo-proxn uprastat tednam tankam fuddo korunk eke bailek aplea ghorkarachea sangatachem boll ani tenko zai asta… Tea khatir ghov sodanch sangata asop borem… Hem kitem?

Nov mhoineamni ghov tarvar thaun yeta, ani soiro koso ghora ravun kaim satolleamni porot veta.” Adinch sogleo zapo toyar korun dovorlole porim ti matui vell ogddaynastana uloyli.

“Ghov-bailen koxem ravop-jiyevop hachi tumkam bes-bori khobor asa. Punn mhaka tuji ek gozal somzona, tum sangta te toren ghov-bailen jiyeunk, ghov sorkari kam’ korpich kiteak asunk zai? Khasgi nokri korpi legit aplea bailank zata titlem kazari jivitachem sukh diunk tum chinta title fattim nant. Zalear, tuje dhuvek sorkari kam’ korpich ghov kiteak zai?”

“Baba, mhojea horddeant aslolea avoychea kallzacho husko ani anvdde tujea monak somzunche nant, nhoi mhunn te mandpache-i nant. Kallzacheo gozali kallzanuch somzun gheuncheo astat. Kazari jivitant sumara bhailea mogan jiyeum yeta, punn tea mogan pott mat bhorona. Pott bhortolem zalear nokrechi goroz asta. Tea khatir, fuddarache nodrentlean nokrechi surokxa-i zai poddta. Na zalear monak thar asona… barik chintun polle…”

Mhaka tiche kodde he babtint anik gozal korunk naka asli. Tea khatir, chalu vixoyacher uloupachem hanv thoinchea thoinch bond kelem. Ti tor sorkari nokri korpich zanvoym zai mhunn hott dhorun bosloli.

Ti uloytali te porim tichea monant ‘fokot sorkari nokri korpi zanvoym mhoje dhuvek kazari jivitant sukhi dovrunk xokta’ hi kolpona tichea monant mozbut ghor korun asli. Punn xevott meren mhaka ek gozal somzoli na – hika tor fuddem vochun dhuve khatir sorkari nokri korpi cheddo mellona zalear, hi dhuvek ankvaruch dovortoli kai?

Gozali-gozalimni, hoch proxn tika vicharun dislolo, punn…

EKA DISACHO GÕYKAR ?

2010-11-20T01:22:00.000-08:00

SON’VARACHIM SUNGTTAM:

EKA DISACHO GÕYKAR ?
- Jose Salvador Fernandes

Novembrache 16ver ani 17ver, 2010 Kuveitt xarant bhou dobajean, ghonnghonnan ani obhimanan Gõykaranchi Vixiv Porixod 2010 (Global Goans Convention 2010) zali. Jea hetun ti ghoddoun haddli, tacho hetu vevosthit ritin ani sufollponnim xarti pavtolo vo na tem kollpak vatt na. Fattlea-i vorsamni Gõyam bhair, pordesant osleo Gõy-Gõykarancheo porixodo zaleat. Tench kiteak? Dor vorsa, Agostache 20ver, kherit bhaxen Pordesantle Gõykar WORLD GOA DAY monoytat. 2000 vorsa thaun ho Dis monovnk survat zali. 1992 vorsa, Konknni Bhas Bharoti Ghottnneche Attve Vollerint aspavli tea nimitan WORLD GOA DAY pordesant zolma ailo. Mhonnche, ho Dis monovpak laglear 10 vorsam bhorlim. WORLD GOA DAY hea mathallea khal pordesantlea sogott Gõykaramni ekttaim yevn apli osmitay, sonvskrutay, bhas, porampora, songit, jevonn-khann, itihas, sonvskrutik daiz, adi. somarombhun, tantuntlean Gõykarponnacho obhiman jito-jivo korop,ani to fuddle pillgek-ui rakun-samballun dovrop, ho to Dis monovpa fattlo hetu asa. Sonvsarache fattir, zoxe porim, Canada (Toronto, Vancouver, Quebec, Montreal, Calgary), Australia (Melbourne, Brisbane, New South Wales), New Zealand, United States (New York, LA, New Jersey, Houston, California), Kenya, Mombasa, Tanzania, Mozambique, Dar es Salaam, Zanzibar, Tanga, Modli Udent, Purtugal, Spain, Pakistan, Jermani, Mumboi anik her sabar desamni, je Gõykar nokri kortat te sogle ekttaim yevn ho Dis monoytat. Pordesant utpon’n zalolea hea hetuk dhorun Gõyant-ui ho Dis monovpacho proyotn zala, punn pordesant monoytat tea panvddeacher, ani titlea nettan nhoi.

Pordesantlea Gõykarancho WORLD GOA DAY monovpa fattlo hetu bes-boro asa. Pordesant ravn ho Dis tim motte umedin ani obhimanan somarombhtat hi-ui ekdom’ bori gozal. Punn proxn yeta to ho – Gõykarponn eka disan somarombhun sompoum yeta? Vorsantlean ek pavtt – WORLD GOA DAY – ghonnghonnan monoun, uprant urlolea disamni Gõykaranchea Gõykarponnachem kitem?

Romi lipientlean Konknnichi udorgot zavchi mhunn, Gõyant Dalgado Konknni Akademi vavurta. Tech hetun, he Akademicheo khubxeo karyavolleo zatat. Akademicho sekretar hea natean, hea karyavollinchi khobor khobram-potrancher uzvadda yevche khatir, mhaka ti toyar korchi poddta. Khobram-potrank dhaddtana, Gõykaram meren pavpi khubxea website-ink-ui hanv ti khobor dhaddun ditam. Ek pavtt, oxich hi khobor, pordesantlea eka nanvostea Gõykarak-ui dhaddloli. Tednam tannem mhaka oxi zap boroyloli – “Dear Jose, we should always work hand in hand.” Pordesantlea Gõykaramni ani Gõychea Gõyant aslolea Gõykaramni sangatan, hatant hat ghalun vavrunk zai, oso hanvem to orth ghetlo. Dusrea utramni, pordesantle ani Gõyantle Gõykar, osmitay, sonvskrutay, bhas, porampora, songit, jevonn-khann, itihas, sonvskrutik daiz, adi. nodrentlean sangatan vavrinant.

Khorem! Pordesant zoim Gõykar asat, te Gõykaranche zunve zaleat. Tanchem tem Gõykarponn tanchea rabiteache ani vavrache xime purtench. Thoim te ap-aple porim, sabar rupamni Gõykarponn samballpacho ani jitem-jivem dovorpacho khub thokos ghetat. Punn tanchea tea Gõykarponnacho som’bond Gõychea Gõyam kodde khuincheach rupan zoddlolo disona. Dekunuch, sonvskrutay, bhas, porampora, itihas, sonvskrutik daiz, adi. nodrentlean pordesantlea Gõykaranchem Gõyak vhoddlexem yogdan favo zalolem disona.

Pordesantlo Gõykar pordesant astana sabar ritimni aplea Gõykarponnachi niga gheta zalear, titloch taka Gõychea apleponnacho husko ascho poddtolo; ani tech apleponnantlean ani huskeantlean tannim Gõyak pordesantlean favo tem yogdan divpachi goroz astoli. Poristhiticher nodor marlear, tankam hi goroz azun-ui bhasunk na mhonn disun yeta. Dekunuch, pordesantlo Gõykar Gõyant yeta tednam, pordesant astana WORLD GOA DAY osmitay, sonvskrutay, bhas, porampora, songit, itihas, sonvskrutik daiz samballpachea jea hetun to monoyta, tea vixoyam vixim hanga tannem koslich bhasabhas vo khottpott keloli disona. WORLD GOA DAY-a nimitan to je-je vixoy somarombhta tea vixoyancheo sonvstha Gõyant asat. Bhaxechi asa, sonvskrutayechi asa, daizachi asa, songitachi asa. Punn hea sonvstham kodde tannim som’bond zoddlolo, bhasabhas ani gozal keloli vo mon ghalolem matui disona. Oxe poristhitint, pordesant ravn vorsantlean ek dis WORLD GOA DAY monovop hem khub sompem ani nanvachem koxem dista.

Konknni bhas Ghottnneche Attve vollerint gelolea nimitan WORLD GOA DAY monoytat mhonntoch, pordesantlea Gõykaramni aple osmitayechem protik (khunna) aslole Konknni bhaxe khatir khubxeo gozali korum yetaleo. Konknni bhas sorvangi fulche khatir bhaxechea nanvan ani bhaxe udexim Gõychea Gõyant bhaxeche, sonvskrutayeche, daizache mellave ghoddoun haddpachi kolpona ghevn fuddem yevnk azun-ui vatt meklli asa. Pordesant zo eka disacho Gõy Dis monoytat, tache poros anik-ui khubxe, sonvsarbhor ximpoddlolea Gõykaranche som’bond mozbut korpachem, eka unchlea panvddear tancho ekvott ghoddovpachem ani tantuntlean bhaxechim, osmitayechim ani Konknni sonvskrutayechim pallam-mullam okhondd zatat toslem kitem-i korpacho vichar pordesantlea Gõykaranchea ekvottan ani sangatan zavpachi goroz asa.

- Vhoilo lekh, Global Goans Convention-Kuwait 2010' 'Yadostik' (Souvenir) Pustokacher uzvaddak haddla.

Ho Koslo Obhiman ani Svabhiman?

2010-11-13T20:38:00.001-08:00

SON’VARACHIM SUNGTTAM:

Ho Koslo Obhiman ani Svabhiman?
- Jose Salvador Fernandes

Gõyantlea Gõyant kednam-i purtugezancho ul’lekh zata tednam, Gõyantlea kaim lokak osoch, orth naslolo ani sanje pejek upkarona toslo boball korun dista. Toxem pollevnk gelear, tancho to ornneantlo boball oxench mhonnchem poddtolem.

Gõy rajyantlea kaim xarantlea ani ganvchea rosteank vo imarotink purtugez nanvam asat. Itlim vorsam hea purtugez nanvancho vapor zait fuddem aila. Aiz teach nanvan tea rosteank vo zageank vo imarotink vollkotat. Dhormancho bhed-bhav korinastana, Gõyantlea khubxea lokamni tim nanvam mandun ghetlim. Tancho vapor kelo. Azun-ui vaportat.

Punn itlea kalla uprant, Gõyantlea kaim zonnank atam vochun, tanche zannte pirayer, tea rosteanchim vo zageanchim vo imarotinchim purtugez nanvam bodlunk zai oxem dista. Tornne pirayer, kuddint rogtacho fors aslo tednam him nanvam bodolchim oxem tankam kednach dislem na. Khorem mhonnlear, te-ui itle kall tinch nanvam vaprun itlea meren ailole. Punn atam okosmat tankam tea nanvanchi bexttich addkholl zalolea porim dista. Dusreank konnak tachi addkholl na thoim, hankam addkholl asa dista.
Purtugezamni Gõycher 450 vorsam raj choloylem. Gõykarancher tannim zulumponn choloylem. Gõykarank tannim khubuch tras kele. Dekun, tanchem kitench vaprop na, oxem tea dhormvadi Gõykaranchem mot asa. Dekunuch te Gõyant aslolea rosteanchim vo zageanchim vo imarotinchim purtugez nanvam bodlunk zai mhonn boballtat. Punn purtugezanchi ji chal-rit apunn palltat ti mat soddun divnk raji nant. Dekik, konn eklo advogad apnnak Gõycho ani desacho obhiman ani svabhiman asa mhonnit purtugezancher vikh onkhta, tednam to mat purtugezamni haddloli sutt nhespachi chal soddun dina.
Khuinch nhoi zalear, korttache panvdde tori choddtana to sutt aplea angar choddoyta. Konn eklo svotontr soinik, eka dobajeache machier purtugezamni haddlole butt ghalun purtugezancheruch utranche far xevttita. Oxeo anik-ui khub dekhi asat.

Purtugezanchi apnnak ‘allegry’ zalolea porim sovongam korpi hea Gõykarank, disonk naka aslem tache poros-ui khub pavtti purtugez tankam porki distat. Tannim haddloli bhas ani te bhaxechim okxoram-i tankam porki distat. Punn te inglez bhaxechim okxoram vaprun aplim nanvam, vo aplo koslo-i vevhar kortana tankam koslench porkeponn disona. Inglez hi porki bhas mhunn hanche modlo konn-ui eklo, Gõyant uzvadda yevpi inglez disallem vachinastana asa hoi?

Aiz purtugezank gallio ghalpi he lok, itlo kall kiteak ogi asle tem zanna zavpacho proyotn korun-ui somzona. Itlench nhoi, Gõyant jednam Purtugez Konsuldad (Consulate) zali, Fundacao Oriente suru zali, tednam he lok khuim nhiden bhormetale kai oso sobhavik ritin proxn ubo zata. Itlench nhoi, dor vorsa, Gõychi ek nanvosti kolej, Ponnje Kala Akademint Purtugez gitanchi spordha ghoddovn haddta tednam, tache add nixedh marunk he lok khuim sanddlole astat kai? Tednam tancho Gõycho obhiman ani desacho svabhiman Gõyche khuinche nodint - Mandovi kivam Zuari – buddlolo asta kai? Gõycho kitlo lok aplea potta khatir purtugalak veta. Tednam, Gõychea Gõyant, tanchea pottachi vevostha zata tosleo nokreo divn, he lok tankam purtugalak vochpache kiteak addavnk fuddem soronant kai?

Aiz kall bodol’la. Aiche pillgechem mon odik rundayen ani meklleponnan vichar korta. Taka lagun, xakek upkarona toslim hea bhou thoddea purtugezam add ulovpeanchim vaingim aiz tim aplea kanank bandun ghenant. Tanchea hea ‘outdated’ vicharank tim mol-mhotv dinant. Tanchea tea orth naslolea vicharamni ghuspun ravlear, apunn fuddem pavchim nant hachi tankam bes-bori khobor asa. Dekunuch, Purtugezanchi chal apnnavn purtugezankuch vaitt mhonnpi hea lokamni apli ‘contradictory’ jinn tharear ghalpachi goroz asa. Tharear mhunn ghaltole koxe? Ek pãym pavla fonddant!

http://www.goa-world.com/

Vattar Bodlot, Gõykar Bodolcho Na !

2010-11-06T02:45:00.000-07:00

SON’VARACHIM SUNGTTAM:

Vattar Bodlot, Gõykar Bodolcho Na !
- Jose Salvador Fernandes

Kornattokachea Karwar, Supa ani Joida vattarant khubxe Gõykar vosti korun asat, oxem svota heach vattarantle lok sangtat. Apunn Konknni ulovpi Gõykar lok hem-ui te sangunk fattim soronant. Aplim pallam-mullam Gõyant asat dekun , he tin-ui vattar Goyant vilin (merge) korche mhunn hea vattarantlea lokachi khorayen magnnim asa. Apunn koxe nizache Gõykar asat tem dakovnk apnna kodde itihasik purave asat, oxem-i te sangtat. Voile tin-ui vattar Gõyant vilin korpacho tancho hott itlo khor zala, tea atam aplem hem magnnem ghevn Suprim Korttachea darar pavleat. Tanche he khuxek ani magnnek Kon’nodd lokancho virodh asa. Te nodrentlean tannim andolan-ui choloylam.

Toxem pollevnk gelear, Gõyam bhair aslolea Gõykaranchean, apunn jea-jea zagear vosti korun asat, thoimsor ravn-ui aplem Gõykarponn, apli osmitay, apli vollok samballum yeta. Je monis aplea ganv-ghora pasun pois asat, te khuim sodanch apleo chali-riti, vollok, osmitay odik bore bhaxen samballtat ani tigovn dovortat. Tea khatir, Karwar, Supa ani Joida vattaramni vosti korun aslolea Gõykaramni apunn jea zagear vosti korun asat thoinch aplem Gõykarponn adim pasun chalik laylolem toxem chaluch dovorpachi goroz asa. Itihasik karonnak lagun, hea Gõykarancher Gõyam bhair vochpachi palli aili asum-ie. Tea khatir te thoim khub vorsam vosti korun asat. Punn atam vochun, tea vattaramni sogle Gõykaruch asat mhunn te zage Gõyant vilin kor mhonnop, kaideak dhorun asa oxem disonam.

Aiz meren je Gõykar Gõyam bhair asat tankam Gõykaramni bhairavnk nant. Te Gõychea khuinchea-i konnxak asum, tankam svotachea Gõykaramni kednach porki lekhunk ani vagovnk nant. Konknni bhaxechea dhagean te sodanch som’bondan ani ekvottan ravleat. Tech nodrentlean, Gõyche xime bhair aslolea Karwar, Supa ani Joida vattarant vosti korun aslolo Gõykar ani Konknni monis, Gõy rajyantlea Gõykarank porki disona, dusrea vattarantlo disona. Osmitayechem sut aslole Konknni bhaxe udexim Gõykaramni tankam sodanch apleponnan vagoyleat. Te Gõychea xezareak asun-ui, tanche kodde uloytana-misoll zatana tankam xezari koxe kednach disunk divnk nant. Aplech mhunn vagoyleat. Hachem khoreponn Konknni Sommelonam ani Porixodo zalolea vellar konnak-ui disle bogor ravnk na.

Apnnak Gõykar ani Konknni monis mhunn sogleamni vollkololem zai dekun, Karwar, Supa, Joida he vattaramni ravpi Gõykaramni te vattar Gõyant vilin korpachem andolan korche bodlek, hea vattaramni jeo karyavolleo ani hal-chali asat ani zatat teo tannim Gõyam meren haddum yetat. Hech nodrentlean Gõykant ravpi aplea sangateank tannim apunn vosti korun aslolea vattaramni koslea-i nimitan yo-voch korpachi sondi divn, Gõykarponnachem natem, som’bond ani vangddach bhas samballop hem khub xanneponnachem thartolem. Tantuntlean, Karwar, Supa, Joida hea vattaramni ravpi Gõykar,aiz je aple apunn porkeponn bhogtat, teo porkeponnacheo tancho bhavna-i pois zatoleo.

Tednam, tankam apunn ravtat te vattar Gõyant vilin korche khatir, andolan ani korttache panvdde choddpachi-i goroz poddchi na. Taka lagun, aiz thoimsor he vilin korpache gozalik lagun Kon’nodd lokachea monant-ui kodduponn nirmann zalam, ani tea nimitan dusmankayecho goddbodd cholta, to-ui khuim tori bond poddtolo.

Motdarank Mol Yeta…

2010-10-16T02:35:00.000-07:00

SON’VARACHIM SUNGTTAM:

Motdarank Mol Yeta…
Jose Salvador Fernandes

Otubrache 31ver, 2010 Gõyant Nogorpalikancheo vinchnnuko. Hea vinchnnukanchi toyari boreach nettan chalu asa. Toxem pollevnk gelear, halinchea kallar, uprant teo Panchayaticheo, Zilla Porixodecheo, Vidhan Sobhecheo, Lok Sobhecheo vo anik kosleo-i zaum, hea sogllea vinchnnukank sumara bhailem mhotv ailam. Hem mhotv noitik nhoi, sot’teche nodrentlean ubem zalam. Dekunuch, aiz khuinchea-i panvddeaveleo teo vinchnnuko zaum, tantum svarth asloleank apo-ap ‘interest’ yeta.

Kosleo-i teo zaum, vinchnnuko lagim pavta-pavta, motdaranchem mol vaddunk lagta. Motdarank ogich, boslole kodden mhotv yeta. Toxem pollevnk gelear, tem mol motdarank vinchnnuk loddovpi umedvaruch ditat. Vinchnnukam vellar, vinchnnuk loddovpi umedvar motdarank mathear ghevn nachtat. Motdar sangtat tem kitem-i korunk te raji astat. Tea vellar motdarank khuxak dovrunk te pãymamni kitli-i vatt cholonk aite astat. Dusrea utramni, aplo zago tea-tea panvddear mozbut korunk te motdaram khatir kitle-i mov zavnk aite astat. Vinchnnukechea rattavollinchea disamni, te motdaranchea ghorache umbre maddounk zotiancheo kitleo-i paro zhorovnk toyar astat.

Konna-i koddchean tor chodd nhoi zalear, thoddem tori ‘business’ haddunk zai zalear, LIC-chea ‘agent’-ank ek gozal bore ritin khobor asa. “Business’-a khatir ‘client’ mhunn sodunk to jea ghorant bhitor sorta, tednam to tea ghorant lhan bhurgim aslear tancher kherit bhor dita. Tanche kodde chodduch khellta, fokannam korta, tanchi loktubay korta. Ani dusre pavtt to tea ghorak bhett ditana, tea lhan bhurgeam khatir bhurgeanghe avddichi oxi kosli-i vost hatant dhorta, ani apurbay kortole toren, avoy-bapai uzram ti khavpachi vost tea ghorantlea bhurgeank dita. Aplea bhurgeanchi khuinche-i ritin konnem-i apurbay keli zalear avoy-bapuy khuxal zatat.

Aplea bhurgeanchi apurbay korpi mon’xa thaim avoy-bapayche-i il’le-il’le korun boreponnache som’bond vaddtat. Ani tednam, hea LIC-chea nanvan aplo ‘business’ korpeak-ui tanche koddchean aplo ‘business’ korpak vatt borich meklli zata. Dusrea utramni, bhurgeam udexim to avoi-bapaychem mon jikta. Hem sangpa fattlem karonn?
Hoi-nhoixe torechi gozal mhojea-i jivtant halinch ghoddli. Aitar soddun hanv ghora mellonam. Mhonntoch, fattlea Aitara, amche Nogorpalikechi vinchnnuk loddovpi, amchea vaddeantle, fattim-fuddem dog umedvar mhaka bhettle. Pottounche khatir…. Vinchnnukek apnnak mot ghal mhunn sangche khatir…. Punn, hansdot-hansot mot ghal mhunn sangche poilim, tannim dogaimni, ap-aple porim mhaka jikon ghevpacho prototn kelo…

Eklo mhonnpak laglo – “boro vavr korta tum… khubxe pavtti ‘paper’-ancher fottu polletam hanv tuje… khorench, tuje oxe fottu potrancher ba polletoch hanv khuzxal zatam… kitlem-i zalear amchea ganvak nanv nhoi tem? Osoch tuzo vavr chalu dovor… ani kednam-i, kosli-i karyavoll korpak tumkam mozot zai zalear sang mhaka… ”

Dusrea umedvaran-ui mhaka chonneachea zhaddar choddovpacho proyotn kelo – “ adim tujim borovpam vachtalom hanv… tim mhaka vachunk khub avoddtat… boro boroyta tum…” Monant mhonnlem, hem soglem sangunk Nogorpalikechi vinchnnuk yeum porian kiteak ravnk zai aslem? Ghor kaim chodd pois naslem?

… vinchnnuko lagim pavta-pavta motdarak apo-ap mol yeta mhonnta ti hi gozal!

________
Sonv'var, 16 Octubr 2010
www.goa-world.com

'AMCHO AVAZ' - Jose Salvador Fernandes

2010-10-02T00:40:00.000-07:00

SON’VARCHIM SUNGTTAM: ‘AMCHO AVAZ’
- Jose Salvador Fernandes

Avaz! Amcho! Kherit bhaxen Konknni mon’xancho. Mukhelponnan Konknni mon’xam khatir. Ani viprit ritin Konknni mon’xamni kelolo avaz. Mhonnche, xevttim Gõykarancho avaz. Vegllea utramni amcho avaz!

Hoi! Anik thoddeach satolleamni, Konknniche Romi lipentlean ‘AMCHO AVAZ’ nanvachem disallem-potr (daily paper) suru zavpachem asa. Itlo kall, Konknniche Romi lipientlean ek disallem uzvadda yevchem oxem, oso kherit bhaxen Romi lipientlean Konknni jiti-jivi dovorlolea sogott Gõykarancho mona pasun anvddo aslo. To atam xarti pavtolo. Hacho orth, hache poilim Konknniche Romi lipientlean ek-ui disallem uzvadd yevnk na oxem nhoi. 1907 vorsa SANJECHEM NOKHETR hem Konknniche Romi lipientlean uzvadda ailolem poilem-voilem disallem aslem. Tea uprant Novem Goem, Goencho Avaz hea nanvanchim disallim uzvadda yevn, tannim Romi lipientlea Konknni vachpeanchea monachi dispott’tti tan-bhuk marlea. Punn uprant, na-na torechea addkhollinchea fatrank lagun tim disallim, disallim mhunn fuddem uzvadda yevnk pavlim nant.

Atam khub kallan oxem, Konknniche Romi lipientlean anik ek disallem uzvadda yeta –‘AMCHO AVAZ.’ Khorem mhollear, Konknniche Romi lipentlea mon’xancho avaz gazovpak ani aikopak oslea disalleachi borich goroz asli. Ti goroz atam hem novem disallem chalik lagona borabor bagtoli. Itlench nhoi, tor hea disallea udexim Konknni potrokaritent-ui mol-mhotvachi bhor poddtoli, vangdda Romi lipientlean Konknni bhaxechim pallam-mullam ghott-mozbut zatolim ani tem disallem Gõykarnchi osmitay ani vollok mhunn fuddem sortolem.

Konknni bhaxecho itihas ustun pollelear, Gõychi ani Gõykaranchi osmitay rakun-samballun dovorpacho bhouch mol-mhotvacho vavr kelo to Konknni potrokariten mhunn disun yeta.

Konknni potrokarita 2 Fevrer,1892 vorsa, UDENTECHEM SALLOK hea neamalleantlean suru zali. Hem nemallem dor mhoineak ek pavtt uzvadda yetalem. Fuddem vocgun tem pondrallem zalem. 1894 vorsa hem ppondrallem bond poddlea uprant, Konknnintlim ani Konknniche Romi lipiecho bhag aslolim sabar Purtugez ani Inglez nemallim uzvadda ailim. O Concani, A Luz, O Luso-Concanim, O Liberal, O Goano, Tribuna, Porjecho Avaz, A Lua, Catholic Sovostkai, Dor Mhoineachi Rotti, The Popular Magazine, Ave Maria, The Goa Mail, O Amigo do Povo, Konkani Boletim, A Tribuna , Gulistan , Defensor do Povo, Amcho Sounsar, Amcho Gao, The Goan Herald, Niz Bhavarti, The Goa Times, A Voz do Goano, Porjecho Adhar, The Goan’s Own Magazine, Vavraddeancho Ixtt, Novem Goem, Gõykar, Gulab, The Goan Review, Konkonn Divo, adi. oxea sabar nemalleancho tantum aspav zata. Oxe he Konknni potrokaritentlean Romi lipientlo Konknni monis apli bhas samballit fuddem sorla.

Khobram-potr hem khobro divpi bhou purvilem madeom. Hea madeomacho TV-k ani reddiok khub faido zata. Aiz jeo TV-cher, khobram chenolancher vo reddiocher jeo khobro vitraytat, teo poylim borovn kaddtat ani uprant vhoddlean vachun aikopeam khatir vitraytat. Punn hea khobrantlean, aikopeank jitli-i te-te khobrechi barik-sarik mahiti zai ti vellache moryadik lagun khubuch pavtti diloli nasta. Punn ti khobram-potrancher mat purayponnim vachunk melltat. Xiklole porjek khuim khobram-potram him khobrechi mukhel zhor asta. Tea khatir, khobram-potrank ek visvaxi vachpi asta.

Aiz sonvsarant, Bharotant ani Gõyant legit jem kitem ghoddta tem aiche sudarlole teknolojik lagun ami aiche aiz zann zavpak pavtat. Aiz ghoddloleo gozali jeo faleam khobram-potrancher uzvadda yetoleo teo News Chenolam udexim aiche aizuch kollta. Torui astana, oxe fattbhuyecher aiz-kal khobram-potrank khuinch mar boslolo disona. Adim hea madeomak jem mol aslem tem aiz-ui asa. Oxe poristhitint, Konknniche Romi lipientlean ‘AMCHO AVAZ’ hea disalleantlean, atam Konknni potrokaritek odik dhar ani ek vegllem moddon yevpachi vatt toyar zata.

Itlo kall, mona-kallzantlean Romi lipentlea Konknni mon’xak Romi lipientlean ek disallem zolmak yevchem mhunn axetale ani anvddetale. ‘AMCHO AVAZ’ disalleantlean tachi hi axa ani anvdde atam xarti pavtele. Tache he anvdde-axa xarti pavoita-pavoita hem disallem dubav na Konknni potrokaritechea mollar mol-mhotvachi bhor ghaltelem. Tech khatir, dor eka Gõykaran ani konknnean hea disalleak aitea monan-kallzan yevkar divnk favo.

http://aitaracheokaskuleo.blogspot.com/
http://www.goa-world.com/

Bosvaleank fokot tikett-duddvanchoch husko?

2010-07-09T22:04:00.000-07:00

SON’VARACHIM SUNGTTAM:

Bosvaleank fokot tikett-duddvanchoch husko?
-Jose Salvador Fernandes

Poir, Julayache 5ver, Bharot Band zalo. Ani teach disa, Gõyant Akhil Gõy Khasgi Bos Dhoniamni khasgi bosi bond dovorpacho nirnnoy ghetlo. Ho nirnnoy tannim ghetlo to Bharot Bandak tenko diunk nhoi, punn te sorkara thaim tikettiche duddu vaddounk magtat taka sorkar kan haloina hem tache fattlem karonn. Tea disa, Bharot Bandachem nimit dhorun Akhil Gõy Khasgi Bos Dhonianche Songhottnnen rosteavelean dhanvpi bosi bond korun kitem zalem?

Don gozali zaleo.
Ek, tannim tea disa bosi bond dovorleo tacho probhavuch zalo na mhonnchem poddta. Kiteak, tea disa Bharot Band dekun, Bandachea nimitan vhoddlo-so lok kamak bhair soronk na. Mhonntoch, tea disa tannim jea hetun bosi bond dovorleo tacho zaunk zai aslolo probhav zaunk na. Tannim bosi bond dovorleo tacho probhav Bharot Bandant virgollun gelo.

Dusri gozal. Bharot Banda nimitan apleo bosi bond dovorlole Akhil Gõy Khasgi Bos Dhonianche Songhottnna tikettinchi dor vaddoupachea hetu vixim kitli gombhir asli tem thavem zata. Ailear dongor ailo, ani gelear sut gelem oxe torechem tanchem mon tea disa disun ailem. Na zalear, to dis soddun, her khuinchea-i disa apleo bosi bond dovorpacho tannim kiteak nirnnoy gheunk na, oso ek sobhavik ritin proxn monant ubo ravta.

Julayache 5ver apnnem bosi bond dovorlolo tacho probhav vhoddlo-so zaunk na hem Akhil Gõy Khasgi Bos Dhonianche Songhottnnek apo-ap kollun ailem. Dekun tannnim kacha-kuchu, kacha-kuchu korun atam Julayache 12ver thavn eksarke sompar vochpachem jahir korun sorkarak bhivoupacho proyotn-so kelo. “Tujem soglench mandun ghenam, punn tuka itlem tori ditam” oxea monan sorkaran tanchi tikett vaddoupachi magnni mandun ghetlea. Dekun, tannim 12 tarkecho somp atam fattim ghetla.

Akhil Gõy Khasgi Bos Dhonianchi Songhottnna ghoddlear khub-so kall zalo zaunk zai. He Songhottnnen aiz meren apleach purto, apleach faidea purto vichar kela tem polleunk mellta. Jitle-i pavtti petrol-dizol vaddta, title-i pavtti tikettichem mol vaddoupachi tanchi magnni asta. Thodde dis annponnam korun-ui sorkar tanche magnnek bhik ghalta ani titlean te thondd zatat. Kitlo kall porian? Fuddle pavtt petrol-dizolachem mol anik matxe vaddum porian.

Akhil Gõy Khasgi Bos Dhonianche Songhottnna petrol-dizol mharog zata sorkaran tikettichi dor vaddounchi mhunn khottpott korta; apnnacher onit zalolea vori ti nhidantli zagi zata. Punn tanchea bosimni provas korpeancher jednam onit zata tednam mat hich Akhil Gõy Khasgi Bos Dhonianchi Songhottnna gop-chup asta. He Songhottnnecho ek-ui fuddari provaxeancher zatole oniticher avaz uttounk fuddem sorona.

Dekhik:
- Bosint provaxeank gheupachi ek xim’ asta. Punn, duddvanche axen, bosinche dhoni vo her tanche kamdar sumara bhair provaxi lottun-chepun bosint bhorun provaxeancher onit kortat. Oxea vellar, Akhil Gõy Khasgi Bos Dhonianchi Songhottnnam he gozalik kiteak dolle dhampta?

- Khubxe pavtti, provaxeanche duddvanche axen bosvale ‘speed competition’ lavun khelltat, ani tantuntlean bosin provas korpeancho jiv sonkoxttant ghaltat. Khubxe pavtti te ‘speed’ spordhecho xevott obsoegant zata ani khubxe pavtti provaxi zokhmi zatat, thodde mortat legit. Osli poristhiti tallunk Akhil Gõy Khasgi Bos Dhonianche Songhottnnek apleach mon’xank ek xist toyar korche khatir kiteak panvlam ubarun disonant?

Bosin provas kortolea poinnareanche nodrentlean anik-ui osle sabar proxn-oddchonneo asat tancho-i Akhil Gõy Khasgi Bos Dhoniamni vichar korpachi goroz asa. “Ami tikett vaddounk maglem ani ti vaddoyli, amchi goroz zali” oxea monachea ani sobhavachea khasgi bosvaleamni provaxeank man-respeitan vagoupachi goroz asa. Zanchea khustar bosvale jiyetat tea provaxeank bosin provas kortana tanche hok’k kaidean diupachi goroz asa. Akhil Gõy Khasgi Bos Dhonianchi Songhottnna aplea vangddeank heo gozali sangot kai?

www.goa-world.com
10 Julay 2010
(c) All rights reserved.

Hatiyaracho Goir-vapor Zaunk Lagta Tednam…

2010-06-11T23:28:00.000-07:00

SON’VARACHIM SUNGTTAM:

Hatiyaracho Goir-vapor Zaunk Lagta Tednam…

-Jose Salvador Fernandes

“Tumi kitem re baba? ‘Net’-avelean ani potram-masikantlean tumi tench-tench zoroitat!” Tin dis poilim konn eklo vollkhicho Konknni mogi mhaka mell’lole kodden mhonnpak laglo.

“Ami tench-tench kitem zoroilam saiba?” Hanv.

“Tuka khorench khobor na?” Nigtoch udeunk laglolea surya porim tachea gorea mukhamollar matxe tambsann udeli. Hanv goddibhor ogich ravlom. Punn dusrech goddiek mhonnlem -

“Tem amchem motanchem ani vicharanchem zhogddem, tantum dusmankayechem oxem kainch na.”

“Tumchim tim ‘net’-avelim ani masik-potramvelim boroupam je ritin boroyleant tim vachlear, tantum fokot dusmankay nhoi, dusmankaye xivay anik khub kitem asa.” Apnnakuch konnem soroll okman kelolea porim to boroch serious zalo.

“Toxem nhoi ga tem,” hanvem mhonnlem. “Voilea-voir polletoleak tem motam-vicharanchem zhogddem dusmankayechem zhogddem dista ga. Itlea khol ani dharechea vichar-motanchem zhogddem tem!”

“Mhaka ek gozal sang! Vichar-motanchea zhogddeant ekamekachea bhesak voir kaddpak, ekamekachea vavrache kritikek, ekamekachea vavracher xenn-chikol marpak khuim zago asta? Zalear, vichar-motanchem zhogddem mhonnche poros tem dusmankayechench zhogddem oxem mhonnchem poddlem na?”
Itlem uloun to mhoje zapechi vatt pollet ravlo. Hanv matso vell ogich ravlom, ani uprant mhonnlem –

“Polle. Khuinchi-i gozal tum je ritin gheta tech ritin tum somzota nhoi? Tantum dusreak guneanvkari tharaum yeta ga?”

“Puta mhojea, tumchea tea sogllea boroupantlo ‘tone’ somzot ani utram pollet zalear, tumchea monant ekameka add kitem-kat xizta tem konnak-ui sompeponnim kollon yetolem. Ani mhaka dista, mhoje bhaxen her-ui tem bes-bore ritin somzoleant.” To atm-visvasan uloilo oxem mhaka tea vellar dislem.

“Tea gozalimni dusmankayechem oxem kitench asa oxem mhaka disonam. Tuka mhojea sangnnea urfattem dista zalear mhojean mhonn kitem korum yeta?”

“Borem! Tujea motak dhorun cholum-ia tem vichar-motanchem zhuz. Vichar-motanchem zhuz zalear, dor eke zapentlean ani manddlolea vicharantlean hem monanchem zhuz disan-dis fuddem vochun xevttim tantuntlean kitem tori ‘conclusion’ yeunk naka aslem? Ailolea disa amchea sarkea vachpeank legit vitt yeum meren tench-tench orth naslolem kalovop, ghunvon-firon teoch-teoch gozali borovop, bhasabhaxecho mullavo ‘point’ soddun modinch anik kosli, matui som’bond nasloli gozal challop, modinch ekamekacher arop korop, boglanttam ghalop, apnnak sopurnn somzun hachim-tachim kutam kaddop, boroupantlean nosay ani ‘ego’ legit ugto korop ani oslem zaitem. Sodanch ugddas dhor cheddea, hatant hatiyar asa mhonn tacho koxea-koso-i goir-vapor korcho nhoi. Kiteak, ek pavtt tea hatiyaracho goir-vapor zaupak lagtoch, tea hatiyarak zo asonk zai aslolo to orth urona. Konknni mollar tor nhoich nhoi.”

Survatek thaun je gozalichem khoreponn to mhaka pottounk sodi tem mhaka tachea tea xevottachea utrantlean pottlem.

(c) www.goa-world.com
Son'var, 12 Jun 2010

Various Konkani Links
courtesy: http://www.konkanirocks.com/ :

KONKANI SONGS
http://www.youtube.com/watch?v=69RTTkWREtc Mando Goencho
http://www.youtube.com/watch?v=xgYtnu4rhdg Claudia
http://www.youtube.com/watch?v=fOoTdEdyIH8 Dol Mojea Bai
http://www.youtube.com/watch?v=Td-WU89mi7Y Nirmonn film
http://www.youtube.com/watch?v=N2RIAS_zFZg Amchem Noxib film
http://www.youtube.com/watch?v=sdkVDS1EqT4 io moga
http://www.youtube.com/watch?v=q1w95jUCHDU Bebdo
http://www.youtube.com/watch?v=AHuPf_MK54Q Tuzo Mog Lorna
http://www.youtube.com/watch?v=pDUzM0n48Ak Red Rose Lorna
http://www.youtube.com/watch?v=wdCgV9bBQ0U Juliana
http://www.youtube.com/watch?v=GReOnE2g6pw Rajan & Prema Remo + Alisha
http://www.youtube.com/watch?v=QUBpfaI_W8U Paka paka Lorna
http://www.youtube.com/watch?v=1MMxXaySEE0 Goa Amchem
http://www.youtube.com/watch?v=m8lgxXWJhIc Ye ye Cathrina
Henry D’Souza + Helen D’Cruz
http://www.youtube.com/watch?v=gKBVGobyFwo Paanch Vorsaam Remo & Alisha

Tiatr
http://www.youtube.com/watch?v=T6SpOapIVkI Roseferns tiatr
http://www.youtube.com/watch?v=6qbI1cpSsL0 Luis Bacchan
http://www.youtube.com/watch?v=Y0ERfCNGDiw Wilmix & Sharon
http://www.youtube.com/watch?v=nbTA1kPtxK0 Dekhni
http://www.youtube.com/watch?v=_UW-NbDGA9s Kunbhi

Adle Zomnivele Khell

2010-06-04T22:49:00.000-07:00

Adle Zomnivele Khell

- Jose Salvador Fernandes

Eke pillge koddchean dusre pillge kodde, dusre pillge koddchean tisre, tisre koddchean fuddle, oxem eke pillge thavn fuddle pillge kodde tonddim (orally), onukoronn korun, vo polleun zo khell vo songit fuddem yeta taka lok-natteo (folk theatre) vo lok-git oxem mhonntat. Hem lok-natteo konnem ani kednam rochlem, ghoddlem hachi konnakuch khobor na.

Dusrem, lok-natteont songitacho sangat gheunche khatir jim vazontoram vaportat tim khoddboddit (crude) torechim astat. Dekhik ghumott, dhol, kax, kansallim, pirluk. Songitacho sangat diunk him vazontoram vazoitat tancho avaz ami barik-sarik aikolear to hea vazontoram itloch khoddboddit asta, ani khubxe pavtti to avaz naka titlo amchea kanar ani horddeantlea kallzar legit marun amkam kimar korta.

Tisrem, lok-natteont jem uloup asta, tem ganvgirem, kheddeantlem, ‘polish’ korunk naslolem asta. Lok-natteantlim jim patram uloup kortat tim tonddak yeta toxim uloitat, tonddak yeta toxim gaitat. Dusrea utramni, lok-natteo boroylolem asona, ‘ailem toxem gailem’ oxea rupachem asta.

He, lok-natteache voile faskent Zagor ani Khell he prokar bes-bore bostat, ani teach karonnank lagun, Khell ani Zagor lok-natteo prokar oxem amchean mhonnum yeta.

Aiz jea prokarak ami zomnivele khell mhunn vollkhotanv tea prokarak adim, ‘Fell’ mhonntale; uprant tea ‘Fell’-achem ‘Khell’ zalem, ani atam odik ‘polished’ ritin tankam ‘Zomnivele Khell’ mhonntat. Kiteak hea fellank vo khellank machi asonasli, te zomnicheruch nachtale vo khelltale. Dekunuch tankam Zomnivele Khell mhunn nanv poddlem.

Don Toklean, Nicklau Martinan, Kottombichea Santiago Pereiran, Francis de Paroda zaka khellant ‘Shalibai’ hea nanvam vollkhotale, Menino Afonso, Magnier Rod-an zomnivele khell kelloile ani khelloile. Tanchea uprant, Socorro Piedade, Anton Moraes, Vitorino Pereira, Patrick Dourado, Ligorio Fernandes hannim-i hea poromporik khellank mhotvachem yogdan dilem.

Khorem mhonnlear, poilo Fell vo Khell vo Zomnivelo Khell konnem toyar kelo, tachi survat khoinchea ganvant zali, hem sodun-ui hatak lagona, nhoi mhunn konn sangonk-ui nokllo. Punn he boroinastana toyar korpache khell mat vichitr toren ube kortale. Konnn eklo apli ek kotha gheun yetalo. To ti kotha khellanchim kantaram toyar korpi mestrik sangtalo. Mestri te kothek lagu zatat toslim kantarm ghoddtalo. Uprant, to apnnem aikolole kothe pormannem, tantum anik-ui bhor ghalun khellgodde vinchun kaddtalo. Ho mestri uprant kolakaran ucharpache, kotha-vostucher adarlolo son’vad vo uloup apunn sangtalo, ani to-to khellgoddo tea son’vadant aple porim mitt-masalo bhorun uchartalo. Oxea vellar dusrea kolakaran tachea son’vadak koso zobab diunk zai to mestri porot anik ek son’vad uloun khell xikoitalo. Kolakaramni son’vadant kitlo-i masalo bhorlo mhunn xevttim kotha-vostuchi ji mukhel kolpona asli ti rakhun khell xevott meren fuddem vhorop gorjechem aslem.

- Khellantlea son’vada ani tachea kolakaram vixim anik ek gozal sangpak zai. Kolakar son’vad uchartana, tanche modem zo konn koddok son’vad uloun dusrea kolakarachea tonddak chavi kortalo, toch lokache vo khell polleupeanche nodrentlean boreantlo boro vo ut’tom kolakar mhunn nanvak pavtalo.

- Hea Konknni bhaxentlea Khellanchi modd khuinchi astali tacho som’bond he khell Gõychea khuinchea vattarantle khellam mestri xikoitale vo te khuinchea vattarantlean nirmann zatale tache kodde asa.

- Poromporik khell chodd korun Saxtti talukentlea Ban’navle, Chinchonnem, Kunkolle, Padd’dde, Chandra, adi. ganvamni zatale ani heach talukeantle mestri khell xikoitale. Minguel Fernandes zaka fuddem vochun Khaddio Minguel vo Kurddo Minguel mhunn vollkhotale, taka khellam mollar khellanchea Patxayancho Patxay mhunn pachartale. To ganvan Chinchonnechea Durgecho aslo, Don Toklo ho Kolvacho aslo, Anton Mari ho Oll’llecho aslo. Santiago Pereira Kottombicho, Magnier Rod Kolvacho, Socorro Piedade Vernem Pirnnicho, Anton Moraes, Ligorio Fernandes, Patrick Dourado Ban’navleche, Vitorino Pereira Utordecho, oxe sabar zann mestri Saxttintle asle. Saxtti talukeantle, ani tantuntlea tantum te ganvgirea vattarantle asle mhonntoch, tea mestirinchea khellamni Saxtti moddicho vapor zatalo. Khellant vaporloli modd zorui Saxttichi astali, torui sogllim patram aplea bhesa pormannench uloitalim. Dekhik, khellantlo bhattkar aplea munddkara thaim uloitana Kudd’ttorechea vo Lottlechea Bam’nna porim oso uloitalo - “Kitem re Jaki? Rati ghara yetana, tujea cheddean mhoje choilek bhivoili khuim mure?” Punn tich gozal dog munddkar uloitat tednam choliechea zagear “cheddvak bhivoilem” oxem mhonntale.

Fellamni vo khellamni jim gitam astalim tim sobhavik ritin vo gitak kan diun te khellantle songitkar songit vazoitale. Ani gitache je sur astale, tea surank jem songit astalem tem legit ganvgirem, kheddeantlem koxem astalem.

Voir khellantle boliecho ul’lekh kela. Khellachea gitantlea utranchi-i tich boli vo modd disun yeta, ani taka lagun tem git khellank mudier thik koxem sobta.

Survatechea kallant Karnavalachea tin disamni zaupi hea Fellantlim vo khellantlim jim gitam astalim tim khellache kotha-vostucher adarlolim astalim: Aiz tiatramni zoxim veg-vegllea vixoyachem gitam astat toxim asonaslim.

Tin partincho ek khell asta. Part mhonnlear purai khellacho ek bhag. Ho ek bhag mhonlear ek svotontr khell astalo. Oxem hea khellant tin sovtontr, ekameka kodde kosloch som’bond nastana tin parteo astaleo. Hea tin partincho ek sancho mhonnlear, ek khell. Khellantli dor ek part ek vo dedd voranchi astali.

Aiz konknni tiatr machier khell-tiatr mhunn zo prokar cholta to zomnivelea khellantleanuch aila mhonnunk zai. Hea poromporik ani adlea khellanchi boreach promannan pik zaunk lagli tednam, hea khellancheo spordha ghoddun haddunk lagle. Tantuntlean, eka khellacho mestri dusrea khellachea mestri poros ap-aplea khellantlean tank dakoupache proyotn korunk lagle. Oxea vellar spordhe khatir fokot donuch, svotontr oxeo parteo astaleo. Punn uprant, zaka “The Shakespeare of Konknni Stage’ mhonn pachartale ani azun-ui pachartat tea sorgest Rosario Rodrigues-an don partincho ekuch ‘plot’ korun ani kotha-vostuk lagu zaupi odik kant ani vinod ghalun ekuch vixoyacher adarlolo khell don bhagamni machier dakhoupak survat keli. Takach khell-tiatr mhonntat.

Nattkank vixoyanchi xim’ na, tech toren hea Zomnivelea Khellank-ui vixoyachem bondon naslem, vo na. Hea khellamni kuttumbik, mogache, kazaranche, onoitikponnache, bhattkar-munddkarache, somazache, desache, Gõyche, advogadanche, dhormik, adi. oxe sabar vixoy astale. Hem sogllem tea khellanchea nanvamvelean disun yetalem. Dekhik, Ghatki Bhoinn, Beiman, Hanv Afrikanist, Xamaim, Noxibantlem Kazar, Visvaxi Ghorkarn’n, Angovnn, Gõycho Khambo, Igorjecho Pedo, Kettkar Kistod, Vhoddponnachi As, adi. him sogllim nanvam tea khellanchem soimb dakoitat.

(c)Jose Salvador Fernandes
www.goa-world.com

Sonvar, 5/6/2010

Exclusive to www.goa-world.com
& Gulf-Goans e-Newsletter

__________________

http://aitaracheokaskuleo.blogspot.com/

Zoit Sotachench Asta! – II

2010-05-08T04:26:00.000-07:00

Zoit Sotachench Asta! – II

-Jose Salvador Fernandes

Aiz Mayachi 08 tarik. Monsenhor Sebastiao Rudolfo Dalgado hancho zolmacho dis. 1855 vorsa, Bardezantlea Assaganv ganvant tancho zolm’ zalo. Aiz tanchea zolmachem 156vem voros. Hea tanchea 156vea vorsachea disa nimitan, eka agllea-veglleach hea bhas-xastreak amchem noman!

Monsenhor Sebastiao Rudolfo Dalgado hancho 156vo zolmacho dis eke kherit bhaxen itihasik dis tharta. Monsenhor Sebastiao Rudolfo Dalgado hanchea nanvan choltele Dalgado Konknni Akademik (DKA) ani Romi lipientlean Konknni kelloun ani khelloun bhaxechi zotnay ghetoleank ani seva kortoleank ho dis khorea orthan aiz itihasik mhotvacho dis asa. Karonn, aichea disa Konkani Literature in Roman Script – A Brief History hem, khub vorsam meren kallachi samki goroz aslolem pustok uzvadd yeta. Hem pustok, Dalgado Konknni Akademin sorgest Profesor Dr. Olivinho Gomes hankam 2008 vorsa ek prokolp (project) mhonn dilolo. Te hea sonvsarak ontorche poilim, tannim ho prokolp toyar korun Dalgado Konknni Akademichea hatant ghalolo. He-ui tanchea mol-mhotvachea vavrak lagon, sorgest Prof. Dr. Olivinho Gomes Konknni mollar omor urtolo. Tanchea otmeak xanti mellum!

Konkani Literature in Roman Script – A Brief History oxe torechem pustok khub vorsam adim uzvadda yeunk zai aslem. Kiteak, Romi lipientlean Konknni bhaxechea ani sahityachea itihasant zo vavr zalo to pustokachea rupan attapunk na dekun, Devnagorivaleamni ‘xanneank’ pimpoll dakoupacho zaito proyotn kelo. Khorem mhonnlear, tancho to proyotn mhonnche bodlek, Konknni mollar Romi lipiecho zo mhotvacho itihas asa to pusun uddoupachi tanchi ti strategy asli oxem mhonnchem poddta. Hi strategy khottea, zatim-katinchea ani communal monantlean xizloli oxem mhonnonk koslich addkholl na. Karonn, aiz tor ami Konknni mollar nodor marlear, Romi lipientlean Konknnik mhotvachem yogdan diloleank, muttbhor bamonn Devnagorivaleamni bhairailole dolle bhorun disun yeta. Aplea boroupantlean ani uloupantlean Konknnichea veg-vegllea prokarancho ul’lekh kortana, Romi lipientlean poili kovita, poili potrokarita, poili kotha, poilo tiatr, poilem cholchitr, poili romanx uzvadda aili ani Konknni khatir poilo martir melo mhonn sangpak tanchem kalliz thorthorta ani dhodd’dhoddta. 1556 vorsa thavn Romi lipientlean Konknnicho vavr chalu zalo mhonn sangchea vellar tankam thorthoro sutt’tta ani tanchea monantlim itihasachim panam sanddtat. Nhoi, te tim sanddtat. Konknni mollar ghoddon gelolea tea itihasachim panam ustinastona te soroll Xennoi Gõybabaxim uddi martat. Punn Xennoi Gõybaban Romi lipient her bhasantlim rupantoram kelim tancho tankam itihas mellona tem vichitruch dista. Fokot Xennoi Gõybabalo Devnagoricho itihas mellta!

1987 vorsa Rajbhas Kaido pas kelo. Konnak lagun pas zalo? Mukhelponnan Romi lipientlea lokanchea prexorakuch lagun mum? Pordesant ravon aple maim-bhaxek manancho zago mellcho mhonn aplea ghamache duddu Konknni Porjecho Avaz-ak dhaddun dilolea Romi lipiek tenko diupi bhavancho-i tantum vantto asa mhonn mum? Ekdancho to Kaido pas zatoch hea soglleank tannim konnxak marle. Poisaile. Romi lipientle lok ‘dalit’ ani ‘harijan’ zalolea porim, ani fuddem vochun tanche kodde kosloch som’bond naslolea porim tankam fatt keli. He gozalik kitem mhonnpachem? Romi lipientlean Konknni samballtoleancho aplea faidea goir-vapor korop oxench mhonnchem poddlem mum? Khorem mhonnlear, Rajbhas Kaido Romi lipientlea lokak fottoun pas kelo! 21vea xekddeantlo vhoddantlo vhodd gudmell (conspiracy) ani visvas-ghat ho ! Khottea, zatim-katinchea ani communal monantlean xizloli hi anik ek strategy nhoi zalear anik kitem tor?

“Konknni mhonnlear Devnagori lipientlean boroyloli Konknni” oxea utramni Devnagorivaleamni Rajbhas Kaido pas zata toso kelo. Aiz ho Kaido pas zalear 22 vorsam odik zalim. Hea 22 odik vorsanchea kallant tannim Romi lipiecho itihas pusun uddounk boroch vavr kelo – ube ani add vatten-ui. Punn tanche thaim tem zaunk na. Khubxea zannank tannim Romi lipiecho itihas ‘zero’ korun dakoilo. Rajbhas Kaideant Romi lipiek zago melloun diupache chollvollek tenko dina zalear, Romi lipiechea thoddea fuddareamni Gõycheo igorzo foddun –moddun uddoupachi Bispak dhomki dilea oxe fottincho poskotto fulounk legit tannim khub kitem kelem! Punn kalla pormannem tanchea tea fottinchea poskotteak sotacho kantto laglo ani…

… ani atam urlolo sotcho kantto Konkani Literature in Roman Script – A Brief History hea pustokantlean lagtolo. To tankam khub dukhtolo. Khub roddoitolo. Hem pustok tankam tanche fottim pasun vingllem kortolem. Tanchea kansulancher sotachim thapttam vazoitolem. Romi lipientlo Konknnicho itihas lipounk sodtat tednam tanchea kanank pill ghaltolem. Sotak man diupi loka mukhar te Romi lipi vixim fott gozali sangtat tednam tancher tem fontt martolem. Tancheo fotti tancheach tonddar martolem. Tanche tankanch lojek ghaltolem. Tancheo fotti tancheach talleant fugar kortolem ani itlim vorsam te Romi lipi sompoupacho zo vavr kortale tanchea tea vavracher tem udok soddtolem, sot uzvadda haddtolem.

Jose Salvador Fernandes

8/5/2010

Zoit Sotachench Asta!

2010-05-08T04:22:00.000-07:00

Zoit Sotachench Asta!

-Jose Salvador Fernandes

“Romi lipientlean sarki Konknni borounk zaina. Romi lipientlean Konknniche sarke uch’char zainant. Romi lipientlean uzvadda ailolea Konknni sahityak dorzo na. Romi lipien Konknni bhaxechi vatt lailea. Romi lipientlean boroytoleank Konknnichi buniyad na. Romi lipientlea boroupeank kholay na. Adi….” Oxea utramni sabar zannamni kitlexech pavtti Romi lipiek ani tantuntlean boroytoleank hinnsaileat, kikont keleat, unne nodren polleleat ani azun-ui hinnsaitat, kikont kortat ani unne nodren polletat. Zoxe porim kitem Romi hi Konknnichi bekaideachi (illegal) lipi ani tantuntlean boroytole-i kazari som’bonda bhair zolmolole koxe! Hantum chodd korun, Konknni moll aplea bapaichem bens mhonn miroytolea muttbhor bamnnancho aspav asa.

1987 vorsa Rajbhas Kaido (apnnak zai toso) pas korun ghetla tednachean te odik nettan ani odhikrut ritin Devnagori hich Konknnichi khori ani sobhavik lipi oxem mhonn dholkem vazoit bhonvtat. Khorem mhonnlear, khoinchech bhaxek sobhavik lipi asona hachi tankam khobor asa. Romi lipientlean Konknni bhaxek khoinchea rupan kitlem girest yogdan dilam ti-ui tankam bhorpur khobor asa. Punn hem sogllem Romi lipientlean zalam ani ghoddlam mhonn tankam mandun gheunkuch naka. Kiteak, tea sotachi tankam jirvonn zaina. Dekunuch te Romi lipiecho girest itihas kallachea pordea fattlean lipoupacho proyotn kortana distat. Romi lipientlean Konknni bhaxek dilolem yogdan nakarche ani kallokant dovorche khatir te bamonn lok ani tankam bolli poddlole Devnagori lipi Romintlean utraupi thodde “sobhavik lipiecho” mud’do (point) defence mechanism mhonn vaportat. Punn itihasant nond (register) zaloli khuinchi-i khobor defence mechanism-acho vapor korun lipoum vo noxtt korum yeta?

Abrilache 8ver, 2010 Romi lipientle Konknnint ek itihas ghoddcho asa. Tea disa, Romi lipientlean Konknni bhaxechi udorgot korunk vavurtele Dalgado Konknni Akademichem (DKA) ek pustok uzvadda yeupachem asa. Konkani Literature in Roman Script – A Brief History oxem tea pustokachem nanv asa. Hem pustok, Dalgado Konknni Akademin sorgest Profesor Dr. Olivinho Gomes hankam 2008 vorsa ek prokolp (project) mhonn dilolo. Te hea sonvsarak ontorche poilim, tannim ho prokolp toyar korun Dalgado Konknni Akademichea hatant ghalolo, ani fuddle son’vara to pustok rupan uzvadda yeta. Oxe torechem, poilim pasun Romi lipientlean Konknnint kelloilolea ani khelloilolea veg-vegllea sahitya prokaranchi vollokh korun diupi mol-mhotvachem ek pustok zachi nibel goroz asli tem uzvadda yeta hi dor eka Konknni, ani bhou korun Romi lipientlean Konknnicho vavr, seva kortolea mon’xak obhiman bhogpachi khobor!

Hea sod-vavrachea pustokant, sorgest Profesor Dr. Olivinho Gomes-an 1556 vorsa thavn Romi lipientlean Konknni sahitya nirmann zalem tacho niyall ghetlolo asa. Ho niyall dolle bhorun vachlo zalear, aiz je Romi lipiek hinnsaitat, kikont kortat, unne nodren polletat tanchea tonddak apo-ap chavi zateli. Romi lipientlean Konknnik sahityak tola-molachem yogdan favo zalam tem sot je fott mhonn sangot bhonvtat ani boroytat tankam atam ulounche ani borounche poilim donanchem tin pavtti chintchem poddtolem. Je konn Romi lipie vixim aplea monancher nennarponnacho goirum gheun asat tanchea-i monancho goirum nitoll korpacho vavr hem pustok kortolem. Romi lipientlea sahityacheo mullaveo ani sot gozali je lobadd monis Devonagori lipieche karpetti ponda lipoupacho proyotn korit asat tanchim-i rupnnim atam gollun poddtolim. “Romi lipientlean sarki Konknni borounk zaina, Romi lipientlean Konknniche sarke uch’char zainant” oxem sangpi, uloupi ani boroupi atam lojek poddpache dis pois aschenant. Kiteak, “Romi lipientlean sarki Konknni borounk zaina, Romi lipientlean Konknniche sarke uch’char zainant” oxem zannim tanche koddchean aikololem vo tanchem boroup vachlolem, tech lok atam tankam “zalear hem itlem ani sogllem koxem toyar zalem tor?” oso tankam proxn vicharpacho vell kednam-i yeum yeta.

Romi lipientlea boroupeamni sahityache veg-veglle prokar kelloun Konknni bhaxek poilim pasun rup-rong dila. Eke bhaxek sabar angamni jitli voir-unch vhorum yeta, titli tika unchle tenkxer vhorpacho Romi lipientlea boroupeamni proyotn kelolo asa – uprant to potrokaritechea, tiatrachea romaxinchea (kadamborinchea), kovitechea, kothanchea vo sahitik onnkarachea mollar zaum. Romi lipienuch Konknnichi buniyad mozbut korun dovorloli asa. Aiz he buniyadicher dusre aplem ghor bandun Romi lipientlean Konknni bhaxek yogdan diloleank ani azun-ui ditoleank “tumi bhaile, ami mullantle” oxi vagnnuk dilea ani ditat. Romi lipientli Konknni sompounk te fattlim sabar vorsam na-na toreche proyotn korit asat. Punn jea mon’xachi osmitay tache bhaxent asa, taka sobhavik lipiechean, nhoi mhonn addechea upayamni vo add vatten vochun kosoch sompounk zaina. Hachi zanniv lhou-lhou Devonagori lipientlean apunn Konknni zannar mhonn miroupi lokank zaunk laglea. Dekunuch aiz amkam tanchea tonddantlean, “je meren Romi lipientlean Konknni boroupi nim’nno monis astolo, te meren Romi lipiek amchean kainch korunk zaunchem na” oxe torechim utram aikunk yetat.

Atam, Abrilache 8ver, 2010 Profesor Dr. Olivinho Gomes-an kelolea sod-vavrachem Konkani Literature in Roman Script – A Brief History pustok bhair sortoch te anik kitem mhonntole tachi vatt ami polleun ravpchi matui goroz na. Kiteak, Romi lipientlean Konknnicho vavr zalolem sotachem pustok adim pasun konna-i khatir ugtem asa ani sodanch astolem. Konnachea-i kitlea-i fanciful fott ulounneancho tacher matui probhav zauncho na. Kiteak, zoit sodanch sotachench asta!

Jose Salvador Fernandes
1/5/2010

Konknni Cholchitram Kednam Fular Yetolim?

2010-05-08T04:20:00.000-07:00

Konknni Cholchitram Kednam Fular Yetolim?

-Jose Salvador Fernandes

Mhapxemchea Al Jerry Braganzan poilem Konknni cholchitr Mogacho Anvddo boroun ani digdorxit korun, 24 Abril, 1950 vorsa Mumboi cholchitr porddear dakoilem. Mogacho Anvddo, Sukhachem Sopon, Nirmonn, Jivit Amchem Oxem, Boglantt, Mog ani Moipas, Girestkai, Bogsanne, Suzanne, Jivanacho Khell, adi. Konknni cholchitram khub vorsam adim borinch gazlim. Itlim gazlim, tim aiz meren Konknni cholchitranchea itihasant apnnak kherit zago kantoun asat. Hantlea thoddea cholchitrantlim movall, goddsannin ani girest songitan toptoplolim gitam azun-ui Konknni mon’xanchea vonttancher bhouch sompeponnan golltat.

Aiz Konknni cholchitrank zorui 60 vorsancho kall bhorla, torui aichea kallar Konknni cholchitranchi sonvskrutay je toren fulonk zai asli ti fulonk na. Aiz amkam vorsantlean chukun ek-don Konknni cholchitram toyar zalolim polleunk melltat, punn tim cholchitram Konknni lokam mukhar haddtat tednam tankam vhoddlo-so protisad (response) mell’llolo disona. Tache fattlean khub karonnam asum yetat.

Aiz ami barik-sarik niyall korit zalear, Konknni cholchitrancho zago Konknni Video Comapct Disc-am (VCD’s) bhorun kaddtana distat. Aiz vorsantlean kitleoxeoch Konknni VCD uzvadda yetat ani teo hot cakes koxeo khoptat. Punn hea VCD-ink amchean Konknni cholchitram mhonnonk zaina, karonn teo home videos astat. Eka khorea ani borea cholchitrachim khaxeleponnam ani kheritponnam tantum disonant. Chaltea ani sadea Konknni mon’xak hi cholchitra ani home video-a modli ontor khobor na. Dekun, to ti ek vo unnea vorachi VCD ghetana ani polletana tea video-ant konn-konn apleache avddiche tiatr kolakar asat tancher chodd bhor dita. Cholchitracho khoro orth nokllo aslolea mon’xacho hantum kosloch guneanv na ani to korunk-ui zaina. Kiteak tache bhitor Konknni cholchitranche sonvskrutayen rig gheunk na, ani tache bhitor Konknni cholchitranche sonvskrutayen rig gheunk Konknni cholchitram toyar zainant.

Konknni cholchitrank market na dekun, Konknni cholchitram toyar korunk konn fuddem sorona oxem sabar zann uloitat. Punn Konknni cholchitrank market na mhonn hem moll toxench soddlem zalear, tem kallachea porddea fattlean vochpachi bhirant asa. Toxem polleunk gelear, Konknnintlea khubxea gozalink market na. Eka kallar, aiz zatat title tiatr ani tiatrache proyog zainasle. Aiz tiatrache sonvskrutayen Konknni somazant itlim khol pallam-mullam dhorleant, hea mollar nove-nove tornnate aplim panvlam ghaltana distat. Nove-nove tornnate apunn tiatr boroun machier haddtana distat. Mandtam, tiatrachi sor cholchitrak yeunk zaina, ani cholchitrachi sor tiatrak yeunk zaina. Ek borem cholchitr toyar korunk jitli duddvanchi guntvonnuk (investment) korchi poddta, titli tiatr ubo korunk poddona. Mhojea motan, Konknni cholchitranchi market toyar korche poilim Konknni mon’xa modem Konknni cholchitranchi ruch toyar korpachi goroz asa.

Konknni cholchitranchi sonvskrutay Konknni mon’xam modem ruztoli ani fuddem vochun tigtoli zalear, Konknni cholchitr mollachi odd asloleamni poilim Konknni somazacho sabar angamni obheas korcho poddtolo. Konknni mon’xanche avddi-ruchincho vichar kortoch, to cholchitra kodde zoddcho ani zullouncho poddtolo. Tanche avddi-ruchinchem cholchitr toyar korpacho vichar kortana tantum khorea ani borea cholchitrache gunn, kheritponnam ani khaxeleponnam aspavchim poddtolim. Hem sogllem kortana tannim cholchitr mollavelea zannarancho ani expert-ancho adar-sohokar gheuncho poddtolo. Choddxe pavtti tea khatir boroch duddu-i khorch korcho poddtolo. Ho korch bhorun kaddunk ani vangddach tem cholchitr lokam meren pavounk ani Konknni cholchitranchi sonvskrutay tanche modem ruzounk tannim yeuzonn ankchi poddtoli. Khub kottin kam’ tem, punn yeuzonn ankun dittayen fuddem pavl ghalem zalear, khoim tori survat zaum yeta ani vevosthit ritin ani sosnnikay samballun vavr chalu dovorlo zalear Konknni cholchitrachem moll ek dis fular yeunk yeta.

To dis kitlo lagim vo pois asa kai?

Jose Salvador Fernandes

24/4/2010

Tiatr ! Tiatr ! Tiatr !

2010-05-08T04:18:00.000-07:00

Tiatr ! Tiatr ! Tiatr !

-Jose Salvador Fernandes

17 Abril, 1892 tem 17 Abril, 2010. 118 vorsancho kall. Sahityachea Tiatr prokarak. Hea 118 vorsanchea kallant, tiatrachea angamni khubxe bodol ghoddleat. Tiatrachea vikasak mhotvachem yogdan diupi bodol ghoddleat. Dekunuch, 17 Abril, 1892 vorsa suru zalolea ani aichea tiatrant borech bodol ghoddoileat ani ghoddleat tem disun yeta. Punn mhotvachem mhonnlear, tiatracho gabho mat toch urla. Uronkuch zai, karonn tench tiatrachem khaxeleponn asa.

Tiatrachem ek mhotvachem ang mhonnlear tiatrachi borpavoll. Tiatr veg-vegllea angamni sudarot vetana, veg-vegllea angamni progoti kortana, mhojea motan tiatrachi borpavoll-ui aste-aste fulot vochunk zai, ti fular yeupachi goroz asa.

Tiatrachem mol-mhotvachem ang asloli borpavoll girest asop mhonnlear tea tiatrachem ordem zoit. “Tiatr boroupa fattlo tuzo hetu kitem?” oxem tiatristank vicharlear, choddxe zann rokddech zap ditat – “ lokak sondex diunche khatir hanv tiatr boroitam.” Oxi hanv zap aikotam vo vachtam tednam, mhojea monant vicharancher vichar yetat - dusreank sondex diupi ami konn? Sondex diupacho odhikar amkam konnem dila? Ami dusreank kiteak sondex diunk zai? Khuim tori vochun dista, tiatrantlean konnench, konnakuch sondex diuncho nhoi.

Zalear, tiatr kiteak boroupache tor?

Mhojea monam pormannem, tiatrachi borpavoll girest chintnamni (thoughts) ani vicharamni toptoploli asunk zai. Machier tiatrachea rupan ti follak yeta tednam tantuntle vichar tiatr pollennaranchea monak adllun vochunk zai. Tea vicharamni ani chintnamni, tiatr polleupeank chintunk laupachi tank asunk zai. Tankam vichar korpachi vatt ugti korpachi xokt asunk zai. Tankam nhidentle zage korpache dhomxe asunk zai. Ani eka tiatrache borpavollint tor he gunn asot zalear, dubhav nastana tiatr polleupi apnnak tiatr somzola te toren ap-aple porim, apo-ap sondex ghetolo. Tankam to diupachi gorozuch upraschi na.

Aiche tiatr pollennar, oxech uttun konnachea-i tiatrak vochonant. Tiatr konnacho, tiatrant konn-konn gaupi asat, konn-konn komedian asat, konn-konn kolakar asat hem sogllem polleun ani chintunuch xevttim tiatrak vochpacho nirnnoy gheta. Tiatrache borpavolli vixim-i oslench kitem zaunk zai oxem mhaka dista. Tiatrachi borpavoll itli dharechi, probhavik ani monachi bhuk bagoita tosli asunk zai, faleam tiatr pollennaramni tiatrache borpavollivelean tiatr boroupeacho sumar korun tiatr polleunk vochpachem tharaunk zai. Oxi poristhiti nirmann zali zalear, tiatr boroupi-i tiatr boroitana don pavtti xadur ravtole, ani hea soglleantlean tiatr borpavollicho-i bhaxik ani sahitik nodrentlean dorzo vaddpachi xoketay asa.

Punn niktti toxi tiatrachi borpavoll korunk zata? Dhorlem pen, laglo borounk mhonn eka tiatrachi bori borpavoll toyar zaina. Tea khatir boroupean khubxeo gozali korcheo poddtoleo. Boroupean apnnak yetat tea bhasantlean vachop korpachem, veg-vegllea bhasantlim nattkam polleupachim, somazant cholta-bhonvtana ani chear-chougam modem misoll zata tednam monache dolle ani kan ugte dovorpache, apnna bhonvtonnim ghoddtolea ghoddnnea-gozalincher niyall korpacho, monantlea monant heo soglleo gozali xizoupacheo ani uprantuch kagdar vaddun magir machier choddoupacheo. Ani tednam, tiatr boroyloleak apnnem ek boro tiatr boroyloleachi, ani tiatr pollennarank apnnem ek boro tiatr pollela mhonnpachi bhitorlean khoxalkay bhogtoli.

Tiatr ho Gõycho ek agllo-vegllo sahityacho prokar. Eka kallar tiatr ani tiatrist mhonnlear choddan chodd zann ang kaddtale. Punn khub vorsam uprant hea prokarak ek vegllem mhotv ailam, vegllo zago, vegllem rup favo zalam. Gõyant Tiatr Akademi sthapon zait porian tiatr prokarak anik-ui mhotv ailam. Sahityacho ho prokar anik-ui unchle tenkxer vhorun bosounk, Tiatr Akademin tiatrache udorgoti khatir vavurtana kherit toren tiatrache borpavollicher bhor diunk panvalm ubarlelim zalear, borpavolliche nodrentlean anik thoddeach vorsamni amkam anik-ui unchlea dorjeache tiatr polleunk melltole.

Jose Salvador Fernandes

15/4/2010

Amche ‘self-styled’ Som’padpi !

2010-05-08T04:17:00.000-07:00

Amche ‘self-styled’ Som’padpi !

- Jose Salvador Fernandes

Don’parcho tea Hotelant jevunk boslolom. Jevonn jevun purnn zaunkuch na. Mhoje koddchean Konknni borounk xikpeacho mhaka fon ailo.

“ Romi lipientlean purnn utor koxem boroitat?” Tannem mhaka vicharlem.

“Konknni veakoronnachea (grammatical) ani xud’dhlekhonachea (correct spellings) nemak dhorun tuka Konknni xikoun kabar zaupache dis lagim pavleat; ani tum mhoje thaim ‘purnn’ utor koxem boroitat hem atam vicharta?” Jezvit padrim bhaxen, tachea proxnak hanvem proxnacheach rupan zap diupacho proyotn kelo.

“Tunvem mhaka xikoilam mhunnon hanv zannam, punn Konknniche Romi lipientlean porgottnneo uzvadda yetat tanchea thoddea som’padpeank Konknnichi veakoronnik bandavoll ani xud’dhlekhonache nem’ mat favo tea promannan khobor nant oxem mhaka dista.”

Monant mhonnlem, haka khuinche borpavollint kosli tori chuk mell’llea. Na zalear, ho oso boroupi nhoi.

“ Kiteak mhonnta tum? Konknniche khuinche porgottnnent tuka kitem chukichem mell’llam?” Hanv.

Jose Salvador Fernandes

10/4/2010

Gõychem dom’ naslolem rajkaronn!

2010-03-27T23:19:00.000-07:00

SON'VARACHIM SUNGTTAM:
Gõychem dom’ naslolem rajkaronn!

-Jose Salvador Fernandes

"Fuddlea satolleant Gõyant rajki mollar anik kosleo-i ghodda-moddi zaum yetat, punn sorkar poddcho na ani tea ghoda-moddincho ekdancho xevott zauncho na hem mat khorem dista!" oxea utramni fattlea satolleant hanvem mhojem borovp sompoilelem.
Ani zalem-i toxench. Sorkar sodrer urloch!

Gõyant sodrer aslolo sorkar uddounk fuddem sorle khore, punn tanche te yeuzonnek dom' naslo. Tanche yeuzonnent porjechem boreponn naslem. Fokot tanchem boreponn aslem. Mhunnon tannim ekdancho sorkarak dilolo tenko rokddoch kaddunk na. To kaddche poilim tannim tenko kaddta, sorkar uddoita mhunn khub boball kelo. Khorench tor monant aslem zalear itlo bobbal kiteak kelo to somzonam. Boball korpak kelo, punn uddoilo na, thoinch tanche 'credibility'-n mar khalo. Rajkaronnant oxench. Rajkornni kitem-i korche adim don pavtti chintina.

Gõyant fattlea satolleant sorkar uddounk fuddem sorlele te lokache protinidhink khorem mhonnlear sorkar uddounk koslich buniyad nasli. Dekun 'budget session'-a vellar oxe kortele, toxe kortele ani sorkar uddoitele mhunn te varear boballtale.Khorem mhonnlear, aplo svarth sadounche khatir ti 'blackmail' korpachi ttrik asli. Punn ti tanchi ttrik khuinche khuim xelleli. Somzum-ia, tannim sorkar uddoilolo, zalear tacho mar Gõychea 'budget'-ak bostolo aslo. Udorgotiche nodrentlean Gõyak khuim tori mar bostolo aslo. Tachoporinnam' her-ui gozalincher bostolo aslo. Dispott'tto vevhar opangull zaupacho. Tednam he, lokan vinchun kaddlele protinidhi aplea motadrnk ani Gõyche porjek kitem zap ditele asle? Koxe ritin pottoitele asle?

Gõyche amdar-montri, rajkaronn mhonnlear hata bottancher khellpacho ani khelloupacho khell mhunn somzotat. Kiteak, je hetun te nivddun aileat tea tanchea hetunt Gõychem boreponn na. Porjechem boreponn na. Konnachench boreponn na. Te fokot aplea faidea khatir vinchnnuko loddoitat, apleach faidea khatir nivddun yetat, apleach faidea khatir nivddun yetoch ap-svarthan panvlam fuddem ghaltat ani apleach khatir jiyetat.

(c) www.goa-world.com
Son'var, 27 Mars 2010

Goa Budget 2010 Highlights:
http://digitalgoa.com/ca_disp.php?id=938

Still the G-7 makes noise.... on Saturday
http://www.navhindtimes.in/news/g7-gives-two-days-ultimatum-digambar

Gõychem dom’ naslolem rajkaronn!

2010-03-20T01:00:00.001-07:00

Gõychem dom’ naslolem rajkaronn!

-Jose Salvador Fernandes

Sod’deak Gõyant rajki mollar khodoll suru zala. Ho khodoll motdaranchea boreponna vo faidea khatir nhoi mhunn, aplea angar yetelea mottorachi legit beporva korinastana konn-ui tondd foddun sangtolo. Toxem polleunk gelear, vinchnnuke uprant Gõyant aiz meren khuincheach motdarsonghanchea amdaran vo montrean motdaranchea faidea khatir xembor sodd, pon’nas tok’ke legit khodoll ghalunk na. Zalear atam tori kiteak ghaltele? Mhonnche, dusrea utramni ho khodoll tannim ghala to apleach faideak, apleach boreponna khatir asa oso tacho orth. Punn hantunt-ui koslench noveponn na; kiteak kai mhonnlear, aiz sogott zann rajkoronneanchea mollak faideachinch oklam laun polletat.

Asleleak khuim sodanch axea chodd. Tich got amchea rajkornneanchi. Rajkoronnant tankam zago melltoch, tanchi axea apo-ap vaddot veta. Hi apli vaddti axea puri korche khatir te raticho dis ani disachi rat korun vavurtat. Punn tanche axek xim’-mer asona. Gõyant, rajki mollar sod’deak G-7 zomo toyar kela tachi got hich. Gõyche ani motdaranche udorgoti khatir zo aplo vell tannim folladik ritin vaprunk zai aslo to te aplea faidea khatir vaportat. Gõychea sot’ter aslolea sorkarachim sutram aplea hatant asa mhunn te somzotat ani te porim te aplim horddim fuddem ghalun bhonvtat. Vinchnnukam vellar aplem horddem bhitor ghalun motdaranchea paimaxim apunn koxe motanchi bhik magunk bhonvtat hi gozal te visrunuch vetat.

Gõyant sod’deak zo rajki mollar khodoll G-7-an suru kela te vixim vichar korit zalear, khuinche-i poristhitint sorkar sot’ter urtelem koxem dista. G-7 tor sorkaracho tenko kaddit zalear, ek tor Vidhan Sobha borkhast zaum yeta, na zalear G-7-achean virodhi pokxacho tenko gheun raj choloum yeta. Punn G-7 pongddant asat tankam tenko diun aplem kaim sadchem na hem virodhi pokxak-ui bori khobor asa. Dekun, ghov-baileche zhogddeant apunn kiteak poddchem, oxem chintun ani uloun Gõyant BJP aplea zagear thondd asa. Toxem polleunk gelear, tea G-7-antle vangddi BJP-chea mona faskent bosona.

G-7 zorui sot’ter aslolea sorkarak dhomki diun bhiyeunk sodta, torui tancheach kallzant tanchea kortubanchi bhirant tankam sotaita. Tantuntle thodde khuxi nastana-i, tea zomeache vangddi asat. Tannim oxem-toxem kitem-i kelem zalear, tem tankanch mharog poddum yeta mhunn G-7 zomeak bori khobor asa. Dekun, Montri Churchill Alemao jitle ugteponnim ani atm-visvasan uloita titlea atm-visvasan te kainch ulounk vochonant. Apunn jem kitem kortat taka koslich buniyad na mhunn te zannant. Itlench nhoi, tor apnnem jem kitem choloilam taka bhailea anik konnachoch tenko na mhunn tankam bes-bori khobor asa.

G-7 sot’ter aslolea sorkarak dhomki dita tachem Mukhel Montri Digambar Kamatak-ui vhoddlemxem poddun vochunk na koxem dista. Kiteak, Gõychim sutram tachea hatant konnem-i ghaleant zalear tim ‘High Command’-an. Zalear tannem kiteak husko kaddpcho? Sogllem ‘High Command’ polleun ghetolo mhonnit to hat kovllun bosla.

Montri Churchill Alemao G-7-ak sabar torechim avhanam korta. “Tumi sorkaracho tenko kaddlo zalear-ui Kongres sorkar sot’ter urtolo”; NCP-k tor kalliz asa zalear tannim amdarponnacho rajinamo diun porot ek legit zago nivddun yeun dakounchem”; “ Kongres pokx khuinchea-i vellar ‘mid term’ vinchnnukank toyar asa” oxem Montri Alemao Kongresichem tondd apunn zaun uloita. Kiteak kai? Taka khorench sorkar poddun novean vinchnnuko zaleleo zai? Toxem zalear tachem Mukhel Montri zaupachem sopon follak yetelem mhunn to yeujita kai? Na zalear to kiteak itlo boballta? Adav nastana konn xidi foddina!

Fuddea satolleant Gõyant rajki mollar anik kosleo-i ghodda-moddi zaum yetat, punn sorkar poddcho na ani tea ghoda-moddincho ekdancho xevott zauncho na hem mat khorem dista!

www.goa-world.com
20/03/2010
[c] all rights reserved.

‘Anti-virus’-uch ‘Virus’ Gheun Yeta Tednam…

2010-03-12T20:39:00.000-08:00

SON’VARACHIM SUNGTTAM:
‘Anti-virus’-uch ‘Virus’ Gheun Yeta Tednam…
-Jose Salvador Fernandes

Konknnicho ek dobazo. Tea dobajeak mhaka to mell’llo. Konknnintlean tannem thoddem bhou borovp kelam. Konknni mollaveleo heo-teo gozali uloitana tannem mhaka okosmat mhonnlem –

“Hanv tuka fattim melluk yeupachom aslom.”
Khubxea zannanchi “dekilem moddem, yeilem roddnnem” chal mhaka khobor asa mhunn, hanv hanslom ani ogich ravlom.

“Hansta kitem? Fokannam korinam hanv. Tuka mellunk yeupa fattlem karonn kitem tem zanna tum?” Tannem nettan vicharlem.

“Tunvem sangonastana mhaka koxem kolltelem?” Hanvem tachea proxnak proxnacheach rupan zap dili.

“Hanv ek Romi Konknni masik kaddunk yeujitam,” apunn khub kitem mottem korunk fuddem sorta oxem aplea jivak somzun to motteponnan uloilo.

“Tacho fattlo hetu kitem?” Hanvem tachem chintop zannun ghevpacho proyotn kelo.

“Hetu itloch - Konknnint bhor ghalop.” Tannem horddem matxe fuloun sanglem.

“Oi? Konknnint bhor ghalop ani magir kitem korop?” Hanv.

“Anik kitem korpachem? Kainch na. Voilean Konknnichea itihasant ek masik asa mhunn nond zateli.” Tannem odikuch obhimanan sanglem.

“Toxim, Konknnichea itihasant kitlimxinch masikam-potram zolmak yeun kalla adinch morun geleant….”
“………….”

Gozal fuddem vhorche khatir tache kodde zap nasli. Punn thoddea vellan to uloilo –
“Toxem hem masik bond poddunk diupachem na am…. Cholounk samkem sompem re tem…. Dor mhoineak sorkarche don ‘full page coloured advertisements’ mell’llear puro, anik kitem zai? Zai fokot mhaka tuzo adar zai, editing korpak.”

Monant mhonnlem, dusreache ran’nicher adon dovrun ho aplem xit randunk sodta!
Aiz Konknnint, amche kodde eka poros odik masikam asat. Hantuntlim kaim masikam kallachi goroz mhunn suru zalim. Halinchim thoddim masikam Konknnint nove borovpi utpon’n korpache nodrentlean chalu zalim. Thoddim fokot Konknnint bhor ghalpache nodrentlean zolma aileant. Punn hem sogllem kortana, him masikam Konknni potrokaritent goroz asleli mhotvachi bhor ghalunk visorleant hem dolle dhampun konn-ui sangtolo. Aichea Konknni masikam-nemalleancher gombhirtayen vichar korunk boslear, tantum potrokarita fuloupi gunn sodun-ui mellonant. Dekunuch, hea masikamni potrokaritecho mukhel zago choddan-chodd soroll lekh, kovita, kotha, ek-anki nattkulim, bhurgeam-kannyo hea sahit’yache prokaramni bhouch promannan ghetlolo dista. Tantuntlea tantum, thoddea masikancher Konknni songit ani kantaram mhunn uzvaddaitat! Dekunuch, aiz Konknni masik kaddop mhonnlear lekh, kovita, kotha, ek-anki nattkulim, bhurgeam-kannyo itlench uzvaddavop oxem khubxea zannank dista. Voir ul’lekh kel’le sahit’yache he prokar konn-ui sompeponnim boroun dhaddta oxem khubxea zannank dista, ani ratiam modem konn-ui Konknni masik uzvaddaunk toyar zatat, uzvaddaitat-ui ani xevttim apunn hanspacho mal thartat.

Konknni masikanchea thoddea sompadpeank ani sompadpi monddollak potrokaritechi il’li-i zannvay asona. Dekun oslea sompadpeanchea sompadpiponna khal choltelea masikancher hachim-tachim kutam, vankddeponnam kaddpi borovpam, apunnuch sarko asa mhunn hott’tt dhorpi lekh, boro vavr korteleancher borovpantlean xenn marop, konnacho rag kaddunk masikacho goir-vapor korop hem sogllem polleunk mellta. Hea soglleantlean, oslea masikanchea sompadpeank Konknni potrokaritechi ‘A’ ani ‘Z’ legit khobor na mhunn thavem korta. Itlench nhoi, “Konknni bhaxechi udorgot korunk (khuinchea mollachi udorgot kounk sodtat ti tankanch khobor na ti veglli gozal) hanv masik choloitam” mhunn sangpi thoddea sompadpeanchim masikam legit khubxe pavtti Konknnicheruch vikh onkhun ani buniyad-ghottsann naslelim borovpam uzvaddaun Konknni lokanchea monant duspott kortat tem polletoch, ‘anti-virus software’ toyar korpi komponeo aplo fuddem dusro toyar kortolo ‘anti-virus software’ khoponk zai mhunn poilea ‘software’-ant ‘virus’ ghalun vikpachim naddingponnam kortat te gozalicho mhaka ugddas yeta.

Konknni bhaxek hozar vorsancho mol-mhotvacho itihas asa. Eka kallar, amchea mhalgoddeank Konknni potrokaritechi nadd bori somzololi dekunuch tannim fattlea kallant Konknni potrokarita borech unchle tenkxer pavoileli. Dekun, azun-ui tea Konknni sompadpeanchi ani tanchea potram-masikancho lok tust-tokhnnayecho ugddas korta. Tanche koddchean sfurthi gheun aiche Konknni potrokariten anik-ui unchli tenkxi ganttunk zai asli. Punn potrokaritechi matui zannvay naslele thodde potrokaritechea nanvan ani rupan vegllench kitem tea masikamni uzvaddaitat dekun, aiz legit Konknni potrokarita babot urlea. Ti fulunk na. Ti prouddtayek pavunk na. Mhalgoddeamni ganttun dilele Konknni potrokaritechi tengxi, aichea thoddea ek-torfi (one-sided), sompadpiponnachi tank naslelea ani nanvam purtea Konknni sompadpeank ti sodun-ui mellunk na hem sobhavik asa.

Khori potrokarita, aili fur, mumrant pur vo kaddli jib laili talleak oxi nhoi mhunn tea sompadpeank konn xikoitolo?

(c) Jose Salvador Fernandes
www.goa-world.com

13/03/2010

Bhurgeank Konn Somzotolo ?

2010-03-05T23:06:00.000-08:00

SON’VARACHIM SUNGTTAM: Bhurgeank Konn Somzotolo?

-Jose Salvador Fernandes

Fattlea satolleantli khobor. Ixttinnichea potik obsoeg zal’lo mhunn, sanje vellar tanger khobrek gel’lom. Oso tanche kodde uloitam-uloitam tancho, bara vorsam pirayecho put thoimsor ailo. Hatantlim pustokam konnxak ubem aslelea mezar beporvayen uddoilim, ani mhaka hello mhonnlem.

“Kitem re baba? Khuim bhonvta?”

“Tuition-ak gel’lom”. Roger-an sanglem

“Atam porikxa lagim pavleat, boro korun xik.” Hanvem soglleam porim lhanank budh ditat toxi dili. Punn tachea tonddar matxe kallim kupam aslim. Monant mhonnlem, porikxechem tenxen ba zaum-ie. Titlean, mhoje ixttinn aslele tache avoyn mhonnlem, “to khuim xikta? Xiklolo zalear taka ami tuition-ak dhaddpachim?”

“Mhaka xikpachi khuxi na mhunn tuka ani papak hanvem kitle pavtti sanglam!” Rogerachea mukhamollavelim kupam odikuch kallim zait gelim.

“Magir, xikonastana kitem korunk sodta tor tum?” Avoyn putak vicharlem.

“Mhaka decoration korpak borem dista. Hanv decorator zatolom mhunn tuka kitle pavtti sanglam.” Roger uloilo.

“Decoration-amni amchim pottam bhorelim nant. Tum bore bhaxen xik ami borea kamak lagun borem zoddun fuddar kor.” Avoy putache khuxecher chodd bhor dinastana uloun meklli zali.

“Matxim ogi ravtat polleum-ia. Boro nasleleak matxe suseg diyat,” thoinch khattir add poddun aslolo Rogeracho bapui uloilo.

“Tunch matxe tachea gineanar uzvadd ghal,” mhoje ixttinnin mhojea tonddak pollet mhaka sanglem.

Hanvem tondd hanstem kelem ani ogich ravlom. Tache fattlean karonn-ui aslem.
Ghora vochpa khatir mhoji motorsaikol fuddem vetali toxi mhojea chintnanchi-i motorsaikol fuddem dhanvtali.

Avoi-bapaik aplim bhurgim xikchim, khub xikchim oxem mona-kallzantlean dista. Bhurgeank zata titlem xikounk tim kitle-i tyag-ui korunk raji astat. Punn soglleach bhurgeank xikpachem mon nasta. Gineanan vaddonk na vo fuddaracho husko na mhonnon nhoi. Punn tankam aple gunn-kolent-ui fuddar korpacho asta. Xiklear jitlem zoddunk zaunchem na, tache poros-ui khub kitem aplea avddichea gunnantlean zoddpachi tanchi bhou khuxi asta. Zoddpa vangdda tantuntlean somadan-ui bhogpachi tankam avodd asta. Kiteak khub pavtti monis khub unchle nokrechi opekxa korun xikta, tea podar khub zodd mellta mhunn anvddo ghonttun. Punn ti zodd taka kitli pasun somadan diunk xokta ti khobor na. Fokot zoddint somadan bhogta to monis jivitant kainch korunk pavona oxem mhojem mot.

Aiz iskolamni jem xikop ditat tem xikpeank tanchea fuddara khatir kitlea upyogachem tacher gombhirtayen vichar zaupachi goroz asa. Kiteak thodde jivitant kosloch hetu nastana boll kortat mhunn xiktat, khubxim zannam khub vhoddle hetu gheun xiktat punn tim xevttim hetu zoddunk pavonant, anik upay nasun tim kednach vichar korunk naslele nokre fattlean dhanvtat.

Khubxe pavtti monis xikpa poros aplea avddichea gunnantlean aplo fuddar ghoddounk
kitle-i kantte-khuntte maddoun fuddem vochonk raji asta. Osleank avoy-bapaichem khorem ut’tejon mellunk zai. Avoy-bapai aplea bhurgeachea fuddarachim sopnam fokot varear sopneunche bodlek bhurgeam thaim uloun tanchem mon zannun gheun, tancheo khuxeo, avddi-gunn zannun gheun ghevop khub khub gorjechem.
Tednam tankam bhurgeanchea monancho thav gheunk, avddi-gunnam vangddo xikxonnachem-i mhotv sangunk ami tankam zanniv korunk khub sompem zatelem.

(c) Jose Salvador Fernandes
www.goa-world.com

Son'var, 6vi Mars 2010

‘Literary Criticism’-achea Thermomitorachi Goroz

2010-02-26T22:01:00.000-08:00

SON’VARACHIM SUNGTTAM:

‘Literary Criticism’-achea Thermomitorachi Goroz

-Jose Salvador Fernandes

‘Choddxea bhasantlea sahit’yacher literary criticism zata toxem Konknnintlea-i sahit’yacher zavpak zai oxem mhaka monantlean dista. Tea monan, kaim pustokancho vichar-ui mhojea monant chalu asa.” Ponnjechea eka Hotelant sangatan chav piyetana hanvem Konknnintlea tea nanvostea borovpeak mhojem mon ugtem kelem.

“Baba re, tea vixoyak hat ghalpak, amche Konknni bhaxe khatir azun-ui to vell yeunk na.” Tea borovpean kopantle chayek ghontt marit mhonnlem.

“Vell yeunk na mhunn ami toxech ravle zalear, amche bhaxentlea sahit’yak dorzo yeupak khub kallav lagtolo.” Hanvem fuddlem chintun mhonnlem.

“Polle, tum tor atanch amche Konknni bhaxentlea sahit’yacher literary criticism korunk laglo zalear ek bhirant asa – jim konn umedin borovpak fuddem sortat tim bhiyeun borovpachem bond kortelim.” Tea borovpean matxea gombhir mukhamollan sanglem.

“Hantum bhiyeupachem kitem asa? Porikxa dilear bhurgim fail zatelim mhunn chintun xallentleo porikxa konn fattim ghena nhoi? Voilean, porikxa asat mhonnlear bhurgim bhouch fikirin ani chotrayen xiktat nhoi? Ani tanchea tea proyotnancho tankam zo foll mellunk zai to mellta nhoi?” Hanvem taka mhozo vichar pottoupacho proyotn kelo.

“Punn bhurgem porikxe khatir xikta tem aplo fuddar monant dovrun. Tum sahit’yachi molavnni korpak zai mhonnta tednam, borovpeank aplea sahit’yantlean fuddar korpacho asona hem monant dovrunk zai.”

“ Mhunnon amche bhaxentlean ami literary criticism korpacho vell azun-ui yeunk na mhunn justification divop sarkem asa?” Hanv ghunvon-firon tacheach vicharacher ailom.

“Tum yeujita ti gozal chalik lagli zalear tacho porinnam’ tuka atam nhoi, uprant kolltolo. Dekun, te gozalecho vichar sod’deak tori monachea eka konnxak dovorta titlo boro.” Tannem mhaka suchoilem…

… ani tea vixoyacher hanv tache kodde fuddem chodd ulounk vochunk na. Punn monant mat vicharanchea pustokanchim panam ugtim zait aslim.

Aiz amche Konknni bhaxentlean zaitech zann, zaitinch pustokam uzvadda haddtat. Punn tim sogllinch pustokam vixoyache nodrentlean asunk zai titlea kholayechim ani titlea dorjeachim asonant. Thoddeamni tori ‘ailem toxem gailem’ kelelea porim boroun pustokam uzvaddailim ani tim Konknnint fokot bhor ghalpa purtinch urlim. Fuddarak tor hich chal ani poristhiti chalu urli zalear, amkam borea sahit’yachi ruch, gost ani dorzo koso melltolo? Khorem mhonnlear, ti ruch, gost mellpa khatir, khuim tori survat zavpachi goroz asa. Ani hachi survat, Konknni sahit’yachea literary criticism-antlean zavpachi goroz asa.

Eka kallar, bhou thodde lok sahit’ya kelloitale ani tem kellounk panvl fuddem ghalche poilim bhouch chint’tale-yeujitale. Vichar kortale. Veg-vegllea tontr-montran sahit’yache veg-veglle prokar kelloitale. Punn aiz konn-ui, utt’tta bosta pustok uzvaddaun mekllo zata. Apnnem uzvaddailelea pustokak sahit’yachem koslem ani kitlem mol asa vo astelem, Konknni pustokamni bhor ghalche poros sahit’yant tem kitlem bhor ghaltelem oxea vicharancher lokx dinastana khubxe borovpi aplem pustok uzvaddaun meklle zatat. Oxe torechea pustokancher mud’domuch sahit’yachi som’ikxa (literary criticism) zaupachi goroz asa. Ani toxi zali zalear, dubav viret amche bhaxentlea (novea) borovpeank to-to sahit’yacho prokar kellounk ani hatallunk il’lem vegim ginean yetelem. Aplem sahit’ya nirmann korche khatir chotrayen panvlam fuddem ghaltelim.

Vachpeank apnnem kitem-i kaloun-lepddaun dil’le poros, tem borem xizoun kagdacher vaddpa khatir tanchea monanchi toyari asteli. Khorem, borem ani dorjedar sahit’ya kitem tem tori tankam kollun yetelem. Te nodrentlean tim panvlam ubarunk lagtelim, vavrunk lagtelim. Tantuntlean sahit’yachi, bhaxechi udorgot zaunk lagteli. Bhaxecho ani sahit’yacho dorzo-i vaddunk pavtolo.

Exclusive to www.goa-world.com
(c) All rights reserved.

26/02/2010

' Mhaka Borovpi Zaunk Zai !'

2010-02-15T03:57:00.000-08:00

SON'VARACHIM SUNGTTAM:

'Mhaka Borovpi Zaunk Zai!'
- Jose Salvador Fernandes

“Mhaka Konknnintlo borovpi zaunk zai. Kitem korpachem?” Mhojea ixttachea putan hanv tanchea ghora gel’le kodde mhaka vicharlem.

Hanvem mhonnlem, zata titlem vachop kor. To mhonnpak laglo, “vachunk anik khuim vell asa?”

“Jevpak tori asa mure?” Hanvem hansot chimtte kaddpacho proyotn kelo.

“Jevnnak vell na zalear-ui korcho poddta nhoi? Na zalear pott ravta? Bhuken jiv vetolo?”

“Pottak bhuk lagta, monak tujea bhuk lagona dista!” Hanvem taka chintunk lavpacho proyotn kelo.

“Punn Konknnintlean uzvadda yeupi khubxim borovpam, monachi bhuk laglea ani ti bhuk vachpantlean bagoun, uprant tannim tim borovpam keleant oxim disonant,” oxem sangun tannem mhaka thoddea borovpancheo dekhi dileo. Tantum kovita ani kothancho-i aspav aslo. Ani te vixim hanv taka fuddem kitem tori sangunk sodpacho proyotn kortanach tacho fon vazlo, ani mhaka tannem, “bye, uprant ulounchem” oxem mhonnit dhanvlo.

Monant mhonnlem, gelo to boro zalo, punn vetana chimtto kaddun gelo.

Aiz ami, Konknnintlean khubxe zann borovpam kortana polletanv, punn tantuntlea kaim zannanchea borovpamni, vachpeanchea monak chintunk lavpi vichar asonant. Astele koxe? Tancheach monant te poile asonant. Jea vixoyacher te boroitat, to vixoy soddun tantum her soglem, gorje bhailem asta. Itlench nhoi, tor thodde borovpi eka vixoyacher borovnk bostat ani xevttim vegllench kitem borovn meklle zatat. Thoddeanchim borovpam ordim xizlelim astat, thoddeanchim xizonk naslelim astat, ani thoddeanchim nanvak boroilelim astat. Borovpa fattlo aplo hetu kitem to poilo tanche tankanch khobor asona.

Amchea, Konknnintlea borovpamni choddxe pavtti creativity asona. Dusrea utramni, tea-tea borovpeachi borovpachi khas xoili (style) mhunn asona. Tantum bhas fuloupi, soboupi ani vachpeancher probhav korpi bhaxeche olonkar asonant. Bhas girest korpi bhaxeche gunn asonant. Vachpeank aplea borovpank khillaupi tank asona. Mhonnche, unnem-punnem soglleanchim borovpam ekech xoilichim-xim astat. Taka lagun hea borovpank veglleponn yena. Tim vachpak umed yena.

Borea ani khorea borovpeak khuim aplim soroll ani nitt chintnam ani vichar lokam meren pavoitolo zalear, taka bhas bori yeunk zai oxem mhonn zaite zann sabar pavtti sangtana aikunk yeta. Veakoronn, bhaxentli utravoll oxea sabar bhaxik angancho tannem vichar korpacho asta. Amchea khubxea borovpamni hem bhou unnea promannan polleunk mellta. Itlench nhoi, tor amchim borovpam dusrean konnem-i sudraun uzvadda haddlim zalear, tim ami porot vachun polleupacho ani bhaxeche nodrentlean je tantum bodol keleat te kiteak keleat tacho konnuch porot vichar korpacho tokos ghena. Zalear, amchea eka borea borovpeachi koxi opekxa korum yeta?

Boro ani khoro borovpi kompiutor chalu korun vo ‘pen-paper’ gheun “atam kitem boroum-ia?” oxem kednach mhonnchona. Itlim vorsam amche bhaxentle je borovpi tizle ani ghoddle tanchean legit tokos ghenastana ani sod-vavr korinastana borovp korunk zaina, ani toxe te korche-i nant.

Boro borovpi zavop hi ek kola asa oxem zorui sabar zann mhonntat, torui koxem borovp hem vijnean (science) asta. Boro borovpi zatolo zalear tuje kodde kitem tori sangpa sarkem asunk zai, ani tem sangche khatir tuje kodde bhaxechi kola asunk zai. Ani tantuntleanuch borovpeachi creativity ani khorai disun yeta.

Sanathan Sanstha – 'hinvsecho dhorm’

2009-10-31T02:09:00.000-07:00

SON'VARACHIM SUNGTTAM:

Sanathan Sanstha – hinvsecho dhorm’

- Jose Salvador Fernandes

Otubrache 16ver, Divallechea adlea disa Moddganv xarant bomb futtlo (vo foddlo?) hi gozal aiz pondra dis zaun gele torui borich jiti-jivi asa. Gõyant tor hea vixoyan her vixoyancher dhampnnem ghalam. Sorkari, osorkari, bhouxik vo khasgi panvddear aiz Sanathan Sonvsthecheoch gozali aikunk yetat.

Sanathan Sanstha hi Hindu Janjagruti Samiti (HJS) sthaplolea Dr. Jayant Balaji Athvale hachea fuddariponna khal cholta. Sanathan Sonvstha mhonnlear Hindu ‘fanatic’-anchi (dhorm’ pixeanchi) sonvstha oxem sangtat. Toxem polleunk gelear, sogllea dhormamni ‘fanatic’ vo dhorm’-pixe astat. Dhormam khatir zhuzta-zhuzta te aploch dhorm’ sompoun bostat. Khorem mhonnlear, hankam dhormachi khori vollokh asona mhonnlear lottkem zaunchem na. ‘Little knowledge is dangerous’ mhonntat te toren he dhorm’-pixe dhormachi il’lixi apnnak ji vollokh asa ti gheun apunn dhormache rakhonndar zalolea porim vavurtat. Punn khuinchea-i dhormacho bomb foddun rakhonn ani prochar mhunn korum yeta? Hi kolponach poili pixeponnachi mhonnchi poddta.

Aiz ami amchea dhormachea itlea mogan poddleanv, ki amkam mon’xam poros dhormuch mhotvacho zala. Ami masachea mon’xak haddam, ani marfinchea devank masam khavoitanv. Amchea dhormachea mogan ami mon’xank bomb ghalun martanv ani devak chear von’ttim modem bond korun surokxit ritin dovrunk khottpott’tanv. Aiz amkam mon’xancho mog kor mhunn sangpi dhorm’ zai, punn to mog korunk amkam mon’xam nakat. Amkam disonaslolo dev zai, dista tim mon’xam nakat. Dhormachea ami mogant poddtanv tednam ami dhorm’ amche khatir nhoi, punn ami dhorma khatir aslolea porim vagtanv. Ani hi gozal amkam Sanathan Sansthechea khala dilolea gozalim udexim thavi zata. Sanathan Sansthechechi ek kherit karyavoll asa. ‘Spiritual Experiences of Seekers’ nanvachi. He karyavollichi gozal tanchea ‘Science of Spirituality’ pustokachea ‘Tisrea Khonddant H - ‘Self Defence Training’ hantum asa.

He proxikxonnache karyavollint devachem raj sodpeank ‘air-gun’ gheun proxikxonn ditat. ‘Firing’ mathalleachea 7vea avesvora khal Sanathan Sansthechea vangddeank sabar torenim ‘firing’ korunk xikoitat. Avesvorachea 7.a bhagant devachem raj sodpeak ubem ravon (kada pavitra) bonduk cholounk xikoitat. 7b. hantum taka bosun (baitha pavitra) bonduk cholounk xikoitat. Punn hem bonduk cholounk legit tannim sabar panvdde pallche poddtat.
a. Xikoilolea pormannem bonduk bhorunk zai.
b. B. Bonduk bhortoch far marunk toyar zaunk zai(Fire ke liye sajja
ek). Ek pavtt far pettounk hukum’ ditoch uzvea payamachi dimbi zomnik tenkounk zai.Oxea vellar davi dimbi bagounk zai ani uzve dimbie mukhar dovrunk zai.

Sanathan Sansthechea ‘Science of Spirituality’ khala ‘Spiritual Practice of Protecting Seekers and Destroying Evildoers’ hea avesvora khal atmik chali korche khatir Gurunchem mhotv sanglam. Zo he Sansthecho vangddi vaitt korpeank noxtt korpachi kosli-i kornni korta taka to Guru bhogxita. Itlench nhoi, tor devachem nanv gheun konn-ui tanchea vangddean vaitt korpeank noxtt kele zalear ti kornni (kriya) kornni mhunn tharona. Oxe gozali khatir Karmacho (Kornnecho) kaido lagona. Santamni vo Gurumni tor vaitt korpeank noxtt korunk budh dilea zalear to jerul korcho oxi-i tanchi xikounn asa. Ani oxe torecheo kornneo adarleo zalear teo adarteleachea nanvar uronant.

Dhormachea nanvan osleo khotteo, hinvsecheo, paddeo, mon’xam modem duspott korpi, aplea dhormak lagun dusrea dhormacho dves korpi, dusro dhorm’ sompoupacheo gozali fuddem yetat tednam, sonvsarant dhormuch naslo zalear kai borem zatolem aslem oxem khinnbhor monak dista.

(c)Jose Salvador Fernandes
www.goa-world.com
31/10/2009

Gõyant fokot miroupa purto ekvott?

2009-10-17T00:35:00.001-07:00

SON’VARACHIM SUNGTTAM:
Gõyant fokot miroupa purto ekvott?

-Jose Salvador Fernandes

Ami Gõykar sodanch mhonnot aileanv, ani azun-ui mhonntanv – “Gõyant kristanv, hindu ani musolmanancho ekvott sodanch boro asa. Dusrea rajyant zatat toxim dhormanchea nanvan hangasor zhogddim-zhuzam zainant. Vochot thoimsor ami dhormachea nanvan bhed-bhav korinanv.

Hangasor tin-ui dhormancho lok xantin ani ekvottan jiyeta.” Oxea sabar godd kolponamni, tin-ui dhormam modem ekvott asa mhunn dakounk zaitem kitem ami sangot sutt’tanv. Punn barik niyall kelear, poristhiti ami sangtanv titli god na, borich koddu asleli polletanv.

Gõyant toso hindu ani kristanvancho ekvott polleunk gelear, to ekvott vhoddlo-so disona. Hindu zo bhoujon somaz asa to ek vell kristanvam kodde borea monan vagot ani uloit, punn tancho bamonn vorg asa tacho ekvott tancheach bamonn vorga kodde bhou thoddea promannan asta, tanchea dhormantlea her lokam kodde nhoi. Zo apleach dhormant zati mandta, to dusrea dhormantlea loka kodde koso ekvott korunk xoktolo?
Hachem khoreponn amkam spoxtt ani kherit ritin Konknnichea devnagori mollar disun yeta.

Gõycher somzum-ia kednaim, kosli-I havoll vo oddchonn uprasta tednam ek vell hindu ani kristanv somajik mollar tori eka hetun tache add zhuztat, punn hea oniti addchea zhuzant Gõycho musolman aplem buz diunk fuddem sorona. Te aplea dhorma ani somaza purtech jiyetat.

Sodeak Gõyant hindunk ani musolmanank poddona. Khuinchea vellar tanche modem lottafotti zaun te kednam ekamekachea jivar uttot tem sangunk zaina. Hea don-ui dhormanchea lokanchea ekvotta vixim aiz vhoddlemxem boreponn na. Desantlea her hindu mon’xam porim, Gõyantlo-i hindu monis musolmana pasun don panvlam poisuch ravta.
Dhormachea vixoyavelean anik vichar yeta. Gõyant konn-ui kristi monis hindunchea devllant dislo zalear, to thoim koslea hetun gel’lo to nokllo astana tacho sangati kristi monis taka vegllech nodren polleta.

Igorjent padri legit tea nimitan “ami kudd’ddea devank bhozunk hanga-thoim vetanv” oxea utramni sermanv korta. Oxea vellar mhaka proxn poddta – Kristi lok hindunchea devllamni veta tednam hindunche dev amkam ‘kudd’dde dev’ zatat. Oxem zalear, hindu lok adlea Gõyam igorjent veta, Mhapxem Milagr Saibinnchea festak yeta, ani sabar kristi zageancher veta tednam, tankam ami kiteak mandun ghetanv?

Tankam kainch kiteak mhonninanv? Tednam to lok amkam kudd’ddea devache bhokt kiteak disonant? Ani amkam tor dusrea dhormanche dev ‘kudd’dde dev’ distat zalear, tankam amche dev ‘kudd’dde dev’ disle mhunn tantum kitem vankddem asa?
Khub vorsam zalim. Gõyant ek chal suru zalea. Kristi igorz Ontor’
Dhormanchi Magnneam Rit (Inter Religious Prayer Service) , Ontor’

Dhormancho Son’vad (Inter Religious Dialogue) ghoddun haddta. Kristi igorjek dusrea dhormantle dev ‘kudd’dde’ distat zalear mhojea motan oslea ritink kosloch orth ani foll na. Tem fokot nanvam purtem.

Dusrem, heo riti oxe toren ghoddun haddtat hachoch orth Gõyant dhormam modem sarko ekvott na osoch zalo mum? Ani ekvott aslo zalear, osleo riti kiteak ghoddun haddpachi goroz uprastali?

Tisri gozal. Hea ritimni mukhel ulovpi mhunn ek kristanv, ek hindu ani ek musolman monis asta. Heo riti igorz ghoddun haddta mhonntoch, hea zomatink choddan chodd Kristi lok asta. Ontor’ Dhormanchi Magnneam Rit vo Ontor’ Dhormancho Son’vad mhonntoch, hea zomatink hindu ani musolman lokacho asunk zai titlea ankddea poros-ui unno legit lok asona. Dekun kednam-kednam, monant proxn yeta – heo riti fokot Kristi loka khatir kai? Hoi zalear, toslea ritink, Ontor’ Dhormanchi Magnneam Rit vo Ontor’ Dhormancho Son’vad mhonnche bodlek anik kitem-i mhonnop odik borem aslem nhoi? Ani toxem mhonnonk naka zalear, hea ritink tin-ui dhormantlea choddan-chodd lokank bhagak gheunk zababdari asloleamni panvlam ubarunk naka aslim?
Aiz Gõyant kristanv, hindu ani musolmanam modem ekvott asa to fokot Moddganvchea ‘La Marina’ hotela mukhar aslolea Komunidadiche bildingechea eka khambeak tin-ui dhormantlea devanchim eke kodden chitram laileant tache purtoch asa! Ponnjechea postt-ofisant hindu ani kristi dhormachim eke kodden chitram dovorleant tache poltoddi to vochona. Ganvantlean yeradari korpi bosimni tin-ui dhormanchea devachim chitram laileant tantuntuch to dhormacho ekvott sompta.

Khoreponnan sodun-ui polleunk mellona.

(c)Jose Salvador Fernandes
www.goa-world.com
17/10/2009

Konknniche Poke Huske-Khonti!

2009-10-09T22:31:00.000-07:00

SON’VARACHIM SUNGTTAM:
Konknniche Poke Huske-Khonti!

Poir ek mhoineallem vachtalom. Konknnintle Romi lipintlem. Tea mhoinealleantlem ek boroup vachlem ani tantuntleanuch hea boroupacho zolm’ zalo.
Aiz kall bodol’la. Fattlo kall atam uronk na, ani atancho kall fuddem urcho na. Zalear, hea kalla vangdda amchem chintop, uloup ani boroup bodlonk naka aslem ? Kalla pormannem, khuinche-i gozali khatir amchem vavrop bodlonk naka aslem? Hoi, zai aslem. Zalear, Konknniche Romi lipichea nanvan thodde aplem adlench pemprem kiteak vazoitat tem somzonam.

Amchea modlea thoddeank, je Konknniche Romi lipintlean boroupam kortat tankam ek sonvoim asa – utt’tta-bosta Konknniche Romi lipi nanvan tonddak yeta tem uloup, chintinastana boroup. Romi lipintlean masikam-satollim-potram khoponant, vachpi nant, jahirati mellonant, te lipintlean Konknni khatir konn vavrina, adi… oxea utramni te aplem niraxavadachem chintop boroupant bodoltat. Tanchem tem chintop-uloup ani boroup oxe torechem asta, ki tem vachtana Konknnichi Romi lipi aizuch sanje morteli koxi dista. Oxe torechem tanchem chintop, uloup ani boroup te kitle pasun kalla fattlean asat tem thavem korta.

Aiz ami Konknnichea nanvan - uprant ti khuinche-i lipintli zaum - anik roddpache dis uronk nant. Hacho orth, Konknnintlean sogllem vevosthit, cholunk zai toxem cholta oso nhoich nhoi. Konknnintlean Konknnichi anik khub progoti, udorgot zaupachi urlea. Te progoti khatir pengott bandun vavurpache he dis asat. Ghorantle vo ofisantle kodelir bosun Konknni khatir huske-khonti kaddpache ani tichea nanvan roddpache dis kednam poke zale! Konknnichea mollar hacher-tacher fator marpache, haka-taka dubavan bottam dakoupache, devacho rag mon’xancher kaddpache dis borinch vorsam fattim somple tachi khobor hea mollar vavurtoleank, ani tantuntlea tantum zobabdari asloleank asunk zai.

Apnna kodde podvi, hatiyar vo madheom asa mhunn tannim tacho koso-i vapor kelo mhunn sobona. Konknnichea mollar tor nhoich nhoi.
Konknnichea mollar aiz Konknnichea nanvan konn roddta, onzta taka konnuch bhik ghalina ani ungon-ui pollena. Kiteak, tosle monis jivitbhor Konknnichea nanvan roddpachi, Konknnichea nanvan tich-tich CD-kessett zoroupachi bhumika kortat ti konnak bori disona ani avddona.

To. Tannem Konknniche Romi lipintlean aiz meren 4 pustokam uzvaddaileant. Khuimsor-ui bhettlole pavtti to mhaka sangta – “ are baba, mhojim pustokanch khoponant, konnuch ghenant.” Poir to mhaka anik ek pavtti meulo, mhonnpak laglo – “fuddlea mhoineant mhojem anik ek pustok uzvadda yeta…. amontronn dhaddtam tuka uprant. Punn tuka ek sangum? Pustokam khoponant re!”

“Khoponant zalear, anik ek pustok kiteak kaddunk fuddem sorla?
Ekdancho pustokam uzvaddaupachim bond kor, ani susegad rav mure. Oso ailolea disak roddta ani onzta kiteak? Porot-porot tench-tench aikunk legit vaz yeta, ani loz dista tum uloita tea gozalinchi!” Hanv sottasott uloilom toso to ogi zalo. Ani hanvem taka fuddem kitem sangche adinch to thoimsorlo koddsorlo.

Oxea monache ani sobhavache amchea Konknni mollar zaite monis asat.
Konknni khatir mhunn zaitem korunk fuddem sortat, kortat ani uprant ‘am-um, am-um ‘ korit onztat, ani na-nareachem uloup korun dakoitat.
Osleancho mog Konknni sovem kitlo khoro vo khotto tem disun yeta.

Aiz kall bodol’la. Konknni khatir na-nare ghalpeank aiz konnuch lokx diunk raji na. Konnuch tanchea niraxavadak bhik-ui ghalunk raji na.
Konknnichea nanvan poke huske-khonti kaddche ani manngeachim dukham gollounche bodlek, Konknni khatir kainch korinastana ravop khub borem.
Xevttim, Konknni add ulounk tondd nhoi mhunn vixoy aschona.

Konknnichea mollar aiz kosli poristhiti asa ti soglleank khobor asa.
Konknni mollar kitem kelear kitem zatelem ti-ui soglleank khobor asa.
Dekunuch, thodde oxe poristhiticher vichar korun borea monan panvl fuddem ghalche bodlek, Konknni urta kai morta oxe torechem chitr utranchea rupan toyar korun vachpeam mukhar vaddtat.Punn vachpeancher tacho kosloch porinnam’ zauncho na.

Kiteak, aiz Konknni mollar lokak oxea lokanche ‘zor pejek roddta’ bhumikechi bes-bori khobor asa.

(c) Jose Salvador Fernandes
www.goa-world.com

10/09/2009

____________________________

Watch out for AITARACHEO KATKUTLEO, every Sunday,
come sun or rain!

Releasing tomorrow:
Walkover? Tenxonn Kiteak?

http://aitaracheokaskuleo.blogspot.com/